بسم الله الرحمن الرحيم

شخصيآ إذا أبي أحكم على مستوى لاعب محلي أحكم عليه من خلال مباريات دوري أبطال آسيا لأن المنافسة فيها أقوى من المنافسة المحلية , يعني إذا أنا رئيس نادي كبير مثل الهلال وملزم بالمنافسة على جميع البطولات المحلية والخارجية في كل موسم وقررت أتعاقد مع لاعب محلي المفروض أتعاقد مع لاعب قادر على مقارعة المنافسين محليآ وخارجيآ, لكن إذا اللاعب مستواه محليآ ممتاز بسبب ضعف المنافسة محليآ هذا من غير المنطقي أدفع فيه 5 ملايين سنويآ علشان بطولة محلية .

فيه مشكلة ومصيبة وكارثة حاصلة بالدوري المحلي اللي هي قيمة عقود اللاعبين ( الشباب ) صغار السن !
يعني مثلآ سالم الدوسري وفهد المولد وعبدالفتاح عسيري وسلمان الفرج ومصطفى بصاص هذا الجيل جيل العقود المليونية الضخمه + مقدم العقد الهائل واللي سبب المشاكل بالمستوى العام للاعبين أصبحو غير مهتمين بتقديم مستوى مع الفريق أو المنتخب ، يعني مثلا كلنا نذكر فهد المولد وعبدالرحمن الغامدي والفرج وبصاص في بداياتهم قبل 4 أو 5 مواسم , كان فيه حماس ولعب بروح وإنضباط , لكن تجي في يوم وليلة وتوقع معه عقد ب قيمة 5 ملايين سنويا + مقدم عقد 8 مليون أقل شيء بدون أي شروط أو بنود تكفل للنادي حقه في حال عد الإستفاده من اللاعب سواء بإنخفاض مستواه أو إستهتاره أو كثرة إيقافاته أو كثرة الإنذارات اللي تحصل عليها , هذي تعتبر بمثابة الهدية للاعب وكأنك تقول له خذ الفلوس كامله بدون أي جهد منك , وهذا اللي صاير , اللاعبين حاليآ يعني بالعامية ماعاد يبون يلعبون كورة ولا عاد يبون اللعب مع المنتخب ولا يبون معسكرات , ضامن 8 مليون كاش مقدم عقد ومرتبط مع النادي ب5 ملايين سنويآ وفي حال عدم تسديد النادي للاعب حقه فقط بشكوى منه لا يستطيع النادي تسجيل أي لاعب إلا بعد مايعطي اللاعب حقه ... كلنا شفنا اللي صار بمعسكر المنتخب الأخير من تسيب ولا مبالاه من قبل بعض اللاعبين، واللي صار بنادي الأتحاد قبل فتره قريبه من غياب متعمد وبدون مبرو نهائيآ عن التمارين من فهد المولد ورفاقه هذا دليل ومؤشر إن الفكر عند اللاعب السعودي الشاب غلط ! وتعامل إدارات الأندية معهم غلط آخر ، مثلآ غاريث بيل جاء للريال ب90 مليون يورو , لكن موب نفس النظام هنا فقط خذ الفلوس وروح الملعب إلعب ,لا هناك فيه بنود منها مستوى اللاعب حسب تقييم المدرب ونسبة تسجيله للأهداف ونسبة صناعته للأهداف وعدد البطولات اللي يحققها مع النادي وسجل اللاعب من الإنذارات والإيقافات هذي كلها تحسب على اللاعب في العقد في حال فشله بتطبيقها أو تطبيق جزء منها , وهذا الشيء اللي أثر على مستوى اللاعب هنا وجعل عنده شيء من اللامبالاه خصوصآ مع المنتخب ، هنا نشوف مثلآ معسكرات المنتخب تجي فترة يقولك في معسكر ب ميانمار ومباراة ودية ضد ماليزيا إستعدادا للتصفيات الآسيوية , واللاعب توه مستلم مقد عقد وعنده إجازه من النادي والمعسكر هذا معكر مزاجه خصوصآ إن اللاعب في الفترة الأخيرة ماعاد يأمل كثيرآ على نتائج منتخبه , وعارف إن المنتخب ماراح يوصل مثلآ كأس العالم أو يحقق كأس آسيا وعلشان كذا يقولك وش لي بالسفر والتعب والنوم والأكل والتمارين وبالنهاية ماراح نوصل بعيد , بالآونة الأخيرة نشوف في أول يوم يومين معسكرات المنتخب إستبعاد كم لاعب بسبب الإصابة أو هروب لاعب أولاعب يقفل جواله, أو لاعب مايرد ع تلفونه , وبالنهاية ماهو خسران شيء ( ماديآ) وهذا الأهم بالنسبة له , يعني بالنظر للعقوبات اللي طالت كم لاعب بمعسكر المنتخب الأخير نشوف إنها عقوبة إنضباطية يعني إستبعاد من المنتخب فقط , وهذا اللي يبيه اللاعب أصلآ يبي الجهاز الفني ماعاد يستدعيه, مادام عقده مع النادي جاري بالكامل ماراح يتأثر ولا راح ينضبط للأسف هذا اللي صاير .العقوبات مفروض تكون مادية وبنسبة كبيرة جدآ , وهذا اللي بيضيط اللاعب . بعد خسارة الهلال من الأهلي الإماراتي في المنافسة الآسيوية وبعد فوات الأوان من خلال حالات الغياب عن التمارين أو المعسكرات أو عدم الظهور بالمستوى الفني المطلوب أو اللامبالاة وغياب الروح في مرحلة حاسمة من البطولة الآسيوية أضافت الإدارة الهلالية بند يسمح فيه للجهاز الفني بالخصم من قيمة عقد اللاعب بنسبة 30٪‏ على حسب تقييم مستواه الفني .. هذا القرار اللي نتظره منذ مبطي من جميع الأندية المحلية وتطبيقه بصرامه عالية ورفع نسبة الخصم لتصل ل 50% أو أكثر في حالة تعدد حالات الخصم .

