#1  
قديم 04/05/2001, 06:50 PM
زعيــم جديــد
تاريخ التسجيل: 02/08/2000
مشاركات: 30
قال نزار قباني " لحن حزين .... لحن فرنسي الرنين "

وأتيت لأكمل العزف .... على جراحات الزعيم .

هذاالموضوع بدون مقدمات ماهو الا جري في مساحات الكيان الهلالي الشاسعة :

لاحظوا وضع الهلال من يوم جا الامير تركي بن سعود مع احترامي الشديد له كانسان مخلص للنادي ومحب !

مانقول فيه شي ... الرجال مجهد ومتحمس ولكن ..... على حسب امكانياته وقدراته وخبرته الادارية!


اجل هذا مدرب يجيبه ؟!! انا حاولت والله حاولت بس عجزت افهم وش شايفين فيه ؟! ماله تاريخ وسجل تدريبي يتعنز عليه .... قالوا مو مهم لكن عنده اساسيات تدريبية وفكر كروي وشخصية تبي تساعده ..... ولا شفنا لا اساسيات ولا فكر ولا شخصية !!

تراها هي ست مباريات فوز قبل ايران .... وبح !

ولو قستوها مضبوط تجدون انه - في الغالب - عبر تاريخ الهلال اذا صار المدرب جديد يشعلل الفريق اول الوقت وبعدها اما يرسي على شعللته ولا يطفي .... والواضح في حالة هالمدرب ان الفريق طفا عقب الست مباريات .


مبارة الصفاقسي الشوط الثاني ..... مباراة الهلال يوم الاربعه ..... مباراة الاتحاد .... مباراتي النصر <<<< هالطقه كلهن ترا اللي كان مشعلل اللعب ومضبطه هو روح الفريق الهلالي المعروفه عنه اللي تطلع وقت الشدايد بس .... ومع ذلك اغتال المدرب بتشكيلته العقيمه وتغييراته السقيمه هذي الروح كما شفنا في مباراة النصر الأخيرة بشكل خاص !

الكاتو وش سنعه والله لو يعطونه شروخ ومبسط جنب نوير انه بيكسب النادي ذهب على الاقل من هالمطافيق اللي بيجون يشترون منه بس عشانه محترف وبرضو نكون طبقنا نظريات المدلج عن الاستثمار في النوادي


البلنتي حق الكاتو لو كان حسين العلي مكانه كان تلقاه مشبك الكورة في الباب وناطن من فوق كنج الغفلة وتاركه يتسدح كعادته بينما العلي واللعيبة عند مدرجات الدرجة الثانية يعانقون امواج الجماهير ويشعلون الفرح في تلك الجموع التي ازدحمت من الدرجة الثانية وحتى المنصة ( بينما شاهدنا في الجهة المقابلة كيف برزت الوان الكراسي الفارغه في كل ما تحت الساعه من مساحة ) .




حسين العلي لاعب قناص شاب اثبت حساسيته العالية تجاه هز الشباك ويبي يثبت وجوده اكثر وخاصة في مثل هالمباراة المصيرية ..... يقوم يدخل الكاتو اللي ماضيع فرصنا في الذهاب ... وقدام الاتحاد الا هو ؟؟


بالاضافة الى ملاحظات الأخ هتان التكتيكية اللي اعتبرها شخصت الحالة المأساوية اللي كان يعيشها الزعيم بين يدي مدربه حسبي الله عليه وعلى من جابه .. وعلى من أصر انه يستمر رغم اخفاقاته وتواضع مستواه

واليكم ملاحظات الاخ هتان اللي تبون تلقون انها ملاحظات في محلها فعلا :

