أخوي أيوب .. التنظير سهل جداً .. و بعد انتهاء المباراة سهل أطلع الاخطاء لأني شفتها ..
وسهل أقول ليش ما طلعت فلان ولعّبت فلان .. و ليش مالعبت بالتكتيك الفلاني بدال تكتيكك ..
لأن الأمور وضحت بعد المباراة .. لكن لكل مباراة ظروفها .. والمدرب مثله مثل اللاعب و الإداري و غيره .. تخونه قراءة المباراة ..
لكن مازلت مصر على رأيي إلى أن يحدث الله أمراً ..
وهو بأن دياز بالمجمل مدرب ممتاز لكنه يمر بسوء حظ .. الغيابات و ضعف الإمكانيات للاعبين اللي عنده حجّمت من مستوى الفريق ..
لكن بالمجمل و حسب متابعتي لكل المباريات .. الهلال ماكان سيء .. قدر ماكان غير محظوظ ..
الهلال يتلقى هدف بالمباراة أو ربما مايتلقى هدف ويتعادل .. بس ما يسجل رغم الفرص اللي تحصل للفريق ..
وأنا سبق و ذكرت في رد سابق إني مستعد لأي عضو يجيب لي مباراة من مباريات الهلال و يثبت فيها إن هجمات الفريق الخصم كانت أكثر و أخطر ..
جميع المباريات الهلال كان يصل لمرمى الخصم أكثر من الخصم .. و جميع المباريات الهلال يضيع على أقل تقدير فرصتين أنت وضميرك ..
وعندي قناعة إن المدربين أمثال دياز لا يمكن يخبّص بالتشكيلة بس علشان ياخذ الشرط الجزائي و يمشي ..
أتوقعها من مدرب مغمور أو مدرب بأول مشواره مع الفريق .. مثل ماسوى جوستافو ماتوساس ..
وسبحان الله اسمه قريب من اسم ماتياس بريتوس
..
كلهم جو للهلال ومن أول مباراة يبون الشرط الجزائي ..
دياز ماعنده أي سبب يمشي .. وحتى لو عنده عرض من نادي ثاني .. النادي الثاني يقدر يدفع الشرط الجزائي ويختصر الوضع ..
وبالعقل و المنطق مافيه شخص يدور على نفسه الخسارة وفسخ العقد إلا إذا عنده عرض ثاني أقوى ..
ولا تقدر تقول دياز توه جاي و عجز يتأقلم مع الرياض .. الرجال معه عائلته وولده عايش ولا جته إلا العافية ..
ومانتكلم عن عصر الثمانينات بحيث نقول المجتمع غريب عليه .. الحين خبري خبرك الوضع بالسعودية على مايحبون ..
بالنسبة لماتياس .. فدياز اخطأ بالإصرار عليه .. لكن اللاعب كان أفضل بكثير مع ناديه السابق وهو نادي مكسيكي كبير ..
وحب يخرج من حسابات الهلال بالمستوى الهزيل ( المتعمّد ) اللي قدمه ..
لأنه عارف الوضع و يدري إن النادي ماراح يصبر عليه و بينهي عقده ..
لا يوجد لاعب على وجه الخليقة يستلم الكورة ويسلمها ب5 ثواني .. حتى مايحتفظ فيها نهائي ولا يحاول يشوت ولا يمشي .. إلا واحد يلعب طقطقة ..
الحبسي .. ركنه على الدكة بسبب ان المعيوف حارس المنتخب .. وأوامر عليا فرضته أساسي ..
ودياز مهب عمى .. يشوف إن الحبسي كمستوى و كتاريخ وكخبرة عن سبعة معيوف ..
ويأتي لاعب من الاحتياط للأساسي لأن فريقك مابين إصابات و إيقافات .. طبيعي يبلش ..
إدواردو - خربين - سالم - العابد - سلمان الفرج - البريك - الشهراني - عطيف - ميليسي ..
كل واحد بهم يرجع من إصابة يدخل بإيقاف ثم يرجع لاصابة
أخوي أيوب .. أنت قسوت على دياز .. والظروف هي من تحكمه حالياً ..
له أخطاء .. صحيح ..
لكن الاستقرار مهم جداً .. ودياز و غيره من المدربين يتعلم من أخطاءه .. و المفروض حنا نتعلم بعد ..
تغيير مدرب عرف البلد و طبيعته .. وعرف الدوري و أنديته .. وعرف إمكانيات لاعبينه .. و عرف حاجات فريقه .. خطأ كبير ..
يعطى فرصة ثانية .. ويجلسون معه .. وياخذون احتياجات الفريق .. حسب الميزانية ..
طبعا لو ماتسمح الميزانية بيصرح دياز إنه مقتنع باللاعبين
.. زي ماصرّح قبل ..
ثم يلعب باللاعبين الجدد .. و يرجع المصابين .. و يكتمل الفريق .. وبعدها لكل حادث حديث ..
باقي كم جولة على الدوري؟ .. الحديث عن إقالته .. أو التشويش عليه بالانتقاد و زرع جو مكهرب إعلامياً ما يفيد إلا خصوم الهلال ..
خلوه يركز بشغله هالكم جولة الباقية .. وماباقي شيء .. الظاهر 10 جولات .. أو أقل ..
وبعدها وقت الحساب و العقاب ..