#1  
قديم 03/04/2005, 05:18 PM
زعيــم مميــز
تاريخ التسجيل: 21/04/2002
المكان: الرياض
مشاركات: 3,291
التسول الحديث .. بطريقه .. الأغـراء الخبيث !

[align=center]
.
.
.
ياميه مرحبا ومسهلا بكل اللي دشو الموضوع
نورتوا موضوعي بتواجدكم

قد يكون العنوان ملفت للانتباه خصوصاً ان فيه خبث واغراء
ويالهوووي على الاغراء وخصوصا اغراء نانسي واليسا
يقولون ماصارت ظهور شبابنا منحنيه مثل شيابنا الا من نانسي وطقتها

وانا اقول لاتلومونا اليسـا اللي يشوفها يقول كنها زبده سايحتن في قدر
<<== الله ابو من علمك التشبيه

ماعليكم نانسي واليسـا وماجر غصنهم ..
الحين طلع في سعوديتنا مثلهم .. لااحد يبقق لي عيونه ايه هذا الصدز

بس اغراء على خفيف .. يعني بعد كم سنه عسى الله لايقوله بنشوف
نانسي السعوديه بسروال سنه تغنى على الجسر المعلق

كل هالكلام اللي فوق عشان اخش في الموضوع الرئيسي
الا وهو قصه صارت لي في دولتنا المملكه وبالتحديد بالرياض
وبالتحديد عن بنك الراجحي الواقع على طريق العليا العام
وحصل هذا الموقف يوم الاربعاء 28/1/1426 الســ 9 ص ــاعه < ياحركتات

كنت رايح للبنك ازين لي بعض الشغلات البسيطه <= الله يقطعك انت وشغلاتك
اصلا دليل انك منتب وجه بنوك يوم وقعت على اورقاهم قالوا التوقيع مختلف
هذا دليل انك مقطع البنوك

ايووووه وش كنا نقول .. ايه تذكرت !
قبل ماادخل البنك كنت كاشخ ومرسم وطاق لي شراب العايله من ابوريالين
ومادها لين وصلت ركبي من زود الكشخه وطاق لي نظارات شمسيه
يعني طالع بيوتفل < الله ابو من علمك الانقليزيه

وصلت للباب .. واسمع صوت نااااعم جاني من بعيد اسمعه يهمس ويقول
لو سمحت اخوي ؟
قمت ناظرت وراي وعلى يميني ويساري مالقيت الا انا
قمت واشرت على نفسي قلت انا
قالت ايه انت
قلت ياهلاااااا والله <= ترى قلتها في نفسي

لوكم شايفينها كان تقوطرت سعابيلكم من زينن فيها ومن لبسن يغري
اجل تصدقون لابسه لثمه ومكحله عيونها وطاقه العطر اللي يشق الخشم
يحق لي اخق معها صح

قلت امري وش بغيتي ؟
قالت وش رايك نبعد عن باب البنك شوي ؟
في هذه اللحظه بدت تجي وتروح الافكـار ..
قلت لا ذي وراها بلى وشكل هالصبحيه بتكون اكشن ;)

قلت ياله تعالي ونبعد شوي عن البنك
قالت انا منقطعه وماعندي احد هنا وداخله على الله ثم عليك
عاد انا ضاع عقلي مع عيونها وانخرمت على ريحه طيبها
حتى من الخرمه شوي وارقد على كتفها

قلت طيب والمطلوب مني وشو ؟
قالت ابي اروح لديرتي "الخرج" وماعندي احد ..
عاد انا سويت فيها ابو الفهامه قلت ولو اوديك لو تبين ديرتنا
قالت لا ماابي اكلف عليك انت وراك مشاغل واشغال
قلت لا ماوراي شئ ابد وهذا موتري ياله اركبـي <عجل ابي كل شئ بسرعه
قالت وين موترك ؟ قلت ذا .. يوم شافته مغبر وماجاز لها < ياقوي عينها

قالت تعال كلم امي وشف وش تبي ؟
قلت هلااا والله الام بعد معك .. والله كملت فرحتنا
قلت لها اللي يبيني يجيـني << ياثقل


قامت الام وجت وقالت ياوليدي حنا ...... الخ < مالكم بالطويله
قلت تبون اوديكم ابشروا .. قالت وقف لموزين وبنروح معه
وانا اكلمهم لمحت لموزين ووقفته !
قلت توصل للخرج ؟
قال لا مافيه ادخل قرج ممنوع ادخل بس سعودي ادخل < هو يتكلم تسذا
قمت والتفت عليهم ولقيت البنت تكلم بالجوال

