# من قلب الدرة ,, السبب الرئيسي لأن تكون جماهير الوسطى متفرجة فقط + تحليلات فنيــة
الســلام عليكم ورحمة الله وبركاته ,,
كيف الحال جميــعا ؟؟
أبآرك لكم في البداية الإنتصار الثمين والمهم جدا في لقاء قبل البارحة ضد فريق العروبة ,,
فوز كما قلت هو مهم جدا والسبب لأنها البداية وأولى المباريات الرسمية فالفوز في مثل هالمباريات يعطي ثقة للآعبين في أنفسهم وفي أنهم لآعبين مميزين ويستطيعون أن يقدمو الكثير ,,
الشئ الثآني دائمآ وأبدآ ماتكون مشكلة الهلال في الأندية التي تلعب بطريقة دفاع منطقة وشاهدنا هذا الشئ كثيرا في مباريات الهلال بالذات في الآسيوية ضد الأندية الخليجية بشكل عام مع الفوارق االكبيرة في الإمكانيات في مثالي لكن تبقى الطريقة واحدة والهلال بفوزه ضد فريق العروبة يدل على أن هذا الأسلوب المتبع من قبل هذه الأندية بالإمكان إيقافه وبإمكان الهلال أن يسجل وبالتالي كأن حآئط الصد المعمول قد تم هدمه وبدأ الإنتشار الهلالي في جسد روح الخصم ثم فتكه والإنقضاض عليه ,,
محدثكم كان من الـ 9412 مشجع الذين حضرو كرنفال الهلال في أولى الجولات في الدرة ,,
وسأتكلم في البدآية عن الأسلوب الفني والتكتيكي اللي اتبعه الهلال بعد ذلك سأعلق على بعض التعليقات اللي قرأتها بعد المباراة على بعض اللاعبين ,,
البعض كان يقول بأن الهلال كان سيئ في الشوط الأول وفي الواقع ماشفت الهلال سيئ جدآ في ذلك الشوط ,,
كل مارأيته هو تكتل دفاعي لـ 9 لاعبين من فريق العروبة في منطقتهم وإستحواذ هلالي كامل على مجريات اللعب لكن للأسف كان بدون فائدة لأن لآعبي فريق العروبة كانو في قمة لياقتهم البدنية لذلك مع مثل هذي الطريقة تحتاج إلى الصبر والإستمرار بالهجوم وبطرق مختلفة والإبتعاد عن الدخول من العمق لأنه صعب جدا ,,
تماما هذا مافعله الهلال بالشوط الثاني عرضيات كثيرة + تسديدات من خارج المنطقة + لعب عالأطراف مما أرهق فريق العروبة كثيرآ حتى استسلمو وانتصر الأحق بالفوز ,,
بكل أمانة أشوف أن مثل هذه المباريات هي أصعب من مباريات الفرق القوية فبمثل هذه الطريقة أنتصر تشيلسي على برشلونة في دوري الأبطال 2012 وتأهل للنهآئي ,,
بالنسبة للاعبين استغربت بعد دخولي للمنتدى من إنتقادات لبعض اللاعبين وأخص بالذكر لاعبنا نواف العابد في الشوط الأول خصيصا على حسب مايقوله أخوي الناقد ,,
في المقابل ماكنا نشاهده في الملعب أنه أنشط لاعب كان في الشوط الأول هو نواف العابد هو أكثر من استلم الكرة هو أكثر من مرر والأجمل من ذلك كله اللاعب يقوم بمهام دفاعية أيضا فنشاهده دائما مايرجع للخلف في حالة الهجمة المرتدة لفريق العروبة ووضح هذا الشئ جليا في شوط المباراة الثاني لما كان العروبة في هجمة مرتدة كان بالإمكان أن تكون شبه إنفرادية لكن نواف رجع وقطع الكرة في لقطة جميلة جدآ من اللاعب ,,
اللآعب الثاني هو سيقاندو كاستيلو حصل على قدر كبير من الإنتقاد اللاعب لسى في أول المباريات وهذه حتى أول مباراة له في الأستاد ملعب كبير والجمهور يوضح للاعبين أنهم كثير خصوصا أن الواجهة كانت ممتلئة فأكيد مع هذه الأجواء الجديدة عليه سيحتاج وقت للتأقلم ,, فبالتالي اللاعب لديه الكثير ليقدمه فقط يحتاج مننا الصبر ,,
