السلام عليكم ورحمة الله وبركاته
بقولكم سالفة
اليوم بعد ما رجعت من الامتحان يعني تقريبا الساعة عشر .. رحت لداري وقعدت اراجع اجاباتي
سمعت صوت فرحت وطليت من الدريشة
عاد دريشتي تطل على المسجد
تخيلوا شنو شفت
شفت اثنين بلبس المدرسة ورا المسجد ومحد يقدر يشوفهم الا اللي عندهم درايش مثلي
.. والله اشكالهم في الابتدائي
يمكن ثالثة او رابعة
صغار حيل ومبين من جسمهم
المهم شفت واحد قاعد والثاني واقف يتلفت
وقفت يمكن ربع ساعة ابي اشوف شنو السالفة
تخيلوا اللي كان قاعد طلع زقارة وقعد يدخن والثاني يراقب له المكان
شي غريب فعلا
اذا الحين وانت في الابتدائي زقاير .. باجر اذا كبرت شنو بتسوي!!!
يبقى السؤال:
منو السبب؟؟
انا اقول: ان السبب الاول والاخير يعود الى الاسرة واهمالها
والله ياجماعة مدارس المرحلة الابتدائية واخص بذلك مدارس الاولاد مليانة بلاوي ومصايب
اذكر اني قبل فترة قابلت احدى الموظفات في مدرسة ابتدائية للاولاد
والله قالت لي مصايب
والله يا جماعة كنت احسب الدنيا بخير الى ان سمعت كلامها
طالب سنة اولى ابتدائي..يقوم الصبح على ضرب ابوه .. كان يداوم ويبين عليه الكدمات وعلى رقبته اثار حروق.. ومبين انه كان يطفي الزقاير في رقبته.. تخيلوا هذا ابوه
.. بعد ما سألوا طلع الاب رايح فيها ودايما سكران والام سورية منحاشة لسوريا
في نفس المرحلة .. طالب ابوه مسجون بسبب المخدرات وامه صايدينها في شقة .. بالله شلون ما يبونه يسرق او يبون يعلمونه الادب وامه وابوه بهالشكل!! :sad:
تخيلوا ام تاركة بيتها وعيالها ومسافرة للسعودية عشان زوجها تزوج عليها .. كأن الزوج مسوي جريمة شنيعة .. طيب وخير ياطير تزوج .. الاسلام حلل اربع.. هل السالفة تستاهل انج تتركين عيالج للانحراف والضياع وتتجردين من مشاعرج كأم !!!
والله شي يعور القلب والجيل الجاي الله يستر منه
والسبب الاهل الله يسامحهم
تحياتي لكم :sad:
شي يعور القلب والله! 
الوضع الشجري
