#1  
قديم 14/09/2004, 10:51 AM
مشرف سابق في منتدى الرياضة السعودية
تاريخ التسجيل: 06/04/2003
المكان: Riyadh State
مشاركات: 1,667
Talking علــوم فيصــل فـي باريــس (( 2 ))


طبعا اول ماركبنا الطياره زي ماانتوا عارفين تهاوشنا من يقعد عند الشباك ... وبعد صياح ونياح جلس ماجد عند الشباك وانا قاعد على الطرف .. بعد هوشه فضيعه مافكنا منها الا المضيف ... بعد ماقالنا كل واحد يقعد على حسب رقم البوردينغ

بعد مااقلعت الطياره بحدود عشر دقايق وزعوا علينا السماعات ... المهم انا حطيت على الاغاني وانسجمت معاها بقوه لدرجة اني قعدت اغني بصوت عالي وانا مدري عن نفسي ... فجأه جاني المضيف...

المضيف : لو سمحت

انا : .......................

المضيف طق كتفي ويقول : لو سمممممحت

انا : هلا هلا امر

المضيف : ممكن تقصر صوتك لان الركاب يشتكون منك

انا ( منحرج ) : انشالله انشالله

ووخرت السماعه خوفا من اي ردة فعل اخرى تصدر مني <<<<< منب عاقل يالفصحى


وبعد خمس دقايق تقريبا جا المضيف مره ثانيه .. بغيت اقوله قسم بالله ماغنيت .. بس اشوى طلع ماجد هو اللي طالبه


المضيف : امر اخوي

ماجد : متى الاكل جعت قسم بالله انتوا قايلين ان التذكره شامله للاكل ولا انا غلطان

المضيف : لا ياخوي منتب غلطان الاكل بعد شوي بيجي

عبدالعزيز : ابي كبسه وسلطه لا هنت

المضيف وهو معصب : ياخوي ذا مو حزة غدا الحين وقت فطور

انا : فشلنا ذا الخبل .. خلاص رح الله يستر عليك

عبدالعزيز : الحين تهزأني قدامه على بالك انه صاحبنا .. ترى كنت اقدر ارد عليك بوقتها بس محترمك

ماجد : اص .. اذكروا الله ترى حنا بطياره يمكن تطيح فينا ماتشوفون التلفزيون

انا : عبدالعزيز تكفى حللني

عبدالعزيز : الله يحللك ويبيحك وانت بعد حللني <<<< وهو بيصيح

طبعا بعد هالموقف ماقدرنا ناكل ابد من الرووووعه ونمنا طول الرحله .. وقمنا على صوت المضيف وهو يعلن عن وصول الرحله لمطار اورلي في باريس .. انا قمت اول واحد من النوم وصحيت عبدالعزيز

عبدالعزيز : وش فييييه طاحت الطياره؟

انا : تعووووووذ من ابليسسس وصلنا ابشرررك

عبدالعزيز : هاه صددق اشوى ماصار لنا شي وقام يبكي من الفرحه .. وصحى ماجد

ماجد : وش فيه يبكي وش صار؟

انا : من الفررحه اننا وصلنا .. ومادريت طبعا الا طقووها نيااحه انواااااااع الصياح

وفجأه شفت شي عجيييب لدرجة ان عبدالعزيز وماجد وقفوا صياح من الدهشه

ماجد : ناظروووووووو مافيه عبايات بالطياره زي ماشفنا اول

عبدالعزيز : حنا بعلم والا حلم وش ذا اللي اشوفه

انا : وش يدريكم انتو كذا بناتنا لاهجو من الديره تفصخو مافيه عبايات .. وراكم كذا كنكم اول مره تشوفون بنت مهيب لابسه عبايه <<<< مسوي فطين

ماجد : لاوالللللله تكفى بشويششش علينا .. ترى حنا اخوياك ودارين عن البير وغطاه .. يقالك دايم مسافر ومتعود .. اشوى انك مسعبل على نفسك من الخققان

انا (منحرج) : ااااااا عادي اشوفهم بالتلفزيون كذا ... الله يخلي الال بي سي

عبدالعزيز : هههههههههههه شف وجهه قام يصب عرق

انا (معصب) : مشينا بس كل العالم نزلت الا حنا

.............................

