#1  
قديم 22/09/2004, 11:08 AM
عضو سابق بلجنة التغطيات بشبكة الزعيم
تاريخ التسجيل: 12/12/2003
المكان: الــريــااض
مشاركات: 1,679
Talking © برايه زرقاء © واختطاف الطياره ،، ؟

من الحين الموضوع تراه طويل

يعني الي مايبي مواضيع طويله فيه زر يجيه على اليسار اسمه Back (يعني ان جهازي انقلش )

المهم بنخش بالموضوع ،،
انا قدر الله علي وصدمت 7 هنود بالبطحا ويبون ديه .. يعني كان فيه شرهات ساعدونا (احد لاعب عليك قايل لك انك بالضمان الاجتماعي؟ )







بسم الله الرحمن الرحيم


---------------------------


تصدقون ؟ ياشين الي يودع حبيبته .. ( اخ برايه .. ممكن اعرف وش تبي انت الحين من الحياة؟؟)
ابي ريال ياروح امك
بس جد مشكله الي يودع احد يحبه (يعني بفهم مسوي حبيب انا وخشتي الحين؟؟ )

طيب طيب


===============



اشرقت شمس ذلك اليوم على محبوبتي مدينة الرياض(الله لايخليني منها .. صح انها حر وملعنة جدف وصح اني انواع التشميع باقسام الرياض بس يكفيني اتنفس هواها (صارت خويتك مو ديرتك...!! ) )

وكان اخوكم الي هو برايه .. (ونعم فيني) جالس ع المسبح .. وجالس يتصفح الصحف (هههههههههههه مسوي مثقف انا وخشتي ؟؟ طيب طيب )
ويرن جرس الهاتف النقال الخاص بسمونا كالعاده كل صبحيه .. أم العيال تصبح علينا .."صورة واحد طالع قلبه"
وانواع السوالف انا وهي جلسنا 7 ساعات ( احس ان الفاتوره بتوصل 77 الف مليون دقيقه ريال سعودي)
المهم جاني خط وانا جالس اكلمها (انتظار يعني) ..
وصرفتها قلت شوي وبدق عليك ..
وشوي الا الي يكلمني اللواء ......... بن .... الـ..... (برضو ونعم )
ودارت هالمكالمه بيننا :
انا: هلا والله
هو :اهلين برايه . كيفك؟
انا: بخير كانك مانتب بخير
هو : نعم؟؟؟
انا:لا سلامتك بس كنت اكلم اخوي الصغير (عا111ش مرقع )
هو : اهاا .. المهم ..
انا: اسلم ،،
هو : مادري وش لون والله ابدا معك يابرايه وربي مستحي صراحه ..
انا: ماعندنا بنات للزواج ( العن ام الرد الي مادري وش يبي الرجال لواء وشايب وش الي زواجه وجع؟)
هو : زوجوك عجوز خشمها ولا كوع ابو صويلح(جارنا) الي كنه جندي واقف بنص طريق الملك فهد...؟ (اعذرني ابو صويلح لاتزعل .. والا اقول لك طق براسك الجدار انت وخشمك ذا الي كنه تورنيدو ضارب عليها كفر )
انا: طيب ياخي قل ترى وجهي قلب برتقالي على موف على ازرق (شعار نادي الاتفاق ذا موب وجه؟)
هو : بالعربي يابوي .. جاينا امر .. ننقلك لـ لنيويورك
انا: والحين انت مسوي هالزحمه عشان تقول تسذا..؟؟؟
هو : صحيح انها غربه ياولدي بس وسع صدرك وترى فيه شباب معك هناك يعني بتستانسون ..بس شوف اهم شي الشغل اوكي؟ ;)
انا: طيب طيب طال عمرك (قال ايش قال شغل خخخخخ يصير خير حبيبي )
هو : زين ترى رحلتك بعد يومين
انا: ليه انتم حاجزين وقاضين؟؟؟
هو : ايه طال عمرك
انا: يا انتم اغبياء ؟؟ طيب افرضو قلت لا..؟
هو :ههههههههههه ابد بنتلك مع شوشتك وعلى الطياره طوالي
انا:هاهاها(ضحكة واحد منغبن .. "تستاهل هذي اخرة العسكريه )
هو : اقول ماسمعت صوت القطار ؟؟ ( تحسون انه ذب الميانه شايب قريح؟ )
انا:لا .. ماسمعته ( على نياتي مسكين)
طووووووووط طوووووووووط طووووووووط
انا: الوووووووووه الوووووه .. انقطع الخط؟؟ ( انقطع؟؟ الا سكر بوجهك يالوح )
--------
طبعا رحت نمت لي شوي . . وصحيت ع المغرب .. والله واتصل على واحد من اخوياي بالمطار .. ابيه يلعب لي بالحجز والا يكنسله والا يشوف حل