"الابقاء على ثلاثي دفاعي بحت مثل الغامدي والمسعري وتوليو في مباراة مطلوب فيها اهداف ماكان تصرف سليم من المدرب والمدرب لاشك انه قدم فريق مرعب ويكفي الهلال الآن لو جا مدرب آخر اكثر حظ من هالمدرب أخذ جميع البطولات ويكفي سعود بن تركي صفقة توليو هاللاعب انا معجب فيه جداً ولايهون خميس العويران بس راحت عليه الخانه مادام هالذيب يلعب .. وفيه ثلاث لاعبين بس يتم ابعادهم ويصير الهلال بخير وهم المسعري ولطف والنزهان والبحث عن ظهير ايسر بشكل جاد ولاهو معقول ثلاث مواسم وعشرين بطوله يدخلها الهلال بدون ظهير ايسر ..!! وبالنسبه لروني فاعتقد ان ثمان مباريات حاسمه ومهمه ماقدم خلالها شي وانا اشوف الكاتو افضل واخطر منه سواء في خط الثمان طعش او تحركاته .. الثنيان حاول ولكن ماكان معه نص يسانده ويد وحده ماتصفق ،، الثنيان يعطيها المسعري والمسعري يرجع الكوره للشريده .. هذا لاعب النص .. الله يذكر محمد لطف بالخير يوصل نص الملعب بالكوره ويرجعها لاحمد خليل ولا الشريده ،، والنزهان يستلم الكوره من الدعيع ويروح يعطيها الحارثي ويرجع مليون ويقطع الكوره ويرجع يعطيها هالمره الداوود ويرجع مليون وانتهت المباراة وهو ماشي الفين كيلو متر في المباراة ..!!
انا ماهاجم هالثلاث لعيبه لكن لعبهم انتهى زمانه وحرام ياخذون مركز على حساب غيرهم وعبدالله سليمان منتقل بمليون وراتب عشرين الف واحتياط ،، طيب ليش مالعب ظهير ايسر بخبرته الدوليه ،، وين ادارة الكره ..!!
وفيه خطه اسمها 3 /5 / 2 ممكن تلعب بدون اظهره من الاساس ويكون المحور مع السنتر ماسكين الظهير ..

قـف ونـاظـر ..




في مكالمة شخصية جرت بين شخص اعرفه معرفة وثيقة مثل واحد من اخواني وبين فهد المصيبيح ... ذكر المصيبيح انهم جميعا لعيبة واعضاء شرف واداريين غير مقتنعين بالمدرب ولكن تركي بن سعود هو اللي راسه والف سيف مايروح !!

وقبل ايام في لقاء معه في جريدة عكاظ قال سعود بن تركي : لو الغينا عقد المدرب الآن فسيصبح هو كبش الفداء وليس التحكيم !!

ماذا نسمي هذا الموقف اذا صدق كلام المصيبيح ؟؟؟

انا اسميها : مكـــــابرة وتخبط اداري وسوء تصرف .

وماذا تسمي هذا التصريح ؟؟؟

انا أسميه – واعذروني - : ضحك على الدقون واستغفال للجماهير .

ياناس هاذا الزعيم .... أفضل فريق آسيوي .. هذا اللي رفع راس ديرتنا في كل مكان ليس بالنتيجة بل بالمستوى الباهر ايضا .

كل شي بكفة ومباراته مع شيميزو بكفه .... عالمي عالمي عالمي قبل ان يصل للعالمية .

وقبلها جابيليو وقبلها ناغويا ....واذا رحت غرب لم افريقيا على طول يبرز لنا الترجي التونسي وكيف تلاعب الهلال بافضل فريق افريقي بعيادي الحمروني والهادي بن رخيصه رحمه الله وشكري عيّاد << حارسهم مدري اسمه كذا ولا انا حقت الدعوى


واذا رجعت ورا برز لك اسم منتخب الرشيد العراقي مو فريق وبس لانه كان يضم 9 اساسين في منتخب العراق ( فريق عدي بن صدام وش ظنكم بيصير ) هع

ونتذكر ان الهلال هو الفريق العربي الوحيد اللي قدر يهزم هالمنتخب .

