|
طبعاً أخواني الغالين أنا لاحظت مؤخراً إتجاهنا بقوة لمواضيع الفرفشة الضحك أكثر من المواضيع الجدية ... ماعدا القليل ... لكن أنا ودي أقولكم سالفة صارت علي ... ---------------------------- طبعاً هي صارت هالأسبوع يوم الأربعاء بالليل دخل الوالد الله يعطيه العافيه المستشفى وكان معه أحد أخواني مرافق ... ورحت أنا له الساعه 9 بالليل ... وجلسنا ندردش ونسولف ... وقالي : سفر وانا أبوك عندك شيء بكرة ... قلت : لا والله ... بغيت شيء أبشر ..... قال : ودي ترافق معي الليلة بدل أخوك ...... قلت : يابوي هذا من غير ما تقول طال عمرك ........... المهم جلست مع الوالد ... وصار بينا حديث والله مؤثر وماتمنيت أني أقوله ... لكن لتعم الفائدة بأذكره ... الوالد : سفر وأنا أبوك ما يحتاج أوصيك في رضا الله والوالدين وأخوانك ... ترى الموت وأنا أبوك يجي الإنسان في لحظة ... سفر : يابوي بدون ماتوصيني طال عمرك ... ولكن إنشاء الله أنت بخير والله يطول عمرك لنا ... الوالد : سفر الموت حق ... والله أنا ماعلي من الموت وأنا أبوك ... الحمد لله دين رب العالمين قايم فيه بأكمل وجه ... لكن والله أنا خايف عليكم أنت وأخوانك من بعدي ... خاصة أغلبكم ماتوظفوا ... والحمد لله الخير كثير ولكن الوظيفة ضرورية وأنا أبوك والرجال مايضمن الدنيا ... بصراحة والله بكى وهو يقول هالكلام ... وأنا والله ماقدرت أمسك نفسي بعد ... سفر : يابوي تكفى غير الموضوع ... وإنشاء الله نرفع إسمك فوق ... أنت ما قصرت علينا وإنشاء الله تفرح فينا وتفتخر بعيالك ... الوالد : إنشاء الله ... وإنقطعت السالفة بزيارة أحد الأقارب ... المهم راح الزائر وقال الوالد : أنا بنام هالحين ... وأنت على راحتك وأنا أبوك التلفزيون عندك ومتى مابغيت تنام طفي التلفزيون ... قلت : أبشر ... لكن ماقدرت أشوف التلفزيون علشان ما أزعجه الله يطول عمره ... وطفيت التلفزيون ونمت ... والحمد لله كل ماتحرك الوالد كنت أسبقه وأقوم أشوف ... تخبرون أي واحد أبوه يسوى عمره وأكثر ... وكل ماشافني صاحي يقول : نام نام وأنا أبوك ما فيه شيء ... والساعة 5 صحا الوالد وأنا معه ... قال خلنا نصلي الفجر ... وصلينا الفجر ... ورجع نام ... والساعة 7 صحينا وجابو الفطور ... ولحظتها وأنا أقرب المائدة للوالد مع الأكل ... طالع الوالد في وقال : الله يوفقك ياولدي ... والله أني أتمناك أطيب الرجاجيل ... والله يوفقك في كل أمورك ... بصراحة هالدعوه كانت لها وقع نفسي كبير ... وجلست أناظر في أبوي والدموع في عيوني وقلت الله يديمك لنا يارب ... وأنت نور البيت يابوي ... والحمد لله الساعة 10 كتبوا للوالد خروج من المستشفى ... وطلعنا وفي السيارة قام ينصحني نصايح أثمن من الذهب والمجوهرات ... الوالد : سفر وأنا أبوك عليك بدين رب العالمين قبل كل شيء ... وإنشاء الله إذا رضى عليك ربي بارك الله فيك ... الدين الدين الدين هو الأساس ... وبعدين أنتبه لنفسك والله ما ينفعك في هالدنيا إلا عمل ذراعك لا فلان ولا علان ... والرجال يكون نفسه بنفسه ... ولا يحتاج لأحد ... والله وأنا أبوك لو لا سمح الله تفقر اليوم أو بكره ما ينفعك أقرب الناس لك ... الرجال وأنا أبوك لازم يعيش عزيز نفس ولا يذل نفسه يوم من الأيام ... الإجتهاد هو أساس النجاح ... صدقني وأنا أبوك لكل مجتهد نصيب ... والله مايضيع تعب الرجال ... وأعيد مرة ثانية وعاشرة الدين قبل كل شيء ... طبعاً نصائح أعتبرها تاج وكنز من اعز الناس على قلبي والدي الغالي ... الله يطول عمره ويخليه ذخر ... ولكم تحياتي ... أخوكم / سفر المرزوقي . |
أخوي الغالي والحبيب (سفر) ,,, الله يعافي الوالد ويقومه لكم بالسلامه , ويخليه لكم منور لكم حياتكم ويشوفكم مثل مايتمناكم عليه ,,, ودائما نصائح اهالينا تظل تاج يزين رؤوسنا , ونبراس ينير لنا دربنا في هذه الحياه , فتجدنا في بعض الاحيان تاخذنا ظروف هذه الدنيالاشياء لايبقى لنا منها شىء في دنيتنا ,,, وننسى امور أهم , فبكل حنيه وعاطفه الاهل تجدهم يحنون علينا ويذكرونا بها وبان هذه الدنيا فانيه فلا يبقى فيها للانسان سوى الذكر الطيب والعمل الصالح ,,, ولا اقول ياغالي الا عسى الله يخليه لكم وتقر عيونكم دائما بوجوده بينكم وبحسه معكم , ويراكم وقد وجدتم لكم في هذه الحياه طريقا نحو النجاح وباءذن الله يشيل عيالكم وعيال عيالكم :) ,, عسى الله يعطيه العافيه دوم , ويخليه لكم ,,, وتقبل خالص تحياتي لك ,,, |
