بسم الله الرحمن الرحيم السلام عليكم و رحمة الله و بركاته مساء الخير جميع هذي اول مشاركة في هذا منتدى المجلس العام أتمنى قبولي بينكم و إن شاء الله اكون خفيف الظل يارب إسمعوا السالفة قرأتها في كتيب يقول المؤلف روى لي أحد الأصدقاء هذه السالفة و قال : طلبت مني الوالدة أن أسجلها في مدرسة من مدارس محو الأمية , يقول أنا أسفهليت وقلت بس أنت تأمرين غالي و الطلب رخيص قالت ياوليدي أبغاك توصلني كل يوم للمدرسة قلت سمي أوصلكي و أرجعكي من و إلى المدرسة "حلوة من و إلى ضربة معلم" يقول الراوي هذا و أنا ألعب كرة يوميا أدبتسي ورى هالكرة مع زملائي الأعزاء لا و من زين هالأمور ما يبون أحد يتأخر و اللي يتأخر يمسك الجادة يعني أيه هين يطقها والله من زين الأمور عاد انا عندي واسطة في إتحاد الحارة و دايم يلعبوني حتى لو ما تمرنت "مثل اللي يتأهلون لتصفيات كأس العالم للأندية بالواسطة" شكلي جبت العيد هاه وش كنا نقول نرجع لخوينا رونالدوا الخبوب يقول رحت و سجلت الوالدة بالمدرسة و شريت لها مطبقة قصدي شنطة علشان التفاتر و الكتب و يوميا أشتري لها سفن أب و سندويكة زعتر و طربق طربق وين رايحين للمدرسة و من وين جايين من هالمدرسة هذا غير لعب الكرة طبعا صدق إني ما ألعب كل المباراة بس هاه أحسن من لا شي صدق إني أوقات أطلع من اللعب و هم متحمسين و مهزومين و أسبب لهم أحراج بخروجي المفأجيء " كل يوم و مفاجيء ايه هين" يمكن يحتاجوني وإلا شي و مشيات يقول خوينا الراوي هالوالدة مستمرة بالدراسة وأنا مستمر بعملي و لعبي و لهوي و إذا جت الوالدة من المدرسة تنكب على هالدروس اللهم ياكافي تقل تحضر الدكتوراه طنّشت الوالد و باعت العفش و اهملتنا وما صار لنا والي كل هذا بسبة التعلوم لا عادة ويقول خوينا ومرةٍ من الأيام بعد ثلاث سنوات وأنا ذاهب بوالدتي العزيزة للمدرسة و حنا واقفين عند الإشارة كانت حمراء "قمت و قطرت فيها" ويقول و حنا عند الإشارة كان واقف بالقرب من سيارتي سيارة إسعاف و مكتوب عليها باللون الأحمر و بخط واضح (سيارة إسعاف) قلت أماه يا أماه وش رايتس تقرائي هاللي مكتوب على هالسيارة و قعدت تبلحق شوي و إفتشت الغطوة و فنجلت العيون قالت الله يدفع البلاء تختبرني يا جنيني تحسبني ما أفهم ياوليدي قلت لا ياميمتي وش دعوى مجرد دعابة بس كيوز صعمبوطي لا أقل و لا أكثر يا اماه وقامت الوالدة تتهجا الحروف و تقول صِ . صِـ . صِيـ . صيتي سيارة صيتي يقول خوينا أنبهرت و ضحكت و من ثم درعمت و بعدين أعدت أدراجي راجعاً للبيت بالوالدة قلت يكفي يا يمة هالعلم اللي عندتس و تحصلّتي عليه من الدراسة فيه الخير و البركة بعدين ياميمتي ما نبيتس تتوظفين و لا هم يحزنون بيتس و عيالتس أحسن لتس الوالدة إقتنعت و الوالد إسفهل و إستانس بعد أن عادت المياه إلى مجاريها و بارك لي خطوتي والسلام عليكم و رحمة الله و بركاته (سيارة الإسعاف سابقاً باللهجة العامية كانت تسمى سيارة الصيتي بسبب الصوت المزعج و هو اللي عالق في ذهن والدة راوي هالسالفة) معاني الكلمات : تس = ك أدبتسي = أركض الخبوب = شارع في مدينة بريدة (القصيم) مطبقة "والله تورطت" = يعني امممممم كيف الحال طربق طربق = المشي بإناقة تبلحق = تنظر و بعنف فنجلت = فتحت بقوة جنيني = إبني المهذب كيوز = أختبار مالأمينه داعي صعمبوطي = صغير درعمت = مشيت الهوينه ياميمتي = يأمي العزيزة إسفهل = إستبشر خيراً (رويتها لكم بتصرف مني أخذت الفكرة فقط و الباقي من عندي)<br><font size=1 color="#000080" face="tahoma">[عدلت بواسطة عواكيس التاريخ:24-03-2001 الساعة: 12:40 PM]</font> |
الوقت المعتمد في المنتدى بتوقيت جرينتش +3.
الوقت الان » 11:54 PM. |
Powered by: vBulletin Version 3.8.7
Copyright ©2000 - 2024, Jelsoft Enterprises Ltd