[align=center]اخوي تغيب الشمس .. اعتقد بل اجزم انك عاشق ومتيم في الهلال لكن حبك للهلال للاسف قد يضره اكثر مما ينفعه
لو تذكرنا السنة الماضية وكيف كان البعض يدافع ويدافع عن الهلال (وهو في اسوأ حالاته ) وكانوا يتكلمون مثلك من واقع حبهم للهلال وانا لا اشك اطلاقا في هذا .. لكن لو حكموا عقولهم شوي وابتعدوا عن العاطفة كان ماصارت يمكن الصدمة بهالحجم المرعب في السنة الماضية
اخوي تغيب الشمس .. كلنا او خلني اقول اغلبنا نحب الهلال مثلك بل يمكن اكثر .. بس حنا نتمنى الهلال على احسن صورة فلما شفناه في وضع تنازلي حطينا ايدينا على قلوبنا وخفنا ان تقتل فرحتنا برجوع الزعيم مرعبا للفرق ..بضياع البطولات... فياعزيزي لايذكر في التاريخ الا من حقق البطولة وحنا مانرضى الا بها !!
حنا نبغى نقد واقعي ... نبغى كلام يفيد الفريق فعلا في هالفترة الحرجة .. الادارة زي ما انت تعرف مطلعة على النت .. وايضا كثير مما يكتب على النت يصل بطريقة او باخرى الى الصحف وبالتالي يكون له تأثير غير مباشر على وضع الفريق النفسي والفني
لما ننتقد لاعب مثل ديسلفا .. لا ننتقده لاننا نكره الهلال مثلما احس انك تفكر اخوي تغيب الشمس .. ولكن ننتقده لاننا نشوف في خيالنا ديسلفا يضيع علينا فرص الفوز في نهائي الدوري مثلا .. فلذلك نشوف انه من الافضل للهلال انه يبعد هذا اللاعب عن التشكيل ... ولما ننتقد باكيتا اللي مدحناه قبلها كثير .. ماننتقده الا لاننا نشوف انه اخطأ ونبغى هالخطأ يتعدل قبل لايطيح الفاس في الراس !!
اما انت اخوي تغيب فكل شيء تحطه على راس الجماهير وعدم حضورها .. انا معك الجماهير مقصرة .. لكن لو تذكر مباراة المربع العام الماضي ضد الاهلي كان فيها حضور كبير جدا جدا ... وما النتيجة ؟ اكبر واقسى خسارة للهلال في تاريخه وضياع بطولة الدوري
وايضا مباراة الاياب امام الاهلي في نصف نهائي ولي العهد كان فيها حضور ربما هو الاكثر في الملاعب السعودية العام الماضي و ما النتيجة ؟ خسارة وخروج من كاس ولي العهد :sad:
مو معناها ان حضور الجمهور غير مؤثر ... الا مؤثر ونص .. لكن الاهم هي حالة الفريق الفنية وهي اللي تحدد بشكل اكبر مقدرته على تحقيق الاهم ... وهي اللي نبغاها في احسن وافضل حالة مثلما كان الفريق الى مباراة الاهلي في الدوري وبعدها بدأ المستوى ينحدر من مباراة الى اخرى بشكل يخوف ويجعلنا نتكلم وننتقد بشكل واقعي لكي نشارك في وضع حل للفريق ... بدل ان نتكلم باسلوب جمال عبد الناصر ولا الصحاف ;) ونخالف بشكل صارخ الواقع اللي جالسين نشوفه
اخيرا ...اخوي تغيب الشمس صدقني وبدون زعل .. كثير ما تكتبه بعد المباريات الاخيرة للهلال من الكلام العاطفي المخدر والبعيد عن الواقع (على الاقل من وجهة نظري !) يستفز البعض وانا منهم
.. وانا مو من حقي اقول لك اكتب كذا او لاتكتب كذا .. فانت حر والمنتدى للجميع لكني حبيت اعطيك رايي الصريح يمكن يكون فيه فايدة .. واتمنى انك ماتزعل مني فكلنا اخوان واللي يجمعنا كثير ولا يفرقنا الا اختلاف بعض الآراء
آسف على الاطالة
كل الاحترام لك وللزعماء الملوك
[/align]