ياسر الشهراني

أناأتمنى أي أحد يعطيني إحصائية للاعب بعدد صناعته للأهداف من خلال الكرات العرضية سواء العالية أو الأرضية , اللاعب له قرابة 5 مواسم مع الفريق ومعدل دقة عرضياته وإنفراداته ضعيف بنسبة كبيرة جدآ , بالإضافة إلى ضعف تغطيته الدفاعية بالنظر من الوهله الأولى إلى بنيته الجسمانية الضعيفة . يعني دفاعيآ لا يمكن تستفيد منه بالعرضيات أو التغطية السلمية خلال المبارايات الآسيوية الكبيرة أو المنتخب بالمافسات الخارجية القوية , اللاعب اللي مخلي الجمهور معجب فيه إنه يركض طوال المباراه بسرعه و حماس وسرعته عالية وأنيق وخلوق ويلعب بروح عالية , لكن مافي أي إنتاجية على أرض الملعب لا هجوميآ ولا دفاعيآ مقارنة بعدد المباريات الكبيرة اللي لعبها مع الفريق , أنا أتوقع إذا لم تخني ذاكرتي إن عدد الأهداف اللي صنعها من الكرات العرضية من أول مباراة له إلى يومنا هذا لا تتجاوز 8 أو 9 وهذا معدل ضعيف .البريك مثلآ نجده صنع 5 أهداف في أول موسم له كأساسي مع الفريق , وهذا معدل أفضل من الشهراني في بداياته ، عمومآ أتمنى أي شخص عنده إحصائية لعدد صناعته للأهداف من خلال الكرات العرضية يفيدني

