سبعه مواقف صعععبه ... اختار موقفك ... واسدح ردة فعلك ... دعوه للجميع ...
بسم الله الرحمن الرحيم
كثيره المواقف اللى تتكرر علينا في حياتنا اليوميه نتعامل معها بسلبيه كبيره نندم عليها لأن النتيجه لن تتغير بل ربما تسوء .
اخترت لكم سبعه مواقف فقط و لكم اختيار منها ماشئتم موقف او موقفين او ثلاثه ومعالجتها بالمطلوب ادناه
المطلوب كل عضو يعبر عن واقعه في التعامل مع ما سيذكر من مواقف بصراحه تامه ثم يذكر لنا ما كان يجب ان يكون منه اتجاه نفس الموقف وياليت يذكر النتيجه كيف راح تكون في الحالتين طبعا حتى المواقف اللى ماتناسب اخواتي العضوات اتمنى يعيشو الموقف ويتكرمو بالمشاركه.
بسم الله نبدأ :
الموقف الاول
مباراة الهلال والاهلي على وشك تبدأ وحكم المباره يطلق صافرة البدايه وفجأه تجيك امك او ابوك ويطلبك تخدمه في مشوار ضروري لا تقل مدته عن ساعتين والا خلوها ساعه وخمسه واربعين دقيقه حدد او حددي موقفك .
الموقف الثاني
تطلع انت واخوك الصغير مشوار واخوك هو السواق طبعا كان المشوار بعد صلاة الظهر في صيف الرياض اخوك يبغى شركة موبايلي وانت عندك شغله بالبنك المهم ينزلك على انه يمرك بعد نص ساعه تروح تلاقي النظام في البنك متعطل وتتصل على جوال اخوك يرد ابوك يقلك اخوك نسي الجوال بالبيت وتمر ساعه وساعتين وانت تنتظر تعطش وتجوع وتلتفت للمطعم وتحط يدك على جيبك تتذكر ان المحفظه مافيها ولا ريال لان بطاقة الصراف منتهيه والنظام متعطل تلاقي ليموزين تقله محمد ممكن ودي بيت واذا وصلتني انا يطلع جيب فلوس ويجي ويرفض صاحب الليموزين الاول والثاني والثالث وفجأه يأذن العصر الا واخوك جاي وش را تقله وكيف راح تتعامل معه ؟
الموقف الثالث
عزمت اصحابك او عزمتي صاحباتك وتكلفت وسويت العشاء وحظرت الحلا والقهوه والشاي وانتظرت وانتظرت وانتظرت وما احد جاء تتصل عليهم ما يردون وبعضهم جوالاتهم مقفله انتظرت الى الساعه وحده ليلا بعدها نمت لمن تقابلهم حدد موقفك او حددي ؟
الموقف الرابع
تدخل او تدخلين امتحان وانت مذاكر او مذاكره ويكون الحل تماااااام والدرجه اذا ماكان كامله تنقص درجه وتطلع النتيجه رسووووووووب وتروح للدكتور وما ينصفك وتروح للعميد وما ينصفك وتروح كل مكان وما في فائده وتحمل الماده وتنزل لك الماده عند نفس الدكتور ويكرر معاك نفس الحركه يعني يرسبك متعمد وتمر الايام وتلاقي الدكتور متعطل ومقطوع على خط الرياض الدمام ومحتاج فزعتك ضروري .. حدد موقفك ؟
الموقف الخامس
تمنع زوجتك من زيارة جارتها لأسباب تراها انت مقنعه بينما زوجتك لا تراها كذلك المهم ان زوجتك تطلع تزور جارتها بدون علمك ويوم من الايام تكشفها انت حدد موقفك للاعضاء .
اما العضوات
تشتد لهجة الحوار بينكي وبن زوجك وفجأه يسفعك كف قوي حددي موقفك ؟
الموقف السادس
نهائي بطولة حواري قويه وتحمى المباراة الدقائق الاخيره وانتو مهزومين 2-0 وتسجلون هدف ويتقلص الفارق وقبل نهاية المباراة بدقيقه تعرقل داخل منطقة الجزاء بلنتي صحيح لا غبار عليه ويصفر الحكم وتفرح مع زملائك وفجأه ترفع راسك الا والحكم يوجه لك الكرت الاصفر الثاني والبطاقه الحمراء بداعي التمثيل ونفس الحكم له معاك مواقف مو حلوه من اول ... حدد موقفك ؟
الموقف السابع
تشتري سياره جديده قيمتها لا تقل عن 150 الف ريال وايفون فور اس << دوبه متوظف .. ويادوبك طالع من المعرض مبسوطمن السياره والايفون بيدك بدق تقهر واحد من اصحابك واول مايرد وتقله وتقهره يقلك ايهههههههب ويجيك شايب مسرع يصدمك وتنفجر الايرباق او الوسائد الهوائيه بوجهك من كل مكان ويطير الايفون وينكسر والمصيبه ان السياره لسا مو مأمنه حدد موقفك من الشياب و خويك ..؟؟
واخيرا تذكر ياعزيزي ما ورد عن النبي صلى الله عليه وسلم حتى نربي انفسنا عن الزلل ونعفها عن الخطأ.
عن أبى هريرة رضى الله عنه أن رسول الله صلى الله عليه وسلم قال :ليس الشديد بالصُّرَعةِ ، إنما الشديد الذى يملك نفسه عند الغضب . متفق عليه ـ حديث سليمان بن صرد قال : "اسْتَبَّ رجلان عند النبى صلى ونحن عنده جلوس ، وأحدهما يسب صاحبه مُغْضَباً قد احْمَرَّ وجهُه فقال النبى صلى الله عليه وسلم : إنى لأعلم كلمة لو قالها لذهب عنه ما يجد ، لو قال : أعوذ بالله من الشيطان الرجيم . فقالوا للرجل : ألا تسمع ما يقول النبى صلى الله عليه وسلم؟ قال : إنى لست بمجنون ! متفق عليه ـ لؤلؤ ومرجان