يوم وصلت لمهم قامت البنيه وقفلت الجوال !
قلت يقول مايوصـ... ماأمداني اكمل كلامي الا تأشر البنت هذا لموزين
قلت زين واروح لمه ويفتح لي الدريشه .. طلع باكستاني
قلت توصل للخرج قال مافيه مشكـله !
قلت بكم قال بـ 200 ريال قلت ليه الخرج قريبه !
قال وين خرج 180 كيلو .. قلت تنصب على بزر انت < اخس ياكبير
قلت توكل ماابيك .. والتفت يمين والقى العجيز وبنيتها مشخصين معه راكبين

قلت خير وين رايحين ؟
قالوا ياولدي ادفع له حنا مستعجلين ..!
قلت والله مشكلتكم انا ماجاز لي راعي هاللموزين
بعدين مااحب احد يستغفلني !
خش اللموزين عرض وقال خلاص عشان انت ولد كويس 100 ريال
قلت ياشيخ لو تقول بـ 10 مادفعت لك
نقزت الام وقالت انت ادفع اللي عندك وحنا نكمل الباقي
قلت انزلوا ولو تبون استاجر لكم هيلكوبتر بـ1000 ريال وتوصلكم للخرج ماعندي مانع
بس هاللموزين ماخش مزاجي ولا هضمته ..! << الله من الحتسي

نزلوا وجتني مكالمه جلست اكلم دقيقه ونسيتهم
يوم خلصت والتفت يمين ويسـار ماحصلتهم ..
لفيت على البنك ابدورهم اشوف وينهم ماحصلتهم ..

قلت لخشمي هماك تو منصرع على ريحه عطرها دلني عليها
قال ظف وجهك الريحه بعد مادخلت نص وجهك في موتر اللموزين انعدمت

عاد دخلت البنك ونسيتهم وخلصت شغلي
وطلعت من البنك ولاشفت لهم لاحس ولا خبر
.
.
.
.
مايستفــاد من القصــه ../

1/ القصه حقيقه وغيره مبهره .. والله على مااقول شهيـد
2/هل وصل التسول الى درجه الاغراء .. واستخدام اساليب الحرام لكسب المال !
3/قصص بنات الاغراء والتسول تكثر عند البنوك ووقت الرواتب ولمن اراد ان يعيش
الاثـاره فماعليها لا التواجد تلك الايام .!
والله يعين اللي قلبه رهيف بيروح راتبه اول مايطلع من الصراف ;)
4/مهوب كل بنت غير محتشمه تجيك وتبادرك بالكلام تكون خاقه مع شكلك
يمكنها خاقه مع الـ 500 ريال اللي تطل من مخباتك
5/ اين مكافحه التسول عنهم .. او أن مسؤوليتهم اقتصرت على الاشارات والمساجد فقط !


تحيــاتي [/align]
اضافة رد مع اقتباس
  #2  
قديم 03/04/2005, 05:48 PM
كاتب أديب بالمجلس العام
تاريخ التسجيل: 20/10/2003
المكان: جارة القمر .. الخبر
مشاركات: 1,650
fmfmfmfm

بصراحة لا تعليق

وأفضل طريقة للقضاء على هذه الظاهرة هو تجاهلها تماما ولكن يبقى لانجاح هذه الطريقة قلب قوي مثل قلب ( فيصل )

لك أجمل تحية

أخوك
مطيع الهميمي

fmfmfmfm
اضافة رد مع اقتباس
  #3  
قديم 03/04/2005, 06:08 PM
زعيــم مميــز
تاريخ التسجيل: 29/04/2002
المكان: العاصمة الحبيبة
مشاركات: 4,646
اسمع يافيصل قصتك هذي تذكرني بقصة صارت معي والمشوار ايضا كان للخرج ......

جاءت لي بنت صراحة كشخة وطاقة ذاك النقاب اللي يروع من زينة وجت في تكسي ووقفت عندي وفي رمضان استغفر الله وقامت تقول نفس الكلام لكن بتغنج اكثر من الازم ..... عاااد اخوك ذيب ما مشت علي السالفة وقلت انا معي العائلة وحياكم الله معي اوديكم للخرج ويوم شافت الدعوى ماهنا دراهم قالت مع السلامة بنفس شينة ..........

فعلا مصيبة هذي الاشكال من التسول ذي الايام والله يستر علينا وعليكم .....