سالم الدوسري

أنا من الأشخاص اللي عددهم قليل اللي ما أعجبهم سالم الدوسري من أول مالعب مع الفريق، هذا إذا ماكنت أنا الوحيد اللي ماأعجبني لعبه منذ بداياته ، اللاعب المبدع تعرفه من لمسته للكوره ومن تصرفاته داخل الملعب وخارجه سواء من ناحية الجدية باللعب أو الحماس أو الإهتمام بالستايلات والربطات وكثرة المشاكل مع لاعبين الخصم والطقطقه بالكوره والظهور بالسنابات أكثر من الظهور بالملعب من خلال تقديم شيء مقنع كلاعب ، البعض مايقتنع إن سالم لاعب عادي إلا من خلال مستواه بالمباريات الكبيره ، وهذا الشيء موجود أيضآ اللاعب مامنه فائده خلال المباريات الكبيرة ، بل في بعض الأحيان يضر بالفريق من خلال الطقطقه بالكوره أو حدوث مشكله مع لاعب الخصم خلال المباراه ونرفزته ، عمومآ اللاعب ماينفع نهائيآ ومن الأفضل مقايضته بجمال باجندوح لاعب الإتي .

عبدالعزيز الدوسري

اللي جالس يسويه اللاعب حاليآ هو إنه يمشي بالملعب ويتنفس فقط ويستلم 4 مليون سنويآ أو أكثر .. المشكله موب بالفلوس المشكله كيف يعقل أن الجهاز الفني يبقي على لاعب مامنه فائدة نهائيآ ، بل أن ضرره أكثر من نفعه في بعض المباريات

بالنسبه لي الرهان الحقيقي للفريق في كل موسم هو تحقيق آسيا، واللي جالس أشوفه حاليآ إن الأسماء الموجوده حاليآ ( ماينغزا بها ) سواء من خلال الأسماء اللي ذكرتها فوق بالإضافه إلى جهة الظهير الأيسر بقيادة الزوري 9 سنوات تقريبآ وهو نقطة ضعف بالفريق ومع ذلك وجوده بشكل دايم أساسي ، البريك ظهر ببداية الموسم وقدم مستوى رائع، وفجأة إحتياط والأسباب مجهولة ، مثله مثل يحيى كعبي وشافي الدوسري وسلمان الفرج ببداياته كان ظهير أيسر وفجأة صار محور ، وأيضآ الكوري لي يونج مستواه بالجهه اليسرى أفضل من اليمين ومع ذلك تم نقله لليمين ، وياسر الشهراني نفس الوضع أيضآ وتم نقله لليمين ، والبريك لما جاء يمين أعطى فرصه للشهراني العوده لجهته الأصلية اليمنى ، لكن البريك إحتياط فجأة .

شراحيلي الحارس المفروض لو إن من الإدارة أبيعه ، اللاعب أتوقع ماعاد له نفس يلعب ، سواء من خلال إيقافه من لجنة المنشطات وبعدها غيابه ليلة مباراة الأهلي الإمارااتي وبعدها هبوط مستواه بالمباريات مع وجود علامات إستفهام كبيره على بعض تصرفاته مع الكورة وتشعر أنه يتعمد إنه يخطي في الكثير من الأحيان .

بطولة ولي العهد

البطولة هذي ضررها على الفريق أكثر من نفعها ، يحققها الفريق بحكم تمرسه فيها يعني حتى لو الفريق بأسوء مستوياته يحققها غالبآ ، وهذا الشيء ينعكس سلبا على الفريق بالإستحقاقات اللي تتلو بطولة ولي العهد ، وتشعر أن الفريق واللاعبين يقدمون مستوى كبير وهذا الشيء يخفي العيوب اللي تطلع بمنافسة الدوري وآسيا ، البطولة هذي تذكرني بمقولة ( الصورة في المرآة غير حقيقية ) أي أن مستوى الفريق في هذي البطولة غير حقيقي وليس مقياس يقاس به مستوى اللاعبين بشكل عام ، وتحقيق الفريق للبطولة ليس دليل على المستوى الكبير اللي يعيشه الفريق

التغيير ظاهره إيجابية ومطلوب في هذي الفتره ، وأتمنى الإدارة تتحرك لتغيير أكثر من لاعب محلي والأجانب بإستثناء أدواردو ، و أتوقع الموسم إنتهى بالنسبه للفريق سواء من ناحية البطولة الآسيوية من خلال إمكانية تحقيقها أو من خلال بطولة كأس الملك اللي حتى لو حققها الفريق ليست مقياس بحكم خروج أغلب الفرق المنافسه وتتويج الأهلي بالدوري يجعلهم لا يلقون لها بال .

