#1  
قديم 08/05/2005, 10:37 AM
زعيــم متألــق
تاريخ التسجيل: 11/03/2003
المكان: الـــــــــــرس محبوبتي
مشاركات: 1,381
مبارة النصر وماحصل فيها معي.. اثارة لأبعد الحدود..

بسم الله الرحمن الرحيم
السلام عليكم ورحمة الله وبركاته
تحية خاصة لجميع الزعماء ..
اولاً.. هاردلكم على التعادل مع نادي النصر في ظل حضور الهلال بهذا المستوى القوي بالمبارة رغم الأرهاق الذي اصاب لاعبيه والنقص الكبير في صفوفه
تخيلوا لو كان الهلال كاملاً والكامل وجه الله.. اربعة لاعبين مستبعدين للراحة والغنام ونواف والحربي والصالح للأصابة..
والجمعان للأيقاف.. راح يأكل خابور نادي النصر.. والجمهور مالي الملعب فل بعد ياسلام..
ماأروع الملز وهو مليان بجمهور الهلال من زمان ماشفنا هالجمهور..
وكان لي الشرف بحضور هذه المبارة ولي وقفات معها..
* كنت متواجد بالرياض من عصر الأربعاء انا واربعة من الزملاء..
في يوم المبارة يوم الخميس ذهبنا للملعب الساعة 7.30 !!! وقت متأخر جداً وصادفنا حادثاً بالطريق قام بتأخرينا بضع دقائق على الدائري بين مخرجي 14 و15 وكان حادث اشبه بالنكتة عافنا الله واياهم 10 سيارات مرة واحدة .. ماتحسفت الا على 430 حرام تروح بين هالقرمبع!!
* وصلنا الملعب 7.55 وكان البوابات مغلقة وسألت أحد الأشخاص وقال من بعد صلاة المغرب وهم يفتحون الباب دقيقتين ويقفلون 10 دقائق!!
وكنت امام ابواب الدرجة الثانية وحصل تدافع كبير وخاصة انه يوجد اطفال مع والديهم ويوجد اناس ضعفاء لايتحملون التدافع وكان منظر محزن ان ترى هذه الفوضى وخاصة ان الجميع يريد الدخول وحراس الأمن تقوم بالضرب (بالعجرة) شوف عيني مسكوا واحد ثلاثة من رجال الأمن وقاموا بضربه .. واغلقوا الباب على رجل واحد من الجماهير!!
* فعلاً الجماهير قامت بفوضى كبيرة من الجانبين ورجال الأمن يريدون دخولهم بالترتيب لكن هذا صعب ..
*انا قمت بدور المتفرج انا وزملائي ونسينا حتى قص التذاكر اللي كان طابور طويل !!!
*اتصلت على احد الزملاء بالملعب وقال انا بالدرجة الأولى الملعب اللحين فل الساعة 8.10!! قلت واللي برى يبيعون علينا تذاكر ينصبون على خلق الله الجميع كان يريد الدخول لو اظطر الى الوقوف ..
قمت بشراء التذاكر من احد الأشخاص اللي يبيعها بزود 5 ريال قلت 5 ريال ولا وقفة بالسراء هذا تنتهي المبارة مادخلت..
ذهبت للدخول من أحد البوابات اللي كانت مقفلة من بعد المغرب وهو الباب الصغير اللي يسار الباب الكبير..
قال حارس الأمن مافيه وسئلته عن السبب قال هاذي توجيهات مانفتح الباب الا بعد الصلاة قلت انتهت الصلاة اللحين.. الساعة 8.15 قال ماجانا امر قلت برضه اباقف هنا قل اوقف بكيفك الناس تدخل مناك وانت واقف عندي ثواني ويفتح الباب رجل امن من داخل ويطلع علينا قال بالدور وتذكرتك عطني اياها وانا كالعادة محظوظ صرت اول واحد وجت الناس سراء خلفي وصار لي دفعة محترمة رحت على وجهي الا شوي ..
قام واحد بالقفز امامي من على الحاجز الحديدي امام رجل الأمن اللي لاحس ولاخبر..
دخلنا وانطلقنا للمدرج وكان هدير الجمهور قوي جدا بما يوحي بأن الملعب ممتلىء لآخره..
قاموا بالتفتيش وصادر رجل الأمن قلم احد زملائي والسبب قال ماهو شغلك يمكن معجبه القلم..!!
دخلنا الى المدرج العلوي بالدرجة الثانية وكان ممتلئ وذهبنا الى آخر درج ويوم ظهر الملعب بقدر ماحزنت اني ماحصلت مكان لكني كنت سعيد بالجمهور الكبير هذا وخاصة اذا التفت الى مدرج النصر ماتشوف احد فيه ..
