مرحبا بالجميع مرة ثالثة ..

أشوف الرمي زاد :( والله يستر لا يجيني شيء في هاللقاء :sweat:

والله يا فيه ناس ودي أطلع لهم مع الشاشة مثل هذا .. :lamo:

المهم نرجع للأسئلة وبسم الله نبدأ ..:)


بو وليد
هلا والله براعي البالتوك ..بس من اللي علمك باللقاء :D ..

خذ راحتك باللي تبي .. :wallbash:

ما يبي لها كلام ذي .. عندك كيفي كويتية وحبي تيماوي وما شاء الله بعد الفيروسة :wallbash:

ولا يهون اللي يبي اسم أمي ..:mad:


لو أملك معرفة السسب والحلول زينتها .. لكن من جد ما أدري وش المشكلة .. :confused:

عاد لو تاخذ أي جولة في أي منتدى في النت - تعرفه من قبل - تلقاه أقل من المستوى السابق !! ما أدري ليه مستوى المنتديات كلها تقريباً قل بدرجة كبيرة ..!!!!


ألف شكر لك يا أخوي على المشاركة وبالفعل شرفتنا يالغالي ..:)



فتى القصيم
هلا والله بك يا ولد ديرتنا :)..

تصدق ودي عاد أنقزك على باقي الشباب بس خفت يقولون واسطة .. :rolleyes: <----- الله من وسع الوجه :D

شف عاد .. النوم الشيء الوحيد اللي ما يحكمه مكان محدد !! بس بشرط تكون والفت المكان .. :sleep:


يوه شكلك من حقين منول اللي لازم يوقفون ويغير زيت ويشيك على الكفرات ويعبي بنزين في أول محطة ..!! ما أدري ليه ما يضبط أموره من بدري :D ..

لكن عاد تصدق إن الواحد يرتبط بمحطه معينة وتلقاه دايم يمرها :D عندك مثلاً " خط القصيم " و " فيحاء العتش " و الحين طايح في اللي فيها كفي شوب أظن اسمها البساتين .. :)

عاد وش تشتري .. مايبي لها كلام نفرين بخاري مع الدجاج .. :rolleyes:


بصرفها ريالات وأعطيك إياها عشان تعدها .. :D


أنصحك إنك تتركها لأنها ما توكل عيش :D إن بغيت تسرق عليك بالذهب تراه مربح :rolleyes: ..


الله يذكره بالخير ..:) من اللاعبين القلائل اللي تحس إنه يحترم الشعار اللي يلبسه ويحترق عشانه ..:)

لكن عاد يوم قال إن العين هو الزعيم .. اعتبرها كبوة ..:(


عكس اللي قلته في اللي قبل :D ..

من جد خالد عزيز الموسم قبل الماضي وأول الموسم الماضي من أفل اللاعبين في الهلال .. لكن من نصف الموسم اللي فات وهو ما أدري وش جاه ..!! حتى إن مستواه انحدر انحدار لدرجة إنه انقلب :D ..


تصدق عاد .. من أفضل الطلاب اللي مروا عليّ نصراوي !! صح إني حاولت اقلبه هلالي لكن ماش :D ..

بس يظل أفضل طالب مر عليّ حتى الآن وله منزلة كبيرة في قلبي وكم تمنيت أن بحثت عن طريقة للتواصل معه فهو تخرج من عندنا وأنا نقلت في نفس السنة ..:( والله يذكره بالخير ويوفقه دنيا وآخره ويحرسه من العين ..فالطالب اللي يدرس (( للعلم )) ثم المستوى يندر وجوده في هذا الزمن ..!!:no:


على قوسيتي :D .. وماهوب على كيفهم :bluesky: ..


علي الدحيم .. :D الله يذكره بالخير ..:)

اما موقفي .. فهو والله بقولهم ترى بنده أرخص :D .. وأكيد إني بعزمهم عند مطعم النور :D ..


البدائع / ديرة الاهل والأجداد هي الماضي والحاضر والمستقبل ..:)

البروستد / البيك ..وغيره لا تسميه بروستد :D ..