ثالث اللاعبين وهذي المرة أنا من سأنتقد هو اللاعب سالم الدوسري أعتقد بأنه كان الأقل عطاءً في الملعب كان مشتت نوعا ما يغلب على لعبة الفردية وأيضا يسرح كثير في المباراة ,, وفيه لقطة ماأدري إذا ظهرت عندكم في التلفزيون كانت الكرة مع اللاعب ياسر الشهراني في الجهة اليمنى وكان أمامه سالم لكن الغريب بأن سالم كان يمشي ومعطي ظهره لياسر إلى أن وصل لخط التماس وياسر نشوفه يطالع في سالم يبغى يمرر بس سالم مو معه في الأخير استفاق وطالع للخلف وتحرك ,, في هذه اللحظة علمت بأن سالم ماكان في الفورما أبدا عليه مراجعة نفسه لأنه من اللاعبين المهمين جدا في الفريق وفي وسط الملعب ,,
رابع اللاعبين وسأختم حديثي عن اللاعبين فيه هو اللاعب الكوري تشو سونغ هوان بكل أمانة في كل مباراة يزيد إعجابي في هاللاعب أكثر من المباراة اللي قبلها واضحة عليه ثقته في نفسه ,, هدوئه ,, تمركزه الصحيح ,, وأيضا يعرف متى ينقض على المهاجم اللي أمامه ويقطع الكرة ,, ربما يكون عيبه الوحيد وإلى الآن ماأدري هل هو عيب أو لآ ولم نجرب إلى الآن لكن أعتقد بأنه بطئ نوعا ما لأني ماأشوفه يركض كثير أو لم تأتي الفرصة لأن يركض ويواجه لآعب سريع لذلك نحتاج إلى أن نصبر ونشوف ,, لكن أعتقد بأن وجود الكوري يعطي ثقة كبيرة في اللاعب اللي جنبه وشفنا مستوى المرشدي في المباراة كيف كان ممتاز ,, أيضا اللاعب شخصيته قيادية والله ياجماعة واحنا في المدرج وفوق شوي يعني مو قريب من الملعب أنه كان في رمية تماس لفريق العروبة سمعته يصارخ على لاعبي الوسط يضغطو على اللاعب اللي بتتمرر له الكرة طبعا أقسم بالله ماأدري إيش قال لكن واضحة جديته وحماسه ماشاء الله عليه ,,
وأختم مدحي في هاللاعب لأني أعتقد أني مدحته لموسم كامل قدام ,,
أنه الهدف الأول لناصر الشمراني كانت البداية من اللاعب الكوري من كرة طويلة وصلت لنواف العابد ,,
وهذا شئ افتقدناه كثيرا في المواسم الماضية فدائمآ ماتكون الكرات الطويلة من الدفاع غير مركزة وبعضها يرجع لهجمات علينا
الشق الثاني من الموضوع هو عن جماهير الوسطى والكلام الكبير اللي يصير عليهم ,,
وأنآ وآحد من هذه الجماهير وبكل أمانة أخذت بخاطري من بعض الجماهير لإنتقادهم لنا بل وصلت الإنتقادات إلى أن البعض بدأو يشككو في هلاليتنا !!
طبعا في البداية نعم فيه تقصير مننا وأعترف بهذا الشئ وبالذات في الحضور ,,
لكن المشكلة لآتكمن في الجمهور بل في الملعب ,,
ملعب أستاد الملك فهد كبير جدآ مقآرنة بملآعب المملكة الأخرى ,,
بالتالي لو مهما كان الرقم كبير مارح يبين هالشئ ,,
فلو افترضنا أن مباراة البارحة كانت في الملز أكيد أن المنظر بيكون غييير وبالتالي يمكن مانسمع أصوات منتقدة وقيسو على ذلك بقية ملاعب المملكة ,,
مع أن عندي تحفظ حتى على الرقم المطروح فأنا قرأت في أحد المواقع أن سعة واجهة ملعب أستاد الملك فهد تسع لأكثر من 20 ألف مشجع وفي مباراة الهلال الواجهة تقريبا كانت شبه ممتلئة ولو افترضنا فيه بين السطور كراسي فاضية ماأعتقد الرقم بينزل عن الـ 15 ألف في الواجهة فقط !!