مرت نص ساعه (طيب بشر امك )

شوي الا يدق علي هو .. ويقول : انت لوح والا تستلوح؟؟؟ انا : ليه يابوي وش فيه؟؟ هو: ياعمي الحجز ذا جاي من الوزاره بكبرها تبي تجيب فيني العيد؟؟؟
طووووووط طوووووووط طووووووووووط
والله وادق على الرجال بعد يومين الا غير رقمه ( الله ابو الخوف .. كل ذا عشان حجز وزاره ؟ "مانتب عاقل يا برايه؟ اشوى انك بتهاجر لجاكرتا وتروح رجليه من الخوف " اها بس )



المهم والله وتقفل اخلاقي وانام لي يومين يحبها قلبكم ..
والله ويدق علي اللواء .. قبل موعد ب6 ساعات .. وانا ساحب عليه .. مسوي بجلس مانيب مسافر
والله ويدق 7000000000 مكالمه .. وجحيييييد وامر بعيييييييد ارد عليه
والله وشوي الا باب شقتي مكسور .. وماناظر الا 2 عساكر .. ساحبيني على خشتي حتى قميص نومي ماغيرته .. وع الوزاره طووالي : )
المهم والله واقابل اللواء ..
هلا ابو ماجد ..
هو.. هلا انت وراك ماترد ؟؟
انا .. ابد كنت نايم ..
ويتدخل احد العساكر عساه شلل الخشوم .. (الي يبي يشوفه .. يشوف خشم جارنا ابو صويلح )
المهم العسكري قال .. نصااااب كان يتفرج على مسلسل طاش ماطاش 3 (العن ام الغبار...!! )
انا احاول اغمز له يمين يسار العسكري قبل يقول شي .. ماناظر الا درج المكتب حق اللواء متعلق بوجهي
واحاول اشيل الدرج .. بس ماش .. ناشبن بجبهتي
المهم ويجي ابو خضر ويشيل الدرج من وجهي بشوته يحبها القلب (حشا ماهيب شوته..؟ صارت زيت عافيه..! )
المهم والله وشوي الا القى ابو ماجد الي هو اللواء قال لي رح جهز هدومك يالله باقي على الطياره 4 ساعات..
والله واروح واخذ ملابسي .. واطق ام البدله الرسمي
وادخل عليه .. واقول له هاه بس كيف..؟
قال حلووووووو جدا على سنقة 10 (صورة واحد رافع السبهه مادري السبابه .. هو السبابه والا الابهام؟)
والله ويعطيني شنطه .. سامسونايت ... والله ويختم عليها بختم كبير }{برايه زرقاء}{ (كبر راسي صراحه وقتها)
وشوي الا يرسل معي 3 عساكر .. ويودوني بالبنتلي حقته (هذا لواء والا وزير؟؟؟؟؟؟؟؟؟؟؟)
طبعا واحد من العساكر هو الي يسوق البنتلي .. والباقين راكبين بدورية ورانا .. يمشون (موكب يعني مانيب عاقل )
والله ويدق الفلشر الي يسوق البنتلي ... وانا الي اختبص .. قلت شكله بيخطفني..؟؟ (وش عندي مسوي حلو انا بفهم؟؟ )
عاد والله وانا الي افهم الموضوع .. واطلع راسي مع دريشة (شباك) البنتلي .. " الله ابو اللوح .. على بالي موكب تفحيط "
والعالم طردي ورانا .. يحسبوننا عساكر مخربينها وبنفحط (صورة واحد مادري وش يبي من الحياة)
المهم والله يوم وصلنا للمطار .. وياخذون العساكر جوازي والتذكره ويمرون 70 بنت .. جايين الظاهر من الثانوية السبعون .. بس وش جابهم المطار مادري...؟؟؟
وتجي وحده وتقرا الختم الي بالشنطه .. .. وتعلم خوياتها الظاهر .. وماسمع الا صراخهن .. وااااو برايه زرقاء هنا ( خخخخخخخخخخ يسموني توم كروز )
المهم ووالله واخط رجلي (مشكله هالمعجبات والله "" وانت الصادق النصب هو الي مشكله "" )
واروح ورا العسكر واقول .. ناوين يختطفوني .. (بنات يخطفونك؟؟ )
المهم والله ويودوني الطياره .. واركب بالمقعد بالدرجه الاولى (يقولون الدرجه الاولى يعطونهم تمر وقهوه صدق؟؟ " ايه ماهيب تراث؟؟ "
بس الي يقهرني الدرجه السياحيه .. مايعطونهم الا عصير بردقان (برتقال) منتهي .. وسن توب بعد ليته الربيع...!!!
ماعلينا منهم
المهم والله ويركب معي نيجيري .. والله ويجيني اشمئزاز صراحه .. وركبتي بدت تقشعر (مانتب عاقل ياقشعريره )
والله ويجي ابو الشباب .....عاد هو طويل ترى .. المهم والله ابو الشباب رفع يده يبي يسكر حق الشنط ذاك .. (وش يسمونه )
وانا الي قمت انتفظ واصاررررررخ ..
واقول .. اول ماشفت المضيف .. يررررررررحم امك طلبتك تكفىىىىىىى ورررررربي فقدت حاسة الشششم تكفىىىىىى شف لي محل غير ذا .. لو تحطوني جنب المضيفات عادي (ماتشتهي بس؟ ;) )
هالكلام كله .. قبل ما تقلع الطياره ..
والله وابو الشباب المضيف قدر وضعي .. وفهم ان النيجيري له سبع سنين ماعرف شي اسمه مويه المهم يحطني باول مقعد وجنب الدريشه (الشباك) المهم وانا جالس اقرا المجله احتري الركاب يركبون ويخلووننا نقلع ..
وتجيك وحده .. طاقه ام اللثمه .. وماخلت ولاعطر الظاهر الا كبته على ملابسها..؟ .. وانا الي وجهي يغدي تسذا >>>>>>
وهي شافت خشتي شكلها .. ومامسكت نفسها وضحكت ذيك الضحكه .. قالت ..: مشكلتكم يالشعب السعودي .. اللثمه والعيون تجيب فيكم العيد .. وشوي يوم رفعت الطرحه .. وانا اناظر ؟؟ الا ام الشباب .. لها سكسوكه ،،؟؟

