ترى درينا انك كنت مسافر بر بدون ما تكتب موضوع
إيه من قدك تسافر بر حتى لجزر القمر إجازه طويله وموتر جديد

أجل انت اللي دايم مسوي زحمة عند الصيدليات بطرق السفر
كل اشوي طامر جايب شراب الكحه تحطه بالشاهي

ماشاء الله نصائح ولا التوجيه والإرشادة حق الأمن العام

هلالي الجوف · #1 12/07/2004, 05:10 AM

طااااااااااااااااااط سسسسسسسسسلام

اول هام السحالي برىىىىىىىىىىىىى موضوع فوق مستواهم

ثاني هام عيال النعمة اللي يشحنون السيارة بالبسامي ويلحقونها بالطيارة يمسكون الكتف الايمن ويسفطون على جنب

ولامانع من توليع الفلشر

هذا موضوع يخص المنتفين اللي على بند مد لحافك على قد رجليك

ثالث هام حيالله اخواني التماسيح

ندخل بالصدام الامامي اقصد بالمقدمة

موضوعي هذا وهو عن السفر البري ماله وماعليه وجتني الفكرة وانا كالعادة ماسك خط بهالصيفية ;)

بسم الله ..

## قبل ماتبدأ بالسفر سم بالله وافتح الباب بيدك اليمين

<<== صارت كبسة

اقصد قبل ماتبدأ بالرحلة وقبل ماتحدد الوجهه اعرف من تخاوي ;)
ياكم من مرة ومرة وياكم من واحد وواحد راحوا شلة ورجعوا كل واحد شله اقصد كل واحد لحاله

وياكثر ماتسمع عن ناس تهاوشوا بسفراتهم ( اما ليش تسرع والا وقف نتعشى والا وقف ننام والا هات اسوق والا ارفع والا نزل صوت المسجل والا غير الشريط .. اما الشرطان سالفتها سالفة

)
اما عاد التهرب عن دفع البنزين والتظاهر بالنوم عند المحطة ياكثرها

اما واذا كنت مستزوج

فيمدحون شراب الكحه حطه بالشاهي وافتك من القرقره ووجع الراس

ولو تسافر لحالك يكون احسن علشان احسن

والعب وحدك تطلع راضي

## تاكد من سيارتك

افحص الكفرات والمكيف والزيوت واللمبات والمساحات ومي المساحات والسبير

ولاتنكمخ على راسك وتنسى تنفخ السبير ترى مايمديك تنفخه باثمك

ولاتنسى الانسة عفريتة

وحتى مفتاح العجل تراه بعض احيان يسوى وزنه ذهب خاصة اذا انت من حقين المحارش ( من نوع على ركبتي

) يعني خله قريب يمكن تحتاجه ;)

## تأكد من نفسك

واقصد تأكد من وجود الرخصة والاستمارة والمحفظة .. واهم شي الجواز والعناوين

## ازجر الكفرات

زجر الشي اي نفخه

وازجر الكفرات يعني عبها هوا

ترى كل مازجرتها كل ماقلت نسبة الانفجار( البنشر ) .. لأنها تحما ( ترتفع درجة حرارتها وماتنفع معها التحاميل

) واذا حميت وهي منسمة تنفجر

<<== طرى على بالي واحد منسم غريبة لهالحين مانفجر

واحرص على قياس الهوا قبل التحميل وبعده لان التحميل يزيد الضغط على الكفر ونصيحة خلها بين الـ35 والـ45

## لاتسرع فالرادار اسرع

ترى سيارات هالوقت صارن طيارات بس مهنالك سرعة لان الرادار ماشاءالله عندنا بكل قرنة

واتحدى اذا وجود الرادار خوف على ارواحنا

لان محدن احرص مني على روحي والا على روح عيالي ومن معي والا حتى على سيارتي لكن الشكوى لله

المهم اذا كنت مبتدىء لاتسوي نفسك مايكل شوماخر وتطير شغال مساقط ولو معك فيراري .. اعقل وانتبه يما تحترف زيي وسو اللي تبي

## لاتسوي نفسك عربجي وانت ماعندك سالفة

اذا وصلت نقطة تفتيش سكر الياقة ونزل ردونك وسكر الكبك والبس شماغك وشخص وطف الانوار على السكن وخلك محترم تراهم بيحترمونك ويمشونك

