السلام عليكم
صبحكم الله بالخير جميعا
عنوان الموضوع هو جمله كنا نقوله كثير منوّل لكن الحين:sad:
كالعادة وبدون لف ودوران
قبل سنوات كان رمضان بالرياض سعة صدر وفلة حجاج ووناسة
وسنة ورى سنة بدى شهر رمضان الله يشرفه يصير ضيقة صدر:sad:...
هالسنه كثير من الناس اللي قابلتهم يقولون لي : ياخي مهوب رمضان هالسنه كئيب ؟ , وكثير اللي قالوا لي نفس الكلام , حتى اني صرت انا احس مثلهم ان رمضان هذا ما أدري وشلون
صحيح رمضان شهر عباده , وشهر جد واجتهاد بعمل الخير , لكن ما أحد ينكر ان ليالي رمضان يكثر فيها الطلعات والروحات
يعني المفروض انه ليالي هالشهر تكون ونيسه
, لكن هالسنه غير
عاد انا جيت اسوي نفسي ذكي
واحاول افسر منين هالضيقه اللي بالناس؟؟
اتوقع والله العالم ان بعدنا عن الدين , و الدبور اللي صار للاسلام والمسلمين وحالة الاحباط اللي في داخلنا واللي تزيد كل ما مرة السنين هي أحد أهم الاسباب:sad:...
سبب ثاني وهو هالمشاكل الجديده واللي ما تعودنا نشوفها مثل التفجيرات والمداهمات واطلاق النار والتفتيشات بالشوارع
سبّبت عندنا قلق(:::::::> يقالي طبيب نفسي
) وخلتنا بحالة عدم استقرار نفسي ( :::::::> قويه ذي
)...
سبب ثالث من وجهة نظري المتواضعه اخي الكريم (:::::::> أتخيل اني مشارك ببرنامج
)
قلة نزول الامطار , يمكن واحد منكم يضحك يوم قرا هالسبب
بس انا اقول له لاتضحك
, سبحان الله العظيم المطر اذا نزل يجدّد كل شي
ويوسع الصدر
ويطيّب انفسنا
...
وهالسبب هو اللي ودي اسولف عنه شوي
, الملاحظ ان الامطار في تناقص(أتكلم عن الرياض) , يعني قبل 6 او 7 سنوات في رمضان كنت أطلع انا والعيال يوم ورى يوم(::::> حبيبي بحلم بيك بعنيك
) لروضة خريم ( قريبه من رماح للي ما يعرف
) المهم كنا اذا جلسنا على الارض الواحد منا ما يشوف الثاني من طول العشب
ويا الله ارزقنا من فضلك
وكنا مبسوطين لدرجة ما توصف:p ... , اما الحين كانك جالس بملعب الملز قبل لا يصلح
يعني ما فيه حياة والمكان يضيّق الصدر:sad: والسبب ما فيه مطر
...
سبحان الله العظيم انقطاع المطر هذا كأنه تذكير من رب العالمين لعباده الغافلين واللي كثرة ذنوبهم وزاد حرصهم على الدنيا وبعدهم عن اللي يقرب للآخرة والله المستعان...
تذكرون قبل كم يوم صلوا صلاة الاستسقاء , الصراحه أنا ما صلّيت:sad: وصرت كل ما شفت واحد من الشلة أسأله صليت الاستسقاء يقول لأ
على كثرهم ولا واحد قال لي انه صلى!!!...
وانا ودي أسأل الاعضاء الكرام( ولا أبي أعرف الاجابة) من صلى منكم صلاة الاستسقاء؟؟ أتوقع اذا كان فيه أحد صلّى فهو عدد قليل...
كل قصدي من هالموضوع اني ابذكر نفسي واذكركم اننا مقصرين , حتى المطر اللي حنا محتاجينه ما رحنا نطلب رب العالمين ونصلي الصلاة اللي سنّها الرسول صلى الله عليه وسلم لأجل نزول المطر(::::::> شفتوا أعرف أتكلم فصحى
بس ما ودي
)
هنـــــــــــــــــــــــــــــــــــــــــــــــــا ينتهي الموضوع وتبدأ الخرابيـــــــــــــــــط
[HR]
السنة هذي لو الله أكرمنا بالامطار وارتوت الارض بالماء , كان لو سألت أي واحد من شباب الرياض وين تبي تروح بالعيد ( عيد الفطر أو الحج) كان قال أبطلع
للرياض اللي حول
الرياض:::::> طبعا ما فهمتوا شي
لكن أبشرح لكم : الرياض باللون الاحمر هي جمع روضه والروضه هي المكان الذي يكشت اليه
, أما الرياض التي باللون الازرق فهي ديرتنا ماغيره
...
لكن لو ما كان فيه مطر:sad: اللي يقول لك ابسافر للدمام , واللي يقول ابروح لمكة وجدة , واللي لا أنا أبطلع دبي أتمشى , والثاني يقول ابروح للقاهره والثالث لبنان والرابع.... , لمين ما يبقى بالرياض أحد ويصير العيد فيه يجيب المغص
...
طبعا أدري انه فيه ناس مافرقت معه لأنه مسافر مسافر
سواء امطرت ولا لأ , لكن أتوقع كثير منا اذا صار فيه مطر وربيع كنسل موضوع السفره , خصوصا اللي ما عندهم دراهم = فلوس = مصاري
...
أنا ما أدري وش أبي لكن زبدة الموضوع اللي معه رقم جوال كرّاني ( اللي يقدم النشرة الجويه بالسعوديه
) , يسأله حولنا مطر باذن الله والا لأ؟؟ ويرد علينا بسرعه
تحياتي للجميع
ولا تواخذون على اللهجه
واللي مافهم أول سطرين ما أظنه فهم شي
وتر
سلام عليكم
الوضع المتطور
