العجب العجاب في حياة ابو الشباب :
اليوم : السبت
الموافق : ماادري وش يوافق من زين هالذاكرة كل اللي اعرفه انه في شوال في سنة 1992م
المكان : السكن الجامعي في جامعة الملك سعود خبركم مابعد حطوا جامعة في شقراء إلى هالحين ( حدنا المعهد العلمي وعليه طقاق علشان المكافأة ) .
الحالة الاجنماعية : ابلغ من العمر عشرون عام واعزب وطفران وطالب مغترب وفي الصيف اكد على جمسي خربان مكيفه اجيب ردود جح من المزارع ( يعني اني عصامي )
القصة :
رنت الساعة الخراش اللي حاطها جنب فراشي على الساعة سبع زي العادة علشان اروح الجامعة ( عندي واحدة اصلية ماقد خربت مع اني قبلي امحط بها كل ماهبلتني ..كان تعرفونها ماركة بق بن شاريها من ساحة الصفاة ماتقومك انت لحالك وبس تقوم كل طلاب السكن )
طبعاً فزيت من فراشي وأنا متردد هو أنا ماخذ لي غطيطة زود ربع ساعة ؟!؟
قم بس وادحر الشيطان .. طيب
واقوم واروح للحمام اغسل وجهي من آثار النوم وغبار الاحلام وافرك لوحتي الامامية بالموية والصابون ( صابوني المفضل ابوعنز ) كاد اني اطلع ابيض شوي ( طول عمري افرك في هالوجه ولاقد جاب نتيجة ) وفيما انا واثناء انهماكي في عملية الصنفرة سرحت بالذهن مبحر في خيال بعيد وصرت افكر بصوت مسموع عن شكلي اللي مهوب من زينه دب ولاهنا زود طول وكرشتي بادية في البروز وشعري هالعرادة اللي يالله اقوى اكده ويدي كلهن يسر اذا جيت ازين شيء اكبه والا احوسه ( يعني ارفل ) مسحت وجهي بالمنشفة ثم القيت نظرة على طلعتي البهية في المراية اللي توي شاريها من الحراج البارح عقب مانكسرت الاوله ( من عادتي اني اطالع في المراية كل يوم واقول : ياملحي ويازيني )
لكن كأن اللي في المراية مهوب يشبه لي ياجماعة !!
اشوف واحد اطخم ومزيون شعر ناعم كانه اللي يجي في دعايات برت بلص والوجه صار ابيض عقب الحنطي والعيون زرق والكرشة راحت وصرت اطول شوي وممشوق القوام .
معقولة ان الصابونة ( ام عنز ) جابت نتيجة ؟!
مهوب معقولة اني بهالزين كله لحد اني يوم شفتني فكيت معي !!!!
صرت ابرق في وجهي بالمراية واقول : انا / مهوب انا / انا / مهوب انا / ..
لا والله مهوب انا !!
قلت لهاالشخص الماثل امامي في المرآة : من انت ؟
قال لي : انا انت ياوجه العنز !!!!!!
قلت : وشلون ؟
قال : ماودك ان شكلك يصير زين ؟
انت قدام المراية السحرية كل اللي تبيه ينفذ لك بس بشروط !
اصابتني رهبة مصحوبة بدهشة وانبساط شعور غريب يصعب وصفه !!
وقلت بعد ان افقت من الصدمة : وش هي الشروط ؟
1- تكون لحالك .
2- تقول اللي تبي بصوت مسموع.
3- بين كل طلب وطلب فترة لاتقل عن اسبوع .
4- الطلبات الكبيرة تبي لها فترة طويلة علشان تطلب ثانية .
5- احقق لك الطلبات المعنوية وبعض الماديات وفلوس كاش مافيه .
6- تحفظني في مكان آمن .
7- وان رحت لغيرك ماعاد ارجع لك .
ياسلااااااااااااااااااااااااااااااااام
كل اللي ابيه اقدر احققه
وش اللي يمكن اطلبه جا في البال اشياء كثيرة مااقدر احصيها وهذا بعض اللي جا في هالدمجة :
الليلة :
فيه عرس لواحد من الجماعة ودي اغير شكلي لمدة ست ساعات لشكل بزر وادخل قصر الافراح واقز الحريم والبنات تراي ماقد شفتهم من عمري ثمان وقبل الحارس يطلعنا ويمحطنا بالعصا اللي معه .