اما واذا وصلت لهم وشافوا شوشتك طايرة ومفسر الذرعان والدخان يثعور والشماغ على الكتف لاتلوم الا نفسك

تراهم يحترون هالاشكال على نار .. هي كلمتين ( اسفط على جنب

) وخذ عاد عطلة بالساعات وانت سافط وبيحطونك بمنخل حتى لو مامعك شي .. مساكين يدورون لو نصيص

وعلى طاري المنخل تذكرت واحد من اخوياي وقت احداث الجوف طالع للمزرعة فجر الجمعة بالسروال والفنيلة ومسكوه الطوارىء بالصدفة ونخلوه

اقصد فتشوه ولقوا معه جفت ( بارود حق صيد طيور ) ناسيه ورى المرتبة الكمخه وثلاث ايام واهله مايدرون عنه

وبالقوة وبالواسطات وبعد اخذ تعهد طلع بسرواله وفنيلته والحديد بايديه ورجليه تقول مجرم يحتري حد السيف

## اذا بنشرت وانت مسرع اقضب الدركسون زين وتشهد

لاتسوي نفسك فاهم وتدعس على البريك

تراك ان سويتها بتحجز تذكرة درجة اولى بدون عودة على اقرب طيارة للقبر

جود الدركسون زين وخل السيارة توقف من حالها والا وقفها شوي شوي بالنمر الثقيلة

## واذا بنشرت وصلحت البنشر لاترمي الكفر المبنشر وتمشي

اذا سويتها اعرف ان راسك هو المبنشر ويبغالك رقعة تيوبلس

سواها واحد من الشلة المنسمة

بعد ماصلح البنشر مسك الكفر ودحدره يقول خلاص خرب

## لاتخلي عداد البنزين ينزل عن الربع

ياكم واحد وواحد انقطع بنزينه اقصد بنزين سيارته ووقف يأشر لخلق الله بسبة محطة مافيها بنزين والا كهربها مقطوع والا وقت صلاة .. والا نسوه .. خلك ذهين وعب بنزين منت خسران شين

## خل عنك حركات المبزرة

وحركات المبزرة ياكثرها .. خاصة كبس النور العالي بوجهك بالليل اذا كان خط واحد والا مسك الجانب الايسر والمشي بسرعة منخفضة بالطرق السريعة

هالحركتين انواع الازعاج

## اذا كنت مسافر بالليل ومريت من عند مزارع وصادفك طيور ليل والا فراش على النور والقزاز الامامي لاتنكمخ وتشغل المساحات

ترى المساحات تزيد الطين بلة وحلها عاد يما تلقى ليفه وصابون

## كذلك انتبه بالليل من البعارين .. ترى لقاء البعير وجه لوجه اسرع طريق للقبر

والمشكلة بالليل مايمديك تشوف الا البعير بحضنك .. اما بالنهار اشوى شوي

لذلك ينصح بالقيادة نهاراً

## اذا صادفك عج وغبار وقف وحط راسك ونم

والا ارجع لديرتك

لاتمشي وتعدم سيارتك

الا اذا كانت حلال دولة والا مستأجرة حط حيلك فيها عادي

اما اللي يحطون فيري وشحم احب اقولهم كيف الحال والله يخلف عليكم

## اذا حسيت بنوم والا تعب وقف وخذ غفوة ولاتكابر ..
واذا معك احد يعرف يسوق عطه فرصة ومافي داعي نقول الوعد يوم القيامة

## استخدم الاشارات

ترى من أداب الطريق احترام الغير

يعني علم انك تبي تتجاوز ودق اشارة يسار وعكسها اذا رجعت لطريقك ولاتساقط .. وحب لغيرك ماتحبه لنفسك

## خلك رجل

اركد ومافي داعي تناظر لمحارم خلق الله .. ياكم واحد وواحد حجز مقعد على قطار الموت السريع بسبة التتنيح بالسيارات اللي فيها بنات وينسى نفسه وسيارته الا هو بعداد المفقودين

وانت ياراعي البنات خاف ربك فينا وامسك محارمك وبلاش براقع وجنز

مدري عن بعض ناس هي تسافر والا تكشخ علشان تلفت الانتباه !!
ياكم واحد انقطع وضوءه وهو رايح يصلي

وياكم واحد طلع من البقالة ونسى الباقي

هذا اذا مانسى اغراضه بسبة عيون وحركات نشوفها عند المساجد والبقالات

## ختاماً خل شعارك الدائم ( تمتعوا بالرحلة ودعوا القيادة لنا

)

الحاتمي · #2 12/07/2004, 05:28 AM

الـحـاتـمــي ...

