في ليلة قمراء يسودها الهدوء (داخل يقول شعر ذا مب سبق صحفي)

والله ما ادري وشلون ابدأ من الفاجعه اللي حصلت فجر اليوم

لكن نبدا من أول معرفتي بالسالفه

تحديدا الساعه 2:20 دقيقه الفجر دق باب غرفتي في سكن الجامعه دق قووووي ومفجع الصراحه وانا كنت في عز نومي
وفتحت الباب بعصبيه وأجد أحد الطلبه يسحبني للخارج ويقول سم بالله واركض للمواقف ترا السكن يحترق
(أنا للحين نايم ومنب مستوعب الوضع أو بالأصح منب مصدق الرجال من قوة النوم )
المهم ديورت لغرفتي وبكمل النومه
وفي نفس اللحظه اشوف الدنيا كل مالها وتزيد احمرار (الحين بس صدقت)

واحاول افتح النور لكن مافيه نور كل شي محترق التوصيلات وغيرها
قلت يا ولد مبدهاش الحق بس على التلفزيون والملابس واللابتوب وانحش من الغرفه
(يلحق على التلفزيون والناس تراكض ورا الكتب والملخصات صحيح فاشل)

السالفه ومافيها
ان الطلاب اللي كانوا ساكنين في السكن رقم 649 و 648 تم تحويلهم لسكن مهجور من اربع سنوات حسب ما وردنا رقمه 657 و 658 لأن السكن الاول تقرر هدمه

وكان العداد الكهرباء مكشوف طوال الفتره هذي واعتقد انه لحظة تشغيله ما تحمل الضغط هذا وانفجر وبدت النار تمشي على السقف (طبعا سقفنا خشب على بالهم عايشين في الامازون الاخوان )

اترككم مع الصور ما ودي اطول لاني ان طولت رحتوا فيها

طبعا وكعادة الشعراء البكاء على الاطلال في مطلع قصيدتهم
هذي اطلال غرفتي وانا اصور وابكي


وهذي احدى الغرف


وهذي صوره للسقف الاوروبي اللي باقي ربعه


صوره لمدخل الحمام وانتوا بكرامه اللي احتجز فيه طالبين وتم اخراجهم من قبل الطلاب الشجعان


أحد المواقف المشرفه والمحبطه سويا
اننا ركضنا لعماير ملاصقه لنا بحثا عن طفاية حريق لإنقاذ ما يمكن إنقاذه لكن للأسف جميع هذه الطفايات كانت فارغه
وهذا اللي سويناه في الطفايات بعد ما لقيناها فاضيه رميناها عند الدرام تكرمون


وهذا الشي اللي يقهر وهي كتابة ( فارغه ) على جميع طفايات الحريق اللي شاهدناها والتاريخ مدون منذ سنه (طيب تدري انها فاضيه ورا ما تنفخها نفخوا خشمك؟؟)



مشاهدات من الحادث :
1- الطالب الشجاع ماجد الزهراني قام بكسر زجاج دورة المياه الخارجي بيده واخراج طالبين كادا ان يموتا من الخوف والاختناق
2- تشديد امني مكثف حول السكن وخصوصا من قبل امن الجامعه اللي منعوا اقتراب اي شخص للحادث للتصوير مع تفتيش شخصي.
3- قمت بمكالمة جريدتي الاقتصاديه واليوم هذا الصباح لتغطية الحدث ولكن للاسف اعتذرت الاولى وحضرت الثانيه وتم طردها من قبل الامن
4- عند صلاة العصر ذهب بعض رجال الامن لاداء الصلاة واستغليت الفرصه للتصوير بكاميرا الجوال وتم ضبطي ومصادرة الجوال وطالبوني بمسح الصور لكن الحمد لله انهم طلعوا عليميه (اسوي move to folder ويحسبوني مسوي delete ) طبعا وكتابة تعهد بعدم الاقتراب من الحادث مره اخرا
5- أحد الاخوان كان يبكي دم لأنه كان مخزن مشروع التخرج وانحرق الكمبيوتر (القهر انه مهندس كهربائي)
6- بعد صلاة الفجر تحدث الامام للمصلين عن الحادث وقال للساكنين ضرورة توفير سكن لنا والشباب الملتزمين والله انهم نشامى كلن مسكنا وقلطنا للصباح ولزموا نقعد اسبوع زياده.
7- المطافي وما ادراك ما المطافي برود وتقاعس في العمل حضروا الساعه 3 تماما بعد ما اكلت النار الاخضر واليابس وفي محاولتهم للاطفاء تحس انهم يطفون كومه من الزباله وليس سكن يحوي كتب وملفات وبرامج اغلى من حياتهم.
8- الاخ اللي دق علي الباب اخر الليل عشان ينبهني بالحريق طلعت له بالزبيري حقي ويوم طفت النار حبيت خشمه

ختاما اقول الحمد لله على سلامتنا وانا ما حطيت الصور ذي الا عشان افضحهم وترا مهب اول مره تصير لكن عشان غرفتي انحرفت قلت لابد هالمره

الف تحيه وشكر للشباب اللي اخمدوا الحادث

تشااااااااااااااااااو