ياوسع وجه الاتحاد السعودي....
 

اليوم وانا اتصفح الجرايد ولا القى خبر مدري وش سنعه... يعنبي خبر اقل مانقول عنه جهرا والعين ترا... مثل قولة نسوي كذا ياجماهير الهلال ولا احد يقدر يقول ليش..

ايقاف ذياب مجرشي ثلاث مبارايات لسوء سلوكه
والله مالك حق ياذياب اثر سلوكك الله بالخير...:confused:
طيب يا الاتحاد السعودي خل عندك حياء شوي ... يعني مو للدرجه ذي وسيعة وجيهكم قولو وايقاف حارس الاتحاد مباراة وحده... يعني اخذ كرت احمر هو وموقف موقف الله لايعوق بشر بس اكذبو علينا وحطو ان القرار صدر منكم انتم يالجنة العقوبات...

يعني كل اليوم احاول اكذب على نفسي واقول اكيد ان ذياب الله يهديه مسوي له بلوى ... بس من وساعة وجيهكم ... اوسع من اللي قلته قبل شوي... طالع واحد منكم يقول ان الطرد غير مستحق..

بس ولحسن النيه قلت يمكن ان الاتحاد السعودي مستحدث كرت من نوع جديد.. لكن وسعتوها هالمره بزود وطلع مكتوب كرت احمر ... قلت يمكن اخذ كرت برتقالي ولا شي سبحان الله ماندري يعني..

وهالمره عاد زودتها بحسن النيه ... وقلت اكيد ان الاتحاد السعودي فارض عقوبات شديده على مسابقة الامير فيصل بن فهد عشان يخوف اللاعبين الصغار ..و بكذا اذا ذياب توقف ثلاث مبارايات بكرت غير مستحق ... اجل اكيد ان حارس الاتحاد موقفينه سنه ...

ولكن هنا وسبحان الله توسعة وجيهكم بالحيل ... وحارس الاتحاد في مباراة الهلال الجايه بيتندح بالملعب واطول شنب مايقدر يقول له وش جايبك...

وطبعاً من كثر ما احاول احسن النيه وادور مخرج للاتحاد السعودي طلع في راسي نخله ... بس عاد لحق اخوي علي وقطعها ... وعطاني سبب وجيه ... ان اللاعب هلالي وهذا سبب كافي ..وصراحه اقنعني ... دامه لاعب هلالي اجل الاتحاد السعودي معذور ....

نجي هنا الى مربط الفرس ... وحركه ذكيه جداً من ماجد الحكير ... يعني جهز العصابه قبل الفلقه .. قال اذا الهلال او الاهلي او الاتحاد اخذو كاس فيصل بن فهد .. راح نمنعهم من المشاركة ونرشح فريق ثاني ... وتراه ماقال النصر...عشان ما احد يقول اني بديت اكذب...

طيب ذياب وقلنا ميخالف ... بس عاد فريق يحقق بطولة ويحرم من حقوقه ...ونجيب فريق ثاني ماله دخل ويشارك بالبطولة المخصصه لغير... ليش يعني؟؟؟ هو صغر بوجيهكم يعني.. ماشاءالله اوجيهكم اوسع من كذا مافيه...

طيب ابقول الاتحاد ابخص ... وترا الكلام اللي قلته فوق مالي دخل فيه ... ولاهو انا اللي كتبته .. واخلي مسؤليتي عن اي حرف ورد فيه ويمكن ان اسمي بالمنتدى مسروق لني نزلت عند البقاله وخليت اسمي يشتغل ... لن مثلكم خابر الاتحاد السعودي يتهدد ... والظاهر انه بيخلص من اللاعبين وبيلتفت للجمهور... والله يستر بكرى لااشوف اسمي في الجريدة وجاي كذا

ايقاف عاشق زعيم نصف الارض لمدة شهر نظراً لما بدر منه وان رجع فتح فمه شطبناه ولايقول ماحذرناه

عاد ما اعرف اوقع على اقوالي ببصم بس بعدين...

تحياتي للجميع

ماجد//الرياض

[ALIGN=CENTER]لا تظلمهم الله يهديك أخوي ..
هذا اللي يكتب القرار يحسب حارس الإتحاد إسمه ذياب مجرشي :D..
عاد هم ما دروا إلا يوم نزل القرار .. وأنت عارف عاد .. الرجال عند كلمته ..


على فكره .. ترى يوزري مسروق مثلك :D ..[/ALIGN]

الاتحاد السعودي (( الف حكايه وحكايه ))
اتحاد فاشل فعلا مثله مثل الاتحاد الاسيوي

هلا والله اخوي خارج الخدمه.... تصدق ماتبادر لذهني احسن النيه للدرجه هذي... بس اكيد ان هذا اللي صار... لن مثلك عارف ان الاتحاد سعودي عادل جداً ولا يحب الظلم واكره مايشوف الظلم.. مانقول الا الله لايحرمنا من اتحادنا اللي مايحب الظلم ويطبق العدل حتى لو على نفسه ... وعمره ماحرم احد من حقه ... ولو يعطيك الحكم كرت اصفر غير مستحق فتح تحقيق ... قايل لكم مايحب الظلم وعاد اذا الغى الحكم هدف للهلال وهو صحيح لقيت من بكرى اللجنة مجتمعه وتحقق مع الحكم صراحه لو وش نسوي مانلحق جزاء الاتحاد السعودي..

<<<<<<<<<<<<الكلام اللي فوق اعكس ابو ابوه ويطلع الكلام الصدقي...

---------------

هلا اخوي هلالي اصيل... ذكرتني بكتاب الف ليلة وليله ... يارجال وسع صدرك ... ويقولون الضرب بالميت حرام... مانقول الا الله يرحم فيصل بن فهد ويغفر له... ماعرفنا قيمته الا بعد موته... رغم انه مشجع لفريق اكره مايشوف الهلال ... ومع ذلك ماشفنا ظلم على الهلال ... كان اهم شي يشوفه سبل رقي الرياضه السعوديه ... ايام فيصل الله يرحمه ماكان الاتحاد الاسيوي يتجرا يصدر قرارت ظالمه لنه عارف ان فيه رجال تدافع عن الرياضه السعوديه... لكن بعد ماراح صرنا الجدار القصير .. كل واحد ينطنا ...وماشفنا العنجهيه بالقرارت الا بعد موته ... ومانقول غير الله يرزقنا بواحد مثل فيصل يرجع ايام عز الرياضه السعوديه ...

---------

صراحه يا ادارة المنتدى انا اطالب بتكثيف الدوريات بالمنتدى عشان تخف سرقة اليوزرات ... انا مايمديني اوقف عند البقاله واذا طلعت لقيت يوزري داعس من قدامي ... وشوفو اللي اخذ يوزري وش قام يكتب ... ترا يالاتحاد السعودي اليوزر مسروق ومقدم بلاغ على سرقته ... يعني بدون عقوبات ...


تحياتي للجميع

ماجد//الرياض

الحين اللي يشوت الخراشي في (*****<<مانعتها الرقابه) ومتعمد مايسوون له شي ؟؟؟؟؟؟

والله اتحاد دمار