طبعا انا مشيت الوضع .. موب عشان شي ؟؟ بس مافهمت القصه للحين


المهم والله ويوم شوي قالو ان الطياره الجامبو بتقلع ( اخبر الجامبو عسكريم " ايس كريم " والا انا غلطان؟ )

والله ويجيك واحد مادري وش قصة اهله ؟؟ ويقوم ومعه مسدس .. انا حسبته .. متاثر بفلم اللمبي .. (بفهم الحين وش دخل اللمبي؟؟ )

وشوي الا يقول لي فيك شده يابوي؟؟ قلت سم يابوي؟؟ غلطان ترى اسمي برايه زرقاء موب شده الله يصلحك ،،
شوي الا صاكني على راسي واحد من اخوياه بعجره .. خلت راسي يفتر .. وانلحس مخي ..! واروح للطيار .. واقول له .. بالله اخوي فيه اثنين ماسكين مسدسات وضربوني ممكن تبلغ الدوريات؟؟ عشانهم ضربوني؟ (الله ابو لحسة المخ " ترى مادريت انهم بيخطفون الطياره ابد " )
وشوي الطيار يقول لي .. هذولا مختطفين الطياره .. وانا الي وجهي يكش ويصغر
واقول له كيف؟؟؟
الا جاني الي رفسني بعجرته مره ثانيه .. ويسطرني .. بالعجره مره ثانيه على راسي،،


وانا الي أعصب ،،



واقوم .. واجلده واخذ عجرته .. واصقعه على راسه 8 مرات لين مات الظاهر ..!!
واروح لخويه .. وهو كان ملقيني ظهره .. واسطره بالعجره ويطيح مغمي عليه ويربطونهم ..
ونرجع للمطار عشان ننزل الحثاله ذولي الحراميه المختطفين
والله وينزلوني معهم ..
انا مادري وش السالفه ..؟
والله ويدخلوني على مكتب كبير .. (كبر كرشة أبو صويلح اول ماقابلته)
ويقابلني اللواء ابو ماجد .. ويقول ... بصراحه يا برايه انت .. مبدع .. انت فنان ..
وانا الي اساله .. : اقول حبيبي ..؟؟ وش سالفة اهلك انت؟؟؟؟؟ اسافر وانت بوجهي وارجع وانت بوجهي ..؟ يلعن ابو النحس ياشيخ .. يوم سافرت وانا مقابل وجهك خطفو الطياره .. ويوم رجعت قبل ماشوفك .. شميت ريحتك بس .. وينزلوني مع المختطفين....؟؟؟؟
وهو الي يضحك
ويقول لي .. حنا اصلا .. مودينك الطياره ليه؟؟
قلت .. يلعن ابو الغباء ..؟ عشان اسافر مايبي لها سؤال..
هو : وانت وجهك وجه سفر.....؟؟
انا: كله الا وجهي انت ووجهك تقول عتاب بجلسة طرب...؟؟
هو: ياحبيبي اصلا حنا ماخذينك بالطياره .. عشان نمسك هالمخطتفين فهمت.؟
انا: ادري والا عشان ايش امسكهم ( العن اممممممممم الترقييييييييييييييييع)
هو : ايه طيب .. بس لايكثر بالله..
انا: طيب طيب
والله واخذ شوي















































