صبحكم الله بالخير..

حيا الله اصحاب الزعامه . . اهل المروة والشهامه ..

أبد والله .. فاضي !! ومطنش الدوام اليوم (( والله من الدجه )) !!

قلت اجي اتونس معكم وندردش سوا .. ( سوا ولا زجول ههههه ينكت )

كلها كم يوم ،،، وتبدأ مباراتنا مع جيران الهنا .. ومندوبي زيورخ وممثلي بلدنا في الفيفا ( اللهم لاشماته)

مع النادي اللي يقولون عنه فارس او حاجه زي كذا !! عرفتوه؟؟

هذاك النادي اللي في الدخل المحدود ورى ميد.. أأأيوه عليكم نور .. اللي حول القريه الشعبيه مناك!

مع النادي الأصفر .. ذلك النادي المحظوووظ في مبارايات الديربي ..

شخصياً ومع ايماني التام ان المنافسه انتهت وحسمت لصالح الزعيم.. الا أنها تظل مباراة شيقه..

ينتظرها الجمهور العربي.. ويستمتع فيها بحماس بني نصر ومحاولاتهم المستميته واليائسه لمجاراة المارد الأزرق!!

وكلا مي هذا ليس نرجسيه . . بل هو الواقع ميه بالميه (( حلوة )) .

ما اقول الا آآآه .. ثم آآآه يانصر..

ظلموك وأي فريق ظلموا !!

قارنوك بالهلال.. بحكم الجيره .. فصدقت وركبت الموجه.. يالله الخيره !! ( مو كني قلبت فصحى ) !!

فاستعد يانصر .. للعقاب الأليم ,, من سامي ورفاقه..

وتجهز لتكون افطاراً شهياً.. لجماهير الزعيم المشتاقه .. (( وش عنده نجيب قباني )) !!

فالتنافس بينكما يا اصفر انتهى منذوو مبطي,, ولكن لا بأس بعلقه جديده ..

الفرق بينكما شاسع الآن .. اقولها بكل حياديه ..

كالفرق بين العليا .. وحي الجراديه .. ( لامؤاخذه يا أهل العزب هناك ) !!

..................................................

أنا متفائل والله بصفه غريبه وكبيرة .. ومتأمل خير ونتيجه ومستوى أزرقين ..

وكلامي هذا ليس تقليلاً من الجار !! فالنصر نادي عريق ..

يملك لاعبين ماشاء الله عليهم.. يعرفون يلبسون الفنايل صح ومايقلبون الأرقام وعيني عليهم بارده

يعرفون يربطون حبال كنادرهم .. ( عيني عليهم بارده ) !!

لكن ؟؟

كلنا نعرف ان النصر = ( ماجد + هريفي + محيسن ) أما البقيه ؟؟؟؟؟!!!!!

ومن يوم اعتزل ثلاثي الغفله الهولندي.. والنصر مو قد الهلال وشبه انتهى .. بعكس الازرق ..

وجماهير النصر كل سنه تقل في مباراة الديربي عن المباراة اللي قبلها .. وذلك لثقتهم التامه انهم

لايجارون الهلال ..

أنا مو خايف من حارثي ولا دمتروف ..

انا خايف من شيئين اثنين لا سابع لهما !!

1- التحكيم .. اللي ينتفض لا قاموا أهل الدكه !!

2- الحظ .. وعلى قولة ام كلثوم الله يرحمها ( والحظ لا منه استقعد,, وش يفكك منه ياوليدي ) !!

اي والله .. هالأصفر ياهو محظوظ .. نسنتر المباراة وينهيها الحكم وحنا في نص ملعبه..

وتلقاه من نص فرصه .. سجل وسرق المباراة.. بالحظ!!

ومباراة ذو القعده الأخيره.. أكبر مثال..

لأنه بصراحه.. من 1417هـ .. والنصر يملك براءة اختراع خطه جديده.. 7 - 2 -1

وخذ دفاع ورفس وتشنج اعصاب حارثيه من المصارع محسن واخوانه ..

....................................................

رجاء من كل هلالي.. التوجه السبت للملعب البرتقالي.. وآه ياالبرتقاله..

لمشاهدة الملحمه الهلاليه الرمظانيه.. وباذن الله.. اتوقعها 2 - صفر .. او 2 - 1 للهلال بحول الله..

وأتمناها .. ( 8 - 3 ) .. وش هاالمسكه !!

أنتم .. وش تتوقعون .. ومن اللي يحظر.. عشان نسوي مسابقه احلى صوت ونخليه يمسك الرابطه؟!!

وقبل الختام ..

قبل لا ينط لي واحد .. مولع السكن .. ويمشي ون هاندرد وعشرين .. ويقول :

وش هاالتخلف؟؟ انت متعصب .. ومن هالكلام اللي ماشي سوقه هاليومين..

احب اقوله.. يروح منتدياتهم الصفراء .. ويشوف خرابيشهم وهرطقاتهم..

ثم بليز يرجع لي.. عشان اقوله:

ان كان حبي للهلال تعصباً.. فاشهد علي بأنني متعصب ..

ودمتم ..

اخوكم الهلالي ابو سارة..