.
.
.
.
.
.
.
.
.
السلام عليكم لكل الزعماء صغيرهم وكبيرهم..وكل عام وانتم بمليون خير (مع انها متأخرة)بس الرمد اشوى من العمى
هذي يمكن ثاني مشاركة لي..بتكلم فيها عن عدة نقاط تدور في بالي
1-اول شي بالنسبة لقصة اللاعبين المحترفين في الهلال..كل يوم نقرا بالمنتدى عن لاعب جديد بيحترف في الهلال واخرهم كان موستوفوي والبعض يقول علي كريمي وغيره يقول ايمار (كثّر منها) نتمنى من ادارة المنتدى تأكيد هالاخبار لأن بصراحة انا ماعاد اصدق اي خبر الين يوقع اللاعب واشوفه يلعب في مباراة رسمية...حتى لو كان لاعب محلي..
هذا بالنسبة لاخبار التوقيع مع المحترفين...اما المحترفين الموجودين في الهلال خلونا نتكلم بواقعية عن كل واحد...نبدا من الدفاع...تفاريس لاعب ممتاز وبنية قوية..صح دفاع الهلال نقدر نقول كان جيد العام الماضي بس احمد خليل والشريدة كبروا..ما اطالب بتنسيقهم او الغاء عقودهم بالعكس لاعبين خبرة وبيستفيد منهم المدافعين الشباب..يعني تفاريس وجوده هالموسم ضروري لأن الشريدة وخليل قلت انهم كبار وغير كذا صارلهم زمان غايبين عن جو الملاعب..والهليل والخثعمي في بداية مشوارهم اما المفرج مستواه ماهو ثابت..
نجي للوسط..كماتشو..لاعب ممتاز..في اول مبارياته مع الهلال..بعض الاخوان انتقدوه وانتقدوا الادارة على التعاقد معاه..وماصبروا على اللاعب..أي لاعب في العالم يغير فريقه يلزمه فترة علشان يتأقلم مع التشكيلة الجديدة..يعني شفنا اوين مع ريال مدريد وبيكام وحتى زيدان..بأول مباريات لهم كان مستواهم اقل من عادي(بالنسبة لمستوى الدوري الاسباني وبالمسبة لمستواهم قبل الانتقال).هذا وهم متعودين على تغيير الفريق وغير كذا انهم ما طلعوا من اوروبا..اما كماتشو غيّر الفريق والبلد وجا في وقت مستوى الهلال كان ما يساعده على اثبات نفسه...وحاليا بعد ما تأقلم واخذ على الجو مع الزعماء شفنا مستواه خاصة ضد الشباب والنصر...وتذكرو كلامي ضد الوحدة..والنقطة الاهم ان الهلال بحاجة لصانع لعب بغياب الذهبي نواف الله يرجعه بالسلامة انشالله..
نجي للهجوم..باولو ديسلفا...هاللاعب الجميع على ما اعتقد يعرفونه من قبل ما يحترف في الهلال...ايام ما كان في الاتفاق..كان هداف ممتاز في ذاك الموسم..مراوغ وقناص ويجيد الكرات الثابتة ..مشكلته الوحيدة كثرة اصاباته..ولحد الان ما اخذ فرصة كاملة..يعني اقل شي يبيله مباراتين او ثلاثة..وطبعا مو معنى كلامي انه هالموسم بيكون ممتاز..لازم ياخذ فرصته اول بعدين نحكم..وانشالله يكون في مستوى طموح الزعماء..
