قبل ان ابدأ ارجو ان لا يغضب احد من الكلام اللي تحت لانها حقيقة واقعة ولن نستمر ساكتين نبتهج عند تحقيق فوز باهت وضعيف على فريق متواضع .لقد جاءت مباراة البارحة لتثبت بما لا يدع مجالا للشك بأن:
1- الممرن الهلالي ادديموس لا يدرب الفريق
2-او ان لاعبي الهلال ( الذين بدأوا المباراة )لا يصلحون للعب ...
فلقد شاهدنا الشوط الاول كاملاً بلا جمل تكتيكية توحي بأن هناك عمل منظم فما بين اجتهادات الشلهوب (و عربجية الغامدي ) وترجيعات خالد عزيز يبرز لنا سؤال بحجم جبال طويق : ماذا كان يفعل ادديموس منذ عام كامل ؟؟؟؟؟؟
* أما الدفاع فحدث ولا حرج
- عبدالله سليمان = معدوم الثقه
-المفرج = تهور بلا حدود
-الدوخي = اليوم دايخ ( وهواحسنهم )
- المطيري = ما ادري اخاف اظلمه ان قلت انه لاعب حقيقي !!
-الماس = كورة بهدف ( شت عليه ثلاث شوتات والرابعة تضمن هدف )
هجوم الهلال :
لاتراوري ينفع ولا العلي يفيد = كلاهما عالة على الفريق ولا يستحقان اللعب للزعيم ( اقولها بكل صراحة وليغضب من يغضب )
نقاط من المباراة :
الشلهوب برعونة وأنانية افسد ثلاث هجمات منها انفرادية( الله يستر عليك يا ولد اشوفك بانحدار ، عساها ازمة وتعدي ) .
تراوري وجوده من عدمه ( ويا حسافة على اللي اندفع فيه )
سامي الجابر : ما شاء الله عليك تفكير سليم + حماس + نجومية +( ليت عندنا اثنين مثلك )
نواف : عاد والعود أحمد وننتظر المزيد .
الشيحان : لماذا يصر المدرب على ابقاءه حتى الدقائق الاخيرة ( الفترة القصيرة اللي لعبها تحس انه فعلاً لديه شيء )
رسالة للامير الخلوق عبد الله بن مساعد : لا بد ان تحاسب اللاعبين على عطائهم داخل الملعب وتنظف النادي من اللاعبين الذين لا فائدة منهم سوى رفع ضغط الجمهور، وكذلك تسائل المدرب ليش يبدأ كل مباراة بتشكيل ضعيف ثم يقعد طول الشوط الثاني يتخبط ، وما هو دور المساعد ؟؟!! ، خصوصاً ان بين الدفاع والوسط تفاهم عجيب من ناحية ترك الحرية للاعبي الفرق الاخرى بالتوغل داخل المنطقة وتسجيل الاهداف السهلة .... واشياء اخرى كثيرة صدع راسي بس من التفكير فيها

وش رايك تغير كل الفريق احسن لك ؟؟؟؟

لاتعليق

إقتباس إقتباس من مشاركة فهد من الرس وش رايك تغير كل الفريق احسن لك ؟؟؟؟ لاتعليق

معالي قسم بالله انك مبدع وكل الي قلته صح مليون بالميه وكل الجماهير الفاهمه تقول كذا واله ذولا صراحه مع الاسف يكون ممثليلن للهلال تخيل هجوم الزعيم ترواري والعلي ولا المحاور عزيز والغامدي والله الزعيم بحاله يرثى لها والله مو فريقنا ذا

فعلا كلامك 100% ياخوي
والله ان الهلال يلعب بلا طعم ولا لون يلعب على اجتهادات لاعبيه بكل صراحه الفريق ممل بالغايه مدري ليش هل هو من المدرب او من الاعبين انفسهم وانا اتوقع انه من الاثنين ياخي نص الفريق اللي لعب اما الرياض ما فيه منهم لاعب يستطيع تسجيل الاهداف حتى تتفائل انه سيسجل سوى تراوري والشلهوب واما العلي فانه دائما يقف ولا يتحرك حتى تاتيه الكره ولا ادري لماذا هو لا يذهب اليها حتى يستلمها ويلعب اول باول
ياخي المطيري وش الفايده منه صدقني انه مفلس ( لا مهاره ولا عرضيات متميزه ولا مسانده للهجمه ولا تغطيه ممتازه ولا تمريرات صحيحه فما الفايده منه اذن ( انه تكمله عدد فقط)
ياخي اتمنى ان الجمهور الهلالي بالشبكه وغير الشبكه يطالب بالا عبين الشباب مثل
محمد عنبر وتركي الشايع و عبدالله المطرف واحمد الجري لانهم بصراحه ابدعوا مع الفريق رغم انهم صغار وليش لديهم خبره لكن لانقول الا حسبنا الله ونعم الوكيل:sad:

