اجمل ايام تشجيع (انسوا الهم شوي )
 

في وقت تراكمت المصايب على نادي الهلال وانصدمت جماهيره بواقع مر كان امر حصوله ابعد لهم من حلم مخيف وانشغل قسم منهم بعدها بمهاجمة لاعب معين والقسم الآخر بالدفاع عنه وتحول بعض المشجعين الى مدربين واداريين واعضاء شرف ومحامين ووصل البعض الى ان يكون رئيس للنادي والبعض الآخر يقيس هلالية المشجعين بعدد المشاركات في المنتدى وكأن بداية الهلال بدأت مع انشاء المنتدى ، والبعض يقيس هلالية المشجعين بمقدار حبهم للاعب بعينه أو كرههم لآخر ، اخترت ان نسترجع معكم اجمل ايام تشجيع لهذا الكيان الشامخ والتي كانت سببا في ازدياد حبنا لهذا النادي وقبل ان يهاجمنا البعض بأن الذكريات لا تفيد النادي وأن هذا الوقت وقت عمل وقرارات احب ارد عليه بأن القرارات والتعاقدات اذا كانت بأيديكم نفذوها ، اتمنى التفاعل من الاعضاء للننسى الهم قليلا حتى يزال بأذن الله.

*بداية تشجيعي للهلال كان هدف يوسف الثنيان في سالم مروان (شفاه الله) واللي تحققت بطولة الدوري للهلال بفضله.
*أول بطولة آسيوية للهلال كانت اكبر فرحة لي بتحقيق الهلال احد بطولاته (فوز الهلال بالنهائي على أحد الفرق الايرانية بضربات الترجيح) الثنيان نجم البطولة.
*أول سنة درب فيها اوسكار الفريق كانت من اجمل السنوات اللي شاهدت فيها الهلال يقدم كورة ممتعة وتصدر الدوري لكن نظام المربع وهزيمة الهلال امام الشباب بالنهائي ضيعت مجهود سنة كاملة وكان سامي نجم الموسم .
*استمر الهلال بتقديم العروض الجميلة مع المدرب باتيستا بدون مشاركة الدوليين طول السنة (استعداد كاس العالم 94م) وكان فيصل ابو اثنين (اذا لعب فاز الهلال) وفهد الغشيان قبل انضمامه للمنتخب نجوم الموسم والمربع ما انصف الهلال .
* رجع اوسكار مع الهلال في البطولة العربية وكانت مباراة العربي الكويتي اجمل مباراة وابدع فيها الفريق خاصة سامي وحقق الهلال البطولةوكان سامي نجم البطولة.
* استلم المدرب هانجيم الهلال في البطولة العربية وكان اقوى فريق هلالي شجعته (دوخي - ليتانا - ابو اثنين - الرشيد - خميس - لطف - التيماوي - الثنيان - الجابر - الغشيان ) وكانت احلى بطولة قدم فيها مستويات وأكل فرق البطولة كلها وبدون مويه وكان الثنيان نجم البطولة.
* اذكر ان يوزيك مسك الفريق واحترف المغربي بصير مع الهلال وحقق بطولة آسيا لكن ما اذكر عن الهلال كثير (يمكن السبب ايقاف الغشيان) وكان بصير نجم الهلال .
*استلم الزياني الفريق واحترف بشار والحمروني مع الفريق وكان قوي بوجود سامي والثنيان والتمياط والتيماوي والدوخي وابواثنين وخميس والشريده لكن للأسف المربع ما انصف الهلال وكانت اكثر سنة احضر المباريات وكان الدوخي وبشار نجوم الموسم .
* استلم بلاتشي الهلال وفي المربع تألق التمياط كثيرا وكانت مباراة الهلال والشباب التاريخيه وهدف سامي ابرز ماحصل (ما انسى اللي صار بعد الهدف في المدرجات لكن اذكر اني نزلت راسي والصف اللي ورانا صار بقدرة قادر قدامنا)
*اخر سنة حضرت فيها المدرجات كانت السنة اللي احترف فيها الهويدي مع الهلال وخاصة تصفيات البطولة الآسيوية.
* يوردانيسكو كانت اخر فترة جميلة اشوفها في الهلال وأكثرها بطولات والشلهوب كان آخر موهوب تقدمه المدرسة الهلالية للفريق الأول حتى الآن .

أهداف ما أنساها:
هدف الثنيان في سالم مروان (شفاه الله) ، هدف الثنيان في الفريق الايراني ، هدف الثنيان في الترجي نهائي البطولة العربية ،هدف سامي التعادل في الشباب مع اوسكار ، هدف سامي التعادل في الشباب مع بلاتشي ، هدف سيرجيو التعادل بنهائي كاس اسيا ، هدف التمياط في الاهلي في المربع مع بلاتشي .

افضل لاعبين مثلوا الهلال من وجهة نظري:
محمد الدعيع،خالد الدايل ،الشريده ، احمدالدوخي ، فيصل ابو اثنين ، خميس العويران ، نواف التمياط ، سامي الجابر ، بشار عبدالله ، بصير لكن فهد الغشيان ويوسف الثنيان الافضل على الاطلاق .

ياكثر بربرتي شكرا وبأنتظار مشاركاتكم