2-العاصفة اللي صارت بعد كلام البكر ان الهلال هو ترمومتر الكرة السعودية..يعني بصراحة كلام الرجال واقعي(والكلام موجه للي ثاروا على البكر ) وفي اكثر من دليل وغيري تكلم عن هالأدلة..وخير مثال كأس اسيا..كثير توقعوا هالمستوى..تشكيلة مافيها توازن..والبعض انخدع بكأس العرب والتصفيات الاولية لكأس العالم..المنتخب لعب فيهم ضد فرق ضعيفة وما تشكل مقياس لأي منتخب...يعني لو لاعبين ضد فريق في الدوري السعودي كان احسن..لأن لاعبين هالفريق بيقطعون انفسهم علشان ينضمون للمنتخب وياخذون فرصتهم...ولما جا كأس اسيا(الله لايعيد ذيك الايام)
على قولة اهل الشام:ذاب الثلج وبان المرج...وحاليا الحمدلله رجع الزعيم ماراح اقول لكامل مستواه بس أحسن من أول..وبينعكس هالشي على المنتخب..وكأس الخليج قريب
3-بالنسبة للاعبين الشباب...برأيي ان هالموسم اكثر موسم نكسب فيه وجوه واعدة ولها مستقبل كبير..
الهليل والخثعمي والجري ومضواح والبرقان والموري والعنبر والصويلح وغيرهم..وبصراحة من زمان كنت مع هالفكرة...شفنا نادي الشباب العام الماضي..شي واحد سووه والنتيجة كانت انهم فازوا بالدوري..وهالشي هو الصبر على اللاعبين..طبعا في نقطة ساعدتهم ان نادي الشباب ماهو نادي جماهيري ولا في عليهم ضغط اعلامي(مع احترامي طبعا للشبابيين) ومع كذا الشباب من زمان بالنسبة لي اعتبره احسن مورّد للاعبين الشباب في المملكة...لو شفنا الاتحاد 90% من لاعبينه من برة النادي..والنصر راحت ايامهم بعد ماجد والهريفي ومحيسن..والاهلي مشكلته انه يقتل الموهبة وشفنا القهوجي لما انتقل للاتحاد..والمحمدي صار معه ديسك في العمود الفقري من دكة الاحتياط :p (بعيد عنه انشالله) وغيرهم كثير...اما الهلال هذا اول موسم يمشي بالنسبة لهالنقطة بالطريق الصح ويعطي فرصة للاعبين شباب..والدليل على انهم ماشين في هالطريق تعاقد الادارة مع المدرب باكيتا..الكل يعرف انه كان يدرب ناشئين وشباب البرازيل..يعني شغلته واختصاصه التربية الكروية لصغار السن..حتى رئاسة النادي استلمها رئيس شاب(الله يطول بعمره)... وموعدنا نهاية الموسم.
4-الزين ما يكمل...والمقصود الهلال طبعا..الزعيم ينقصه من زمان رابطة مشجعين(مثل الاتحاد والاهلي)توقف مع الفريق في كل المباريات وتكون منبر الجمهور عند الادارة..توصل المقترحات و الآراء..بصراحة ملينا من كثر ما نسمع هالعبارة:ياهلال ياهلال في الملعب والمشكلة ياليت انها طول المباراة..نسمعها او نرددها بالاحرى بس لما يجي هدف للهلال..ماودنا نكون جماهير اهداف بس..لازم التشجيع ما يوقف..وصدقوني اذا كان في رابطة مشجعين تحمس اللاعبين طول المباراة بيزيد عدد الجماهير(جماهير الملعب مو الشاشة) واكيد بيرتفع مستوى الفريق يوم ورا يوم..وتتنظم اغاني او اسميها اهازيج احسن..طبعا ما انسى مجهود الرابطة في الشرقية الله يعطيهم العافية..وانشالله يكون في مثلها في الرياض وجدة والشمال والجنوب..ويسافرون مع الفريق في المباريات اللي برة..انتظر هاليوم
ادري اني طولت عليكم اليوم..وانشالله اكون ما ثقلت..والشكر لأي زعيم عسل قرا هالموضوع..واكييييييييد ابي رأي الجميع..اعتذر مرة ثانية وبالتوفيق للزعيم في المباراة الجاية في اول ليلة من العشر الاواخر..ولا اله الا الله محمد رسول الله...
@MooN-Soul@