فصفص باجه الرطب / عاد ترى الفصفص بأنواعه مانيب راعيه وتاصل لدرجة إني ما أحبه :nono: ..

تفتيش ام سدره / امش 100 قبل ما تاصلهم بـ12 كيلو ويمكن تسلم :ranting:

علي يزيد / أحسن واحد يخلفهم برقم 9 .. :D :laugh:


وشرفت ولا كلفت .. ولا عمرك تعودها ..:)



معذبهم

يا هلا والله بك يالغالي ..:)

اولاً أشكرك على كلامك الحلو وهذا والله من طيب معدنك يالغالي ..والله يعطيك العافية ..:)

ثانياً مانيب قايل لك اخلص .!! بالعكس كثر من مدحي ولا تسأل .. :D

التفات .. يحاول يقز اللي بجنبه .. مسوي فيها ذهين .. :D كل ذولي مرت علي .. لكن عاد براشيم أو شيء كذا .. لا !!

تراني مرعب لو شفت .. :rolleyes:


ما شاء ا لله .. أنت اللي مفروض ينصحنا ..:)
لكن لو تكثر من تواجدك في المواضيع .. يعني تكتب مواضيع أكثر كان يا سلام ..لأنك بكل صراحة قلم مميز وله نكهة خاصة ..:)


إيييه كقصة طويلة !!كنت ذاك الوقت ما أدري وش السالفة ومشكلتنا إن فيه ناس تزين لك كل شيء .. :rolleyes:

<---- انت قلت قصتك مع المخدرات وإلا الزعيم .. :D

والله عاد كانت البداية إني في شهر رمضان ( يوافق أواخر عام 2000 ) قال لي واحد من الأقارب إن فيه منتدى خاص بالهلال وأخباره ولهم تغطيات خاصة وإنهم بحاجة لواحد يغطي لهم في الشرقية .. انا قلت ما عندي مانع أهم شيء نخدم الهلال ..:)
طبعا انتظرت لبعد العيد يوم رجعت للشرقية بداية الدوام سويت بحث لشبكة الزعيم ولقيتها وسجلت باسم البارق صار رايح زودت 2000 لأني مرتبط بالاسم ذا في منتدى آخر ..:) وتم قبول تسجيلي ..:)

عاد جلست لي فترة طويلة عشان يتفعل اليوزر ..:( وبعد ما تفعل كنت أشارك في منتدى الجمهور كردود ( وما كان فيه الا ذاك المنتدى ) بعدها افتتح منتديات أخرى هي الكمبيوتر والعام والرياضة العالمية ..وأنا مستمر بالمشاركة في الجمهور فقط ..

حتى بدأت بكتابة موضوع ( احلى كاريكاتير لأحلى صباح ) كل يوم قبل الدوام .. وكنت أكتبه بمنتدى الجمهور .. وكان الهدف إن الجماهير تشاهد لها كم كاريكاتير في الصباح ..:) المشكلة كنت إذا رجعت من الدوام ألقى الموضوع منقول للمنتدى العام ..:( وأنا ما أدري وش السالفة :D

حتى أرسل لي المشرف ذاك الوقت ( أبو ناصر ) الله يذكره بكل خير يطلب إني أنزل الموضوع في المجلس العام مباشرة ..انا قلت له طيب خل الموضوع إلى الظهر في الجمهور بعدين انقله .. لكن أبو ناصر إلى اليوم مارد علي :D ..

ومشيت على رأيه وبديت اكتبه في العام .. عاد لقيت شله في المجلس العام إنما إيه :D كأنهم أسرة واحدة ..:)

استمريت في المشاركة في ذلك الموضوع بشكل يومي إلا في شهر رمضان أتوقف ..