في مطار اورلي

استغربت من المعامله اللي يعاملونا فيها هناك بالمطار مدققين على كل شي انواع التفتيش

ماجد : ياخوفي بس انهم يحجزونا بالمطار يحسبونا ارهابيين

انا : وش فيك انت من اليوم وانت تتفاول مره بتطيح الطياره والحين ارهابيين

ورحنا عند الجوازات

ماجد : والله اني خاييييف

عبدالعزيز : اذكر الله تو واحد قدامنا سعودي بثوبه وشماغه ماصار له شي وش فيك انت؟

موظف الجوازات : قيف ذا باسبورت بليز

انا : دوك

موظف الجوازات : سئودي

ماجد : نو نو نو نوت سئودي

موظف الجوازات : وت ار يو سي((say

انا : هي از مجنون

بعد ماخلص الاجراءات وهو معصب : قيت اووت

عبدالعزيز : العنبوووه يطردنا

انا : امش امش لاتسوي لنا فضيحه وننحبس

ومشينا رحنا للاوتيل .. ورتبنا الشنط وتروشنا ولبسنا وطلعنا على طول

انا : الحين بوديكم لاشهر مكان في باريس .. قولو وشهوو

ماجد وعبدالعزيز : وشهو؟؟

انا : الزانشالزيه

عبدالعزيز : هههههههههههههههههه ياربيييييييه بطني

ماجد : مصددددددق عمرك انك فاهم هههههههههههههه الزانشالزيه

انا : وش فيكم قسم بالله انه اشهر مكان في باريس

عبدالعزيز : ايه ندري بس اسمه الشانزلزيه ههههههههههههه اشوى انك مع اخوياك ولا صرت مرشد سياحي

انا : مشينا بسسسسس <<<< معصب

.........................

في الشانزلزيه

انا : شوفو هالقهوه تشبه قهوة المساء اللي بالتحليه صح

ماجد : اقول اها بس وش تشبه لها فيه هنا انواع البنات وهناك ماغير تماسيح

عبدالعزيز : اقول فيصل لو انك تبلع لسانك ولاتحكي ازين لك من الفشيله .. ياخي بالله انت ماتتحطم اي شي تقوله غلط بغلط اسكت ازين لك

ماجد : شف هالطخمممممممه

انا : هماك ماتحب الشقر وتقول ان كلهم نمش

ماجد : بس ذي غير .. شقرا وملامح نجديه

عبدالعزيز : وشلون تجي ذي بالله

ماجد : اااااه خطفت قلبي

انا : رح لها تراهم يخقون على واحد خليجي يحسبون انه مليونير

وراح لها مااجد

ماجد : هاي قيرل <<<< يلعن ام الاسلوب

هي : هاي تو ... وت دو يو وونت؟

ماجد : ارقمتسس

هي : وت ؟

ماجد : تيك ماي نمبر 0096650...........

هي : ار يو سئودي؟

ماجد : يس ،،، منتب عاقله عرفتي من مفتاح الخط

هي : ارهاااااااابي قوو ذيرررررررر .. وخبطته بشنطتها

ماجد رجع لنا وهو ياحياتي متحطم : ماقلتلكم انهم بيحسبونا ارهابيين ماصدقتوني

عبدالعزيز : والله انك صادق .. اثرنا منبوذين وحنا ماندري

انا : بسسسسسسسس لقيتهاااااااا

ماجد وعبدالعزيز : وشوووو

انا : لانقول اننا سعوديين .. نقول اننا اماراتيين

ماجد : على بالك انك كذا بعدت الشبهه .. كل العرب بعينهم ارهابيين

عبدالعزيز : ياخوي اسكت انت انا عن نفسي مابي اصير غير سعودي

انا : على بالك اننا بنوزع جنسيات .. انا بقول اني لبناني تئبرني

ماجد : اقنعتني انك لبناني .. اقول كل تبن بس تراني متحطم واسوني

عبدالعزيز : وشلون نواسيك طار عمرك ؟

انا : ههههههههههههههه طار عمرك اجل حلوه منك على قد سنك

ماجد : اص انت .. ودوني ديسكو علشان انسى

عبدالعزيز : خلاص بكره نوديك بس الحين نبي نرجع الاوتيل ننام تراني تعبان

انا : خلنا نقعد هنا على وحده من ذا القهاوي وبعدها نرجع للاوتيل ننام

.................................

