حدثت هذه القصة عام 1424 / 1425 هـ >>> ههههههه عام دراسي موب تاريخ قصة
هذه القصة من نسج خيال الكاتب وليس لها علاقة بالأحداث التي رأيناها في سلسلة أفلام جوارسيك بارك والتي تحدثت عن وجود الديناصورات >>> يا ابو بتخلص علينا والا شلون ..
وفي ظل التكهنات بوجود الديناصورات اراد الكاتب ان يروي لنا هذه القصة التي تتحدث عن علاقتة بالديناصورات وتعد هذه القصة من روائع الأدب الحديث >>> يا ليل من انت ليله
احس اني مليت من هالمقدمه نخش في الموضوع ازين >>> من اليوم

[ الفصل الاول : المفاجاءة ؟؟ ]


قبل شهر كنت انا واثنين من اخوياي نتمشى في منطقة الدرعية القديمة وهي منطقة آثار تقع في شمال الرياض يرتادها عدد قليل من سكان المنطقة >> ملف سياحي ذا موب قصة ..
طبعا كنا نتنقل بين المزارع وبيوت الطين اللي هناك وطاحت عيني على بيت له باب كبير بس مقفل على عكس البيوت الثانيه ابوابها يا اما مفتوحة والا مهيب موجوده خير شر.. وقلت في نفسي ليه ما تروح وتفتح الباب وتشوف هالبيت من داخل ..وامشي لين وصلت الباب وترددت اكثر من مره .. في البداية خفت وقلت مالها داعي اخاطر بنفسي يمكن اللي داخل جن بسم الله علينا .. شوي الا يوم سمعت صوت من بعيد يقول :
من لم يمت بالسيف مات بغيره ..... تعددت الأسباب والموت واحد
وكأني تشجعت شوي وقررت اني افتح الباب واللي يصير يصير ..
فتحت الباب وكانت المفاجاءة ؟؟ شفت أرض خضراء على مد النظر وفي وسطها بحيرة كبيرة زي اللي في منتزه الياسمين >>>> نعم يا اخويه
طبعا هالمنظر ما شدني كثير اللي شدني هو وجود غابة في آخر هالمكان .. قررت اني اروح واشوف الغابة ذي .. وادخل مع الباب واقفله وراي عشان ما احد يدري عن الموضوع من الناس اللي كانوا موجودين في نفس المنطقه .

[ الفصل الثاني : انا وطائر الأركيوبتركس !!؟ ]

طبعا كلكم تعرفون طائر الأركيوبتركس خصوصا طلاب وطالبات القسم العلمي واللي ما يعرفه ولا سمع عنه قبل كذا عليه مراجعة كتاب الجيولوجيا للصف الثالث ثانوي ..
ما علينا >>>> ؟؟؟؟
المهم اني اول ما نزلت للمكان اللي شفته من ورا الباب ومشيت كم خطوه الا ابو الشباب " طائر الأركيوبتركس " محضر طبعا انا أول ما شفته شوي وانهبل لاني مو مقتنع بسالفة الديناصورات شلون اذا شفتها على أرض الواقع >>> اما ارض الواقع شيء يبي لها براد شاهي ..
بعد ما تنحت قرابة العشر دقايق الا ويفاجئني الأركيوبتركس بسؤاله
الأركيوبتركس : هيه انت يا ابو الشباب وش جاي تدور ؟
أنا : تكلمني ؟؟
الأركيوبتركس : لا أكلم اللي وراك ؟
والتفت وراي من زود الدلاخه الا يوم صاح فيني مره ثانيه ..
الأركيوبتركس : بلا أستهبال انت ووجهك ايه اكلمك ؟
أنا : طيب لا تنفخ .. انا كنت مع اخوياي نتمشى في الدرعية القديمة ويوم وصلت الباب ذاك وفتحته شفت هالمكان واعجبني بالذات ذيك الغابة ودي اروح لها بشوف وش فيها .
الأركيوبتركس : خلاص انا اوديك هناك بس بشرط .
انا : امر تدلل قل اللي تبي بس تكفى وصلني هناك .
الأركيوبتركس : ابيك تساعدنا .
انا : كيف اساعدكم ؟؟
الأركيوبتركس : اذا وصلنا هناك تعرف كل شيء بس انت تبي تساعدنا ولا لا ؟
انا : الا ابي اساعدكم بس خلنا نروح بسرعه .
الأركيوبتركس : اجل يالله اركب على ظهري عشان نطير .
واركب على ظهره ونطير باتجاه الغابة .

