ملاحظه كبر عقله ...(يقول طوله 185)... اللي ماله خلق يقرى خرابيطي ويبي يخش في القصه سيده يروح للكلام اللي تحت الخط !!

اصبحنا واصبح الملك لله ... صحيح انه الظهر بس عاد ميخالف ... كالعاده ومن غير ما أكتب الموضوع ... اقول لكم من الحين افصلو التلفون وصرفو عيالكم ورجالكم وحريمكم (هههههههه من بقى) ... واربطو الاحزمه عشان ما نتغرم بسبتكم!!...الموضوع اكيد بيصير طول ابليس ومنب حاطته حلقات يعني بكتب لين تقضي القصه ان شاء الله توصل صفحتين ما علي منكم !!

-------> ياخي شديده ذي مع انها معصقله !

طبعا اكتب لكم موضوعي هذا من فوق كمبيوتري الأسود ... ما غيره ذاك اللي مغير ينتّع تقل ماطور استراحه ... والحمد لله مهنا عطال لما الحين ... والله يستر ما يتغير السيرفر كالعاده كل ما كتبت موضوع !

لاحضو كل ذا وانا ما جبت طاري القصه (كخخخخخخخخخخخخ... انواع التعذيب)

___________________________

مكان القصة ... الدوادمي
تاريخ القصه ... عام 1401ه ...وقولو عجوز ... بواحد من هالعصاقيل اللي جنبي الحين اها!!

-------> عندها عصاقيل اسبيرات غير عصاقيلها

قصتنا اليوم عن أربع بنات الي تجمّعن تجمع الشر كله ... وبعطيكم نبذه بسيطه عنهن قبل القصه (قسم بالله لامرمركم ههههههههه) ...

لولوه العبد الرحمن ... اكبرهن سننا واكثرهن شرا ... تبلغ من العمر حدعشرسنه ... اكبر خواته و أمه ماهنتن خيّيره مغير تلحيط بالزنوبا لانها صارت جذعه ومازالت تطاير بعجاج الوراعين ولا تعلمت من أمور المرجله ... لا وش جابها ذي حقة مقمط تجي بعدين ... اقصد من أمور القرامه والظفاره شي .اذا ناظرتها وش تشوف !!... راس مشقوقه نصين ... افهمكم وشلون راسها مشقوق نصين ...ام لولوه عصبيه وحاره وتنقهر الى منه كدت شعر بنته وجا بعد عشر دقايق والاك ما تشوف راس اللولو من كثر العكاريش اللي طايره ... لذلك قامت امه تجيب الدهون الابيض ذاك ابو غطا اسود وتلط والدين راس اللولو همن تقسم الشعر نصين من عند القصه ( الغّره في قاموس الامريكان) وتجدله جديلتين بقووووووووووووه لين تاقف العمايل من قوي الكد !!


منيره الحمد ... اصغر من اللولو وذراعها الايمن وعصاها اللي ما تعصاها ... عمرها تسع سنوات والرائي يحسبها ام سبع من شيفتها وعصاقيلها ... اذا شفتها تقل ولد دايم لابسه بنطرون وعندها عاهه او مدري سر ربي خالقها فيه ... ما تاقف الا حاطتن يده على خصره ومرخيتن رجل ومرتكزتن على رجل كنها تنكّف (برضه للأمريكان اللي معنا تتنكف يعني تنتقد)!! ... مهيب قليلة شر بس انها صحيّحه ودايم تمشيها اللولو في المهمات الصعبه لانها الرجل المناسب في المكان المناسب وهنا ما غلطت اقول رجل لانها عربجيه نمره واستمار ومغير لازقتن بسليمان الحرش وما سوا سوت !!ميزتها الفارقه ... قنزوع طايش على جنب من الشطانه وقل الركاده


نوره المحمد ... دلوعة الشاشه ... خكا ودابتن سليمه ودايم يوهقونها هالثنتين اللي فوق في خمايلهم عشان امها مهيب تطقها أبد ... تبلغ من العمر سبع سنين...اذا شفتها دايم كاشخه ولابسه أبه حتى في العطله (صدز مدري ليش!!)... ودايم تطلع الاولى ومحميتن تسبد اللولو بلاها بنت على خمس عيال ومدللـه ... هي الوحيده من الاربع اللي عندها لعابيب وكل ما لمسن هالمهسترات اللي فوق شي منهن على طووووووووول تعلم المديره .... امه.. ايه نسيت اقول لكم ان امه مديره وابوها مقرش من حقين الطفره وراعين سفريات وخير ... شعرها سايح ومسبسب ومقصوص قصه فرنسيه (الفرنسي القديم مهوب الجديد) يعني اذا شفت راسها تقل لابستن غضارتن سوداء ... ماشاء الله لا تنظلونه عاد!! ... وطبعا هذي الميزه في نوره هي اللي صدز محميتن تسبد اللولو هي وعكاريشها !