اخوي سفر والله ما ادري وش اقول بس من جد أثرا فيني موضوعك و أنا أخوك الله يخلي لك أبوك و يطول في عمره يارب و إن شاء الله ما يشوف شر و طهور و تكفير ذنوب ويطول في أعمار اباء و امهات الأحياء من المسلمين و يرحم الميتين و يدخلهم فسيح جناته والسلام عليكم و رحمة الله و بركاته |
الغالي سفر اسئل الله العظيم ان يعافيه ويسلمه لكم... ويحفظكم له امين يارب ..... |
الله يقطع بليسك اللله يهديك سفر خوفتني وش ذا الموضوع قلت لايكون صار شيء لأبوك الله يخليه لك ياسفر انشاءالله وما دام ان ولده سفر يبشر برفعة الراس ومايشوف شر انشاءالله وسلامتك يالغالي |
أطال الله في عمر الوالد وجعله في صحة وعافية وما يشوف شر .. وجعلكم كما يهوى... ** والله نصايح من حكيم مهي لك بس لنا كلنا وجزاك وجزاه الله كل خير قال الله تعالى (( وبالوالدين إحسانا)) |
حبيبي سفر الله يحفظك والدك ويطول في عمره .... ونصائح أولياء امورنا تاج فوق رؤوسنا ... اسمع كلام والدك زين ... ونفذ التعليمات زين... |
الحمد لله على سلامة الوالد اولا الحمدلله على سلامة الوالد نصائح أباءنا ستكون اوسمه على صدورنا لمعرفتهم بهذا العالم ومامروا به من تجارب ولانهم يردون لنا معيشة افضل يسعون لسعادتنا دعاؤهم دافع لنا لتقديم الافضل وتأنيبهم لنا دافع لعدم الوقوع في الغلط سلامات للوالد ومايشوف شر |
اخوي الغالي سفر الله يحفظ ابوك ويطيول عمره ويحفظكم لابوك ويوفقك بحياتك يالغالي احفظ كلمات ابيك جيدا فصدقني قال ابو كلام رائع والله يديمه لكم ويحفظه ااااامين |
عسى ربي يطول عمره .. ويخليه لكم .. وهذا قلب الابو .. ماهان عليه يخليك وهو مانصحك النصايح اللي تفيدك في دنياك واخرتك .. عسى ربي يخليه ذخر لكم ان شاء الله .. والنصايح هذي للجميع .. جزاك الله خير. |
الحمد لله على سلامه الوالد اخوي سفر....... والواحد ما يعرف غلا الغالين الا اذا فقدهم الله لا يخليك من ابوك....... والمهم انك تنفذ كلامه مهوب تحطه تاج وكنز وتصك عليه:) |
الحمد الله على سلامه الوالد اخوي سفر والله يعافيه ويطول عمره بالصحه والعافيه ويخليه لكم ويخليكم له نصائح مؤثره ومهمه سلملي على الوالد وقله ما تشوف شر |
بسم الله الرحمن الرحيم الله يحفظلك والدك ياسفر ويطول عمرة ويشوفكم في احسن وضع والله انك اثرت فيني ياسفر جدا المهم الله الله بالوالدين ياسفر والله اني اتمنى ان الوالد الله يرحمه يرجع بس علشان اوفيه جزء من افضاله علي لكن الميت مايرجع ومن حقه علينا الدعاء له (اللهم ارحم موتانا وموتى المسلمين واشفي مرضانا ومرضاهم). |
اخوي سفر قبل كل شي الحمدلله على سلامة الوالد والله يخليه لكم ويخليكم له وان شاءالله يطول الله في عمره لين يشوف عيالكم والله ياسفر مدري شقولك لكن موضوعك بصراحه مؤثر |
الحمدلله يا سفر على سلامة الوالد والله الله بوصايا ابوك ترى فعلاً مثل الذهب قيمه وبمناسبة خروج ابوك من المستشفى تقبل مني هالهديه <img border="0" src="http://www.alhasani.8k.com/gif/21.gif" width="80" height="100"><img border="0" src="http://www.alhasani.8k.com/gif/21.gif" width="80" height="100"><img border="0" src="http://www.alhasani.8k.com/gif/21.gif" width="80" height="100"><img border="0" src="http://www.alhasani.8k.com/gif/21.gif" width="80" height="100"><img border="0" src="http://www.alhasani.8k.com/gif/21.gif" width="80" height="100"> |
| الوقت المعتمد في المنتدى بتوقيت جرينتش +3.
الوقت الان » 03:49 AM. |
Powered by: vBulletin Version 3.8.7
Copyright ©2000 - 2025, Jelsoft Enterprises Ltd