الى احمـــد بن سلطـــان مع التحـــيه - نادي الهلال السعودي - شبكة الزعيم

كويتي هــلالي · #1 20/02/2014, 09:51 PM

السلام عليكم ورحمة الله وبركاته

صبــاحكم ومســائكم كـــادي

العين يم النجوم تخيل وهاجه
فز الضمير وجاوب الشعر لا هاج

سلام يا سامي الجابر ومنهاجه
جاتك على طايرات الجو ميراج

اما سمعها ويتهيض مزاجه
والا عوافي حطها بين الادراج

ارسلتها للي يشعشع سراجه
في ذمتي من الكرم لابسً تاج

ياشبه غيثً لا نوى القاع داجه
خلى على ريضانها خير وامواج

انته دوى المرضان وانته علاجه
وانا المريض اللي يدور له علاج

هذاك ماهو من يحسب خراجه
وليا عطا فكك محابيل واسياج

احمد ولد سلطان لبى حجاجه
عسى حياته كلها خير وانتاج

ياخاطري بالحال قله وناجه
ابوه قدمه قد تعدى لاهداج

مرحوم يا من راحته وابتهاجه
يشوف شعبه منبسط مابه ازعاج

يا سيدي سلطان بكره انتواجه
وشهادتي عند الولي خير وهاج

القلب من قرقاه زايد خلاجه
كانه على بيض الورق سبب احراج

يالله يالرحمن عبدك بحاجه
رحمتك يامنجي ذرى كل محتاج

اختامها بيتً عجبني اخراجه
يوفيك في التصوير مع شرح الاخراج

والله ما يذبحك ياكود حاجه
لا صار في وجهك حيا وانت محتاج

وسلامتكم

الكاتب\ الســـامي

تويتر \ @x3inx

خلف نت · #2 20/02/2014, 10:41 PM

رجل والنعم فيه عضو شرف فعال وقوي وتسلم لنا ذخرا وفخرا يا سمو الامير

عذب السجايا · #3 20/02/2014, 11:39 PM

صح لسانك ويستاهل ،،،،،،ً،،،،،،
والبيت الأخير علاجه
ارفع يديك لمن أعطاه وأعطى غيره

wAiLi · #4 20/02/2014, 11:54 PM

صح لسانكك ي الغالي
ويستاهل احممد بن سلطان كل خير

شعر الهلال النابض · #5 21/02/2014, 12:05 AM

الله يرحم من تعدى هداج سلطان بن عبدالعزيز عسى قبره نور وسرور

ويستاهل ابو سلطان وإن شاء الله انه كفو ويقضي حاجتك

الله يفرج لكل مسلم

طـويـق · #6 21/02/2014, 12:23 AM

صح لسانك والله يسهل امرك ويسد حاجتك

نتمنى توصيلها لا احمد لمن له علاقه فيه .. هلالي ونتمى قضاء حاجته من هلالي

سهل الله امرك

شعر الهلال النابض · #7 21/02/2014, 12:34 AM

شخص ما من محبي سلطان بن عبد العزيز ليس له معرف هنا قرأ قصيدتك وتهيض وأرسل لي هالمجاراة لها

يقول :
هيضني كويتي بلجة خلاجه
وانا ضلوعي دومها تخلج اخلاج

ذكرني اللي ما يعقد احجاجه
بسمته لو داس الخطر نور وهاج

تعطي يمينه والشفاء في علاجه
من بعد ربه صاير طب وعلاج

يمدح ابو خالد ويذكر خراجه
عساه في عال الفراديس دواج

نذكره حب وفاقدين ( ن ) سراجه
وسحابة داوت شعبها بثجاج

نعن له عنة مدور مزاجه
ويرد لا شارب ولا هوب منعاج

أقولها مالي بها ايات حاجة
وعسى طريقك با ابن الاجواد ينباج

طـويـق · #8 21/02/2014, 04:20 AM

رد وافي والاهم منها تفاعله مما يخدم اخونا الهلالي الكويتي

واحمد الحقيقه جزل وكريم

المهند5 · #9 21/02/2014, 04:35 AM

اجل لو السعودييين شعراء قسم ماتكفيهم معلقات

ومن ناحية احمد بن سلطان ماراح يقصر ابو عتب

هلالي راقي 511 · #10 21/02/2014, 04:10 PM

صح لسانك

وان شاءلله تقضي حاجتك على ما تتمنى

عبدالعزيز العمودي · #11 21/02/2014, 04:13 PM

صح لسانك يامبدع

الامير احمد بن سلطان يستحق هذا واكثر من الجمهور الهلال

شكرا لك

بالتوفيق للهلال

كويتي هــلالي · #12 04/03/2014, 09:39 PM

السلام عليكم أِشكر أخواني اللي ردو على الموضوع ولكن أتمنى من أعضاء وأدارة المنتدى أيصال هذه القصيده لسمو الملكي للأمير أحمد بن سلطان بن عبدالعزيز ,,,,,

مع كامل الحب والتقدير للنادي الهلال السعودي ,,,,,,.؟

الزعيم الملكي99 · #13 04/03/2014, 10:41 PM

صح لسانك قصيده جميله
و احمد بن سلطان يستاهل اكثر

خلف نت · #14 04/03/2014, 11:44 PM

الله يعطيكم العافية عالنقل و المُتآبعة

الــنــبــراس · #15 04/03/2014, 11:56 PM

عسى الله يسد حاجتك ويقضي أمرك عند ملك الملوك آمين

الأمير أحمد بن سلطان كفو وانت تستآهل كل خير