حصل ما حصل من انسحاب لبعض المشرفين من ضمنهم مشرفي المجلس العام في رمضان عام 2002 وكنت في نهاية الأسبوع في الرياض.. وقبل المغرب بعشرين دقيقة تقريباً كلمني واحد قال لي إنه سلمان العنقري .. طبعا أنا ما صدقت انه هو من جد :D لكني تأكدت إنه هو .. وعرض علي فكرة الإشراف .. شرحت له جميع الظروف وقال لي إنها ماهيب مشكلة .. وقال إن معك أبو سليمان وحبي تيماوي .. وهذا اللي خلاني أوافق خصوصا في ذلك الوقت الحرج .. والحمد لله عدت ذيك المرحلة على خير ..:)


أغلبهم لظروف عمل أو اشغال خاصة ..:)

عاد تراهم شيبان .. يعني المفروض يتركون المجال لأحفادهم .. :D

بس من جد .. والله لهم وحشة ووحشة كبيرة بعد ..:(


إيه هذا الخف ماهوب خف حبي تيماوي :D ..

شرفتنا يالغالي .. وألف شكر لك على هذه المشاركة ..:)



ريفيلينو

يا هلا والله بأبو شنب .. وأطلق شنب عرفته الملاعب السعودية ..:)

هههههههه ما دريت غنك مثل البعير ما تنسى :D ..
والله يالغالي ماهوب حقران لك ولا لغيرك .. لكن المشكلة في مثل هالمناسبات يكون الدخول للنت محدود جداً .. وبحكم الإشراف بيكون الدخول لقراءة المواضيع أهم شيء :( والمشكلة إن التهاني تكون كثيرة جداً وما يمديني ألحق عليها ..:( وصعبة ارد على ناس واترك غيرهم .. فأتركهم كلهم :D ..
وأنا معترف إني مقصر جداً من ناحية التهاني في المناسبات وكذلك الرد على المهنئين ..:(


بكل صراحة .. إيه ..:)
المشكلة في الزعيم كل ما تغيب تتذكرها وتفكر فيها أكثر ..:)


الحمد لله تواجدت مع مشرفين يتمناهم أي منتدى ..:) ودرجة التفاهم كبيرة جداً بيننا ..ولله الحمد ما قد مر عليّ مثل الموقف اللي تقول ..:)
عاد لو كان الجواب نعم .. هل تتوقع أنه من المصلحة إني اجاوبك هنا :D لأنها - إن حصلت - بتكون بيني وبين المشرف سواء بالهاتف أو الرسايل الخاصة أو حاقه تانية .. :D


ههههههههههههههههههههههههه
تصدق عاد إنها تونس <---- بيزيده قهر :D :D ..


مانيب راد عليك عشان ما يقول أحد ليه ترد على ريفيلينو بس .. :D

ألف شكر لك يالغالي .. وشرفتنا بالموضوع ..:)



مرسول الهلال

يا هلا والله بك أخوي الغالي ..:)

والله ما أدري هل فيه منتدى اسمه البارق أو لا ..؟!!

انا أقصد اسمي اللي سجلت في في منتدى قبل الزعيم كان : البارق ..:)


شاكر ومقدر مشاركتك وتشريفك ..:)


القاضي

أهلا ومرحبا بأبي عبدالله ..إنه لشرف كبير أن أرى هذا المعرف من ضمن المشاركين في اللقاء ..:)

جزاك الله خيراً على هذه الكلمات .. وصدقني أنني متأكد أن كل من يعرف القاضي أو يتابع كتاباته لا يرى فيه إلا كل خير.. وتجده مجبوراً على امتلاك الاحترام لهذا الشخص ..:)

صدقني أن لك في القلب مكانه لا يعلمها إلا الخالق ..:)


هو أنت تذكر :D ..
لماذا لم تقل إنه حق لك تأخرنا كثيراً في اعطاؤك إياه ..:)


الحين ما دامك تدري عن كثر الأسئلة .. ورى ما تزهّل ببعضها .. :wallbash: على الأقل أسئلة الفيروسة .. :D

شاكر ومقدر لك مشاركتك أيها الصاحب ...:)



كيفي كويتية ( 2 )


والله مثل ما قلت للشايب أبو صلعة أقوله لك ..ولكم جميع العذر والسموحة ..:(


الحاتمي

هلا والله بك يالغالي .. والله يعينك على البنزبن .. :D

وش تصحيحوه :bigeek:
هذا تاركه من مدة .. لكني طحت بأشد منه ..:(

لا .. :D
بكل بساطة أدرس مرحلة ابتدائية وما أظن أحد له بالإنترنت .. وإن كان له فماله بالمنتديات :D ..