وباللحظة هاذي تذكرت سعود عبدالعزيز وشعبية نادي النصر قلت هاللحين يشوف هو هالجمهور والا منزل راسه بين رجليه..
* قمت ابحث عن مكان واللاعبين كانوا يجرون حركات الأحماء ولمحت محيل تصغير لمحل وكان فيه شعار الهلال مجلس .. ناديت الشخص اللي خلفه وقلت المكان اللي قدامك فيه احد قال لا تعال وانطلق احد الزملاء قبلي ورحت خلفه وصار المحل يكفينا حنا الأثنين بعد مااشترط علينا صاحب الشعار انك ماتجلس الا بالتشجيع طول المبارة ولاتسكت ابد.. قلت على راسي هذا الزعيم ياحبيبي..
اثني من زملائي نزلوا تحت وحصلوا مكان ..
وباقي الجماهير كانوا واقفين ..
*بعدها قام اثنين من صغار السن بالتنافس بالأهازيج والجمهور يردد خلفهم وكان واحد شعبيته اكثر من الثاني.. وعند انتهاء كل واحد منهم يقوم الجمهور بالتصفيق له..
*طبعاً بدأت المبارة وانتهت وحنا ياواقف اجلس !!!
*خلال المبارة قام الجمهور بالتراشق بينهم بالقوارير وكانت حرب جميلة ومضحكة بنفس الوقت لكن لانحب ان نراها بملاعبنا.. واتمنى ان اللي بداها نصراوي..
قام احد مشجعين النصر بالمشي بالممر السفلي يحمل الشعار وقامت الجماهير بقذفه ويستاهل ماجاه !!
قام ايضا مشجع قدساوي بالجلوس بين جماهير الهلال وقامت بعض الجماهير بالتعليق عليه وتحديه يوم الجمعه..
رأيت اثنين بشعارات الأتحاد بيننا وكانوا يساندون الزعيم مما سبب لي كتمة طول المبارة بشوفة هاللون بيننا..
*بعد المبارة ماتوقعتها من جمهور الهلال قاموا بقذف رجال الأمن بالملعب وقاموا بقذف جماهير الهلال في المدرج السفلي مما سبب تدافع كبير وهرب من الجمهور بسبب القذف..
لم انزل بسرعة وفضلت مشاهدة الجمهور من فوق بالساحة الخلفية وكانت الساحة ممتلئة وكانت الجماهير تقوم بالهرب من كل اتجاه بسبب ملاحقة رجال الأمن لبعض الجماهير..
واقفلت البوابات قليلاً وكان الجمهور يقوم بالقفز على اسوار الملعب من جهات اخرى..
*فوضى كبيرة شهدها ملعب الملز في هذه المبارة لكن هاذي حلاوتها ..
* للعلم فالجمهور الحاضر بهذه المبارة كان من كل مكان من القصيم ماأكثرهم ومن المجمعه ومن الزلفي ومن حائل ومن الشرقية والسبب المبارة يوم الخميس ولا يوجد اختبارات لدى الطلبة والهلال كان متوهجاً هذا الموسم كلها ساعدت على حضور هذا الجمهور من كل حدب وصوب ..
يعني ياجمهور الرياض امام الأتحاد يجب ان تحضروا لأن مبارة النصر نهاية الأسبوع والناس فاضية وجت اما الأتحاد وسط الأسبوع ولن يدعمه غيركم مع امكانية حضور بعض الجماهير القريبة من الرياض..
* الحكم لم يكن بمستوى المبارة وخاصة ان ضربة جزاء لديسلفا لم يحتسبها واستغربت عدم ذكرها ابدا لابالصحف ولا بالشبكة وهي شد احمد العجمي لديسلفا خلال ركلة ركنية بالشوط الثاني..
* باكيتا فعلاً داهية بتغييراته لكن يعاب عليه عدم اشراك الهليل مكان خليل البعيد عن جو المباريات وخاصة ان الهليل جاهز ويلعب مباريات وحركي اكثر من خليل..
*الآف الجماهير لم تدخل المبارة وسلبت حقوقها من المسئول عن اقامة المبارة في الملز تخيلوا لو كانت المبارة بالأستاد والجمهور هذا حاضر مع اللي كانوا برى مع الموجودين بالأستراحات على طريق الأستاد اللي عند كوبري الفحص..
راح يكون الملعب روعة..
*أعجبتني كلمة هيه هيه من الجماهير عند خطاء قريب او ركنية.. جمهور الهلال كان كل يشجع على حدة الدرجة الثانية اللي فوق لحال واللي تحت لحال والدرجة الأولى تشجيع مع الرابطة يجب ان تتوحد الجماهير ..
قائد الرابطة اطربني صوته حركة المروحة جميلة جدا جدا جدا واللي نسينها الموج وخاصة ان الملعب فل..