[ الفصل الثالث : في الغابة ]

اول ما وصلنا الغابة تفاجئت بعدد كبير من الديناصورات ويعرفني عليهم الأركيوبتركس ويعرفهم علي ويعلمهم بقصتي .. ويقولهم اني وعدته بأني اساعدهم .. وانا امسكه على جنب واكلمه ..
انا : هااه وش تبوني اساعدكم فيه ؟
الأركيوبتركس : قبل لا اعلمك ابي اخذك في جولة على الغابة تشوف شلون حنا عايشين .
انا : قدام جولة جولة وش ورانا .
واطلع انا وياه نتمشى على رجولنا في الغابة واشوف ديناصورات صغار يلعبون شبرا امرا والارض تهتز من تحتي واقول في نفسي " يا شين دلع الديناصورات " والأركيوبتركس يتكلم لي عن حياة الديناصورات ويقول ان الكلام اللي شفناه في الافلام مكذوب عليهم وانهم حيوانات أليفه بس حجمهم الكبير مخوف الناس منهم .. وابو الشباب يتكلم الا يوم اني لمحت ذيك الديناصوره اللي ازين من البرتقالة وكانت تناظرني وفي عيونها كلام ودها تقوله لي خصوصا ان الديناصورات كلهم كان يعقدون علي آمال كبيره أني أساعدهم في موضوعهم اللي ما عرفته الى الحين .. المهم اني يوم لمحتها وانا اوقف ويوقف بجنبي الأركيوبتركس واكلمه عن الديناصوره ..
انا : من هذي ؟
الأركيوبتركس : هذي بنت التي ركس ؟
انا : اها التي ركس >>>> يقالي عرفته
انا : طيب ورا وجهها منعفس زي كذا ..
الأركيوبتركس : ابوها !!؟
انا : وش فيها ابوها ؟
الأركيوبتركس : يطلبك الباحه .
انا : فداه >>> على بالي يقصد المدينة اللي في الجنوب
الأركيوبتركس : يا فيصل خل عنك المزح ابوها مات .
انا : لا حول ولا قوة الا بالله شلون مات !؟
الأركيوبتركس : مات مقتول !!
انا : ومن الحمار ذا اللي يتم الضعيفة ذي >>>> تعاطف مع الديناصوره
الأركيوبتركس : اللي قتله هو الجيجانتوس .
انا : ومن يكون الجيجانتوس ؟؟؟
الأركيوبتركس : هذي اللي ابيك تساعدنا عليه وتقتله عشان نفتك منه ومن شره .
انا : طيب .. طيب >>>> يقولها وام الركب قامت تنفضه ..
انا : طيب ممكن اروح اتكلم مع الديناصوره شوي واعرف منها سبب قتل ابوها .
الأركيوبتركس : خذ راحتك يا فيصل سو اللي تبي بس تكفى اقتل الجيجانتوس .
انا : ما عليك ازهل اعتبره في عداد القتلى والجرحى والمصابين >>> مشكلة اذا تحمس قام يخيط بازرق .
الأركيوبتركس : زين اجل انا بوصل مشوار قريب بروح اخذ لعيالي اندومي وبعد نص ساعه امرك عشان نروح لكبير الديناصورات ونتفق على كل شيء .
انا : زين حتى لو بغيت تتاخر يوم كامل ما عندي أي مشكله .
وبعد ما راح الأركيوبتركس وانا اتوجه لبنت التي ركس .

[ الفصل الرابع : سبب مقتل التي ركس !!؟؟ ]

