لمن أشكي لمن أبكي ومن حينهي المنكر
إني زوجة وعندي زوج يتجاهل ويتنكر
يفكر بس في نفسه وفينا أبداً مافكر
يجي للبيت نصف الليل وبعض أحيان يتأخر
وعمره مارجع للبيت قبل الساعة اثنعشر
وعمره ماسهر معنا ومع أصحابه دائماً يسهر
عياله نادراً يجلس معهم صعب مايقدر
يجي في الليل متأخر ويصحى الساعة احدى عشر
وله بعد الغذاء غمضة ولاقد قام أدبر
معه شغله معه جلسه مع اعذار يتعذر
يجيب اعذار مشبوهه تخلي العقل يتحير
وهذي الاسطوانة غالب الاوقات تتكرر
وهو يسمر مع أصحابه وأنا في البيت أتحسر
من التكنيس للتغسيل ثم الأكل يتحضر
وأتصارع مع الأولاد في المدخل وفي المخرج
وحد يشكي وحد يبكي وحد يسقط وحد يعثر
ولا قد ناموا الأولاد عندي الجو يتعكر
لوحدي جالسة أتضجر وأتقهر
من الشك والغيرة والأعصاب تتوتر
ويتغيب علينا يوم أو يومين أو أكثر
ولو نسأله عن غيبته يتنرفز ويتأهر
ويعلنها صراحة ان طبعي مابيتغير
وش تبوا مني أكلكم موجود ومتوفر
ويحسب مالنا مطلب خلاف الرز والسكر
لنا عدة مطالب لو نسي مفروض يتذكر
لنا جلسة مع الأولاد نتفاهم ونستفسر
ونعرف من هو المهمل ونعرف من هو الأشطر
نحسسهم حنان الأهل أصغرهم مع الأكبر
لنا جلسة مودة في الظهيره أو مع المسمر
لنا جلسات حلوة ياريت يرجع لنا أنسنا اللي مر
الى متى على هالزواج ياناس اتصبر
صبرت أكثر من اللازم وفوق الصبر ذا مقدر
أقول السمع والطاعة وهو ينهي ويتأمر
واستحمله مهما كان إن طول وإن قصر
ولا لي أي غرض طبعه بغيته بس يتغير
بغيته من مساري الليل يتنبه ويتحذر
ويعرف واجباته قبل كأس الود يتطير
ونرجع مثل ماكنا ويبقى غصننا أخضر
بعون الله نتعاون وكل العسر يتيسر

معاناة (( بنت البلد )) وكل (( بنات البلد )) ياشباب شوفوا لنا حل.

الحل أختي بنت البلد انك بزوجك تنتبهين أكثر ,,,

وبعدين زوجك يوم أنه ينام للساعه احدعشر !!!,,,

من وين يصرف على عياله في هذا الزمن الأغبر ؟!؟,,,

الرجال ترى وانا أخوك ماله الا بيته وأم عياله ونيسه دربه الأقشر ,,,

ترى بداخل معظم الرجال طفل يتضجر ,,,

يحتاج للحنان من قلب أكبر ,,,

ويالرجال انتبهوا لقلوب النساء تراها بسهوله تتكسر ,,,

وان كان ما تغير الحال بعد كذا فمالك الا الصبر وانتم فيه أخبر ,,,

وعسى الله يفرج همك وتتيسر ,,,

أختي بنت البلد عبرتي عن ما بداخلك و بداخل معظم الزوجات بإسلوب أكثر من رائع و أخوي ابراهيم رد عليك بنفس الإسلوب الله يعطيك العافية يارب و لكن عندي لكن نصيحيتن يمكن إنها تفيد يارب

1- هل إسلوب زوجك معك من اول مت تزوجتي قبل ما يجون الأولاد أعتقد والله اعلم لا يعني بمعنى أخر إحتمال كبير الأولا د أثروا عليك و قل إهتمامك فيه يعني يبي لك ترجعين مثل أول أيام زواجك و حاولي التجديد و التغير في كل شي يعني إلفتي إنتباهه و انتي الحكم

2- شوفي و ش يحب زوجك و ش إهتمامته و حاولي تحاولين تتعرفين على هالشي و تتعلمينه علشان تكون إهتماماتكم مشتركة حتى والله كان يحب يطير حمام تعلمي وشلون تطيرين الحمام يقولن من اجل من عين تهون مدينة

على العموم الله يقر عينك بزوجك و يقر عينه فيك يارب و فيه الأستاذ جاسم المطوع له أشرطه اكثر من رائعه في هالمجال

مع تمنياتي للجميع بدوام الصحة و العافية يارب

والسلام عليكم و رحمة الله و بركاته

العضو النادر الأخ ابراهيم النجيدي: جزاك الله خير ... وهذه معاناتي اوصلها لكم وهي معاناة حقيقية وليست تمثيلية ... وياريت تعطي زوجي النصيحة .....