المحرج جداً هو إنك تتدخل في حقين صف أول .. :D يعني يمكن الطالب يرد عليك بقول : ماهوب شغلك .. أو وش دخلك :D

شاكر لك مرورك من هنا :D ..



ولي عودة لبقيـــة الأسئــــلة بمشيئــة الواحــد الأحـــد


تحياتي للجميع ،،،

نعود إليكم من جديد .. مع الاعتذار عن التأخر في الرد على الأسئلة لظروف المواصلات .. :rolleyes:

<----- الله من زين العذر .. :D

نجي للأسئلة والله يعين على الجواب ..:)

بسم الله نبدأ ..:)


كايدهم

هلا وغلا والله بالزميل ..:)

الله يجزاك خير ..:(

أحس إنه بيجيني صياح .. :cry:

بس والله أقدر اللي يحسون بالمعاناة .. وأقول للثانين وعدكم قدام ..:boxing:

والله يا أخي الغالي <--- قام يتفلسف .. :D
أقول يا اخوي والله حنا ما عندنا ربيع وإلا خريف نشوف من خلاله زين الجو ..يعني ما عندنا إلا صيف أو شتاء ..الحمد لله على كل حال ..:)

لكن عاد الشتاء لحاله ..يعجبني مرة :)..

وعندي نظرية هي إنك تقدر تلبس أكبر كمية من الملابس في الشتاء .. لكن في الصيف ما تقدر تخفف الملابس أكثر .. :rolleyes: <----- وش يبي ذا .. :D


مافيه غير اثنين .. الإنترنت وطلعات البر .. :D

يعني وش تبيني أقول ..التزلج على الجليد وإلا لعب القولف وإلا تسلق الجبال .. :confused: :razz:

لا ماهوب ممكن ..<---- الله من النجاسة :D ..
عاد تصدق إني جلست أفكر في هالسؤال فترة طويلة .. :confused: ما لقيت شيء إلا إني " هلالي " ..لأني تصورت لو إني ما أشجع الهلال وش راح أشجع .. فعلاً احترت .. :sleep:

على العموم الحمد لله ماشية أموري .. يعني الدراسة وخلصتها بدون مشاكل ولله الحمد .. توظفت في المجال اللي أبيه .. مرتاح بعملي ..ومرتاح مع زملائي وأصدقائي .. والله لا يغير علينا ..:)


بقولك لك شيء يا كايدهم .. رح إسأل سامي .. وقله (( ما هو سر حب الجماهير لسامي ؟ )) .. :D

<------ ماهوب مغرور أبد.. :D


يعني عرفته ..بعدين عرفت إنه في الزعيم وله يوزر ..!! هذي لا والله ما صارت ..:)

أو تقدر تقول إني قابلت ناس .. وقالوا انهم يكتبون في الزعيم .. لكن ما علموني بيوزراتهم .. ما أدري هل يسوون شيء حرام أو عيب .. :confused:

على كلٍ فيه واحد أعرفه من قبل زين لكن بعد ما تعينت انقطعت الاتصالات بيننا لمدة ثلاث سنوات تقريبا..:( وعرفته عن طريق الزعيم من خلال يوزر .. ولما تعرفت عليه وجدته خويي اللي قبل ..:)

الله يذكره بالخير ..:)


سلامتك وإلا دمتم طيبين .. :D

ألف شكر لك أخوي كايدهم على هالمشاركة الطيبة واللي زادت شرف اللقاء ..:)




الجبل الأخضر
وعليكم السلام..
يا هلا والله ومليون غلا بك أخوي عبدالله ..شرفتنا يالغالي ..:)
والله سؤال ما أدري وشلون أجاوب عليه .. :D

لكن جاوبت كايدهم قبلك .. <------ إلى الحين لاعب فيه الغرور .. :D

أنا ما أقدر أحكم على إني محبوب أو مكروه لكن ما أقول إلا الحمد لله ..:)


شاكر لك تشريفك يالغالي ..:)



مطزاز
الله يحييك ويبقيك يالغالي .. وألف شكر لك على هذه المشاعر الطيبة ..