العقوبات المادية

أتمنى يتم الأجماع من قبل جميع الأندية المحليه على أن تكون العقوبات الإنضباطية اللي تطال لاعبيها مادية وبنسب مرتفعه و كبيرة ، لأن عقوبة الإبعاد من الفريق أو وضعه على دكة الإحتياط أصبحت مكافئة وليست عقوبة .

اللهم صلّ وسلم على نبينا محمد

مــــــــــوضـــــــــوعــــــك صـــيـــنـــي

انا معك بكل شي قلته حرف حرف إلا شي واحد !!!

إقتباس ياسر الشهراني أناأتمنى أي أحد يعطيني إحصائية للاعب بعدد صناعته للأهداف من خلال الكرات العرضية سواء العالية أو الأرضية , اللاعب له قرابة 5 مواسم مع الفريق ومعدل دقة عرضياته وإنفراداته ضعيف بنسبة كبيرة جدآ , بالإضافة إلى ضعف تغطيته الدفاعية بالنظر من الوهله الأولى إلى بنيته الجسمانية الضعيفة . يعني دفاعيآ لا يمكن تستفيد منه بالعرضيات أو التغطية السلمية خلال المبارايات الآسيوية الكبيرة أو المنتخب بالمافسات الخارجية القوية , اللاعب اللي مخلي الجمهور معجب فيه إنه يركض طوال المباراه بسرعه و حماس وسرعته عالية وأنيق وخلوق ويلعب بروح عالية , لكن مافي أي إنتاجية على أرض الملعب لا هجوميآ ولا دفاعيآ مقارنة بعدد المباريات الكبيرة اللي لعبها مع الفريق , أنا أتوقع إذا لم تخني ذاكرتي إن عدد الأهداف اللي صنعها من الكرات العرضية من أول مباراة له إلى يومنا هذا لا تتجاوز 8 أو 9 وهذا معدل ضعيف .البريك مثلآ نجده صنع 5 أهداف في أول موسم له كأساسي مع الفريق , وهذا معدل أفضل من الشهراني في بداياته ، عمومآ أتمنى أي شخص عنده إحصائية لعدد صناعته للأهداف من خلال الكرات العرضية يفيدني

ياسر الشهراني ضعيف دفاعياً ؟؟؟ لا وللوهله الأولى بعد ؟؟؟؟

ياخي ارحم عقولنا والله لو انك انت الوحيد الي يتابع الدوري السعودي واحنا نتابع الدوري الجيبوتي !!

ياخي ما يكفيك انه ماخذ افضل لاعب خليجي لعام 2015

مع احترامي لك ولكن شكلك تسرعت على ياسر بالحكم الله يهديك

وتبي تشوف قد ايش ياسر الشهراني لاعب مؤثر اسأل جماهير الانديه الثانيه عن رأيهم فيه

وجهة نظر
تحترم لكن ستجد معارضين لها في بعض النقاط
ياسر الشهراني يخدم الفريق اكثر من سلمان الفرج مع اختلاف المركز

إقتباس الرسالة الأصلية كتبت بواسطة Abo0oshe انا معك بكل شي قلته حرف حرف إلا شي واحد !!! ياسر الشهراني ضعيف دفاعياً ؟؟؟ لا وللوهله الأولى بعد ؟؟؟؟ ياخي ارحم عقولنا والله لو انك انت الوحيد الي يتابع الدوري السعودي واحنا نتابع الدوري الجيبوتي !! ياخي ما يكفيك انه ماخذ افضل لاعب خليجي لعام 2015 مع احترامي لك ولكن شكلك تسرعت على ياسر بالحكم الله يهديك وتبي تشوف قد ايش ياسر الشهراني لاعب مؤثر اسأل جماهير الانديه الثانيه عن رأيهم فيه