الأخ عواكيس: شكراً على اهتمامك وهذه اجاباتي لتساؤلاتك وياريت تشوف لي الحل:
1) معك حق اسلوبه تغير بعد انجاب الاطفال ... ولكن هل هذا جزائي؟؟؟؟ وأنا ماقصرت معه في أي حاجه ... واذا قصدك التجميل وخلافه من ناحية التجديد فللأسف هو ماهو راضي يشتري لي حاجة وحاجات البيت بالقوة يجيبها ومع اصحابه أبد ماقصر.
2) اهتماماته السياسة والعن ماعندي السياسة واذا دخل البيت اخذ الجريدة وفك على الجزيرة وجيبي الشاي وأرقيلة المعسل يامره!!!! ... تبيني احاكيه في السياسة قوللي كيف كيف أحاكيه سياسة؟؟؟ ولااشرب معه معسل !!!!
3) وجزاك الله خير على النصيحة وادعيلنا دعائك الصالح وان شاء الله الامور تتعدل .. وجاسم المطوع دائماً أتابع مواضيعه في الارت ولكن ياريت زوجي يفهم ...

هلا أختي بنت البلد الله يحنن قلب زوجك عليك يارب

والله و انا أخوك انا ما تزوجت ولا عندي خبره بس راح اعطيك اللي عندي وإن شاء يطلع فيها نفع يارب

- المفروض الأولاد يقوي الرابط مو يبعدك عنه أو يبعده عنك لكن المكياج والملابس الجديده مو التجديد و انتَ أبخص بهالأمور أهم شي المظهر الخارجي دائماً لا يكون سيء كذلك حاجته لاتنقص و لازم تبدين إهتمام زايد فيه حتى لو ماواجهتي صعوبه في البدايه إذا كان موجود لا تكونين بعيده عنه حتى لو ما يعبرك أهم شي يحس إنك قريبة و إذا كان موجود لا تستخدمين التلفون ولا النت
- اما السياسه والأريقله السياسه عاد على قد همتك مو لازم تكونين مفتحه مره بس يعني حاولي تقرين كتب تتثقفين خصوصا إذا كان الدرجات العلميه مختلفه بينكم أما الأريقله إياني و ياك تقربينها

وإن شاء ربي يصخره لك يارب و يخليكم لي بعض و يديم المحبه يارب

اختي بنت البلد:

انا متزوج وعندي خبره في الازواج. لكن المشكلة لما يكون العيب في الزوج مو الزوجه، وهنا تكون المشكلة. لكن بصراحة صارحي نفسك وكوني صريحة اذا كنتي مقصرة في اي شيء حاولي انك تتمالكين الوضع "ومع العلم ان لا يوجد انسان كامل". لهذا اقول انه يجب عليك مصارحة نفسك في كل الاشياء مثل الاكل النظافة في المنزل اهتمامك في نفسك وكل شيء له دخل في الراحة النفسية. اما لو كان كل هذي الامور عاملتها فيوجد حل جيد وهو انك تنامي عند اهلك في الاسبوع مره عشان الاشتياق. لان مقابلة بعض واجد تجيب الزهق احيانا حتى لو كان في حب بينكم.

أما النقطة الثانية والمهمة وهي عندما قلت معاناة كل بنات البلد، هذا خطاء وليس لمعاناتك انتي واي صديقة لك تكون معاناة عامة، فالحمدالله انا في سعادة تامة في زواجي وكثير من زملائي ايضا. لهذا ارجوا ان لا تكون النظرة عامة لابناء بلدك فنحن احسن من غيرنا بكثير مهما كان بنا عيوب، واصابعك ما هي سوا.

وأرجوا ان اكون قد وفقت في المساعدة

أخوك : ماجد-الشرقية