والله يحييك أي وقت ..:)


Z3eeM_DC
يا هلا والله ومليون غلا بالزميل الجديد والنشيط ..:)

اللهم آمين يارب .. وشكرا لك ..:)

أنت تشوف !
لكن وش رايك أحذفها وإلا لا .. :D

ما أظن فيه شخص بيوقف عند حد معين ..!!
حتى إن الرسول صلوات الله وسلامه عليه قال : " لو أن عند أحد واديان من ذهب لتمنى الثالث " او كما قال صلى الله عليه وسلم ..وأنه لا يملأ فم ابن آدم إلا التراب ..:(
بالنسبة لي الحمد لله حتى الآن أموري كلها تمام والله يديمها من نعمة ..:)


وألف مليون شكر لك على التشريف يالغالي ..:)



الفيروسة الزرقاء

:mad:

يعني لو قالوا لك طبي بحفره .. تطبين .. :nono:

بس عاد أيهم اللي قال لك <---- صدق إنهم هم اللي قايلين :D ..

بسم الله الرحمن الرحيم ..أمنت بالله وتوكلت على الله ..:)

وصيتي .. هي إن ما خلصت الأسئلة ذي تخلصونها .. :D

ياااه .. عطي اغلطي .. :D

السؤال المفروض .. كم مرة طلعت من القصيم .. لأني قصمني الأصل والمنشأ والوولادة .. :D

عاد تصدقين ..ما أحب القهوة اللي فيها مسمار ..:pepsi:

اللهم لك الحمد والشكر .. أنتي بس بتكتبين أسئلة وبس <---- منقهر ولا يدري وش يقول :D ..
لكن ولله الحمد لي الثلاث سنوات الأخيرة ماغبت إلا يوم ..لظروف المرض :( .. وكل هذا بفضل الله سبحانه ..:)

حتى هذا سؤال ؟!!
المفروض تقولين كم مرة تركت سهل .. لأنك عارفه إن مكتبه بجنب الباب .. وكل ما دخلك عطيته ذاك البقس اللي يقلب اسمه للبرفسور ..إلا من جد وش اخبار البرفسور يا سهل .. :D

حبي تيماوي ..عاد ما لقيتي إلا ذا اتهاوش معه .. :confused:
هذا كبر جدي الله يرحمه .. المفروض تقولين كم مرة حبيت راسه .. الله يختم لنا وله بالخير :D ..

على طاري الشاهي ... ورى شاهيكم بدون سكر :mad:
قايلكم كم مرة إن شاهي سهل وحبي تيماوي غيرنا هم يشربونه بدون سكر وحنا لا .. :rolleyes:

ولا مرررة.. :D

قبل ياصل إلا ست أو سبع ساعات ..الآن تقريباً ثلاث أو أربع ساعات متفرقة ... وتختلف من يوم ليوم..:)

الله يجيب المطر ..:(

لا تصير هي اللي رمزها ( تال ) .. :D

وأنتم وش أخباركم .. :rolleyes:

يا كثرها .. :laugh:

الحمد لله ولا مرة .. إلا مرة وحده اتصل علي واحد من الشباب وصحاني من النوم وقال لي إن يوزرك يدور بالمنتدى .. :D بس كانت على نطاق منتدى الإشراف فقط ..:)

منذو قديم القدم . :D

تصدقين للحين أشوفها .. :rolleyes:

المشكلة الكبار هذولا .. ما تدرين وش يبون .. إن سويتها بهيل قال أبيها بدون هيل .. وإن حطيتها بدون هيل قال وين الهيل ..:mad:
وإن جبت له دلتين وحده هيل ووحده بدون هيل قال أنا ما أشرب إلا قهوة شعير .. :confused:
لكن نقول مأجورين .. :D

حتى الآن 19 مرة ..:ranting:

:jawdrop:


لا ربعي ماهوب راعين مقالب ..<--- إيه هين :D
يعني نروح ونجلس ونسولف ونشرب شاهي ونرجع .. اهم شيء الوناسة :D ..