مــر مــن هــــنــــا ...

ويـقـول : بصراحة عجزان لا اكتب !!

<< أجل وشّوله راد

بس بصراحة الحين تأكدت بعد هالموضوع يابو عبدالرحمن أنّك راعي خطوط يابو ركبة !

عاشق ابو بندر · #3 12/07/2004, 05:39 AM

[ALIGN=CENTER]يالله صبــــــــــــــــــاح خير

مالقيت الا الساعه 05:10 صباحاً تنزل فيها موضوع

تعليــــــــــقات حلوه منك يا هلالي الجوف;)

اما سالفة ماتدري عن البعير إلا بحجرك

وبعدين يا خي وش فيك على الناس الي يسافرون وهم مشخصين تراى جونا حلو وطرقنا اروع من الروعة والطبيعة تحف الطرق من كل جهة

تحياتي لك يا مقلع

زين ما فضحت فينا انا والرجال نشوف موضوعك ونقول الله يستر

[/ALIGN]

بو وليد · #4 12/07/2004, 06:07 AM

انا اشهد انك قايد بو عبدالرحمن

يا حبي لك ياعاشق بوبندر

اجل عشا على هالوقت

ما اقوووووووول الا

بالعاااااااااااااااااااااااااااااااااااافية

ابو عبـــــــــدالله · #5 12/07/2004, 07:23 AM

الله يهديك بس .

هالحين وشلون تفتح الباب بيدك اليمين وانت مانت عارف وين تروح ؟؟

راسن · #6 12/07/2004, 08:19 AM

هلا هلالي الجوف ... اسمح لي باأآآآآاتوطفل

عجبتني بعض المقاطع وحبيت اعلق عليها >> ثوبي هههههه

المهم ,,,

إقتباس


	اما واذا كنت مستزوج فيمدحون شراب الكحه حطه بالشاهي وافتك من القرقره ووجع الراس

مجرب

إقتباس


	اذا وصلت نقطة تفتيش سكر الياقة ونزل ردونك وسكر الكبك والبس شماغك وشخص وطف الانوار على السكن وخلك محترم تراهم بيحترمونك ويمشونك

ابد خلك على مانت عليه

خذ معك زوجتك وسو اللي تبي

ومحد معارضك

إقتباس


	تراك ان سويتها بتحجز تذكرة درجة اولى بدون عودة على اقرب طيارة للقبر

كشخة يا هل الجوف تروحون المقابر على طيارات

إقتباس


	الا اذا كانت حلال دولة والا مستأجرة حط حيلك فيها عادي

وبعد نسيت لو كانت حلال ابوك عادي:p

مشكور يا ابا عبد الرحمن >> او ابا دحموني

تحياتي ,,

مشكلني حبك يا سامي · #7 12/07/2004, 09:43 AM

هلالي الجوف ....

توجيهات جدًا رائعه وفي محلها بأسلوب فكاهي

مرح اكرر شكري لك اخوي هلالي وياليت محبين تمتعوا بالرحلة

واتركوا القيادة لنا يلتزمون بهذي الــتوجيهات ومشــكور وما قصــرت

Z3eeM_Dc · #8 12/07/2004, 10:56 AM

إقتباس


	عاد التهرب عن دفع البنزين والتظاهر بالنوم عند المحطة ياكثرها

[ALIGN=CENTER]ياهي تصير دايم و لا اذا قالوا العيال هاه خذ
و كل واجد ماد يده تلقى كل واحد يبيك تاخذ فلوس خويه

يعطيك العافية[/ALIGN]

asheqalreem · #9 12/07/2004, 11:06 AM

[ALIGN=CENTER]حلووووووووة هالنصايح

[/ALIGN]

[ALIGN=CENTER]

[/ALIGN]

prince1111 · #10 12/07/2004, 11:45 AM

ترى درينا انك كنت مسافر بر بدون ما تكتب موضوع
إيه من قدك تسافر بر حتى لجزر القمر إجازه طويله وموتر جديد