تجي عام 1412 وتلقا الهلال مهزوم من الطائي باربعه ومن القادسية بثلاثه الظاهر .... صالح النعيمه توه معتزل .... راس حربه ماكان فيه الا يوسف جازع ومشاري العويران والفيلسوف وراهم .... حسن نمشان قلب دفاع وجه جديد توه ماله الا كم اسبوع وصار تواجده في ظل ارتباك الدفاع بعد غياب ابو فهد .. وفي الحراسه الاسد حامي العرين الهلالي : خالد الدايل . والمدرب كان مين ؟؟ عمر ابوراس .. مدرب ماسمعنا عنه ولا نعرفه ولكنه شايب ... خبره وبانت خبرته لما قال للثنيان : الفريق له خطه وانت يالثنيان حط خطتك بنفسك والعب بالخانة اللي تبيها وشفنا النمر يناقز من يمين ومن يسار وشال الفريق وجاب احلى هدف في الاستقلال من فاول عند الركنية بعد ماراح الفرق للكويت وكل الجماهير حاطه يدينها على قلوبها خايفه من الفريق المرعب الاستقلال الايراني .... وطلعت روح الهلال ... ودعمها المدرب بتوافقه مع هالروح وفاز الهلال باحلى بطولة .

وندور شوي وتطلع لنا مباراة الهلال والعربي الكويتي في البطولة العربية الاولى اللي نظمها النصر ولهفها الهلال .... تلك المباراة اللي انطرد فيها أحمد بهجا من العشر دقايق الأولى ... ولكن الهلال بمن حضر <<< عز الله انه هو اللي طبقها صح .

وادهر الذيب سامي وفاز الهلال ثلاثه صفر او ثلاثه واحد وسامي جاب الاهداف .بس من كان المدرب ؟؟؟ اوسكار ياعمري على هاكالخشه بس

المدب المبدع يتألق في الخطه وتنظيم الفريق ، المدرب الجيد لو فشلت خطته ورأى اللاعبين متداركين الوضع ومتفادين الهزيمة بروحهم العالية مايتدخل ويخرب بتغييرات فاشلة تنبي عن افلاسه وفشله مثل ماشفنا في مباريات الهلال الأخيرة .


تجون بعد كذا تقولون ان مدرب الهلال حاليا مدرب قدير وجدير ؟؟؟ !!

اسمحوا لي اقول لكم : لاتعليق !!!



زعـيـم الـزعـيـم





ومن كان الرؤساء ؟ عبدالله بن سعد الله يرحمه .... خالد بن محمد ونواف بن محمد ( شراكة ) بندر بن محمد <<<< ياحبي له هذا والله اللي تحس انه دمه ازرق يكفي وقفته خلف المدرسة الهلالية كل هالسنين اللي مضت بعيدا عن الاعلام والأضواء .

وبكذا نلف نلف ونرجع لتركي بن سعود اللي ما احسن التصرف يوم شاف وش صار لنا في ايران ... وفي سوريا بعد .... الا اذا كان فرح بالشوط الواحد والبطولة ونسى ان الهلال ماقدم اللي يشفع له انه ياخذها وانه لو النصر سجل ذاك البيلنتي كان ماشميناها يعني بالعربي الفصيح : مالادارة الهلال ومدربهم منّة ... وكان المفروض انهم يعترفون بالوضع اللي صاير ويصلحون الأخطاء لكن وش نقول غير حسبي الله ونعم الوكيل .


هذا الكلام الواجد اللي فوق ليس عشان خسارة تأهل لنهائي لا والله .... ولكن ولادلل على كلامي يمكن يذكر بعضكم موضوع كتبته قبل مايقارب ثلاث شهور كان عنوانه " من امي واخوي .... الى فيدل كاسترو والهلال " وتكلمت فيه كلام كثير مثل كذا حتى فيه بعض السوالف تكررت في الموضوعين دون تعمد ... ولكن لان الظرف والموضوع يتطلب ذلك ..