هيلة الصالح ... يا دلبي والله ... اصغر القوم بس تبشر بمستقبل واعد في الشيطنه ... مغير طايرتن في عجت هالسكنيات اللولو ومنيّر ... واذكى من ابليس دايم تكشفهن في اللحظات الاخيره ويخشرونها في مغامراتهم عشان ما تحرّش عليهم !!... تبلغ من العمر خمس سنين ... يجتمعن باقي الاعضاء في بيت ابوها حيث انه خالهن وخواته يجن يزورن كلن سنه عنده ... لذلك عندها اسرار الذرّه يعني مهناشن ما تعرفه في البيت سوسة نخل مغير تنخرب في البيت طول السنه عشان اذا جن بنات عماته والاها تقدر تقدم يد العون وتطرح اقتراحات جديده للخراب والفساد في الأرض !... اذا شفته ولاك وش تشوف يالله الكفلان الحسن ... شعنونه كبر النمله بس عص دايم مرتزه تسنها تطيول ... عيونها تبالص من كثر الشطانه ومغير متعنقدتن في رقبة ابوها من كثر ما تحبه !!


كالعاده كل سنه امهات هالبني يراكضن قبل ما يمشن للدوادمي ويشرن هدايا وفرايح لعيال خواتهن واخوهن الله يخليه لهن اللي متحملهن ومتحمل ذررررررهن !!... ومغير يحلبن رجالهن هات بجيب طقم لمرت اخوي هات بجيب فساتين لبنات خواتي الخ الخ الخ ... وكله بمخابيهن وترسي على مقطعين لمرت الاخو وحلاو بقر و خرفاش للبزراين يعطونهم اياه أول يوم بعد همن يوزونه عنهم باقي العطله !!

-------> قاهرهاالموضوع بزياده!

وتصل القوافل وجحافل الجيوش الى بيت الخال الله يعينه وما تشوفهن الا كنهن مصريات متلاقياتن بباب الحرم كل وحدتن قاعدتن بعباته ما امداه الا تفتش بس وجنبه انواع الكراتين المحزمه بالحبال والشنط والمبزره اللي متطايرتن عيونهم ... والامهات مغير تخمخم وتحبيب وصياح ونخارير و"الله يجمع شملي" و"الله يرحم اميمتي و أبيي" والزي منو عاد من الدعاوي اللي يقولونها الى شافن بعض كل سنه !

ومن بين الجموع الغفيره ... هناك عينان تبلصان مع ابتسامة مكر ودهااااااء .... نعم !! ام العكاريش (اللولو)وام قنزوع (منيرة)يسلمون بطريقتهم الخاصه المباحر بالعيون !!

ويمر أول يوم والبزارين غرقانين في الحلاو والامهات لاهين كل وحده معلقتن رجله من عراقيبه ومخلين الدرعا ترعا ... ومن باتسر تستيقظ اللولو على الفاجعه !!

هنا نقدر نفصل الاحداث للي يبي يروح للحمام والاش عشان ما تدعون علي


__________________

استيقظت اللولو على الفاجعه الأليمه ... كل الكراتين مظفوفه ... ومهناشن تفطر عليه لا حلاو بقر لا حلاوابو نظاره ولا حتى خرفاش ... ابد مهناااااااااااش .... واسقط في يدها!! (ياحبي لهالكلمه من خبركم يوم عرسي يوم قمت ما لقيت احد واسقط في يدي بعد انا)

وتقعد تلوب تلوب بالمجلس اللي هم نيمينن به هي وخلاتها وذررررررهم ... ولكن لا شئ ! (لاحظو بدت تطلع المواهب ههههههه قال ايش قال لا شئ ... مازا يا هازا) ...