هلا بك
أنا قلت بالنظر من الوهله الأولى ( لـ ضعف بنيته الجسمانيه وليس من الوهله الأولى تعرف إن مستواه ضعيف ) , وشيء طبيعي أي مدافع بنيته الجسمانيه ضعيفه ماتقدر تأمل عليه كثير بالتغطية الدفاعية بالبطولات الكبيرة مثل آسيا سواء مع النادي أو المنتخب , تابع نذير بالحاج لاعب السد القطري وشوف بنيته الجسمانية القوية كيف إنها فارقه في مستواه مع فريقه من خلال تحقيقهم بطولة آسيا والبطولات المحلية , ناهيك عن كثرة اللاعبين الأجانب بالمنافسات المحلية في قطر , ورغم ذلك اللاعب جالس يقدم مستوى كبير رغم قوة المنافسات

معاك 100% . واحد من المعارضين يضع فقط لقطة واحده لعرضيه مرفوعه صح للاعب ياسر الشهراني..Nill

وش فيك ع ياسرنا << الشهراني
اقول لو عندك 4 لاعبين بحماس واخلاص وروح وانضباط ياسر
كان اخذنا اسيا والدوري الفريق كله مافيه الا ياسرنا والشلهوب
والباقي اغسل يدك بصابون وديزل بعد

إقتباس الرسالة الأصلية كتبت بواسطة طلبتكـ 11 وش فيك ع ياسرنا << الشهراني اقول لو عندك 4 لاعبين بحماس واخلاص وروح وانضباط ياسر كان اخذنا اسيا والدوري الفريق كله مافيه الا ياسرنا والشلهوب والباقي اغسل يدك بصابون وديزل بعد

طيب أنا أوافقك في كلامك وذكرته فوق, وقلت إن الشهراني حماسي ويلعب بروح وإخلاص , لكن وش الفائدة بالنهاية إذا العرضيات سيئة وإنفراداته ضايعه وتغطيته ضعيفة بحكم ضعف بنيته الجسمانية وأسباب أخرى فنية

فيه شي اسمه تقسيم العقد على السنوات اللي انت موقع عليها بعطيك اللي تبي لكن ينزل مستواك ينخصم من قيمة عقدك ليش الادارة ماتسويها

ع الاقل بيحرص انه يستمر مستواه ثابت مو يحرث لك الملعب عرضا بطولا اذا قرب ينتهي عقدة واذا جدد العقد انحدر مستواه ويصير مو

هامه قدم مستوى او لا

يعطيك العافية

الشهراني اكثر لاعب يغطي دفاعيا
واكثر لاعب انقذنا من اهداف محققه
لكن اذا حولته يمين تحد من امكانياته وذا ذنب المدرب
مدري وش فيك متحامل عليه

كلام سليم
في كل النقاط اتفق معك
الشهراني ضعيف في الكرات العرضية

اتفق معك في عبدالعزيز (( المفهي ))

يااااااناااااس اخذووووه ببلااااش مانبي منكم شي

رفع ضغطنا حسبي الله على ابليس

إقتباس الرسالة الأصلية كتبت بواسطة هلاليه زي القمر فيه شي اسمه تقسيم العقد على السنوات اللي انت موقع عليها بعطيك اللي تبي لكن ينزل مستواك ينخصم من قيمة عقدك ليش الادارة ماتسويها ع الاقل بيحرص انه يستمر مستواه ثابت مو يحرث لك الملعب عرضا بطولا اذا قرب ينتهي عقدة واذا جدد العقد انحدر مستواه ويصير مو هامه قدم مستوى او لا يعطيك العافية

هذا المفروض يطبق منذ مبطي وبصرامه ، أنا ذكرت بكلامي فوق إن إدارة الهلال بدئت بتطبيق هذا القرار من خلال إضافة بند بعقود اللاعبين يحق فيه للمدرب بالخصم بنسبة 30٪‏ من قيمة العقد على حسب تقييم مستوى اللاعب الفني ، وهذا الشيء صار بعد نهاية مباراتنا في نصف نهائي دوري الأبطال الآسيوي ضد الأهلي الإماراتي اللي خسرناها 3-2 ، قرار في محله ولو إن وقته متأخر لكن أن يأتي متأخر أفضل من أن لا يأتي، وأهم شيء هو تطبيق القرار بصرامه وعدم التهاون أو المجاملة مع أمنيتي بإرتفاع نسبة الخصم إلى 50٪‏