توجهت لبنت التي ركس وانا ما اشوف الدرب >>> اول مره يشوف ديناصوره كاشفه
واتكلم معها ابي اعرف وش سبب مقتل ابوها ..
انا : مساء الخير
بنت التي ركس : مساء النور
انا : كيفك ؟
بنت التي ركس : تمام وانت ؟
انا : بخير من شفتك .
بنت التي ركس : ههههه الله يخليك يا رب .
انا : ويخليك .
بنت التي ركس : انت فيصل اللي يقولون انه يبي ينقذنا من الجيجانتوس
انا : ايه انا بس قبل ما انقذكم منه احب اعرف سالفة الجيجانتوس اخاف انكم كاذبين عليه والا شيء واروح اقتله بغير حق .
هنا قامت تصيح بنت التي ركس ..
انا : يا لييييييييييييل وش فيك قمتي تصيحين ..
بنت التي ركس : انت ما تدري ان الجيجانتوس قتل ابوي !!؟
انا : الا سمعت من الأركيوبتركس وجيتك عشان اعرف القصه منك .
بنت التي ركس : زين بقولك السالفه من الأول .
بنت التي ركس : شوف يا فيصل من فترة يعني قبل عشر سنوات كان ابوي والجيجانتوس من اعز الاصدقاء في غابتنا دائما مع بعض ومستحيل يفرقهم شيء الا الموت .
انا : حلو طيب وش اللي خلاهم يقلبون على بعض !!؟
بنت التي ركس : امي
انا : انا قايل المشاكل ووجع الراس ما يجي الا من ورا الحريم ليه وش سوت امك عشان الجيجانتوس يذبح ابوك .
بنت التي ركس : امي كانت اجمل ديناصوره في القريه .
انا : ما يبي لها كلام دام البنت كذا اجل امها شلون .
بنت التي ركس : هههههه من ذوقك الله يخليك .
انا : ويخليك .
بنت التي ركس : عاد الجيجانتوس تقدم لامي ورفضه جدي الله يرحمه .
انا : الله يرحمه ويرحم اموات الديناصورات والمسلمين .
انا : طيب وش دخل ابوك .
بنت التي ركس : انا اقولك .. بعد ما رفض جدي الله يرحمه الجيجانتوس تقدم ابوي لخطبة امي ووافق جدي .. وتم الزواج واثر الجيجانتوس شايل بقلبه وابوي ما يدري ..
انا : طيب وبعدين !!؟
بنت التي ركس : هاجر الجيجانتوس من الغابة .
شوي الا قمت اتثاوب من سالفتها المملة ..
انا : ايه اسلمي .
بنت التي ركس : ومن سنتين رجع الجيجانتوس للغابة ولما شافني خطبني من ابوي .
انا : طيب وش صار .
بنت التي ركس : وكان جدي اللي هو ابو امي جالس وقال للجيجانتوس تخسى وتعقب ما تاخذها >>> موب صاحي جدها بيجي يوم وياخذها في وجهه .
بنت التي ركس : ويتلفت الجيجانتوس على ابوي ويقوله وش رايك قال ابوي ما بعد كلام عمي كلام لانه كان خايف لو وافق ان جدي يخليه يطلق امي وهو يحبها .
شوي يوم تحمست للقصه واسألها ..
انا : وش كان رد الجيجانتوس ؟؟
بنت التي ركس : قام وقال لابوي شف يا الرخمه اخذت الديناصوره اللي خويك حاط عينه عليها ما قلنا شيء بس ان هالميت ذا يقولي تخسى وتعقب في مجلسك .. اوريك انت وياه .. ثم طلع من البيت .
انا : ايه وبعدين ؟
بنت التي ركس : قبل سنه وابوي كان مار بالسوق الا الجيجانتوس لاعنن خامس جدي فاركن وجهه بالارض .. وامي تصيح من باب البيت يا ويلي ابوي .. بيموت تحت يد ذا المجرم .. شوي الا يوم ابوي اخذته الفزعه عشان امي ويروح يتلاقط هو والجيجانتوس والجيجانتوس عير موب صاحي .. بس ابوي شجاع قام وضربه قدام الناس لين خلاه يقول للعنز يا خاله .. عاد ابوي يوم شافه طاح عطاه ظهره واخذ جدي يبي يروح البيت وفي غفلة من ابوي الا الجيجانتوس جايه من ورا ومعه حديده ويضربه على راسه لين مات .. ومن عقبها كل من وقف في طريق الجيجانتوس قتله ويبي يجي بعد شوي عشان يتملك علي بالغصب وانا ما ابيه وان رفضت يبي يقتل امي .
انا : ما يخسى الا هو .
بنت التي ركس : تكفى يا فيصل فكني من شره .
انا : ابشري بسعدك .

