#1  
قديم 16/06/2001, 11:32 AM
زعيــم فعــال
تاريخ التسجيل: 13/12/2000
المكان: الرياض
مشاركات: 239
عاشق الهلال (أبو فهد) ... ( الجزء الثاني) ...؟؟؟

إخواني الأعزاء السلام عليكم

أقدم لكم اليوم الجزء الثاني من ...قصة عشق أبو فهد للهلال ... التي أتمنى أن تحوز على رضاكم .

و(أبو فهد) شخصية مميزة ولطيفة وتحمل الكثير من المواصفات المتوفرة في الكثير منا

المهم إخواني الجزء الأول نزل بالمنتدى على هذا الرابط .

http://alzaeem.com/vb/showthread.php3?threadid=20292

عاشق الهلال (أبو فهد) ... ( الجزء الثاني) ...؟؟؟

(أبو فهد) رفيقنا ... من يوم طلع على هالدنيا .... وهو يسمع بالهلال .... أبوه هلالي ... بس ما عمره راح للملعب ... إلا مرتين ... على كاس الملك ... 81 و 84 ... أبوه عرف الهلال ... من صديقه ... شيخ الرياضيين ... أبو مساعد ... يقول أبوه ... إن أبو مساعد ... رجال ... حطه على يمناك ... وانه يعرفه زين ... من يوم انهم صغار ... وحب الهلال ... من حبه لأبو مساعد ...

ويقول أبوه عن أبو مساعد ... أبو مساعد رجال ... تلقاه وقت الشدايد ... الله يعطيه طولة العمر ويخليه ... (أبو فهد) يحب أبو مساعد ... ماهوب هو اللي أسس النادي ... هذا يكفيه .

على فكره ... (أبو فهد) ولد في يوم الثلاثاء ... 21/3/1377هـ .

تعرفون وش هالتاريخ ... من فيكم مايعرفه ... تاريخ تأسيس النادي ... اللي ما يعرفه ... ماهوب هلالي ... يعني (أبو فهد) والهلال ... توأم ... فيه هلالي محظوظ ... مثل (أبو فهد) ... فيه هلالي أكثر من (أبو فهد) ...

المهم يقول أبو فهد ... عن أبوه ... أنه هالحين يجلس وياهم ... عند التلفزيون ... إذا فيه مباريات ... يمكن علشان عياله ... وعيالهم ... كلهم هلاليين ... صار يتابع أخباره ... ويعرف بعض اللاعبين ... أصلا البيت كله هلالي ... اللهم لا حسد .

ويقول (أبو فهد) ... إخوانه وأخواته ... وعيالهم ... كلهم هلاليين ... وأعمامه ... وأخواله ... وعيالهم هلاليين ... ما عدا القلة القليلة منهم ... اللي ما يفهمون كوره .

عشق (أبو فهد) الهلال ... من يوم انه صغير ... من سواليف أخوه الكبير ... اللي يقول انه كان يحضر التمارين ... ولا تفوته أبد .

أخوه دايم يتكلم ... ويا ربعه ... عن اللاعبين القدامى ... مثل مبارك عبدالكريم ... وسلطان مناحي ... والدبلي ... والحارس العملاق ... عبدالله سوا الله يرحمه .... اللي يقولون انه ... رد كل بلنتيات الاتحاد ... (3) بلنتيات ... في نهائي كاس الملك 84 هـ ... وان الهلال فاز 3/1 ... بذيك المباراة ... بعد ما كان مهزوم ... 1 / صفر ... في الشوط الأول ...

مباراة الهلال والاتحاد عام 84هـ ... في ملعب الصايغ ... أول مباراة يحضرها (أبوفهد) ... ويا أبوه واخوانه ... لكنه كان صغير ... ما يعرف شيء ... عمره 7 سنين ... راح مع أبوه وأخوانه ... وشراء له أبوه ... حب ... وعصير.

كانوا جالسين ... وراء الباب الشمالي ... في هذيك المباراة ... وفي الشوط الثاني ... العالم يصارخون ... على اللي في الملعب ... مايدري ليش ... كل شوي يوقفون ... وبعدين يقعدون ... ويتكلمون مع بعض ... وهم حمقانين ... وبعضهم يقولون كلام ... ماهوب زين ... وشلون رجال كبار ... يقولون هالكلام ... ما يستحون ... تبون الصراحة ... تراه خاف شوي ... ولو أنه مستانس ... ولاهي ... بالفصفص ... والعصير ... ياليت كل يوم فيه مباراة ... علشان أبوي ... يشتري عصير .