تحياتي
اضافة رد مع اقتباس
  #4  
قديم 03/04/2005, 06:10 PM
زعيــم جديــد
تاريخ التسجيل: 09/03/2003
المكان: الرياض
مشاركات: 29
السبب الأول في انتشار هذه الظاهرة هي عدم مبالات الجهات المختصة .. والا المفروض تشدد وتعاقب كل من يحاول تشويه بلدنا ..

والسبب الثاني للأسف هو بعض الناس الذين يتعاطفون مع هؤلاء المتسولين ... والا المفروض لا يعطونهم أي بال لأنهم إذا عطوهم يشجعونهم بالاستمرار ...

وها نحن نرى هذه الظاهرة تنتشر مع مرور الوقت من رجال مسنين إلى نساء مسنات وفي الأخير إلى فتيات ..

الله يعطيك العافية أخوي فيصل على هذا الموضوع الرائع

ولكن لو تفاديت بعض الكلمات لكان أفضل
اضافة رد مع اقتباس
  #5  
قديم 03/04/2005, 07:24 PM
زعيــم مميــز
تاريخ التسجيل: 11/12/2004
المكان: السعودية - الرياض
مشاركات: 1,659
[align=center]مراحب فيصـل
ياكثر ماسمعت مثل قصتك
ولكـن من اللي راح يوقـف قدام هالتصرفات
التسول صار في كل مكان
شئ مؤسف والله
وشكراً على صياغه القصه باأسلوب مشوق
سلامـي لفيصـل ;)
[/align]
اضافة رد مع اقتباس
  #6  
قديم 03/04/2005, 09:55 PM
الصورة الرمزية الخاصة بـ فارس له جواد
زعيــم نشيــط
تاريخ التسجيل: 08/02/2005
المكان: الرياض
مشاركات: 754
لاتعليق
اضافة رد مع اقتباس
  #7  
قديم 03/04/2005, 11:17 PM
الصورة الرمزية الخاصة بـ مطزاز
زعيــم متألــق
تاريخ التسجيل: 01/05/2002
المكان: الرياض
مشاركات: 1,236
[align=center]
إقتباس
ياميه مرحبا ومسهلا بكل اللي دشو الموضوع

ياهلا بك وبعدين وينك من زمان
إقتباس
قد يكون العنوان ملفت للانتباه خصوصاً ان فيه خبث واغراء
ويالهوووي على الاغراء وخصوصا اغراء نانسي واليسا

جاين امشي مليون
إقتباس
نانسي السعوديه بسروال سنه تغنى على الجسر المعلق

ولاتنسى الونيت تسوق وكاشخه
إقتباس
كنت رايح للبنك ازين لي بعض الشغلات البسيطه

شكلك من النوع اللي يودع ولا يسحب
:p
إقتباس
لوكم شايفينها كان تقوطرت سعابيلكم من زينن فيها ومن لبسن يغري

لعنبو بليسك سعبلت من سواليفك وش لون لو اشوفها
إقتباس
في هذه اللحظه بدت تجي وتروح الافكـار

:p مثل ..


إقتباس
وطاق لي شراب العايله من ابوريالين
ومادها لين وصلت ركبي من زود الكشخه

ماصار شراب صار هلي هوب

إقتباس
ولقيت البنت تكلم بالجوال

إقتباس
والتفت يمين والقى العجيز وبنيتها مشخصين معه راكبين

بنات الذين اثرهم متفقين مع اللموزين اجل تقول عطه اي شي

إقتباس
اين مكافحه التسول عنهم

عندنا مكافحة التسول


ومشكور على هالقصه [/align]
اضافة رد مع اقتباس
  #8  
قديم 04/04/2005, 02:43 AM
زعيــم مميــز
تاريخ التسجيل: 29/07/2004
المكان: شبكة الزعيم
مشاركات: 7,277
مشلكة التسول بالسعودية

كل سنة بتزداد أكثر

أول كنا نشوف شياب عجز وبعدين اولا د صغار مع بنات عند الاشارات ومن ثم المصيبة بنات في العشرين وتكون متبرجة وتلفت للنظر

أتمنى يكون في تشديد اكثر من هذا

وشاكر لك اخوي فيصل على الموضوع
اضافة رد مع اقتباس
  #9  
قديم 04/04/2005, 02:54 AM
الصورة الرمزية الخاصة بـ الشـــ10لهوب
زعيــم نشيــط
تاريخ التسجيل: 11/08/2003
المكان: في الدنيا
مشاركات: 960
ياخي ............ لازم لها حل ؟


مايصير................ مايحدث عند الاشارات؟؟


والقهر ................. يلبسون ثياب سعوديه ؟؟ واشكالهم ماهم كذا؟؟
اضافة رد مع اقتباس
  #10  
قديم 04/04/2005, 06:11 PM
فيو
تاريخ التسجيل: 25/01/2002
المكان: .. الحـــبيــ الرياض ـبـه ..
مشاركات: 15,376
[align=center] يؤ يؤ يؤ يؤ

وش هالـقــصـــة ..!!