وبعدها تعشينا بالرافدين وكان المطعم مليان جمهور بس قهر كلهم نصراويين.. قلت حتى هنا جايين ورانا..

تحياتي للجميع وتمنياتي للهلال بالتوفيق امام الأتحاد والقادسية وسنكون من اول الحاضرين بالمبارتين ان شاء الله..
اضافة رد مع اقتباس
  #2  
قديم 08/05/2005, 10:54 AM
زعيــم نشيــط
تاريخ التسجيل: 19/08/2002
المكان: There, In No Where
مشاركات: 678
مشكووور أخوي على مشاركتك ...
و الاحداث فيها الكثير من الاكشن ... لكن هاردلك التعادل ;) ;)

و ورينا همتك يوم الاثنين


تحياتي لك
اضافة رد مع اقتباس
  #3  
قديم 08/05/2005, 11:08 AM
الصورة الرمزية الخاصة بـ الهلالي ابو خالد
زعيــم مميــز
تاريخ التسجيل: 10/04/2005
المكان: نادي الزعيم
مشاركات: 2,765
الله يعطيك العافيه على التفصيل الاكثر من رائع
اضافة رد مع اقتباس
  #4  
قديم 08/05/2005, 11:08 AM
زعيــم مميــز
تاريخ التسجيل: 23/12/2004
المكان: دبـــي
مشاركات: 1,970
يعطيك العافيه
اضافة رد مع اقتباس
  #5  
قديم 08/05/2005, 11:20 AM
زعيــم متواصــل
تاريخ التسجيل: 18/07/2003
المكان: ََِمََِمََِلََِكََِةِ اِلإََِنََِسََِاََِنَِيِّةِ
مشاركات: 151
هلا بيك يا أبو مها ...

ومشكور على الموضوع والتعبير والترتيب الرااااااااااااااااائع ...

ما شاء الله عليك ...

بصراحة إنشديت إلى كل سطر ...

ولي عتب عليك بسيط في أمريــن :

1- ليش ما عزمتي معك في الــرافديــن ...

2- التوقيــع أحس إنه فيه مبالغة كبيــرهـ ...