يقول (أبو فهد) ... قبل نهاية المبارة ... بشوي ... إلا بصاروخ يجي ... من 30 متر ... وطق في الخشبه اللي فوق ... وردته الشبكه ... وهزها بقوه ... بغت تجي في وجهه ... الحمد لله فيه شبك ... المهم ... سجل مبارك عبدالكريم ... هدف التعادل ... في آخر الشوط الثاني ... وقاموا الناس يطامرون ... ويحبون بعض ... وشاله أبوه ... فوق كتفه ... وصار كل واحد يقول ... ياحبيبي يا مبارك ... هو ما يعرف مبارك ... بس بعد هذيك المباراة ... عرفه زين .

المهم إن الرجال ... اللي جنب أبوه ... قام وشاله فوق كتفه ... وصار يطامر فيه ... ويحبه ... ويقول له ... أنت وجه خير ... وعطاه بعد ... عصير.

عقب هذيك المباراة ... يوم رجع (أبو فهد) ... للبيت ... راح يركض ... يقول لأمه ... يمه شفت الملك فيصل ... شفت الملك فيصل ... عطاهم الكاس ... والناس فرحانين ... ويطامرون في الشوارع ... معهم أعلام كثيره ... كلها زرقاء ... ويشربون ... عصير .

وبعدين يتذكر ...(أبوفهد) ... يوم رجعوا للبيت ... بعد هذيك هالمباراة ... أخذه أخوه معه ... على السيكل ... وصاروا يدورون بالشوارع ... اللي حول بيتهم ... الرياض كلها ... صارت هلاليه ..... ويذكر إن الناس ... صاروا يذبحون ... الخرفان ... في الشوارع ... من الفرحة ... كنه عيد ... ويعطون الصغار ... لحم ... وعصير.

يقول (أبو فهد) عقب هذيك المباراة ... شبعت ... من العصير .

ويشوف (أبو فهد) ... إن هالبطولة .... هي السبب الرئيسي ... لجماهيرية الهلال ... الحقيقية ... وهي بداية ... عهد الهلال بالبطولات .... صحيح إن الهلال جاب قبلها بطولة ... كاس الملك 81 هـ ... قدام الوحدة ... لكنه ما شافها ... وهذي البطولة ... طعمها مختلف ... على كلام (أبو فهد) ... ويا إخوانه ... وللتاريخ ... هذيك السنه ... جمع الهلال ... الكأسين ... الملك وولي العهد .

كبر (أبو فهد) ... ونجح للمتوسطة ... عمره وصل 12 سنه ... وصار يعرف شوي ... عن الهلال ... ويتكلم في الكورة ... ويا ربعه ... هو الخبير فيهم ... على فكره (أبو فهد) ... ما عمره لبس طقم ... ما هوب هلالي ... حتى لو قال المدرس ... ألبسوا لون ثاني ... (أبو فهد) ما يلبس ... غير طقم الهلال ... ما أحد يلومه ... معه حق ... وش تقولون .

يتذكر (أبو فهد) ... هذيك الأيام ... ما يدرون عن نتائج المباريات ... إذا ما حضروها ... المباريات كلها في الرياض ... واللي يبي يروح الملعب ... لازم يروح بدري ... بعد صلاة الجمعة ... المباريات في العصر ... واللي يحضر ... ياخذ غداه معه ... للملعب ... والا يجلس ... في بيتهم ... ملعب الصايغ يمتلي ... ويصكون الأبواب من بدري ... والناس تطامر ... فوق الأسوار ... اللي حطوا عليها قزاز ... بيبسي مكسر ... علشان ما يطمر أحد ... وشباك التذاكر زحمه ... تمسك سرا ... نصف ساعه ... والسرا فوضى ... مثل هالحين ... وأشد ... وبعد ما فيه تلفزيون ... ينقل المباريات ... ولا تلفون ... والرادو ما يقول شيء ... وأبوه دايم يهاوشه ... ياوليدي انتبه ... انتبه لدراستك ... لا تاخذك هالكوره ... وأبو فهد يبي يعرف ... وش أخبار الهلال ... قلبه تعلق بالهلال ... أكيد فاز ... الهلال ما يغلبه أحد .