----->> ماستوعبت اللي صار ،،،

إقتباس
ياميه مرحبا ومسهلا بكل اللي دشو الموضوع
نورتوا موضوعي بتواجدكم

انا سبيشل .. مانورته ،،،

إقتباس
ويالهوووي على الاغراء وخصوصا اغراء نانسي واليسا
يقولون ماصارت ظهور شبابنا منحنيه مثل شيابنا الا من نانسي وطقتها




إقتباس
ماعليكم نانسي واليسـا وماجر غصنهم ..
الحين طلع في سعوديتنا مثلهم .. لااحد يبقق لي عيونه ايه هذا الصدز

بس ماتوقع أنهم سعوديات أباً عن جد
لأن بنت الأصل والفصل مستحيل ومستحيل يجي في بالها هالشي ...!!


إقتباس
ايووووه وش كنا نقول .. ايه تذكرت !

الله يخلف عليك

إقتباس
يحق لي اخق معها صح

No


إقتباس
قلت ياهلاااااا والله <= ترى قلتها في نفسي

ماتووووووووووقع

إقتباس
قلت لها اللي يبيني يجيـني << ياثقل

وإلا عندك نيه تروح للآم .. ترى الثقل زين

إقتباس
قمت والتفت عليهم ولقيت البنت تكلم بالجوال

تتوقع انها كلمت ذاك الباكستاني

إقتباس
قلت بكم قال بـ 200 ريال قلت ليه الخرج قريبه !
قال وين خرج 180 كيلو .. قلت تنصب على بزر انت < اخس ياكبير

أحلى ياذهين .. شي شي طلعت

إقتباس
قلت خير وين رايحين ؟
قالوا ياولدي ادفع له حنا مستعجلين ..!
قلت والله مشكلتكم انا ماجاز لي راعي هاللموزين
بعدين مااحب احد يستغفلني !
خش اللموزين عرض وقال خلاص عشان انت ولد كويس 100 ريال
قلت ياشيخ لو تقول بـ 10 مادفعت لك
نقزت الام وقالت انت ادفع اللي عندك وحنا نكمل الباقي

من هينا تأكدت أنهم متفقين معه


إقتباس
يوم خلصت والتفت يمين ويسـار ماحصلتهم ..
لفيت على البنك ابدورهم اشوف وينهم ماحصلتهم ..

خساااااااا اااااااااااره
ليتك شايف وين راحوا له ---->> ملقوووووفه

إقتباس
3/قصص بنات الاغراء والتسول تكثر عند البنوك ووقت الرواتب ولمن اراد ان يعيش
الاثـاره فماعليها لا التواجد تلك الايام .!

صادق والله وموب بس البنات .. حتى الشباب ،،

أتذكر أختي من زمان حصلها هالموقف
راحت في الصباح عند أحد المصارف الآليه .. ناداها شاب ولا التفت له ،،
وجلس ينتظرها لين ماطلعت .. ثم يلحقها وهي تمشي بسرعه ولاعطته أي وجه يوم جت تركب السياره قالها أختي لحظه
أركبت وطنشته
----->> أختها خوافه درجه أولى المصيبه أكبر مني

إقتباس
اين مكافحه التسول عنهم .. او أن مسؤوليتهم اقتصرت على الاشارات والمساجد فقط

حتى الإشارات والمساجد مهملينها ،،،

كل ظهر أشوفهم .. حتى أحيانا أشوفهم في ساعات متأخره بالليل .. وين مكافحة التسؤول ..!
نايمه في سباااااات عميق




يسلمو فيصل ع هيك موضوع مفيد ،،،




سي يو




الفيروسه الزرقاء [/align]
اضافة رد مع اقتباس
  #11  
قديم 04/04/2005, 06:28 PM
زعيــم مميــز
تاريخ التسجيل: 31/01/2005
المكان: الرياض
مشاركات: 2,059
خلها تجيني والله كف على وجههها <<<<<<ايه طيب