بكرة الصبح :
ودي اغير شكلي ويصير مثل شكل مدير الجامعة واستهبل على هالدكاترة واحوس مريرهم زي مايسوون بنا واخذ حقي منهم وافي ( اه .. ياسلام قاعد افرك يدي )

ودي اصير مايك تايسون :
إذا توظفت اروح لمديرنا وأنا امضغ شيء في اثمي واذا سألني وش تاكل اقول هذي اذن واحد قابلته في السيب مااعجبني شكله قاعد امزمز عليها واسأله عني واعلمه اني رفيقي علشان يخاف مني ولاعاد يسأل عني رحت والا جيت ؟!
ترى اللي يضايقه ( أنا يابوفاس ) يضايقني ( انا يامايك تايسون )
وانا طالع ارجع من عند الباب والتفت عليه وان مبزر عيوني واقول هه تقول شيء اتهدد ودي يعابط معي علشان اساويه هو وكرسيه بالارض

اتمنى اصير لاعب كرة قدم :
لو ساعة اجيب هدف واسوي حركة السباحة اجيك مويحف من اخر الملعب على بطني قد سويتها مرة في صالة بيتنا ويصك راسي في عاير الباب وودوني اهلي للاسعاف واربع غرز !!

ودي اصير قطوة :
بس موب أي قطوة ابي قطوة بر كبر الدريشة علشان اصيد جرذي قاهرني نازل معي في الغرفة ولا هوب يقط وقبله يلعب في ثيابي لعب

اخاف اقول ودي اصير مثل مادونا :
واروح للعقارية اهبل بالشباب واتريق عليهم زي اللي يسوونه بعض الشباب في التشات والا المتنكرين في الساحة ولابسين عبايات وتمسكني الهيئة واتورط واخاف تضيع المراية والا تطيح في يد احد وارط بهالشكل .. وااااااااااو والله المصيبة لا لا خلني في شي اهون ولاهيب من اخلاقياتي !!

ودي أصير غطا قدر :
علشان اشوف العمليات الميتافيزيقية للرز وهو ينشف

ودي اصير حفرة :
وياليتها تكون متنقلة وين مايروح العير نويصر …. ( ولد جيراننا اللي في حليوه - احد احياء شقراء تشبه العليا - قاهرني من كثر مايعلق علي ويسطرني بيديه اللي تقول الوحدة منهن كبر الوسادة ) اصير قدامه بشكل مفاجيء ماله مفر الا يطيح فيها ( الله من النجاسة .. بس يستاهل قبله يسميني التنكه ومرة من المرات رحت اناواياه للمستشفى عندي التهاب في اللوز وعطاني الدكتور مضاد وقال ان ماتشاون سويت لك عملية استئصال للوز – وانا مشهور في الديرة ان خشتي كبيرة – قال نويصر وشو له العملية يادكتور ؟ دغدغه ودخل يديك ومكعهن ) . ( مكعهن = امتخهن )
ودي اصير قوطي تونة ( بشرط ماتكون تايلندية ) :
علشان تشتريني احد المدرسات واشوفهم وهم يفطرون ويحشون في خلق الله .

ودي اصير بكلة :
عند كوافيره كل شوي على راس بنت غير شكل بس خوفتي اني اجي على راس سودانية وانشب في عرادتها ثمن من يطلعني من شعرها ؟!
ودي اصير اشياء كثيرة تدور في بالي ودي اسويها بس قررت اني ابدي الاشياء المهمة اول شيء طلبت اني اخلص الجامعة وتحقق لي هالطلب بسرعة وبتقدير امتياز بس اخلاء الطرف كأنه تأخر شوي !!

ثاني شيء طلبت من المراية انها تدور لي على وظيفة محترمة ومرت فترة طويلة ولا صار شيء وارجع اسألها ثانية واعتذرت مني وقالت : اسمح لي هذي صعبة والديوان مانزل وظائف من زمان شوري عليك تدور لك على واو هو اللي يمكن ينفعك !!!

المهم اني اموري مشت وتوظفت عقب ماشاب شنق من راسي ( ذي بسيطة نرجع السواد للشعر بطلة على المراية ) واعرست على محبوبة قلبي غرشة وجبت منها 3 كناري ( مشكلتهم انهم يغردون 24 ساعة )

وكان من ضمن الطلبات المهمة اني اسجل في ساحة الاقلاع لاني يوم جيت اسجل فيها لقيته مقفل والعالم طوابير في الانتظار والحمدلله انه تحقق لي وافتكيت من المرابط في سجل الزوار ( المرة الجاية باطلب من المراية تسجيل هالمساكين اللي في سجل الزوار كلهم عن بكرة ابيهم يستاهلون والله ) .

