بسم الله الرحمن الرحيم

في الحياه عادي تغلط مره ومرتين وتتحسن في التالته وبعدين تتعلم من غلطك وتعدلو
يعني الغلط مو وعيب ومافي انسان في هادي الحياه معصوم من الغلط ابد؟!!

ودونيس غلط بس المشكله مو في الغلط الي غلطو المشكله انو هوا مقتنع في غلطو ومهو شايفو غلط أصلا؟!!
ما أقلل من أمكانياتو ابدا وأغلب المحللين مدحو في الشغل الي عملو دونيس وواضه بصمتو بصراحه على الفريق
وإن خسر هادا ما يعني انو مهو كويس أكبر الفرق في العالم بتخسر عادي

جمهور الهلال العاشق بأكملو من حقو انو ينتقد المدرب
بس الأنتقاد ما يعني (التقليل من الأمكانيات)ابدا

من وجهت نظري انو الخطه الي هيا 5-4-1 مافيها مشكله ابدا مع الهلال وأشوفها كويسه
وان كانت نفس الخطه في كل مباراه هادا مهو مبرر للخساره ابدا

أول غلط من دونيس هوا إشراك لعيبه مهم في خانتهم؟!

وبعدين يلام الاعب ليش ما أدى كويس في المباراه؟!!!
اقرب مثال سعود كريري ملعبو في خانه مهي في خانتو ورغم هادا مأدي الي عليه وأذا غلط صراحه ما ينلام؟!!
يعني في قلب الدفاع عندك جحفلي كان جاهز في مباراه الأهلي ولعب كريري؟!!
وغير كدا عبد الله الحافظ مستني فرصه عشين يثبت وجودو بيها
وأشوف مباراه هجر أكبر فرصه لو لعب الحافظ كقلب دفاع بدل كريري؟!!!
لكن دونيس لم يستغل (ضعف المنافس)مع كامل أحترامي لنادي هجر وأعطى فرصه للحافظ في قلب الدفاع
وبعدين إذا أتورط لا سمح الله وأتصابو المدافعين يحط الاعب في الأمر الواقع وإذا غلط يبعدو بقرار أنضباطي؟!!
زي ماسار في أحمد شراحيلي وعبد الله السديري؟!!!

ثاني مثال سلمان الفرج لمن تلعبو محور لحالو وفي خانه أشوفها تقتل خطورتو الهجوميه ؟!!
يعني كلنا نعرف مستوى سلمان لمن يلعب وسط متقدم (محور هجومي) أو على الأطراف يبدع
ويعطيك لمسات حلوه ويوزع الكور بطريقه ممتازه ماشاء الله
وطبعا ما يشفعلو نزول مستواه فجأه وتلاعبو في الكوره بالطريقه تخلي الكوره تنقطع منو؟!!!

وثاني غلط هوا ابقاء الاعبين المتخاذلين في آداءهم وإلي للأسف نازل مستوياتهم في التشكيله الأساسيه؟!!

مع العلم أنو في لعيبه جاهزين بس يستنو فرصه من المدرب عشين يعطو كل الي عندهم
يعني مو معقوله دونيس مهو شايف العيبه الي في الملعب يراوغو كتير في الكوره ويخسروها؟!!
ولا شايف اللعيبه الي تنقطع منهم الكوره من الفلسفه الزايده؟!!
ولا اللعيبه الي يقتلو الهجمه ببرودهم وأستعراضهم؟!!!

هادولا اللعيبه الي زي كدا مع أحترامي لهم جميعا مكانهم (الدكه)الين ينعدلو
لانو في لعيبه غيرهم محتاجين لفرصه زي ما هما أخدو فرصه
عشين اللعيبه المستهترين لا يفكرو أنو هما (ضامنين)خانتهم ابدا

يعني بكل أختصار تلعب عدل الله يحييك ما تلعب عدل مكانك الدكه الين تعتدل


وثالث غلط هوا عدم أعطاء فرص للاعبين الي في الأحتياط أو الأولمبي ومع العلم أنهم عندهم أمكانيات تخليهم يلعبو أساسي؟!!

يعني أذا سالم الدوسري وعزوز ونواف ما أعطو المستوى المطلوب
دونيس لازم يطلع عبد الكريم القحطاني والعمار والسواط الي جالسين يقدمو مستويات ملفته في الأولمبي
وأشوف انهم يستاهلو الفرصه زي ماأخدوها هما؟!!



نقاط سريعه


*جمهور الهلال الهلال العاشق من حقو أنو ينتقد بس في أسلوب للأنتقاد؟!!
*يجب الجلوس مع دونيس (إداريا) ومناقشته بوضع الفريق قبل فوات الاوان؟!!
*الإنتقاد والمعاتبه لدونيس لا تعني هدم ما تم بنائه أبدا لأنه لا يجب معالجه الخطأ بخطأ مثله؟!!
*يجب التدوير وخاصه في المباريات التي يكون فيها الخصم لا يجاري مستوى الهلال ليكون الاعب قد إعتاد على أجواء المباريات ويكون هناك البديل الجاهز عند أصابه اي لاعب لا سمح الله
*كثره المراوغه والأستعراض بدون فائده في الكوره لايفيد إيجابيا فهو لم يمنح الفوز والثلاثه نقاط فقط يمنحك التصفيق وضياع الكره في بعض الأحيان؟!!
*يوجد في لاعبين الهلال موهب كثيره لكن للأسف بعضهم لا يستغلو مهاراتهم في المرور والتمرير وصناعه هدف محقق يفيد مصلحه الفريق ؟!!



وفي النهايه لكل شخص وجهه نظؤ ومهما إختلفت وجهات النظر يبقى المعشوق واحد وهوا الهلال
وكلنا تهمنا مصلحه الهلال فوق كل شي


اللهم صل وسلم على نبينا محمد وعلى آله وصحبه أجمعين