السلام عليكم

إخواني بهالصيف يكثر لقاء الشباب في المقاهي وغيرها ...
ولكم أن تتخيلوا هذا الحوار بين صديقين التقيا في قهوة ما .....؟؟؟

إخواني ... قبل ما تقرون الموضوع ... لازم توسعون الصدر ... وتحطون رجل على رجل ... وجنبكم ... الشاهي ... لأنه طويل شوي ...

راح صاحبنا (الأول) ... علشانه متواعد مع ... رفيقه (الثاني) ... يشوفه في القهوه الفلانيه ... يبون يسولفون مع بعض ... وطبعا طلبوا براد شاهي (أبو أربعه) ... و(معسل ملكي) ... وبدأت السواليف المختلفة المواضيع طبعا ... يد على الريموت ... تقلب هالفضائيات ... ويد ماسكه لي الشيشه ... ومن موضوع لموضوع ... حتى وصل إخواننا ... إلي الحديث باللي يهمنا هنا ... عن الرياضه ... وكأن كل واحد منهم فوق راسه ريشة ... يتكلم وكأنه خبير زمانه ... وتسمى هذه النوعية ... من الحوارات ... بـــ ( حوار الطرشان ) ... وبعض الأحيان مثل هالمواضيع ... يجي منها ...


الأول : إلا على ذكر اللاعبين ... وش أخبار اللي انتهت عقودهم ... وبينتقلون … عساهم بيجددون لهم ؟؟؟

الثاني : يقولون ... الإدارة تبي تصيف برا … ما هي حول النادي … شف بالله عليك … يسافرون ويتركون النادي … هذي إدارة … تسافر وتتمشى … تبي تصيف ... ومهملة النادي … لا ويقولون بعد … إن اللاعب فلان ... يبي ينتقل … قايل له عضو الشرف ... انتقل ولا عليك من أحد ... وهو زي ما تعرف … صديقه ولازم يطيع شوره .

الأول : على طاري الصيفيه ...وش ناوي تسوي فيها .

الثاني : أبروح في رحله طويله … أبدأ بالقاهرة … أقعد فيها أسبوعين … وبعدين أسبوعين في كازا … وبأرجع للرياض يومين … وبعدين أبروح لشرق آسيا … يمدحون الطبيعه هناك … وإذا أمداني رحت أمريكا بعد … الصيف طويل … والحر ياخوي … ما ينصبر عليه … والرياض زي مانت عارف … ما تنبغي بالصيف .

الأول : ما شاء الله عليك … رحلة طويله … بتغطي العالم كله … منين طبت عليك الفلوس مره وحده .

الثاني : الله يخلي البنك … يعطون سلفه … اللي تبي … وبعدين يابن الحلال … خل نستانس شوي … ونتمشى … وش ورانا … الدوري ومتوقف … والإجازة طويله .

الأول : الظاهر انك بتروح القاهرة … علشان تشوف ردة فعل المصريين … بعد الكاس … وكازا بتسلم على … بصير … وتشاوره … كان وده يرجع … أما شرق آسيا … أكيد بتتفاهم مع فيلبان … ليش وقف الثنيان … ولا تنسى تمر على … كوريا واليابان … تشتري تذاكر وتحجز كراسي … لكأس العالم … من هالحين ... يقولون التذاكر ... تبي تخلص ... ويتطاقون عليها ...

الأول : إلا أقول ياخوي ... وش رايك بالجرايد هالايام

الثاني : هالحين الجرايد شاغلتنا هالصيف ... باللعيبة اللي بينتقلون ... أو انتهت عقودهم ... وهات يا كتابات ...
التمياط لهولندا ...
الدوخي للنصر ...
ماطر والشويع للهلال ...
شاص للهلال ...
العويران للأهلي ...
رئيس الاتحاد يستقيل ...
ادارة النصر جددت 4 سنوات ...

الهلال يرفع شكواه للاتحاد الآسيوي ...
الهلال ما اشتكى ...
الهلال تأخر في الشكوى ...

مالديني راح ... مالديني قال ... مالديني ماهوب جاي ...
مالديني يقول أبي 6 ملايين دولار ...
على فكرة ترى عمر مالديني ... فوق السبعين ... عسي ما ينسى العكاز حقه ...

الهلال يبي ينسق لاعبين ...
لا الهلال ما هوب منسق هاللاعب ... بينسق الثاني ...

فيصل أبو أثنين يقول المصيبيح ما عنده سالفه ...
المصيبيح ما رد عليه ... لكن الصحفي اللي في الرياض ... رد على صحفي الجزيره ...
الدوخي في القاهره ...
التمياط في باريس ...