الا وتقومني ام العيال ....!! وتقول صباح الخير زوجي العزيز






















><><><>< احس ان فيه واحد متنح ( احب اقول له نشوفك بحلم ثاني ياحلو ) ><><><><

وان شاء الله ان الموضوع يعجبكم ياحلوين (وان ماعجبكم يكون ازين بعد )

===============






نشوفكم ع خيراتووووووو ،،

















اخر تعديل كان بواسطة » برايه زرقاء في يوم » 22/09/2004 عند الساعة » 11:33 AM
اضافة رد مع اقتباس
  #2  
قديم 22/09/2004, 11:20 AM
عضو غير عادي
تاريخ التسجيل: 14/03/2002
المكان: الـريـــــــــــاض
مشاركات: 10,107
الـحـاتـمــي ...


مــر مـــن هــــنــــا ...


ويـقـول : شف استاز براية

أنت من يوم قلت : الرياض و شمس ....إلخ عرفت أنّك أصبت بضربة شمس ;)

علشان كذا ما حنّا بشرهانين عليك

بس المرّة الجاية اركب بآخر الطيارة علشان لو يصير فيه اختطاف تفتح الباب و تنحاش!<< حشى !
راكب خط البلدة مهوب طيارة !
اضافة رد مع اقتباس
  #3  
قديم 22/09/2004, 11:26 AM
عضو سابق بلجنة التغطيات بشبكة الزعيم
تاريخ التسجيل: 12/12/2003
المكان: الــريــااض
مشاركات: 1,679
إقتباس
الإقامة: يفتخر أهل اليابان بأن بلادهم ( بلاد الشمس المشرقة ) و لكني أنا أيضا أفتخر أني من السعودية ( بلاد الشمس المحرقة

^
^

كلنا بالهوا سوا يا استاز الحاتمي يعني ضربة الشمس فينا فينا

إقتباس
بس المرّة الجاية اركب بآخر الطيارة علشان لو يصير فيه اختطاف تفتح الباب و تنحاش!<< حشى !
راكب خط البلدة مهوب طيارة !

خط البلده فيها باب خلفي :p


شاكر لمروك يا الغالي ،،


والسلام ختام
اضافة رد مع اقتباس
  #4  
قديم 22/09/2004, 12:01 PM
زعيــم مميــز
تاريخ التسجيل: 06/04/2004
المكان: جامعة كل الحلا وزين الصفاتي. مانلومك لو مدحت البرتقاله. منحرم من شوف لابست العباتي. شوفها ما كل مخلوقن يناله. لو تشوف بنات القصيم مفرعاتي. ان تحط البرتقاله في الزبالة
مشاركات: 1,913
من: max666
إلي :برايه زرقاء
الزبدة:
ياااااااااااااخي مواضيعك طوووووووووووويله
اضافة رد مع اقتباس
  #5  
قديم 23/09/2004, 06:08 AM
الصورة الرمزية الخاصة بـ مطزاز
زعيــم متألــق
تاريخ التسجيل: 01/05/2002
المكان: الرياض
مشاركات: 1,236
اخوي برايه موضوعك طويل بس انه شيق(حلوه شيق) ومره حلو
اما حركت السطره بالعجراء حلوه ممكن تشرحه لي
والف شكر لك
اضافة رد مع اقتباس
  #6  
قديم 23/09/2004, 07:45 AM
زعيــم نشيــط
تاريخ التسجيل: 11/11/2003
مشاركات: 796
تسيف يعني هم كانوا يسوون لك اختبار يعني

>> على نياتي ما بعد استوعبت السالفة ,,,

كما انني ( يمديك على كما ) ما بلعت عسكري يروح نيويورك الا كانكم تغيرتوا

مشكور براية واحسن ما في مواضيعك انها طويلة --->> مابي اقهر بعض الناس
اضافة رد مع اقتباس
  #7  
قديم 23/09/2004, 08:08 AM
الصورة الرمزية الخاصة بـ Cʜɑᴙᴉƨᴍɑ
اشراف المكتبة الفنية
تاريخ التسجيل: 27/10/2001
المكان: AlHilal.com
مشاركات: 5,975
والله انت شيء الثقافه معذبتك وافلام الأكشن لاتكثر منها كم مره اقولك