عاد الجد الحمد لله مقالبنا ماهيب قوية بالحيل .. يعني نروح نحطب وواحد راكب بصحن الددسن .. وبعد ما نجمع حطب نستلم اللي فوق أنواع قمز الشجر ( يعني نط الأشجار :D ) طبعا بالسيارة .. وابو الشباب مرة يطيح على الحطب ومرة الحطب يطيح عليه ومرة كلهم يحطيحون على بعض ..:)

أو يروح مجموعة منا ويحلتون علينا كفرات من فوق النفود وحنا ما ندري ..:( ومرة الكفر بظهر واحد ومرة على نار ويكب القهورة والشاهي .. ومرة بأحد السيارت .. :D

أو يكون في إن واحد يطرد بك ومعه شروخ اللي تطلهع ألوان في هالبران .. ومرة تظرب بالظهر ومرة بالعلابي ومرة تجي سليمة .. :D

شفتي إن مقالبنا خفيفة .. :D


أقول ترى هالأمور ما ينمزح بها هالأيام ..فكينا .. :rolleyes: :D

قايل لك قهوتك صايدة .. :D والشاهي بدون سكر ( حق شيبان :D )..
أما عاد على شغل طقاقة .. والله على الفلوس اللي تجي في الصيف أنا ودي أشتغل طقاقة .. :D

<---- تذكرت الحيالة .. دواس ومانع :D ..

طبعاً عاد أنتي أم فيصل :razz: ..


والله بقول الأولى ... وإن ما نفع بقول يالله فجر خل ننتهي .. :D

<------ واحد ما عنده وقت .. :D


لأنك " رفلى " :D ..
أجل سكرتيره تاخذ الأوراق وتلف فيها الكراث .. :rolleyes:

والله كانت سفرة ممتعة ..كانت القطية من ثلاثين ريال .. :D وكنا نعبي السفينة ديزل ونحط رجلنا 180 .. :D

أما أهم الإنجازات والكوارث .. فهي إننا قطعنا الصمان بالسفينة خلال يوم واحد فقط .. :D والكارثة إنه ضرب لينا كفر السفينة وحنا فوق أحد طعوس الدهناء .. :D

أما عاد نيوتن .. فهذا قصته قصة ..:)
كان أزلب واحد في فصلنا .. كان كل الشباب يقولون له : ( ثلاثة اثنين واحد .. نيوتن أزلب واحد :D ) .. عاد أنا الوحيد اللي عطيته وجه وقلت يا نيوتن هذي ريالين رح واشتر فيها لمبة كهرب خط 220 فولت .. وقل إنك أنت اللي اخترعتها ترى ما أحد راح يعطيك وجه إلا بالطريقة ذي ..:)

وسوى اللي قلت له عليه وفعلاً صار هو اللي اخترعها .. :D


والله ما أدري وش المشكلة بالضبط .. ولو ادري كان على طول بديت بالحلول .. :cry:

يعني .. على خفيف :D ..

المشكلة قايل لهم ترى الغاز ما ينفع نبي فرن كهرب .. بس رفضوا ويوم احترق حطوني انا السبب ..:(


والله ما أذكر إن فيه مقالب أو مواقف معه .. كلها خير ولله الحمد ..:)
واللي عرف حبي تيماوي يدري إنه مستحيل يزعل أحد أو يسيء له وأنا ما أقولها مدحه لكن والله كلمة حق بحق هذا الإنسان الكبير ..:)

الموقف يمكن الوحيد اللي صار لي معه إني اتصلت عليه يوم من الأيام وكان الوقت في الليل يمكن الساعة عشر ..الرجال رد علي وشكله نايم ..بعد السلام وسؤاله عن الأخبار والعلوم قلت له : أبو أسامة لا أكون ازعجتك .. قال من البارق ! قلت ايه ( أثره توه يعرفني :D ) ..قال الله يقطع شيطانك رديت وأنا ما شفت الرقم .. وأحسبك الدوام داقين علي وطالبيني ومسوي فيها نايم :D ..

أكيد بتجيها عقوبة ..!!