الشاهد اني اكثرت في ذلك الموضوع من ترديد " الله يستر الله يستر " وتلك الأيام كان تركي بن سعود ماله فترة بسيطة ماسك الهلال ... واتهموني بالتشاؤم ودعوني الى التفاؤل .. اقول لهم الآن وش ضركم لو دعيتوا معي ان الله يستر ؟ هذا على أقل تقدير والا فقد كان المفروض التحرك ولو بصورة جماهيرية من اجل تدارك الأوضاع اللي ماكانت واضحة انها سيئة ولكنها كانت سيئة فعلا وكان فيه قلائل حسوا بخطورتها ولكن العين بصيرة واليد قصيرة ) .


وهنا أحب أن أشيد برأي طرحه الكاتب المتميز الأخ DOUB حيث اقترح استغلال تجمعنا هذا لايصال صوتنا الى ادارة النادي وتنفيذ رغبات الجماهير فلسنا بالجهلة ولا بالسطحيين نحن جمهور الهلال الذي اشتهر عنه الوعي والعمق والقوة الا اذا كان لادارة النادي رأي آخر في امكانياتنا وآراؤنا !!! وإلا اذا كان نادي الهلال أصبح نادي الرجل الواحد كجاره الذي ضحكنا عليه كثيرا !!

البوادر تشير الى ان رئيس الهلال ينوي انهاء المدرب بعد انتهاء بطولة السوبر مع الاسماعيلي المصري ..... لماذا ؟؟؟؟

ليس هناك وقت لاحضار مدرب جديد لن يفهم اللعيبة والفريق .

ويقول أحد الأخوة الاسماعيلي فريق سهل .


ما اختلفنا حتى النصر فريق سهل ولكننا لم نستطع الفوز عليه لماذا ؟؟؟

المدرب عقيم ومفلس وفاشل ولو شالوه الحين وحطوا أحد المدربين الوطنيين بيكون الوضع مطمئن أكثر الدرب الوطني بيرفع الروح المعنوية للاعبين بتخلصهم من مدرب عجزوا عن الانتاج والابداع معه .

المدرب الوطني لن يلعب بتشكيلة غبية ولن يغير تغييرات غبية .

الا تعد السوبر بطولة يحرص الهلال عليها ياسمو الأمير ؟؟؟

أم ان ادارة الهلال تعودت التفريط بالبطولات ؟؟؟

سياسة الادارة الحالية لا تفرط بالبطولات فقط ولكنها تفرط بسمعة الهلال ومجده الذي بناه عبر سنين طويلة وبعرق اجيال من اللاعبين والرؤساء .

بطولة كاس العالم جايه وهذي اللي انا كنت قاعد اقول الله يستر الله يستر من ثلاث شهور عشانها


هل يستمر الحال كما هو عليه ؟؟؟؟

هل يتصرف تركي بن سعود ويتحدى نفسه .. و قلة خبرته وضعف قدراته الادارية ؟؟؟


هل بالامكان ان نشوف مدرب في طموحات الزعيم ؟؟؟

لاعب اجنبي واحد في طموحات الزعيم ؟؟؟


زعيم في طموحات الزعيم ؟؟


الله يستر





سيدي الفاضل نادي الهلال زعيم الأندية .... سمو الأمير سعود بن تركي .... جماهير الهلال الوفية ... هل قسوت في كلامي ؟؟
انما قلت الحقيقة التي أحسها قلبي المليء بحب الهلال ورجالاته وجماهيره والامير تركي بن سعود احدهم . نعلم بهلاليتك الصميمة ياسمو الأمير ونعلم أ نك عضو شرف قديم في الهلال ... ولذلك فأنا متأكد ان كلامي هذا وان كان فيه شيء من القسوة فهو سيدخل الفرح الى قلبك وقلب كل هلالي لما يحمل من حب واخلاص للهلال .