تحيتي :

عبدالرحمن ب مساعد
اضافة رد مع اقتباس
  #6  
قديم 08/05/2005, 01:21 PM
الصورة الرمزية الخاصة بـ عطــر الأمــاكن
مشرف سابق بمنتدى الجمهور الهلالي
تاريخ التسجيل: 24/04/2005
مشاركات: 13,275
الأثنييييييييييييييييييييين لاتنسون
اضافة رد مع اقتباس
  #7  
قديم 08/05/2005, 02:07 PM
موقوف
تاريخ التسجيل: 19/04/2005
مشاركات: 2,521
يالله الاثنين تعال وبتشوف الا يسرك
اضافة رد مع اقتباس
  #8  
قديم 08/05/2005, 02:58 PM
زعيــم متواصــل
تاريخ التسجيل: 09/12/2002
المكان: الرياض - (ساكن بالخبر للدراسة بالجامعة)
مشاركات: 74
الموضوع حلوووو ...


عاد تصدق اني كنت واحد من هالجماهير اللي تتراكض بالساحه الخلفية ووقتها ما كنت ادري حنا قاعدين نهرب من مين .. لاني شفت هلاليين يهربون بالاتجاه اللي انا ماشي فيه وقلت خلني اهرب واياهم لا يجيني اللي هم هاربين منه ...

اما الامواج وحركة المراوح اللي سواها (ابو علي) الله لا يحرمنا منه فأنا كنت قاعد وراه على اليسار وما أحلاه من شعور وانت قاعد تسمعه وهو يشجع .. كذا

ويا حليلك انت تقول ان التراشق اللي صار بين الجماهير مضحك .. انا كنت في وسط ( المعركة) واضطرينا نغطي روسنا بأيادينا وننتبه لا تجينا قارورة او حتى نعال الله يكرمك وما تهنينا بالمباراة في وقت التراشق اللي صار بين الجماهير .. لكن الحمدلله ان الامير الرائع محمد بن فيصل جا وهدا الموقف ...
اضافة رد مع اقتباس
  #9  
قديم 08/05/2005, 03:23 PM
زعيــم فعــال
تاريخ التسجيل: 03/05/2005
مشاركات: 232
الله يعطيك العافية على الموضوعك الاكثر من رائع .....
وعلى فكرة هذي اول مشاركة لي في المنتدي .......
بس كنت من اشد زواره في الثلاث سنوات الاخيرة .......

على العموم انا للأسف كانت عندي ظروف اخرتني من الذهاب للملعب .... بس الساعه 8:15 كنت في الملعب .... وشوفت عيني انه مايقارب الخمسة الي سبعة الاف متفرج اغلبيتهم هلالية يلفون حول سور الملعب الخارجي يدورون ولو جحر ضب يدخلون منه ..... عني انا شخصيا سحبت نفسي انا واخوياي ورجعنا

على العموم الف شكر على الموضوع الرائع وباذن الله نبارك لبعض بعد مبارة الاتحاد ....

والله الله بالحضور يا جمهور الزعيم ....
اضافة رد مع اقتباس
  #10  
قديم 08/05/2005, 04:19 PM
زعيــم مميــز
تاريخ التسجيل: 27/06/2004
مشاركات: 1,894
يعطيكم العافيه
اضافة رد مع اقتباس
   


إضافة رد

أدوات الموضوع
طريقة عرض الموضوع

قوانين المشاركة
غير مصرّح لك بنشر موضوع جديد
غير مصرّح لك بنشر ردود
غير مصرّح لك برفع مرفقات
غير مصرّح لك بتعديل مشاركاتك

وسوم vB : مسموح
[IMG] كود الـ مسموح
كود الـ HTML مسموح
Trackbacks are مسموح
Pingbacks are مسموح
Refbacks are مسموح



الوقت المعتمد في المنتدى بتوقيت جرينتش +3.
الوقت الان » 05:20 AM.

جميع الآراء و المشاركات المنشورة تمثل وجهة نظر كاتبها فقط , و لا تمثل بأي حال من الأحوال وجهة نظر النادي و مسؤوليه ولا إدارة الموقع و مسؤوليه.


Powered by: vBulletin Version 3.8.7
Copyright ©2000 - 2017, Jelsoft Enterprises Ltd

Google Plus   Facebook  twitter  youtube