فلان ...... سافر مع أهله في رحله ... للسياحه ...
.... طلع البارح للبر ... وغرزت سيارتهم ... ودفوها ...

فلان ..... ولدت قطوة جيرانهم ... وحطت عيالها ... في الكرتون اللي جنب الثلاجه ...

(الرياضيه) تنفرد بخبر الموسم مصطفايا يقول ... عطاني نصراوي 100 ألف ... علشان أكسر سامي ...

(الرياضي) تنفرد ... (الرياضيه تكذب) ... مصطفايا يقول اللي عطاني 100 هلالي ... علشان أعطي سامي بلنتي ... والصحفي (هلالي) كاذب ...

وبكره التصريح الجديد ... مصطفايا يقول ... هلالي عطاني فلوس علشان أقول نصراوي قال لي أكسر سامي ...

وبعده تصريح ثاني ... مصطفايا يقول ... نصراوي عطاني فلوس ... وقال لي ... قل ... اني قلت ... انك قلت ... وما قلت ... اللي يقولون ... انك قلته ... علشان الناس ... ما تتقول عليك ... وتقول ... انك قلت ... كلام ما قلته ... أنا قايل لك من أول ... ما تقول شيء ... الا تقوله لي أنا ... علشان الصحافة ... ماتتقول عليك ... بكلام ما قلته ... قلقل الله ضروسك ...

والله زمان ... مصطفايا صار ... بمانشيتات الصحف ... وشاغل الناس ... والله قام عزك يا مصطفى ... وصرت فتى الغلاف ... خوش صحافه ...


الرياض ... الجزيره (كتب: ....) ... مصطفى يقول ... ما نقلته احدى الصحف عار من الصحه ... أصلا انا ما أعرف أقول على طول ...

عكاظ تنفرد (واس) ... المدينه (زيورخ) ... اليوم ... الندوه ... البلاد ... الوطن ... وكالات الأنباء ... نيويورك تايمز ... نيوز ويك ...

قناة الجزيرة الفضائيه ... MBC ... CNN ... البيت الأبيض ... كوفي عنان ...

التحقيق مع مصطفى إدريس ... الملقب بـ ... مصطفايا (جزار الملاعب) ... ينتقل ... للأروقة الدوليه ...

لجنه حقوق الانسان ... مصطفى إدريس ... ضحيه مكيده مدبره ...

آخر خبر ... مرسي بن المعلم الزناتي ... اتهزم يارجاله ...

ما أقول إلا مالت عليك جرايد ... وعلى هالمواضيع ... اللي توضح الإفلاس والخواء اللي أنتم فيه ... والشرهة علينا ... اللي ندفع كل يوم ريالين ... في مثل هالمواضيع ... الله يخلف ...

الأول : تصدق لو تروح للجريده وتحط اعلان ثمن صفحة يكلفك أكثر من 5000 ريال ... وما حصلها إلا مصطفايا وربعه ... أخبار بالجرايد ... سوقهم قايم هالايام ... ما ودك نصرح علشان تطلع صورنا بالجرايد ... هو حنا ناقصين ...

الثاني : - يامعلم ... عبي حجر ... وخذ عندك واحد تصريح ... وصلحه ...

الأول : أخوي كل هالبربسه اللي تشوف ... فيه سؤال واحد يدور في راسي ... هو فيه شيء تغير

ويتابع الأول قائلا : يامعلم ... وين الراس ... وراك تأخرت ...

ويكمل الأول كلامه : الظاهر والله … هالاجازة ياخوي مطوله ... والله يعين أخبارها اللي ... ينطبق عليها المثل ... (ناظر وجه العنز واحلب لبن) … أقول ياخوي ... ما تبي خوي في رحلتك الميمونه ... على الأقل نريح روسنا شوي ... وش رايك .

ويتابع الأول قائلا : يامعلم ... وين الراس ... الله يرحم والديك ... خله دبـــل .

الثاني : لا تجيب طاري الدبل ياخوي ... ذكرتني بالاتحاد الآسيوي ... ؟؟؟؟؟

ويتتابع الحوار ....... وتتشعب الموضوعات ....... وللحديث بقيه ...... ؟؟؟؟؟

يمكن فيه جزء ثاني ..... الله أعلم ..... ؟؟؟؟؟


المشكلة إخواني إن الحوار اللي قريتوه … ويتكرر في كل مجلس رياضي … ولا يخص شخص أو نادي معين … وأنتظر تعليقاتكم على هذه النوعيه من الحوارات ...

وكل ... وكل ... وكل عام وأنتم بخير … ؟