لكن ماعلينا ليس هذا موضوعنا ,,
الأهم من ذلك كله ولب موضوعي هو عن قول البعض " بأن جماهير الوسطى متفرجة فقط وليست مؤثرة في الملعب "
السبب يآجماعة هو أن المكان اللي يكون فيه أكبر عدد من الجماهير ( الواجهة ) للأسف لآتوجد فيه الرابطة أو على الأقل شخص ينظم الجماهير في تشجيعهآ ,,
لأن مو معقولة أنكم تبغون كل جماهير الواجهة تشجع من نفسها أكيد بيكون فيه شوشرة ولخبطة ومافيه تنظيم ,,
هذي صورة لمكاني في الأستاد ومكان الرآبطة ,,
ياجماعة بيننا أكثر من 70 متر عرض الملعب كامل ووالله طول المباراة مانسمع منهم ولاشئ يادوب نسمع تصفيق خفيف وكلمة ياهلال تتكرر لكن مو وآضح جدا ,,
طبعا للأمانة وإحقاقا للحق الرابطة كانت شغالة طول المباراة نشوف تصفيق ونشوفهم واقفين لكن للأسف مايوصلنا شئ ,,
أعتقد لو كانت الرابطة موجودة في الواجهة رح تتغير نظرتكم لجمهور الرياض ,,
لأني بكل أمانة شاهدت جمهور متحمس جدا جدا لحظة دخول سامي الجابر بالذات شهدت هتاف بأسمه لمدة طويلة من جمهور الواجهة جميعهم ,, أيضآ تياقو الجمهور ماقصرو معه مرات نصفق مع بعض بس تخرب بسرعة ,,
ولو رجعتو لأفضل لقطة للجمهور الهلالي اللي موجودة في اليوتيوب لوجدتو الأغلب تكون في مبآريآت دوري أبطآل آسيآ بسبب وجود الرآبطة في منطقة الواجهة وبالتالي تضمن أكثر من 10 آلاف مشجع رح يهتفون معك ,,
أتمنى ماتظلمون جمهور الرياض ولآتشككون في هلاليتهم جميعنا نحب الهلال وماأتينا وقطعنا المسافات إلآ من أجل الهلال وحبنآ للهلال مع أني أنآ بيتي قريب من الملعب لكن أكيد فيه جماهير كثيرة قاطعة مسافات طويلة ,,
أعتذر عن الإطالة لكني فرحان جدا بفريقي ومستواه وأتمنى إن شاء الله دائمآ الأفضل وبإنتظار الزعيم في موقعة الجمعة ,,
قوآك الله يالذيب على الموضوع المميز المتعدد الجوانب
والله أني مسستآآآء كثير من جمهور الرياض مو بس انا الا كل هلالي وافي ومخلص اكيد مو راضي على جمهور كذا نآآيم مافيه تفاعل جمهور قهاوي بالعربي , ماعنده الا في القهاوي ويمزز من هالمعسلات وغيره ,
ياخي قهررررر وقسم بالله , جمهور الرياض يجيب الضغط ،، مو مثل جمهور الغربيه و الشرقية يالبى قلوبهم ،
جماهير صحححح تتفاعل مع فريقها على الحلوه والمره , مو جمهور الرياض حتى لو فريقها فايز ماتشوف تفاعل صحح على اصول ,ياخي خلونا واااقعيين اشوي مو نقص على أنفسنا , اول مباراه حق سامي مع الهلال رسميه مانشوف تفاعل يبيض الوجه يااااخي لييش كذا , وقسم بالله السبب مو الرابطةة رابطتنا كويسة بقيآدةة الأبطال ( البطاطي و العفيفي ) ، يد وحده تراا ياجماعة ماتصفق , يعني الرابطة تشق حلجها ولا الجمهور نايم ولا جالس يفص فص ترااا الرابطة تتحطم كذا , وتعالوا اشوي ترا السعودية الرياضية الخشبية توخر صوت الجمهور يعني بس صوت المعلق مو مثل القنوات العدله الي تبيض الوجه ، الكلام عن الجمهور الهلالي بالرياض مايخلص