انا : جرسوووووووووون

ماجد : متاثر مرررره بالافلام المصريه .. قل ايها النادل ههههههههههههههه

عبدالعزيز : وانت متاثر بالمسلسلات المدبلجه .. لاعمرك تنكت يرحم والديك

الجرسون : يس

انا : اكسبرسو بليز

ماجد : كباشتينو

انا : هههههههههههههه اجل تتريق على الزانشالزيه وانت ماتعرف تقول كابتشينو

عبدالعزيز : ون اكسبرسو، ون كابتشينو اند ون امريكان كوفي

ماجد : يلعننننننن شكلك تذاكر من ورانا يالمخيس

عبدالعزيز : لاتغلط هاه تراني معصب وتعرف اني اذا عصبت كني ثور اهيج عليكم

انا : اص يالثور

عبدالعزيز : وش قايلكم انا تو لاتغلطون

انا : انت تو قايل عن نفسك ثور ماجبت شي من عندي

عبدالعزيز : اص لااكفخك الحين اسب انا نفسي عادي بس لاحد يسبني

ماجد : حمار

عبدالعزيز : بلعن خامسسسسسسسك

ماجد : وش دخلك انت انا اسب نفسي

انا : هههههههههههههههه كلب

عبدالعزيز : اقول سلالالالالام الشرهه مو عليكم الشرهه علي انا اني اسافر معكم

وعبدالعزيز وهو ماشي وقف عند واحد يرسم وطلب منه انه يرسمه .. وقعد على الكرسي ووجه راسه يسار يعني مايقدر يطالع الرسام وجيت انا وماجد عند الرسام وقلنا له انه يرسم ثور بدال شكل عبدالعزيز ونعطيه دبل السعر .. وماكذب خبر الرسام قعد يرسم صورة ثور

عبدالعزيز : ماقضيييت يابو الشباب؟

الرسام : وت ؟

عبدالعزيز : فينش فينش

الرسام : يس يس

وجا عبدالعزيز يشوف الصوره وحممممق على الرجال وشوي وكان بيجيه بقس الا جينا حنا وهدينا الوضع

انا : من قالك انك تخليه يرسمك وانت معصب

عبدالعزيز : يؤيؤيؤيؤ يعني هو شافني على اني ثور .. استغفر الله يارب قسم بالله ماكنت ناوي اتريق على نفسي يارب رجع لي وجهي زي اول .. لالا احلى من اول يااااااااارب

ماجد : ههههههههههه رحمتك اصلا حنا اللي قايلين له يرسم ثور علشان تبطل حركاتك

عبدالعزيز : شف واللي خلللللللق هالارض اني ماقعد يوم زياده معكم .. بكره راجع للريااض

انا : تعوذ من ابليس ياشيخ وش هالحكي اللي تقوله .. دفعنا دم قلبنا والحين تجي تقولنا هالكلام

ماجد : اركد يابن الناس حصل خير وحنا اسفين

عبدالعزيز : والله لو وش تسوون هالحركه ذي بحق وانا راجع يعني راجع

وتركنا ومشى راح للاوتيل يدبر له حجز .. وانا وماجد ضايق صدرنا مانبي نرجع بس عشان خوينا لازم نرجع مانبي نضيع صداقة عمرنا على الموقف السخيف

ومالقى حجز عبدالعزيز الا عقب يومين وطبعا حنا معاه .. ورجعنا للرياض

...........................

امي : وش رجعععععععععك؟

انا : هذا بدل ماتقولين الحمدلله على سلامتك ياوليدي وحشتني

امي : وين وحشتني معاه كلها اربعة ايام .. بس ماقلتلي وش رجعك؟

انا سكت شوي قمت افكر برد مقنع ماودي اقول اننا تهاوشنا علشان ماتتريق علي

انا : بصراحه يمه كنت مبسووووط عالاخر ولا ودي ارجع بس اللي كان مضيق صدري شي واحد

امي : وشهوو عسى خير

انا : وعدي لك اني اتزوج مها وانا مابيها بصراحه قرووووويه مهيب على اسمها ابد يعني لو مزنه كانت تمشي الحال بس مها على وحده قرويه مره مابيها يمه .. وقلت بنفسي دام اني وعدتك اني اقعد اسبوعين في باريس بعدها اتزوج قلت في بالي خلني ارجع ازين من اني اقعد اسبوعين وبعدها انشب طول عمري بمها

امي (معصبه) : لا يالتسلبببب توني ادري انك ذكي وتبي تفلت من وعدك بس هين يافيصلووووه والله لو حاط وحده في بالك غير مها ماازوجها لك

انا : واللللللله يمه مافيه وحده في بالي قسم بالله اصلا مابي اعرس .. ومنيب متزوج الا وحده راضيه عنها بس بالمواصفات اللي تعجبني انا