طيب وش السواة ؟؟ ما فيه الا أم قنزوع ... وتجي وتموطه من قنزوعه لين ذيك طامره ومرتكزتن على رجل ومرخيتن رجل ويده على خصره تسذا اتوماتيك من غرقة النوم الى هالحركه... وتحط اللولو خشته على اذن منير وهات يا خشخشخشخششخشخشخش ..... ومنير مغير تهز بالقنزوع وذيك خشخشخشخشخشخشخشخشخشخشخش .... وتقعد تتلفت منير وصدز لقت الكراتين كلهن مختفيه ... ما عدا كرتون واحد موجود بجنب قش خالتهم ام نوره الفرنسيه ومحطوطن عليه كنبل للتمويه .

هممممممممممممممممم ... المشكله ان خالتهم ذي ماخذتن ابعد ربعه بالمجلس يعني بينهم وبينها لحمان اوادم لين يوصولون للكرتون ... وش السواة .... والله وتقوم لكم ام قنزوع وتسايف الجدار ... يعني لصقت ظهرها بالجدار وعلى طراطيف اصابعها وهماها معصقله محدن حاس فيها هي والجدار واحد مهنا فرق !! ...

والله و تنق تنق تنق تنق (موسيقى تصويريه من توم وجيري) ... لين ام قنزوع عند الكرتون وذيك تراقب الجو طول الوقت بس يوم وصلت خويتها للكرتون ضاعت علومها ونست المراقبه ... أثر ام عيون تبلص تطل عليهم من فتحة المفتاح اللي بالباب ... وفي تلك اللحظه فتحت الباب وارتاعن الثنتين ام عكاريش السكنيه همدت همدتن واحده والاها في فراشها تسني ما سويت شي وذيك المهبوله قامت تراكض وهي واقفه ومع الربشه وطت رجل الفرنسيه ... وما تسمع الا واااااااااااااااااااااااااااااااااااااااااااااااااع ... وعشان تسكتها ام قنزوع خذت خرفاش وحشت خشتها ... وقالت كوه كوه من اليوم نقومتس نبيتس تروحين معنا بنفطر حلاو ... !!

وتسكت الخبله الفرنسيه على طول ... المهم حشت ام قنزوع مخابيها بما خف وزنه وطاب طعمه ... وسيده على برا ... بس الحين المشكله وشي ... المشكله ان مرت خالهم واعيه وبتلقاهم لذلك لازم بمكان ياكلون الحلاو فيه بدون ما ينكشفون ... وتقوم اللولو وتاخذ اذن الدعنبه وخشخشخشخشخشخشخشخشخشخش .... وتقوم ذيك وعنعن بيب بيب ... وما تشوف الا الغبار .... وتركض بهم على غرفتن في الحوش لها دقاره مزلاج من برا وريحها خايسسسسسسس ... بس مهوب مهم هما فيه حلاو ... انس الخياس !!

والله ويدخلن والغرفه وهي ظلما شوي ما شق النور زين توهم الفجر ... ويلقن تبن (فال العدو) مصوب فوق بعض ... والله ويقعدن وهرشن والفرنسيه اوف اوف يا ناس والله ماما بتقول لي ريحتك مو حلوه ... وذوليك كعكعه وهرش ما جبن خبر الا يوم سمعو





....






أمووووووووووووووووووووووع



اثر الخبله الدعنبه مدخلتهم في حوش البقر ... ويتقاحصن كلهن تقل جرابيع وما بقى بالحوش الا الذروق الفرنسيه وجنبها كل الادله ..... وما تسمع الا صياحها وذوليك كل وحده بفراشها مغمضه باقوى ما عندها والارياح تعايط ولا جابو خبر الصجه اللي صارت يقالهن نيمات !


__________________


خلصت القصه ... يمكن ما لها هدف بس انها ذكريات جميله يمكن ما يحصل لبزاريننا نصها



وبكذا اكون قد نقلت لكم المواضيع المميزه للكا تبه عصقوله.....وهي تستاهل..مع امنيا تي لها بمزيد من التقدم في مجال الكتابه الساخره..تحياتي لكم وانتضرو قريبا كتا با تي الشخصيه عن الشباب والنساء والسفر والشعر والخواطر اليوميه.

هههههههههههه والله مهبل صدق

مشكور اخوي والله تعبناك الله يعينك علينا

نستنا اللي بعدوووووووو