[ الفصل الخامس : مواجهة الجيجانتوس .. ووداع الديناصورات !! ]

وانا اسولف مع بنت التي ركس ما دريت الا الأركيوبتركس جاي يقول يالله مشينا يا فيصل واروح انا وياه لمجلس الديناصورات ونتناقش في امر الجيجانتوس لكن الوقت موب وقت نقاش الارض قامت تهتز من تحتي اثر الجيجانتوس وصل للغابة واقوم انتفض ما عاد ادري من انا في يده ..
الا يوم لاح في الافق قول الشاعر :
من لم يمت بالسيف مات بغيره ..... تعددت الاسباب والموت واحد >>> ما نكبني الا هالبيت الله لا يعوده من هاوس
المهم واطلع ابي اشوف الجيجانتوس الا الديناصورات مجتمعين عن يمين الغابة والجيجانتوس عن يسارها وانا في النص >>> يعني رحت في خرايطها ..
والا الجيجانتوس يوم يقول طلعوا لي بنت التي ركس .. وانا التفت على الديناصورات بشوف وش يقولون الا يوم البنت تناظرني وتبكي .. وتاخذني الفزعة >>> يبي يروح مع درب ابوها
واجي قدام الجيجانتوس واكلمه ..
انا : خير يا ابو وش تبي في البنت
الجيجانتوس : اقول بتنقلع عني انت وشكلك ذا اللي تقول فحم ابيض >> تعرفون اللي نولع به الحطب
انا : احس منك انت ووجهك ذا اللي كله حبوب تقول ركبة حضرمي ..
الا الديناصورات من وراي يضحكون .. عاد لا ضحكوا تحس انهم دلوخ ..
ويجيك الجيجانتوس يمي ناويني وام الركب تقوم تنفضني وبنت التي ركس من وراي تكفى يا فيييييييييييصل>>>> اصعب موقف مر علي في حياتي ..
وانا في هالموقف الا الجوال يوم دق عاد نغمة الجوال ما تدري وش تبي ..
ويوقف الجيجانتوس مكانه ما تحرك .. انا استغربت وش فيه والا يعني مسكت اخلاق يبيني ارد وبعدين يمسح بي الارض ..
والتفت وراي الا الديناصورات موقفه مثله ولا احد يتحرك .. قلت اجل البلا في الجوال ..
شوي وينقطع صوت النغمه الا يوم بدا الجيجانتوس يتحرك يمي والديناصورات من وراي تصايح اقتله يا فيصل اقتله ..
قلت بس ما لها الا الجوال واطلع على الاستديو واشغل اطول نغمه عندي دقيقه وعشرين ثانيه .. الا يوم وقفت الديناصورات مره ثانيه وانا اللي انسدح من الضحك استانست عليهم نغمة الجوال تسبب لهم مشاكل ..
وهم على ذا الحال اخذت لي حديده وطلعت فوق الجيجانتوس واضربه لين مات وانزل واوقف نغمة الجوال وتبدا الحياه عند الديناصورات من جديد يوم شافوا الجيجانتوس ميت على الارض وهم يطلقون صيحات الفرح ويرددون ..
ياكلك حبه حبه .. ياكلك هذا فيصل
وانا متشقق من زود الوناسه وفي نفس الوقت منصدم من اللي صار .. الا يوم دق الجوال مره ثانيه وهم يوقفون اماكنهم >>> يا ليل من انت ليله وذولي كل ما دق الجوال وقفوا .. وارد الا هو خويي يقول وين انت قلت انا دخلت في بيت طين وضيعت الباب شوي بدوره واجيكم قال كم يبي لك قلت .. ربع ساعه بالكثير قال بسرعه بنمشي المغرب ما بقى عليه شيء .. قلت اوكيك واقفل الجوال وترجع الديناصورات تصايح مره ثانيه ويرددون ..
ياكلك حبه حبه ... ياكلك هذا فيصل
قلت لهم : اقول الجيجانتوس وريحتكم منه الحين ابيك يا الأركيوبتركس ترجعني للباب اللي دخلت عليكم منه .. قال خلاص وانا اركب على ظهره ونطير لنفس الباب
يوم وصلنا هناك الا بنت التي ركس قدامي وتوقفني قبل ما افتح الباب وتعطيني هديه دوب على شكل ديناصور مكتوب على بطنه I love you .. وانا اخذه وامشي يم الباب واسمع صوتها تنادي ..
بنت التي ركس : فيصل
انا : يا لبيه
بنت التي ركس : انت انسان رائع
انا : وانتي ديناصوره جميله
بنت التي ركس : وداعا فيصل .. ارسل معك سلامي لكافة البشر .
انا : يبلغ

وافتح الباب وادخل معه واطلع من بيت الطين على اخوياي ونصلي المغرب ونروح لبيوتنا .



THE END

لا تشرهون علي ... هالقصه كاتبها وانا شااااااااااارب






بيبسي