امي : وش قصدك ذوقي شين يعني ؟؟ ذي اخرة تربيتي فيك ترفع يدينك على امك

انا : والله مارفعتها

امي : ايه ادري بس اقلد فيفي عبده بالافلام

انا : ههههههههههههههه ياحبيلك يمه حتى وانتي معصبه طيبه

امي : ايه علشان ثاني مره تاخذني معك بسفراتك والله اني ازين من اصدقاك ماغير انكت

انا : ان شاءالله السفره الجايه معك

امي : وين بتاخذني

انا : لا بخليها لك مفاجأه

امي : لالا تكفى قل <<< وهي تتدلع

انا : ابهاا البهيه .. فيها مهرجانات حلوه

امي : قممممممممممم مناك لاتوطاك رح فارق

انا : طيب بفارق بس ترى زي ماقلتلك مافيه زواج من مها

امي : طيب بس اذلف عن وجهي يالهيس مابي اشوفك اصير ثوره وانا معصبه

انا : هههههههههههههه بسم الله عليك <<< تذكر عبدالعزيز وضاق صدره

.....................................

ورحت الملحق وبديت اتذكر عبدالعزيز وكلمت ماجد بالتليفون

انا : الو ماجد تكفى تعال الحين انت وعبدالعزيز

ماجد : كنت ناوي ادق عليك نجتمع عندك يالله الحين بمر عبدالعزيز ونجيك

وجوو اصدقاء الطفوووله

انا : حياااااالله عزووووز هات خشمك

عبدالعزيز : هلا والله فيسل

ماجد : هههههههههههه تذكرت ذيك الفرنسيه

انا : اص تكفى لاتذكرني بباريس

عبدالعزيز : وش قصدك يعني تذب من تحت لتحت

انا : لاياشيخ اهم شي طبينا باريس وفيه اثبات بعد .. الفيزا وختم الدخول بالجواز

ماجد : والله ياحنا بنكشخ كشخه على عيال الحاره

وبعد صمت دام خمس دقايق واحنا نشوف اليسا

عبدالعزيز : عندي فكررررررره

انا وماجد : وشووووو

عبدالعزيز : وش رايكم نرجع لباريس مره ثانيه

انا وماجد نناظر بعض وقمنا عليييييه طق




THE END

طبعت الترجمة في معامل أنيس عبيد .. القاهرة
اضافة رد مع اقتباس
  #2  
قديم 14/09/2004, 11:20 AM
زعيــم مميــز
تاريخ التسجيل: 09/03/2004
المكان: رجعنا لرياضنا الحبيبه
مشاركات: 1,525
رااااااااااااااااااااااااااااااااااااااااااااااااااااااااااااااااااائع


تسلم يافيصل روعه ومن قلم اروع يارائع وللروعة معاني...............

بس عبد العزيز ماله حق ياخي نفسه براس خشمه ,,,,,,,,,,,,,,,,,,,
اضافة رد مع اقتباس
  #3  
قديم 14/09/2004, 11:27 AM
الصورة الرمزية الخاصة بـ Z3eeM_Dc
مشرف سابق بمنتدى الجمهور الهلالي
تاريخ التسجيل: 26/01/2004
المكان: شبكة الزعيم
مشاركات: 6,042
الله يرج عدوك يا شيخ
اضافة رد مع اقتباس
  #4  
قديم 14/09/2004, 02:30 PM
زعيــم مميــز
تاريخ التسجيل: 07/05/2004
المكان: الساحل الشرقي
مشاركات: 1,576
تسلم اخووي وما شاء الله اسلوب رائع
الله يعطيك الف عافيه
اضافة رد مع اقتباس
  #5  
قديم 14/09/2004, 04:59 PM
زعيــم نشيــط
تاريخ التسجيل: 26/04/2004
مشاركات: 581
أجل افتكيت من مها

اسلوب ولا أروع

مشكور أخوي فيصل
اضافة رد مع اقتباس
  #6  
قديم 14/09/2004, 06:14 PM
عضو غير عادي
تاريخ التسجيل: 14/03/2002
المكان: الـريـــــــــــاض
مشاركات: 10,107
الـحـاتـمــي ...


مــر مــن هــــنــــا ...


ويـقـول : و انا أقول ليش خطّك شين !!

