اهازيج الهلال وصلت الى ويننج اليفن 5 -الدوري الياباني 5- - نادي الهلال السعودي - شبكة الزعيم

عـــــمـــــــاد · #1 31/03/2001, 07:20 PM

نزلت قبل ايام لعبة ويننج اليفن 5 -الدوري الياباني 5- على البلايستيشن 2 و حصلت لي الفرصة و لعبت فيه عند احد اصدقائي .
المهم انا اخترت المنتخب السعودي و ابشركم حاطين تشكيلة المنتخب اللي في كاس اسيا الاخيرة و حاطين الشلهوب قوة مناولاته 18 و الجمعان تسديدته 18 و سامي حاطين شكله الحقيقي -يعني الجبهة باينة شوي (; - و التمياط و خليل و الباقي المهم اصوات الجماهير اذا سمعتها ما تصدق انت في الملعب و الا في بيتكم بصراحة الاصوات واقعية 100% و انا قاعد العب بالسعودية الا اسمع الجماهير تقول :عزك عزنا ..... عزك عزنا قمت و رفعت الصوت الى اخر شي والا اسمعهم يقولون : يا هلال عزك عزنا , يا هلال عزك عزنا , يا هلال عزك عزنا !!!!!!!!!!!! انا اكلت تبن و قعدت اسمع و الكمبيوتر قعد يلعب فيني و انا قاعد اسمع ..طبعا راح يقول البعض يمكنه يبالغ شوي وهم معذورين فقمت ناديت صديقي و قلتله تأكد يمكني كنت احلم و سمع و تأكد بنفسه و طلع كلامي صحيح (: (: (:
فهنيئا لكم بنو هلال و ليتأكد الجميع ان جماهير الهلال في كل مكان حتى في البلايستيشن 2 ....
[عدلت بواسطة عـــــمـــــــاد التاريخ:31-03-2001 الساعة: 07:25 PM]

ماروكو · #2 31/03/2001, 08:45 PM

الظاهر اني باشتري البلايستيشن عشان اشوف ذا الشريط
والله انك مانتب سهل ياهلال ماشاء الله عليك

شابع بطولات · #3 31/03/2001, 08:46 PM

هلا عماد من جدك تتكلم

طيب وش هي الصوره اللي على بيت الشريط .. مثل م انت عارف فيه مليون شريط كوره

ياليت تحدد كيف شكل الشريط

سفير الهلال · #4 31/03/2001, 09:17 PM

يا اخي
متأكد والله انجاز
لكن بس على البليستيشن(2)
الله يعين
أنا بشتريه عشان أسمع عزك عزنا والله تسوى

جابر عثرات الهلال · #5 31/03/2001, 09:49 PM

اهلين ..مشكووووووور ..شكلي بشتري البلاي ستيشن 2 ..انا عندي القديمة

تحياتي واشواقي

عـــــمـــــــاد · #6 01/04/2001, 01:39 PM

يا شباب ترى اللعبة على البلايستيشن 2 الياباني و راح تلاقونها عند المحلات المشهورة بس ترى ما نزل في الرياض الا الاصلي و يمكن انتهى اما جدة فيمكن تلاقون كوبي و اصلي و هذا الرابط للي يبي يعرف اي معلومات عن اللعبة :
http://fantasista.winningeleven.net
تراهم زادوا الفرق الاوربية ....

هكر الهلال · #7 01/04/2001, 01:51 PM

هلا اخواني انا عندي الشريط واوكد لكم هذا الشئ

عـــــمـــــــاد · #8 01/04/2001, 07:12 PM

مشكور اخوي هكر الهلال و عقبالنا انشاءالله

بوهلالي · #9 01/04/2001, 10:33 PM

يا أخ ( عماد )

اللعبة موجودة بأسواق الشرقية من ثلاث أسابيع .

و الصراحة اليوم اللي نزلت فيه اللعبة أنا ما صدقت ، و شريتها و سعرها بالشرقية 350 ريال ( الاصلي )

و كلامك صحيح ، فيه واحد من الجمهور يقول : ( يا هلال عزك عزنا )
[عدلت بواسطة بوهلالي التاريخ:01-04-2001 الساعة: 11:38 PM]

فهودي · #10 01/04/2001, 10:58 PM

شباب لحظه تروني مجرم في هالعبه واتحداكم.
بس تعالوا كم قيمه الجهاز والاشرطه
طيب الشريط الي تقلون عنه يركب علي الجهاز القديم
الله اكبر صار جهازي قديم

بوهلالي · #11 01/04/2001, 11:02 PM

يا أخ ( فهودي )

هذا الشريط على ( البلاي ستيشن 2 - playstation 2 )

و سعر الشريط الاصلي طبعا ( غالي ) يتراوح ما بين 280 الى 350 ريال

و في الشرقية ما فيه الا أصلي

فهودي · #12 01/04/2001, 11:21 PM

عمري بوهلال وعلي سرعة الاجابه بس كم قيمة الجهاز اصلا
البلايستيشن2 ياطول كتابتها

بوهلالي · #13 01/04/2001, 11:29 PM

الجهاز مع شريط بـ ( 2000 ) ريال ( هذا الكلام في المحل اللي أتعامل معه ) في الشرقية

فهودي · #14 02/04/2001, 12:32 AM

اوف يبيلها قعده 2000 ريال اجل نخليها الشهر
الجاي ماقصرت يابو هلال.

الهلالي المدهر · #15 02/04/2001, 01:34 AM

والله مع اني مانيب حريص على الكمبيوترات بالحيل بس هالجهاز شاريه شاريه الله لا يعوقني بشر
بس انا عندي سوأل ........ في اعتقادكم وش بيكون تعليق ( ***** ) على الموضوع
ولكم جزيل الشكر
[عدلت بواسطة ادارة الموقع التاريخ:02-04-2001 الساعة: 12:41 PM]