وأظننا متفقون ان الهلال يأتي في المرتبة الأولى .... ثم نأتي بعده .

وآسف على الاطالة .


  #2  
قديم 04/05/2001, 06:59 PM
زعيــم جديــد
تاريخ التسجيل: 22/04/2001
مشاركات: 5
عزيزي الدباب
اشكرك كثيرا على هذا الموضوع وهناك موضوع اخر يكمل موضوعك موجود الان وهو نحومشاركة هلالية عالمية افضل امل ان تقرا الموضوع
  #3  
قديم 04/05/2001, 08:34 PM
زعيــم نشيــط
تاريخ التسجيل: 16/11/2000
مشاركات: 567
هلا بأخوي الدباب موضوع رائع كعادتك الله يعطيك الف الف عافيه يارب الأمير سعود مجتهد والله يكون في عونه هذا اللي أقدر أقوله الحين ولكن هناك تخبطات كثيره في النادي تبداء من أعضاء الشرف اللي ما صرنا نشوفهم إلا في الصحف إلى رائيس النادي اللي مو قادر يتخذ قرار و ينتبه للنادي إلى المصيبيح وعدم التنظيم وافهتمام وراء مصالح اللاعبين و ألإلتفات للخصميات و الحسومات و إلى اللاعبين والغرور والدلع الزائد الهلال يحتاج غربله كامله من .. إلى .. و ما أقول لعل الله يكتب الي فيه الخير ومشكور يا بعد حيي
  #4  
قديم 04/05/2001, 08:43 PM
زعيــم جديــد
تاريخ التسجيل: 02/08/2000
مشاركات: 30
هلا بكم

اخوي الحارق /

العفو يالغالي وقرأت موضوعك ورديت عليه


عواكيس /

هلا بك ياجدي

الله يعافيك وتسلم هذا من زود روعتك


كلامك في محله وخاصة عن أعضاء الشرف ولكن ماهو السبب في نظرك ونظر الأخوة ؟؟

ليه ماكنا نشوف مثل هالمظاهر في عهد السابقين من الرؤوساء ؟؟

لاتنسى انهم أعضاء شرف ... وليس عضو شرف واحد ... وليس معقولا ان يكون هناك تواطؤ في المسالة فرجالات الهلال أكبر من هالحركات .


هل هو عدم ثقة في الرئيس الشاب ؟؟

أم ان تصرفهم ردة فعل لأشياء رأوها وأحسوها ؟؟


  #5  
قديم 04/05/2001, 08:52 PM
زعيــم متألــق
تاريخ التسجيل: 14/01/2001
المكان: الرياض
مشاركات: 1,317
Thumbs up

انت كذا انت وموضوعك
  #6  
قديم 04/05/2001, 09:36 PM
زعيــم فعــال
تاريخ التسجيل: 13/04/2001
المكان: قلوب الهلاليين
مشاركات: 224
تسلم يمينك يالدباب < حتى لو كنت تكتب باليسرا ههههههه> موضوع رائع بالفعل لكن يقول المثل كلام بالماضي نقصان بالعقل اهم اهم اهم شي هالحين السوبر السعودي المصري لازم ناخذها لانه اولويه جديده والسنه الجايه الاتي لازم يشارك بالسوبر الكاس والدوري < بعد اسبوع> اذا فاز ان شاء الله يخلون النصر كالعاده يشارك < الثاني > وشف وش يصير
  #7  
قديم 04/05/2001, 11:06 PM
زعيــم جديــد
تاريخ التسجيل: 10/04/2001
مشاركات: 39
لامكان للكذب والمزيفيين بيننا !!
[عدلت بواسطة ادارة الموقع التاريخ:05-05-2001 الساعة: 02:55 AM]
  #8  
قديم 05/05/2001, 12:00 AM
زعيــم نشيــط
تاريخ التسجيل: 16/11/2000
مشاركات: 567
هلا والله بالدباب والله يأخوي ما ندري وش قاعد يصير بين الأعضاء المسأله كبيره جداً الأمير خالد بن طلال بعد مداخلته في مقابلة عبدالرحمن بن سعود اختفى هل معقوله أعضاء الهلال بندر بن محمد وعبدالرحمن بن مساعد وعبدالرحمن بن سعيد وهذلول بن عبدالعزيز؟؟؟ وين الباقين وش صاير الله أعلم معقوله بطولة النخبه أهم من بطولة السوبر البطوله المؤهله لكأس العالم ما يفرحون فيها لا مكافأت ولا هم يحزنون خالد بن الوليد العشق الهلالي وين أختفى والله بالدباب اشياء كثيره قاعده تصير و تخبطات الله بها عليم و ما نقول غير حسبنا الله ونعم الوكيل
  #9  
قديم 05/05/2001, 12:08 AM
زعيــم جديــد
تاريخ التسجيل: 02/08/2000
مشاركات: 30
ياهلا بكم