إذا راح المدرسة ... وجت الفسحة ... راح يركض ... للمكتبة ... حقت المدرسه ... علشان يقرأ الجرايد ... وبعض المرات ... يستأذن من المدرس ... قبل الفسحه ... ويروح بسرعه للمكتبه ... يقرأ الجرايد ... قبل الطلاب الثانين ... اللي يسابقونه ... كل واحد منهم ... يبي يجيب الأخبار ... أخبار الهلال ... يشخص فيها على ربعه .

بعض الأحيان ... إذا راح ... يلقى قدامه ... بعض زملاه ... سابقينه ... ومجتمعين على الجرايد ... الرياض ... أو الجزيره ... أصلا ما فيه غيرها ... يقرون وش كتب ... السماري ... والحمدان ... والعمير ... والسديري ... وغيرهم وغيرهم ... من كبار الكتاب ...

تدرون منهم زملاءه ... الي يتسابق وإياهم ... وإلا خلوها مستوره ... شخصيات معروفه ... في المجتمع ... ورياضيين كبار ... منهم اللي فوق كتفه كم نجمه ... ومنهم المدرب المشهور ... والتاجر الكبير ... والطبيب والمهندس ... و .... و.... و... فرقتهم الدنيا ... ويجمعهم حب الهلال ... لكن مثل أبو فهد ما فيه ... أبو فهد ... إذا جت المباراة ... أخذ سجادته ... وحطها تحت إبطه ... وراح للملعب ... وشرب عصير ...

المهم ... في هذاك الوقت ... مثل الهلال ... الجيل الثاني ... جيل فهد بن نصيب ... وبن عمر ... وحسين العليان ... والطعيمي ... ومرشد العتيبي ... وغيرهم ... وغيرهم ... وبعدين جاء ... محسن بخيت ...

ويقول أبو فهد ... عن هذيك الفتره ... انه يسمع إخوانه ... ويا ربعهم ... يقولون ... إن الهلال جلس ... سنوات طويله ... ما جاب بطولات ... والسبب ... زي ما يقولون ..... إن اللاعبين المشهورين هذاك الوقت .... اللي جابوا البطولات ... تدرون وش صار لهم ... انتقل 6 لاعبين منهم ... للأهلي بجده ... دفعه وحده ... ما يدري ليش .

هو يسمعهم يقولون ... انتقلوا غصب عنهم ... وبعضهم اعتزل ... وان هذي أهم أسباب ... حصول الأهلي على البطولات ... العشر ... اللي رازينها ... ويقول بعد ... إن المنتخب كله ... اللي لعب في دورات الخليج ... الأولى والثانية ... صار في الأهلي ... وإن المنافسة بين الأندية ... إنعدمت هاك الوقت ... وتسبب هالغياب القسري ... للهلال ... بظهور عصر النصر ... اللي قوت شوكته ... لأنه ما انتقل منه أحد ... وابتعد بهالغياب..... الهلال عن المنافسات ... سنوات .

نهاية الجزء الثاني .......................

والبقية ......

الجزء الثالث .................. (أبو فهد) والدوري الممتاز .
السبت القادم ..................... بإذن الله .
   

 

أدوات الموضوع
طريقة عرض الموضوع

قوانين المشاركة
غير مصرّح لك بنشر موضوع جديد
غير مصرّح لك بنشر ردود
غير مصرّح لك برفع مرفقات
غير مصرّح لك بتعديل مشاركاتك

وسوم vB : مسموح
[IMG] كود الـ مسموح
كود الـ HTML مسموح
Trackbacks are مسموح
Pingbacks are مسموح
Refbacks are مسموح



الوقت المعتمد في المنتدى بتوقيت جرينتش +3.
الوقت الان » 04:10 AM.

جميع الآراء و المشاركات المنشورة تمثل وجهة نظر كاتبها فقط , و لا تمثل بأي حال من الأحوال وجهة نظر النادي و مسؤوليه ولا إدارة الموقع و مسؤوليه.


Powered by: vBulletin Version 3.8.7
Copyright ©2000 - 2017, Jelsoft Enterprises Ltd

Google Plus   Facebook  twitter  youtube