معالي زعيم القاره...أوافقك الراي في أغلب فقرات موضوعك. عدا الحارس الماس والعلي...الماس لازم نعطيه الفرصه ونثق فيه...لان مومعقوله الدعيع بيخدم النادي على طول ؟؟؟
العلي...والله مظلوم ؟؟؟يا أخي مبارتين لعب فيهم اساسي وسجل لكم هدفين ؟؟؟؟يعني في كل مباراه هدف ؟؟؟ لا واذا شافه المدرب منسجم مع المجموعه بدله وحطمه (زي ما فعل في مباراة البارح مع الرياض)...يعني لو كان موجود بعد نزول سامي والتمياط كا جاب لكم العيد في الرياض.. طيب وش تبون منه انتم مع ها المدرب الدلخ؟؟؟ يعني لو يلعب في كل مباراه أساسي ...أظمن لكم باذن الله انه ينافس على هداف الدوري؟؟؟ لا تظلمون حسين العلي يا شباب...لازم المدرب يعطيه فرصه حتى يثبت عكس ما يكتب ضده؟؟؟

الغامدي...عزيز...لا تعليق....اللهم اني صايم....أتشائم اذا شفتهم با الملعب...بالذات الغامدي؟؟
المدرب...يجيييييييييييييييييييييييييييييب الضغط والسكر والجلطه والنقرز والكليرا والجدري والانفلونزا والزكام والرماتزيوم والكساح والكحه والغصه ....والحقيقه انه قاعد على كبودنا مثل دهن الودك؟؟؟؟
متى الله يفرجها ويضف وجهه عنا؟؟؟
(أسغفر الله العظيم وأتوب اليه).....والله جرحتو صيامنا مع ها الكلام .بس والله من الحره اللي في قلبي.

الاخوين : فهد من الرس
هلالي شقردي
اللي ييبي البطولات يغير كل لاعب ما ينفع ، واذا لزم الامر كل الفريق ليه لا ، واحب اسألكما سؤال

هل الماس والدعيع بنفس المستوى
وهل يقارن التمياط بـــ عزيز اوالغامدي
وهل يقارن سامي والثنيان بــ العلي وتراوري وهلم جرا !! ؟؟ يا اخوان خلونا من دس الروس بالرمل وخلونا نتطلع على الحقيقة
عموما
انا بجاوب عنكم : الفرق بينهم هو الفرق بين الثرى والثريا !!
___________________________________
اخي همـ][الغلا][ـس
شكراً لمرورك وهذا اللي قلته هو رأي كل هلالي يحب هذه الفانيله
الوضع مؤسف ومخجل وللاسف لا يزال هناك من يقول ان الفريق جيد
-----------------------------------------------------------------

الهلالي ابو تركي
فعلا الهلال بلا طعم ولا لون ورايي معك في ما قلته عن المطيري والعلي
اما من ناحية الاعتماد على الشباب فهذه اظنها من المستحيلات ما دام ادديموس موجود ، والا منانا نشوفهم بدل هاللي سببوا لنا الضغط .
------------------------------------------------
الاخ العزيز بخيت
هون على نفسك ، الهلال ما عاد هوب الهلال الاول ، مادام يعتمد على هالاسماء اللي ذكرت والمشكلة رغنم كثرة اخطائهم الا انهم قاعدين على كبودنا وحارقين اعصابنا ما ادري هم يشوفون شي ما نشوفه والا ايش السالفه ،ويا صبر ايوب عليهم .
العلي فيه امل اما موضوع الماس فوالله يا اخي اني ما اشوف فيه الا مصير( صديق حارس الرياض) وتراه على فكرة منسق من الهلال لكنه من جنبها ؟؟ والمدرب شرحه ؟!
آسف على التطويل واللهم اني صايم ...