بس فيه شيء ماخش مزاجي وشلون الواحد ينسطر بالعجره تكفى ورني الحركه في راسن عشان هي مافهمت الحركه وبالمره يمكن تصحصح وتفهم السالفه

يسلمووووووووووو
اضافة رد مع اقتباس
  #8  
قديم 23/09/2004, 08:12 AM
زعيــم مميــز
تاريخ التسجيل: 09/03/2004
المكان: رجعنا لرياضنا الحبيبه
مشاركات: 1,525
يسملوووووووووووووووو برايه موضوع ممتاز ,,,,

بس متاكد انك ما كسرت شي حولك وانت تحلم بهالحلم مدام فيه عجرا ومشاكل,,,,,

يسلمووووووووووووو حبيبي,,,,,,
اضافة رد مع اقتباس
  #9  
قديم 24/09/2004, 01:50 PM
عضو سابق بلجنة التغطيات بشبكة الزعيم
تاريخ التسجيل: 12/12/2003
المكان: الــريــااض
مشاركات: 1,679
max666 ،، ماشفت وش انا قايل

7
7

إقتباس
من الحين الموضوع تراه طويل

يعني الي مايبي مواضيع طويله فيه زر يجيه على اليسار اسمه Back (يعني ان جهازي انقلش )

========================


مطزاز ،، ياهلا وسهلا وشاكر على مرورك

اما تبي السطر بالعجرا هاذي طال عمرك يبيلها مشاهده على الهواء مباشره واشرح لك وشلون

========================

راسن ،، ياهلا وسهلا وشاكر على مرورك

إقتباس
تسيف يعني هم كانوا يسوون لك اختبار يعني

لاني كنت اكفأ عسكري بالمهام هاذي :P ( ايه هين )

الا والله شافون ضعيف قالوا نرسله ان رجع زين وان مات ازين

إقتباس
ما بلعت عسكري يروح نيويورك الا كانكم تغيرتوا

انا مارحت هم ركبوني على شان امسك الخاطفين ولا وجهي وجه نييورك

إقتباس
مشكور براية واحسن ما في مواضيعك انها طويلة --->> مابي اقهر بعض الناس

العفوو

=======================


الــ قمرـــهـلال ،، هلا وسهلا وشاكر على مرورك

إقتباس
والله انت شيء الثقافه معذبتك وافلام الأكشن لاتكثر منها كم مره اقولك


ان شالله بس وش دخل الثقافه ؟


إقتباس
بس فيه شيء ماخش مزاجي وشلون الواحد ينسطر بالعجره تكفى ورني الحركه في راسن عشان هي مافهمت الحركه وبالمره يمكن تصحصح وتفهم السالفه

شاهد رد راسن أعلاه << اخس يا أعلاه


=======================


abo-15-yaqob ،، ياهلا وسهلا وشاكر على مرورك


إقتباس
بس متاكد انك ما كسرت شي حولك وانت تحلم بهالحلم مدام فيه عجرا ومشاكل,,,,,

أسكت وانا أخوك وخلها على ربك ولا بعلمك لحالك


ويعطيك العافيه ،،


========================



شكراً لكم ،،

والسسسسسسسسسسسلام ختام
اضافة رد مع اقتباس
   


إضافة رد

أدوات الموضوع
طريقة عرض الموضوع

قوانين المشاركة
غير مصرّح لك بنشر موضوع جديد
غير مصرّح لك بنشر ردود
غير مصرّح لك برفع مرفقات
غير مصرّح لك بتعديل مشاركاتك

وسوم vB : مسموح
[IMG] كود الـ مسموح
كود الـ HTML مسموح
Trackbacks are مسموح
Pingbacks are مسموح
Refbacks are مسموح



الوقت المعتمد في المنتدى بتوقيت جرينتش +3.
الوقت الان » 01:20 PM.

جميع الآراء و المشاركات المنشورة تمثل وجهة نظر كاتبها فقط , و لا تمثل بأي حال من الأحوال وجهة نظر النادي و مسؤوليه ولا إدارة الموقع و مسؤوليه.


Powered by: vBulletin Version 3.8.7
Copyright ©2000 - 2019, Jelsoft Enterprises Ltd

Google Plus   Facebook  twitter  youtube