أجل انت اللي دايم مسوي زحمة عند الصيدليات بطرق السفر
كل اشوي طامر جايب شراب الكحه تحطه بالشاهي

ماشاء الله نصائح ولا التوجيه والإرشادة حق الأمن العام

ماء الذهب · #11 12/07/2004, 12:59 PM

توجيهات رائعة منك ياأبا عبدالرحمن ;););)

ابطبقها بعد غد <<===== يعني تراي ابسافر

saudi2002 · #12 12/07/2004, 02:04 PM

تروووح وترجع بالسلامة

ومشكووور على النصايح

ودمتم سالمين

المعترض · #13 12/07/2004, 05:35 PM

هلا وغلا

الله يرجك يابويا اجل الكفر لما ترتفع حرارته ماتنفع معاه التحاميل خخخخخخخخخخخخ

اما المنسم اللي دحدر الكفر وقال خلاص خرب سلملي عليه هههاي

ونتمنى للجميع السلامه والف تحيه للجميع .

@البرفسور@ · #14 12/07/2004, 06:33 PM

[ALIGN=CENTER][TABLE=width:70%;background-color:transparent;background-image:url(backgrounds/18.gif);][CELL=filter:;][ALIGN=center][ALIGN=CENTER]هلا وغلا بك اخوي بوعبدالرحمن ومشكور على النصايح

حلو عنوان الموضوع : تمتعوا بالرحله
ودعوا القياده لنا

المهم اشكرك اول شي وثاني شي بعلق على شي انت قلته:[/ALIGN]

إقتباس


	اما واذا كنت مستزوج فيمدحون شراب الكحه حطه بالشاهي وافتك من القرقره ووجع الراس

[ALIGN=CENTER]اجل الله يعين ام عبدالرحمن والله يعينك على فلوس شراب الكحه اقول وش رايك تشتري لك جمله

تر ازين لك

مع تحياتي لك وتروح وترجع بسلامه يابني ...[/ALIGN][/ALIGN][/CELL][/TABLE][/ALIGN]

ابو الذهب · #15 12/07/2004, 11:11 PM

إقتباس


	هذا موضوع يخص المنتفين اللي على بند مد لحافك على قد رجليك

انا ضامنها ------- اكبر منتف

إقتباس


	## قبل ماتبدأ بالسفر سم بالله وافتح الباب بيدك اليمين <<== صارت كبسة

ههههههه علشان مايركب معنا الشيطان

إقتباس


	اقصد قبل ماتبدأ بالرحلة وقبل ماتحدد الوجهه اعرف من تخاوي

يارجال خذ معك من هاللى يدورون فى الشوارع ولابسين بنطلونات من وسعها تحسبه متلحف بزولية

لاباالله خوش خوى

اما نصايحك ياابو عبدالرحمن خوش نصايح

إقتباس


	## لاتسوي نفسك عربجي وانت ماعندك سالفة اذا وصلت نقطة تفتيش سكر الياقة ونزل ردونك وسكر الكبك والبس شماغك وشخص وطف الانوار على السكن وخلك محترم تراهم بيحترمونك ويمشونك اما واذا وصلت لهم وشافوا شوشتك طايرة ومفسر الذرعان والدخان يثعور والشماغ على الكتف لاتلوم الا نفسك تراهم يحترون هالاشكال على نار .. هي كلمتين ( اسفط على جنب ) وخذ عاد عطلة بالساعات وانت سافط وبيحطونك بمنخل حتى لو مامعك شي .. مساكين يدورون لو نصيص وعلى طاري المنخل تذكرت واحد من اخوياي وقت احداث الجوف طالع للمزرعة فجر الجمعة بالسروال والفنيلة ومسكوه الطوارىء بالصدفة ونخلوه اقصد فتشوه ولقوا معه جفت ( بارود حق صيد طيور ) ناسيه ورى المرتبة الكمخه وثلاث ايام واهله مايدرون عنه وبالقوة وبالواسطات وبعد اخذ تعهد طلع بسرواله وفنيلته والحديد بايديه ورجليه تقول مجرم يحتري حد السيف

هههههههههههههه ارجك الله رجا مبرحا

بس وش النصيص اللى يدورونه ;)