9smsm9 /


تسلم لي يابعدي ماعليك زود

الفارس الأبيض /


اللله يسلم يدينك الثنتين

وكلامك صحيح لازم نهتم بالسوبر لان الهلال ما تعود يفرط بالبطولات


كوميدي /

تسلم اولا على كلماتك في شخصي وفي حق جماهير الهلال يابعدي

لكن انا اخالفك الراي في مسألة ترك سعود بن تركي للرئاسة وخاصة في هذا الوقت ..

نحن في وقت الآن اكثر مانحتاجه هو لم الشمل وليس تفريقه ومساندة الزعيم بالآراء والمقترحات المفيدة كما اشرت في كلامي عن موضوع الأخ DOUB

وقد وضعت هناك بعض المقترحات التي تتلخص في الآتي :

اعتقد ان أهم ثلاث نقاط يجب الالتفات اليها الآن وهي مرتبة حسب الاهمية :

1- المدرب يجب تفنيشه قبل مباراة الاسماعيلي ... يجب اننا مانفرط في بطولة السوبر لانها بتكون دفعة معنوية قوية بعد الانكسارات اللي صارت .


2- أعضاء الشرف ووضعهم اللي مايسر وأعتقد كلنا ملاحظين البلبلة اللي صايرة في أعضاء الشرف أعتقد ان هذا دور الامير سعود بن تركي لابد انه يعرف كيف يحتويهم ويعيدهم للنادي وللعمل بصورة منظمه .


3- لاعب اجنبي يليق بمكانة الزعيم واذا ماصرفوا فلوسهم الحين متى بيصرفونها ؟؟ واذا ماعندهم فلوس الجماهير الهلالية ماراح تقصر لو كل مشجع هلالي يدفع عشرة ريال واحسبوا انتم كم عدد الجماهير الهلالية الوفية ويتم ذلك عن طريق فتح حساب خاص في البنوك الكبرى .


اما بالنسبة لكلامك عن عضوية سعود بن تركي فهذا كلام خطير لا يمكن ان نقبله بدون اثبات ودليل !!!

وان كنت متأكدا انا ايضا من مصادري التي قالت لي انه عضو شرف قديم في نادي الهلال








  #10  
قديم 05/05/2001, 06:28 AM
زعيــم جديــد
تاريخ التسجيل: 02/08/2000
مشاركات: 30
هلا عواكيس

هلا عواكيس آسف جدا ما انتبهت لردك لانه جا بعد ردي


فعلا وضع الهلال الآن ما يسر

شفنا كيف في النصر رجعوا المحنطين بس عشان مباراة الهلال !!


والهلال مقدم على بطولتين مهمتين والوضع كل ماله يزداد سوء

الله يستر

ولكن انشالله كلنا امل في ماهير الهلال انها تقدر تغير بكلمتها الاوضاع .

  #11  
قديم 05/05/2001, 07:39 AM
زعيــم مميــز
تاريخ التسجيل: 04/09/2000
المكان: الـريـاض - الـبـديـعـة
مشاركات: 1,721
Thumbs up الزعيم هو من يصنع المدربين !!!