. الأخوان اللي يتكلمون عن جمهور الغربية وطربهم فأنا لا اختلف معك فهو موروث اجتماعي يختلف عن طبيعة الشاب من المنطقة الوسطى الذي لا يحبذ التشجيع الطربي,, ((ولكن)) النقطة الرئيسية هي في تصميم الملاعب, نعم تصميم الملاعب,, فلو تلاحظ تصميم ملعبي جدة وملعب الشرائع تلاحظ أن بجانب المقصورة مدرجات كبيرة وكراسي عديدة مما يسمح للرابطة ان يكون معها عدد كبير من الجمهور وبذلك ينعكس على كل الملعب, عكس ملعب الملز والاستاد والملز على وجه الخصوص تشاهد ان المدرجات المخصصة بجانب المقصورة قليلة جدا وبعيدة عن رؤية الملعب فلذلك اغلب الجمهور يتوجهون للواجهة لأنهم يبحثون عن الرؤية الواضحة فيصبح العدد اللي حول الرابطة عدد قليل مما يؤثر على التشجيع..... ولا ننسى أن قرار وضع روابط الفرق بجانب المنصات هو من الاتحاد السعودي لكرة القدم. .
أنا من الجنوب وحضرت كم مباراه في الرياض ياخي تحطمت وجلست مثلهم ع الصامت لأني ما لقيت أي تفاعل من الجماهير على الأقل اللي قريب مني .. ولا واحد ع الأقل !!
اتمنى من الجماهير تكون حماسيه وكل واحد يشجع الثاني ويحمسه مهو يناظره بنظرات كأنه مسوي جريمه !!
بصراحه انا اتفق معك بأن الرابطه بعيده عن جمهور الواجهه وانا حضرت مباريات كثيره للهلال في الدره
ما اسمع صوت الرابطه لبعد المسافه وكبر الملعب , بعكس ملعب جده او ملعب الشرقيه او ملعب مكه
بالتوفيق للهلال في المباراه القادمه وهمتكم ياجمهور الشرقيه ورونا حضوركم
موضوع جميل جدا ، والاجمل انه خفف من احتقاني على جمهور الرياض لكن اخي الكريم نقطه اخرى اتمنى من المشجع الهلالي اللي يحضر في الملعب الالتفات لها وهي الحضور بـ تي شيرت ازرق او تي شيرت الهلال لـ يضفي جماليه على المدرج ياخي والله نفسي يوم اشوف المدرج كله ازرق ، الثوب والشماغ لها مكانها اما الملعب فالافضل انك تلبس طقم رياضي بما انه مكان ريــاضه ..
البشر يختلفون من منطقه لاخرى وكل له طبيعته فيه ناس يحبون الطرب وفيه ناس مايحبون الازعاج ويمكن البعض صحته ماتسمح له بس يجي حب في الزعيم لذلك لابد من مراعاة ضروف الآخرين وذلك بتقسيم المدرجات وذلك بوضع لافتات في البدايه لتوجيه الجمهور توضح مكان الجمهور المشارك في التشجيع والجمهورالمشاهد الهادي اللي يبي يناظر بس ومع الوقت خلاص بيعرف الجمهور الاماكن بدون لافتات وبكذا حتي بيسهل على الرابطه تجميع الجمهور المشارك وبتنظمه والاتفاق على الاهازيج الهلاليه الاصيله وترديدها سواسيه باسلوب منظم
12Likes 
لكن واضحة جديته وحماسه ماشاء الله عليه ,,
لكن أكيد فيه جماهير كثيرة قاطعة مسافات طويلة ,,
والجمهورالمشاهد الهادي 
الوضع العادي