صار لي هالحين 8 سنين على هالحالة وانا مستانس بها المراية ومحافظ عليها اكثر من عيوني !
في يوم من الايام :
لقت نفسي فاتح باب سيارة مهيب ذي سيارتي لكن هو امداني افكر مادريت الا شيء يجرني من داخل ويجلسني على مقعد السائق وربطني بحزام الآمان مالقيت دريكسون هه سيارة بدون دريكسون ويجيني صوت يقول لي : اهلين ابوفاس ( ايه شكلها سيارة عصرية – مهيب مسيان – وذا اللي يحاكيني الكمبيوتر ) وكمل : وين رايح ؟ قلت : للبيت ويمس بي مع هالشوارع والحواري الين قربت للبيت وخابر فيه مطب عقبه حفرة فيها نقعة موية قبلي اطيح فيها !!
لكن كلنا المطب زي العادة ( اصلاً ادمنت عليه لو مااكل هالمطب احس ان شيء ناقصني )
وصلت للبيت وانوار البيت مدهرة مادريت الا انا في وسط بيتي والعالم تخترش من حولي وش اللي قاعد يصير ؟؟
والعالم تدخل وتبارك لي وانا متنح ماادري عن شيء ؟!
بيتي مليان ناس ويقولون متى نمشي ؟!
هو انا ماسكهم ورا مايمشون ؟!
أنا .. خابر الضيف اذا جاء يمشي يقول اكرمكم الله ويقضب الباب وراهم يشاوروني يبوني الزم عليهم … منيب فاضي لاحد !! أنا لاهي في همي !!
انا هالحين ودي استوعب الموقف اللي انا فيه وشو بالضبط ؟
شكل الدعوى فيها عرس !! لايصير عرسي !؟ وأنا ماادري بس !
بس أنا توي حرمتي محاكيتني بالتليفون ومبسوطة معقوله لو أنه عرسي تكون مستانسة لها الدرجة !!
ياجماعة تراي ضايع دبروني !
وفي هالاثناء يدخل علي شاب في قمة أناقته رف قلبي له يوم دخل وسلم علي وحب راسي
وقال يبه نمشي ؟؟؟؟؟؟؟؟؟
رن جواله وماانتظر ردي مشى وخلاني ادق الهواجيس !!
يبه !!
دارت بي الدنيا ولفت واجلس على الكرسي وسط الصالة واشوف قدامي لوحة فيها صورة لهذا الشاب وعليه ملابس ظابط توه متخرج من الكلية الامنية !
من هو ذا ؟؟ ماعندي من العيال الا فاس وعمره 5 سنين وفسفوسي وعمره ثلاث وبنتي الفسيفساء وعمرها سبع ( ماشي على وزنية مضبوطة !! ) ؟!

وفي هاللحظة تدخل الصالة علي بنت شمحوطة وماسكة ولد صغير في يدها واصد عنها لين تغطى لكنها واصلت سيرها تجاهي وتقبلني مع وجنتي وتقول للولد معها سلم على جدك يابعد طوايفي !!
انا مابعد افقت من الصدمة الاولى تجيني اللي العن منها وتذب الولد على رجلي وراحت تركض كأنها ناسية شيء !!

حالة الذهول تزداد عندي وهممت بالذهاب الى الحمام وفي طريقي صادفتني ام فاس ورا شكلها متغير كنها شانت شوي ( لا والله اكثر من شوي ) وش هالعرافيط اللي في وجهها ماقدر المكياج يخفيهن !! وش هالتغير السريع ورا الحريم يعجزن بسرعة من يوم تبنط لها ولدين وهي متغيره ؟!
أمور عجيبة تدور من حولي ماقدرت استوعبها ورحت وغسلت وجهي واقول انا شكلي في حلم مسحت بالفوطة واناظر روحي في المراية والا شكلي متغير الشيب غازيني في كل مكان والعرافيط ماليتن الوجه !!!!!
رجعت للصالة ولقيت جريدة منطولة على الطاولة والقطها بشوف تاريخها والاه مكتوب في يوم الاثنين 2/2/2022 م.
وفي صدر الصفحة الأولى مكتوب بالبنط العريض الليلة حفل اعتزال عميد لاعبي العالم احمد الدوخي !!!!!!!!!!!!!
2022م اخر علمي ان امس 7/7/2000م
وين راحت هالعشرين سنة من عمري .. وين ؟؟!؟

رحت اركض ادور مرايتي السحرية اللي دايم اوزيها في التجوري ( اخفيها في الخزانة ) ولم اجدها واستبد بي الغضب وبحثت عنها في كل مكان ولكن اخر مااتذكره امس أن ولدي فاس داخل علي الغرفة وانا نايم وشغل التلفزيون على قناة السبيس تون وازعجني واقلق منامي وقمت وجريته مع شوشته وطلعته برا وزعل وقال : قبلكم مدلعين اخواني ولا تطقون الا انا متى اكبر وافتك من غثاكم ؟!! وكانت كل امنياته انه يصير ضابط !!
وجت غرشتي ومعها الولد يشاهق وقالت : وراك على الولد تبي تعقده المهم اني رحمته وخليته في الغرفة لحاله وطلعت مهيب من عادتي اطلع بدون مااشيك على المراية !؟!
اوه .. اول مرة انسى التجوري ( الخزنة ) حقي مفتوح وفيه مرايتي السحرية !!!!!!
ادركت بعد فوات الآوان ان المراية حققت طلب ولدي الله يهديه وهذا اليوم صار يوم عرسه ………
الله يهديك ياوليدي مابعد امداني اتهنا بشبابي وقعدت اندب حظي وعلى اليوم اللي لقيت فيه هالمراية !!!!!!