بس لو تخسّرت شوي و حطيت بدال أنيس عبيد ,, ميجا ستار كان تمام
اضافة رد مع اقتباس
  #7  
قديم 15/09/2004, 03:52 AM
مشرف سابق في منتدى الرياضة السعودية
تاريخ التسجيل: 06/04/2003
المكان: Riyadh State
مشاركات: 1,667
اخوي abo-15-yaqob .. مشكور على هالمجامله الحلوه

اخوي Z3eeM_Dc .. والله يرجك انت بعد

اختي *مجنونة الهلال* .. مشكوره على ردك

اخوي غاوي مشاكل .. ايه ابشرك افتكيت منها

اخوي الحاتمي .. طيب انا طبعتها في انيس عبيد وش اسوي
اضافة رد مع اقتباس
  #8  
قديم 15/09/2004, 04:40 AM
زعيــم مميــز
تاريخ التسجيل: 10/07/2004
المكان: فوق هام السحب
مشاركات: 5,009
بصراحة مبدع يافيصل
اسلوب جميل
وسرد رائع
وخفة دم
وزملاء فلّه
وأم الله يخليها لك
بس ما له داعي تحشون ابها
اضافة رد مع اقتباس
  #9  
قديم 15/09/2004, 04:43 AM
مشرف سابق في منتدى الرياضة السعودية
تاريخ التسجيل: 06/04/2003
المكان: Riyadh State
مشاركات: 1,667
حبيبي والله ماقصدي احش بابها ولا شي ..

بس انا قلت خلني اقولها ابها لانها احلى شي بالسعوديه
اضافة رد مع اقتباس
  #10  
قديم 15/09/2004, 03:56 PM
مشرف سابق في منتدى الرياضه السعوديه
ومنتدى المنتخب السعودي
تاريخ التسجيل: 14/05/2002
المكان: في صومعة الحياة ..!!
مشاركات: 9,999
اسلوب جدا رائع

تحياتي لك
اضافة رد مع اقتباس
  #11  
قديم 15/09/2004, 05:47 PM
زعيــم مميــز
تاريخ التسجيل: 07/07/2004
المكان: على سطح الهلال
مشاركات: 1,775
رووووووووووووووووعة يا فيصل

الله يعطيك العافية
اضافة رد مع اقتباس
  #12  
قديم 15/09/2004, 07:16 PM
زعيــم مميــز
تاريخ التسجيل: 10/07/2004
المكان: فوق هام السحب
مشاركات: 5,009
إقتباس
الرسالة الأصلية كتبت بواسطة Fai9aL
حبيبي والله ماقصدي احش بابها ولا شي ..

بس انا قلت خلني اقولها ابها لانها احلى شي بالسعوديه

يالله بنمشيها لك هذي المرة ....
بس لا عاد تعيدها
اضافة رد مع اقتباس
  #13  
قديم 15/09/2004, 08:12 PM
زعيــم نشيــط
تاريخ التسجيل: 11/11/2003
مشاركات: 796


القادم اجمل ....... ورحلتك الى سيريلانكا >> يمكن تناسب
اضافة رد مع اقتباس
  #14  
قديم 15/09/2004, 09:38 PM
الصورة الرمزية الخاصة بـ مطزاز
زعيــم متألــق
تاريخ التسجيل: 01/05/2002
المكان: الرياض
مشاركات: 1,236
يعطيك العافيه بس اذا بغيت تروح لفرنسا رح لحالك على شان محد ينشبلك

والف شكر لك
اضافة رد مع اقتباس
  #15  
قديم 15/09/2004, 10:55 PM
تقني مميز
تاريخ التسجيل: 20/05/2003
المكان: ربوع بلادي !
مشاركات: 4,409
ما هازا يا قدع
رقك الله رقاً مبرحاً

جال طالع باريس هاه

يا فيسل يا سئودي ... ترا يمدحون الخبر وأبها

وألف شكر موضوع تشكر عليه

وحبتين
اضافة رد مع اقتباس
   


إضافة رد

أدوات الموضوع
طريقة عرض الموضوع

قوانين المشاركة
غير مصرّح لك بنشر موضوع جديد
غير مصرّح لك بنشر ردود
غير مصرّح لك برفع مرفقات
غير مصرّح لك بتعديل مشاركاتك

وسوم vB : مسموح
[IMG] كود الـ مسموح
كود الـ HTML مسموح
Trackbacks are مسموح
Pingbacks are مسموح
Refbacks are مسموح



الوقت المعتمد في المنتدى بتوقيت جرينتش +3.
الوقت الان » 08:34 PM.

جميع الآراء و المشاركات المنشورة تمثل وجهة نظر كاتبها فقط , و لا تمثل بأي حال من الأحوال وجهة نظر النادي و مسؤوليه ولا إدارة الموقع و مسؤوليه.


Powered by: vBulletin Version 3.8.7
Copyright ©2000 - 2019, Jelsoft Enterprises Ltd

Google Plus   Facebook  twitter  youtube