وهي إننا نبي نكب على شعرها بيبسي ..وبعد ما يجف نخلي كادي تكد شعرها ..:bash:



# عضو ودك تسطره...(الفيروسة :D ).. [ كايدهم - بطل الفيلم - سهل 888 - القاضي ]
# عضو يفهمك .....(كلهم تقريباً لكن الأكثر حبي تيماوي والإعصار ).....[ حبي تيماوي - الإعصار - جمجمة الهلال - كوكتيل ]
#عضو غاثك باسئلته ....(كلهم الا لوحة مميزة :D )...[ كيفي كويتيه - حبي تيماوي - لوحة مميزة - الفيروسه الزرقاء ]
#عضو مشاغب......( الاثنين الاولين :D )...... [ سهل 888 - فـيـّـو - حبي تيماوي - ديك الجن ]


على العموم شكرا لك أختي الفيروسة على هذه الأسئلة .. وأنتظر ((( عدم ))) عودتك مرة أخرى .. :razz:


سهل888

يا هلا والله بك يالغالي ..:)

حيا الله سهل بن أبي سهل .. والله يخلف على أهله ..<---- كنه خربها بآخر شيء :D ..

جيع الاختيارت .. :D يعني ودي أسطره ثلاث مرات :D ..

تصدق عاد إني أحن للشرقية كل ما جاء طاريها .. :D هادئة جداً وونيسه ..:)
لكن الخط .. والله ياهو غثيث :( ويا كثر العج اللي فيه ..:no:..

ماهوب سطرين ..ما أقدر أقول إلا هالكلمتين بس :

الله ياخذ اللي صنعه :mad:

يا أخي يمكن نجمع بينها :D ..
ترى المدارس إلى الظهر بس .. :D

أولاً اسمها المراحل الأولية ماهيب الدنيا .. :D
تقييمي لها .. صح إنها متعبة وتحتاج للياقة في التدريس .. لكن ممتعة لأبعد حد ...:) والممتع بها إنك تشوف التغير على الطلاب أمام عينيك ..يعني يبان شغلك معهم ..:)

الله من المطبات .. :rolleyes: لكن الأحسن اشتر لك جيب بس وخلها عنك :D ..

اللي يسمعه يقول له سبع سنين متزوج :D .. لكن انتظر واحد اسمه سهل يجيب بنت لأني ناوي أخطبها منه ...والله النسيب :D ..

تصدق عاد البلوت هذي اللعبة اللي ما افهم فيها شيء .. :confused:
كل ما اعرف عنها إنهم يلعبون وشوي تلقاهم يتهاوشون أنت اللي سويت وأنت اللي فعلت .. :confused: وأنا بخاطري أقول : ( والله لو إن سامي مضيع فرصة في النهائي :D )..

الحين دبر لك رابع بدالي :D ..

ذكرتني بالسؤال اللي يقول ..باص يمشي بسرعة 120 كلم / الساعة ..ويقطع مسافة 1700 كيلومتر ..مع إن الكفرات مبنشره والطريق خربان والباص مافيه بنزين ..فماهو اسم السائق :rolleyes: ..
يعني الجواب هو : لا للمخدرات :D ..

شف عاد تراني مانيب من اللي يحبون إنهم يهوبلون في البر .. وإلا على طول ينطح الطعوس :nono: ..
صح أحب أشوف التطعيس لكن ماهوب دايم .. :)
والبر والكشتات في تغيير الجو والجلسة وشبة النار وطبخ الكبسة في الكاتم ..وشوفة وجيه شرواك <--- إيه هين :D ..

أظن لو تسأل بيل غيتس هالسؤال قال حبي تيماوي .. :D

وأنا سمعت إنه بعد ( هذا أنت يا حبي تيماوي :D ) يبي يسمي بنته ( آت ) عشان يكتب اسمها : ( @ بنت حبي تيماوي .. :D )..

أقول ترى عندي بعد بريد في الـGoogle ياخذ واحد جيجا ..وش رايك ارسله لك عشان تاخذ راحتك .. :D


شرفتنا يا ابو عبدالعزيز ..ومنور اللقاء بوجودك ..:)فألف شكر لك ..:)



لي عودة للبقية إن شاء الله تعالى ،،،


تحياتي للجميع ،،،