--------------
اقول ورا ماتتخيلون انكم لقيتوا هالمراية وفي نفس الواحد او الواحدة منكم شيء وده انه يسويه وش تبدون ؟؟

أخوي الغالي أبو فاس ...

في البداية أهلاً فيك في هالمنتدى ونور المنتدى بوجودك ...

وبصراحة موضوعك رهييييييييييييييييييب ...

ياخوك أنا ودي أصير عميد الكلية بالجامعة نص ساعة بس ... ودي أنتقم من ناس ...!!!

هههههههههههههه

الله يعطيك مليون عافيه ...

ولك تحياتي ...

أخوك / سفر المرزوقي .

تسلم ابو فاس.

انا ودي اصير ابوفاس. علشان اشوف وين تجيب هالافكار منه.

وعلشان اسجل نفسي في منتدى الاقلاع.

أهلين أبو فاااااااااااااااس..
يالله حيه..
((التمني شيء رائع قضى عليه الواقع المر الذي نعيشه)) نظره شخصيه بحته

قصه حلوه وبين انك شاب ماتحب الملوخيه بالارانب ابد سبحان الله
لا ومن شهدلك انها رهيبه سفر اللي ماعنده مانع ياكل المرق بالارانب هاهاهاهاهاها

بس قصه حلوه شدتني الين انقطع ثوبي قصدي الين قريتها كلها
اههااههاهاهاهاههاهاهاههاهاهاههاهاها

هلا والله بابو فاس ..
سالفتك رهيييييييبه .. اقول ورى ماتسلفني مرايتك شوي ؟؟؟؟

والله يعطيك العافيه ..

[عدلت بواسطة هلالية سدير التاريخ:18-03-2001 الساعة: 05:30 PM]

ابو فاس مدوخ الراس




والله صرت سفر تو

نعنبو دارك ماقلت أتوضاء وأصلي الفجر ؟؟؟؟؟؟؟ وينك فيه . البرازيل .

وبعدين شايب ......... وعايب بعد .


أنا من شميت ريحتك أبو فاس / وأنا غاسل يدي منك ...... يالعايب .

شايب ومغرور = غسل يدك منه ...... ماعندة سالفه .

شياب أخر زمن .

كم عمرك ألحين ميه برى ---- يعني أعتزل أحسن لك ...... ياألشايب أللعايب.

بأسوي لك أعتزال وهديتي لك ....... سجادة بوصلة ؟

ابوفاس والله انك مسكت
لكن ممكن توضح معنى عصامي عشان بعض الشباب ما يعرفونها


وبالمناسبه انا ودي بعد اصير غطا قدر بعد لكن عشان اشوف الرز وهو يشرب


وتشبه العليا هاه ايه طيب

هههههههههههههههههههههههههههههههههههههههههههههههههههه
هههههههههههههههههههههههههههههههههههههههههههههههههههه
هههههههههههههههههههههههههههههههههههههههههههههههههههه

الله يرجك ابو فاس ههههههههههههههههههههههههه
-------------------------------------------------
ودي اغير شكلي ويصير مثل شكل مدير الجامعة واستهبل على هالدكاترة واحوس مريرهم زي مايسوون بنا واخذ حقي منهم وافي ( اه .. ياسلام قاعد افرك يدي )
-------------------------------------------------
احسها طالعه من قلب ، وخلي انا الوكيل تكفى ، ودي استهبل معك <--ياهو شايف الويل بالجامعة

بس حقت الوظايف مسكته هههههههههههههههههه

وحقت الدوخي ماتنبلع ، اما يبي يجلس الدوخي عشرين سنه زود؟؟ ، قل ماجد عبدالله يمكن

انا ودي اكون مشرف ثواني واخذ نسخة من الموضوع للمميزه

حلو مثل هاذي الأفكار الجميلة والممتعه...
عموما..... اتمنى زيادة في هاذي...الحوارات ... والتأليفات .....الجميلة جدا..
واشكرك أخوي ابو فاس.....
واتمنى...ان تبدع دائما كاباعاتك الدائمة...
وشكرا

أبو فاس لو ألقى المراية حجزت لك في مستشفى شهار سرير .

تسلم ابو فاس