المصدر : صحيفة سبق الالكترونية
نشر رئيس نادي الهلال السابق الأمير عبدالرحمن بن مساعد، اليوم، قصــيدة شعرية، تحدث فيها عن مسيرة رئاسته لنادي الهلال خلال السنوات السبع الماضية والتي انتهت باستقالته قبل أيام

سبْعَة أعوام مرَّت وكل وافي خجول

وكل مغرض وجاحد سافر الابتذال

سبعة أعوام تاهت بين رفض وقبول

ولأني اللي مْقَصِّر ولا بلَغْت الكمال

سبعة أعوام فاتت في صعود ونزول

وهذا حال الخلايق وكلنا للزوال

سبعة أعوام راحت بالعمر للذبول

وانْجلَت لي حقايق وانجلى بي خيال

سبعة أعوام هزَّت كل ثابت أصول

وما سواها السَّفاله راسخة كالجبال

يعلم الله عطيته كل ما كنت انول

صحّتي ؛ صفو وقتي؛ جهد مضني ومال

ويعلم الله بأني ما سمعت لعذول

مرتكي دوم لجله للحمول الثّقال

معضلات ومصاعب هم عاتي مهول

وانتصارَهْ ثواني وانكسارَهْ لَيال

طبع هالقوم يدعو للقرف والذهول

سهل في اعوجاجه صعب في الاعتدال

من مدَح فعْلك أمسى قارعٍ للطبول

ومن مشى بْذمّك أضحى حر صادق مقال

في وسَط يزْدهر به مرتزَق مع جهول

وكل تافه وفاضي ما لقى له مجال

وكاتبٍ يحْسِب انّه حاز كل الحلول

للمشاكل من ادم لين يوم المآل

كل شيٍّ يعَرْفَهْ (مدري) ما هو يقول

(قوقلّي) المدارك جاهز بْكل حال

وساقط بْدَرْس الإمْلا بْكل شاشه يجول

يستفيض وينظِّر عالم ابن الحلال

وناقدٍ تاه ليله بين فسق وكحول

كل أسبوع يكتب عن كريم الخصال

ولاعبٍ صار نجْمه في سقوط وأفول

لا هو الّي توارى أو لقى اعتزال

ما سلم كود ثلة فاضلة من وحول

ساحةٍ للبذاءة دامت أوضح مثال

ثُلّةٍ مستقيمة باختلاف الميول

مايله في خطاها عن دروب الخمال

كل وقتٍ بتلقى به كرام الفعول

والهدى غصب يبقى مهما عم الضلال

يا فخور بعيوبي وش تبيني أقول

غير إن المراجل نادرة في الرجال

وانّ سقْط الأراذل خاويين العقول

أكثريّة زمنّا دون أدنى جدال

وانّ الإنصاف يبطي وابن آدم عجول

قالها في كتابه القوي ذو الجلال

عن سوانا ابتعدنا وما قربنا لوصول

سايرين وعلى الله وحده الاتّكال

وكل إنجاز باقي رغم إنّه يزول

وكل إخفاق زايل لو نُسي ما يزال

يامكرر سؤالك حرص مدري فضول

ماني لاقي إجابه ولا هضمْت السّؤال

وش مكاسب كتوفك يا ثقيل الحمول
وش خساير ظروفك من رأسْت الهلال؟