ومشكووور على الموضوع الحلو
اضافة رد مع اقتباس
  #12  
قديم 05/04/2005, 03:06 AM
زعيــم مميــز
تاريخ التسجيل: 18/12/2004
المكان: الجــوف
مشاركات: 2,578
ههههههههههههههههههههههههههههههههههههههه والله قصه حلوه

بس تصدق مفروض اصريت على انك توديهم

عشان يتورطون ومايلقون الي يرجعهم للرياض


تحياتي للجميع
اضافة رد مع اقتباس
  #13  
قديم 05/04/2005, 10:42 AM
الصورة الرمزية الخاصة بـ هـلالـي أصـيـل
زعيــم متألــق
تاريخ التسجيل: 01/05/2002
المكان: (( الـريـاض ))
مشاركات: 1,406
[align=center]
يابن الحلال كل هذي اساليب ( طراره واضحه )
فيه محل كوفي شوب وبوفيه مفتوح في احد اسواق الرياض الضخمه والفخمه
على حسب ماسمعت ان البلوتوث هناك مسوي هوايل كيف ؟
اغلب الموجودين فيه بنات وكل بنت مشغله البلوتوث وتشوف اي شخص فاتح البلوتوث
تقول حاسب عنا واجلس معنا طبعا البعض ماصدق خبر يجي يحاسب ويمكن يعطيها فلوس
عاد هي تاخذ رقمه وتقول باتصل عليك بعدين وتنساه وتسوي هالحركه
مع اغلب الشباب الضعيفين الطراره صارت اساليب فيها عجيبه .



إقتباس
بس ماتوقع أنهم سعوديات أباً عن جد
لأن بنت الأصل والفصل مستحيل ومستحيل يجي في بالها هالشي ...!!

هذاااااك أول مستحيل والاول تحوووووووووول
هالحين ممكن وكل شيء وارد
البعض ماهمه الدين بيهمه اصله وفصله والا بيستحي من احد ؟؟ [/align]
اضافة رد مع اقتباس
  #14  
قديم 05/04/2005, 03:04 PM
عضو سابق بلجنة تطوير المجلس العام
تاريخ التسجيل: 25/11/2002
المكان: سجن الحياة
مشاركات: 2,298
قبل القصة ومافيها من إشارات ومعاني ,,

أخوي فيصل ,, عليك أسلوب خيالي ووصف بديع ,, والله كأني جالس أشوفك ,,

ياعزيزي لا تحرمنا من هالمشاركات الحلوة والكتابات المتألقة ,,

وأما موضوع القصة فهو بلوى من بلاوي الزمان ,, وكل يوم طالع لنا مشكلة ,,

بس عندي سؤال عن مايستفاد من القصة واللي أنت حاطها أول نقطة :

/
إقتباس
القصه حقيقه وغيره مبهره .. والله على مااقول شهيـد

هل هذه النقطة من الفوائد المستفادة من القصة ؟

تحياتي لك يافيصل ,,
اضافة رد مع اقتباس
  #15  
قديم 05/04/2005, 04:51 PM
عضو سابق باللجنه الإعلاميه
تاريخ التسجيل: 27/11/2002
مشاركات: 4,344


إقتباس
لوكم شايفينها كان تقوطرت سعابيلكم من زينن فيها ومن لبسن يغري
اجل تصدقون لابسه لثمه ومكحله عيونها وطاقه العطر اللي يشق الخشم
يحق لي اخق معها صح



الله يرجك ،‘،’،

للأسف التسول صار شي طبيعي عندنا !
اضافة رد مع اقتباس
   


إضافة رد

أدوات الموضوع
طريقة عرض الموضوع

قوانين المشاركة
غير مصرّح لك بنشر موضوع جديد
غير مصرّح لك بنشر ردود
غير مصرّح لك برفع مرفقات
غير مصرّح لك بتعديل مشاركاتك

وسوم vB : مسموح
[IMG] كود الـ مسموح
كود الـ HTML مسموح
Trackbacks are مسموح
Pingbacks are مسموح
Refbacks are مسموح



الوقت المعتمد في المنتدى بتوقيت جرينتش +3.
الوقت الان » 10:10 PM.

جميع الآراء و المشاركات المنشورة تمثل وجهة نظر كاتبها فقط , و لا تمثل بأي حال من الأحوال وجهة نظر النادي و مسؤوليه ولا إدارة الموقع و مسؤوليه.


Powered by: vBulletin Version 3.8.7
Copyright ©2000 - 2019, Jelsoft Enterprises Ltd

Google Plus   Facebook  twitter  youtube