اهلين وسهلين اخوي الدباب مساك الله بالخير ....والله كلامك لا غبار عليه اطلاقاً....ولكن المدرب باذن الله انه ماسك الباب يعني ماسكه بعد مباراه الاسماعيلي !! اما تقول لي ليه بعد مباراه الاسماعيلي !؟ علمي علمك !!! ...


تحياتي & اشواقي

  #12  
قديم 05/05/2001, 09:09 AM
زعيــم مميــز
تاريخ التسجيل: 30/12/2000
مشاركات: 1,874
Cool



دااااااااااااااايم مبدع عزيزي{الدباب} والله كلالالالالام يجمد على الحااااااجب قصدي الشارب ..... .
كذا المواضيع والا بلالالالالاش .
والله يستر على هلالنااااااااااااا من اللي جاااااي.. .
وبصراحه لو يشوووووف الهلال {الخراشي} اصرف من الف والف مدرب اجنبي...{الخراااااشي} مافيه عيب... .

  #13  
قديم 05/05/2001, 01:55 PM
زعيــم جديــد
تاريخ التسجيل: 02/08/2000
مشاركات: 30
هلا بكم

جابر عثرات الهلال /


تسلم أخوي وانشالله يعوضنا الله باللي خير منه .


نايف /


تسلم يابعدي هذا من ذوقك بس

وكلامك صحيح لو مو الخراشي ... لو يحطون السلومي انه أصرف بدل هالمتدرب
  #14  
قديم 05/05/2001, 03:59 PM
زعيــم جديــد
تاريخ التسجيل: 18/12/2000
المكان: الزعيم
مشاركات: 48
انا أسمي مكتوب؟؟.....طه

اخوي الدباب ... جهد ولا أروع الله يسلمك ويخليك لنا وهالمواضيع الحلوة .

فخر لي استشهادك بوجهة نظر لي سبق وتناقشنا فيها

سبحان الله ويداك تخط هذا الموضوع ..... نفاجأ بإصابة في مقتل (الله لا يقوله) بإبتعاد أحد رموز الهلال (الأمير هذلول) بسبب خلافات إدارية !!

.
.
.

لا يسعني الاّ ان اقول : ما أضيق العيش لولا فسحة الأمل
  #15  
قديم 05/05/2001, 08:50 PM
زعيــم جديــد
تاريخ التسجيل: 02/08/2000
مشاركات: 30
هلا بالدب

الله يسلمك يادب هذا بس من ذوقك

وبالنسبة لموضوعك فهو موضوع مهم وخاصة في هالوقت ..

واستقالة هذلول بن عبدالعزيز لازم تكون دافع لنا لتفعيل الفكرة لعى نطاق واسع ..

ملينا من الانتظار يا دب

لكن نرجع نقول الله يستر
   

 

أدوات الموضوع
طريقة عرض الموضوع

قوانين المشاركة
غير مصرّح لك بنشر موضوع جديد
غير مصرّح لك بنشر ردود
غير مصرّح لك برفع مرفقات
غير مصرّح لك بتعديل مشاركاتك

وسوم vB : مسموح
[IMG] كود الـ مسموح
كود الـ HTML مسموح
Trackbacks are مسموح
Pingbacks are مسموح
Refbacks are مسموح



الوقت المعتمد في المنتدى بتوقيت جرينتش +3.
الوقت الان » 07:15 PM.

جميع الآراء و المشاركات المنشورة تمثل وجهة نظر كاتبها فقط , و لا تمثل بأي حال من الأحوال وجهة نظر النادي و مسؤوليه ولا إدارة الموقع و مسؤوليه.


Powered by: vBulletin Version 3.8.7
Copyright ©2000 - 2024, Jelsoft Enterprises Ltd

Google Plus   Facebook  twitter  youtube