01/09/2004, 11:49 AM
|
زعيــم مميــز | | تاريخ التسجيل: 29/02/2004 المكان: الرياض
مشاركات: 1,512
| |
يا للعجب ........ شركه سويديه قذره تذلنا [ALIGN=CENTER][ALIGN=CENTER]اليوم الصباح وزي كل يوم في العطله كنا سهرانيين..
وبعد الفجروالساعة ست بالتحديد قاموا ثلاثه من الشباب وقالوا نبي نروح نشوف افتتاح ايكيا ونشوف الناس..........
المهم بعد نص ساعه اتصلوا فينا
وقالوا: تعالوا الحقوا لا يفوتكم كننا في مكه (الله يشرفها) وقت الحج!!!! مشاكل واسعاف ومرور والدائري منسد والحريم اكثر من الرجال!!!!!!!!!
طبعا اول شي ما صدقت قلت من الفاضي اللي يقوم من الصباح ويروح عشان طفسه ماتستاهل المهم قعدنا شوي قلت خلنا نروح نشوف وش القصه ؟؟
وطلعنا من مخرج تسعه حسيت ان الدائري زحمه قلت معقوله كل هذا عشان ايكيا؟؟
ثمن قلت لا الناس طالعين للدوامات وهذا السبب للزحمه المهم يوم قربنا اشوف غبار من بعيد ونقرب ونقرب ونشوف هالبشر والله اني ما تذكرت الا الحرم ( الله يشرفه )!!! وقفنا السياره ونزلنا وبدت المعاناه ..
شياب على خمسين ستين سنه واقفين ينتظرون وشباب تشوف اشكالهم ولبسهم وكلامهم وحركاتهم تنسد نفسك والطامه الكبرى الحريم والله ثمن والله اني تنكدت وضاق صدري وحسيت بكتمه حريم سعوديات كبار وصغار متراصين وقايمين من صباح الله عشان خمسمية ريال من هذه الشركه السويديه القذره اللتي ذلت الشعب السعودي اليوم بهذه الطريقه السوقيه والقذره اللتي اتبعتهلتسويق منتجاتها واللي يزيدك هم وحده شايله بزرها معها واللي تدف عربيه كل هذا عشان طفسه هالوسخين
ويم جاء توزيع الكوبونات العالم مجتمعين عند البوابه والكوبونات وزعوها في اخر المواقف تعال شف الصراخ والمشاكل والطقاق والحريم اللي اغمي عليها واللي تركض كن واحد يلاحقها بيذبحها
مشاهد من الموقع :
**فيه واحد اجنبي (احمر ) شكله المدير او المسؤل تشوف الشباب وهم يلاحقونه تحس بالذل وانت مالك دخل
**حصلت (مضاربه ) بين حرمتين حصل فيها ( تمشيع ) للشعر ورفع احدى الحريم ( الشبشب ) على الاخرى
** حصلت حالتين اغماء لحرمتين (اللي شفتها غير اللي ماشفتها ) وطبعا كان الاسعاف قريب لانهم عارفين انه بتصير مشاكل لكن مااقول الا حسبي الله على من سمح لهم
**قام احد الشباب من اصحاب الطواقي الطويله ( مسوي الشيف رمزي ) باداء مقطوعه رائعه من ( الكسرات ) وقام من هم على شاكلته ( وهم كثير في الموقع) بترديد ( ياعيوني ,,,الله الله)
** حصلت هناك حالات ( ترجيم ) من الشباب على الحريم ومن الحريم على الشباب ومع كل (هجمه ) اقصد رجمه تسمع (زعاق ) الجمهور
** بعد ان اعلن (المذيع الداخلي ) اقصد السكيورتي ان الدخول للحريم فقط ارتفعت ايدي الحريم وبداوا بالتشجيع وما تذكرت الا هدف سامي على الشباب
يالسخريه القــــــــــــدر!!!!
-السعوديه اكبر مصدر للبترول في العالم وسعر البرميل الان وصل لحاجز الخمسين دولار ونشوف هالشياب والحريم والشباب يتقاتلون من اجل خمسمية ريال
- السعوديه اكثر البلدان مساعدة للاخرين واخرها للسودان والمغرب ولبنان والعراق ومصر و,,,,و,,,,, وشيبانها وحريمها يتقاتلون من اجل خمسمية ريال
-السعوديه تملك اكبر احتياطي من النفط وشاهدت شايب يوم حصل على قسيمه بمئة ريال كنه فايز بمليون دولار
لكن اقول الشرهه مهوب على ايكيا الشرهه على اللي سمحلهم سواء اماره او بلديه [/ALIGN][/ALIGN] |