بسم الله الرحمن الرحيم
بدون مقدمات (لاني ماعرف) كانت عندنا اجازه يومين مع الويكند قلت للشباب وراه مانخربها ونروح لواشنطن الي ازعجونا
الناس فيها ونشوف البيت الابيض وكلمت اربعه من الشباب 
على شان نروح وكلهم وافقو على الرحله قلت تمام وابد نحجز عليه بس ان التذكره غاليه شوي المهم نطلع الطياره وخر عنا كاشخين (قصيمي وكاشخ حله عاد) وصلنا دي سي واول مانزلنا
على طول استاجرنا جيب وبعد غالي 500 دولار لثلاث ايام بس 
قلنا معليش المره بس وحنا حاجزين على فندق قبل مانسافر المهم اخذنا الوصف وطلعنا من المطار رايحين للفندق وجلسنا نحوس وندور الفندق وماوصلنا الا بعد ساعه ونص
ماعلينا شره ماندل 
وصلنا الفندق وحنا دايخين ودنا ننام ونزلت الفندق وعطيتهم اسمي وتغير وجهه وقالت موب هذا هو الفندق الي حاجزين عليه الفرع الثاني 
وبغيت اخذ علقه من الشباب الا شوي 
واخذت الوصف ورحنا للفندق واثره مشوار ساعتين 
المهم وصلنا للفندق والحمدلله على السلامه من بعد عناء سفر طياره وخط المهم بدينا نروح للمطاعم العربيه مقطوعين منه وصرنا كل مابغينا نروح لفندق ولا السوق ولا المطاعم لازم نضيع
على الاقل ساعه 
وجاء وقت العوده قلت لازم نروح بدري للمطار احسبو ساعتين للضياع مع ساعه مشوار وساعه تفتيش هذي اربع ساعات المهم وناصل المطار ولله الحمد بعد ساعه ضياع 
انجاز ونزلنا وقلت لخوي رح سلم السياره وانا ابزين التذاكر .
صفيت مع هالزحمه ولما جاء دوري عطيته تذاكرنا وجلست تطقطق بالجهاز وتغير وجهه قلت ايه رحنا فيها بس مسكونا
وقالت لي انتم جيتو للفندق الخاطئ عاد شف وجهي صار ازرق واحمر صار قوس قزع الا فيه وحده عجوز بجنبي
تطالعن وتظحك قلت كملت واناظر بعين حاقد ومير تخاف
وبوقتها دق علي خويي قلتله دريت وقالتلي بعد مايمديكم تروحون للمطار الثاني (فيه ثلاث مطارات ) وبغيت ارجع واطق خوي خالد لانه هو الي قايل لنا اسم المطار
والمشكله عندنا دوام من بكره
وارجع للعجوز واترجاه تغير الحجز ولله الحمد غيرته بس صار بعد 11 ساعه 
وزدناهم حق تغير الحجز وقلت للعيال خلونا نروح نضييع ونرجع رحنا تمشينا ودرنا وتعشينا وضعنا ورجعنا قبل الرحله طبعا الكلام هذا الساعه 2 بالليل
والرحله الساعه 6 الفجر تسدحنا بالمطار كننا شغالات يتحرون كفيلهم وضع مأساوي
وفتحو الساعه اربع الفجر ورحت ازين التذاكر وجلست يطقطق بالجهاز وهو اصله سوداني قال الحجز لاربعة اشخاص
فقط والخامس ماله حجز وابلش ونزين الحجز بعد عناء وراح خالد يسلم السياره اثرهم مايفتحون الا 5 الفجر ولازم ننتظر
صبرنا الى خمس وراح سلم السياره وجاء متاخر قبل الرحله 35 دقيقه ونركض ركض للبوابه ونصف بالسراء وتفتشنا
ولازم يشيكون على التذاكر والسكيرتي يشوف تذكرت خالد واثره حجزه خطاء لاحول ولاقوه هذي ثالث مره لخالد
ويرجع ركض يزين الحجز حنا الثلاثه دخلنا التفتيش وخالد راح يزين حجزه والخامس بالسراء طويل (اثره ابو الشباب
راح للحمام الله يكرمكم ) جاء خالد ويدخلونه بسرعه حنا ركبنا الباص الي يودي لبوابتنا وننزل ونركض الحمد لله
ركبت الطياره ومعي اثنين وخالد والي معه ركبو الباص الثاني الي بعدنا ويوم جاء بيفتح الباص اثر الباب خربان
ويدقون على المسؤول ويجي يزين الباب اللحين باقي على الرحله 5 دقايق ويم فتح الباص ويركضون للبوابه واثره تقفلت الرحله ويرجعون ويعدلون الحجز ويدفعون الفرق وطلعو على الرحله اللي بعدنا بس انه تمر على مدينه ثانيه
نزلو لمدينة اتلانتا وراحو بيركبون الطياره الثانيه الا وخالد مظيع التذكره ويرجعون يدورون التذكره الا وشوي ينادون اسمه( كالد ) ويروح للبوابه ويعطونه التذكره قال اشوى بغت تظيع المهم وهم ينتظرون ركوب الطائره
قالو الرحله تاخرت ساعتين يؤيؤ وبعد ساعتين قالو تاخرت ساعه 
وبعد بربع ساعه الغو الرحله ويغيرون الحجز ويدورون حجز ثاني ولقو رحله بعد 5 ساعات وبعدها طلعو الطياره ويقول خالد لازم بيصير شي تخرب الطياره
ولا يضيعون المطار الثاني :p ولله الحمد وصلو بعدنا ب 12 ساعه ولهم يومين مانامو ....
واكتشفنا بعد كذا انه عين واحد من الشباب لاننا ماقلناله يروح معنا 
من بعده ما اروح للبقاله الا وقوله والحقييقه هذي اسوء رحله سافرت فيها ...
واتمنى انه اعجبتكم القصه و لاتواخذونا على سوء التعبير
اخوكم
عبدالعزيز
الوضع الشجري
