بسم الله الرحمن الرحيم
طبعاً كلكم تعرفون الأخ سفر المرزوقي..اليوم كان معاي على المسنجر وصار لي معاه موقف تحبه قلوبكم..نخش في الموقف من دون مقدمات

الساعه 7 الصباح والا القى على المسنجر الأخ سفر (أون لاين)هو والأخ الفكر والأولاني قلت نصبح عليهم ونشوف أخبارهم
هلا بالغالي سفر يسعد لي هالصباح الجميل(مسوي ذوق أحمق من ذوق)
الأخ سفر يقول :هلا والله محمد يسعد لي صباحك..
أرد عليه وش تسوي شكلك تقراء في هالمواضيع ومشغول معها..
قال لا والله أنزل أغاني عراقية ..قعد يضحك شوي والله أني أحب الأغاني العراقيه ..
قلت أجل معجب بكاظم
قال لي أسمع هالأغنية اللي بتعجبك ..
قلت هات وليتني ماقلت الأخوان الفكر و الأولاني ما قدرت الحق أرد عليهم ..الله يشغلك ياسفر..عطنى وش عندك..والله ويعطيني العنوان ..عاد أنا ضغطت دبل كلك عليه أشتغل الريل بلير بس ما فيه صوت وش السالفة يامحمد و أطالع أثر السماعه مو موصله بالكهرباء..و أقوم أشغل السماعه .. و أنا أشغل السماعه أثرها كانت مشتغله و الله و أشبكها شوي الفرقعه والشرار من الفيش .. الا الكمبيوتر طافي و لا أخذت علوم الفكر و الأولاني ..أثره أحترق منظم الكهرباء حق الجهاز قعدت شوي وش فيه الجهاز ياولد مو راضي يشتغل عرفت أنه أمس واليوم كله نحس ..
أيه صح ما قلتكم وش صار لي أمس جيت أنام الساعه 11.30 الظهر و الا أخوي الصغير يصحيني محمد قم محمد قم سيارتك أنصدمت ..وش السالفه كيف ما صدقته لأن مدخل سيارتي داخل البيت كيف أنصدمت من المهبول اللي كسر الجدار الى أن وصل سيارتي ..أثر السيد طلع في السياره وصدم و لا وده يقول لي

بس تعرفون ليش أنحست في هاليومين كله عشان هاليومين كل يوم أتصبح بوجه النحس /سفر فأنصحكم ياشباب اللي يشوف سفر في الصباح ينحاش و الا بتجيه مصيبه ربه يعلم بها (أسألوا مجرب)أنا حذرتكم و أنتم والله كيفكم سفر لاتقابلني على المسنجر الا من بعد ما أتصبح بواحد غيرك

طبعاً أخوي سفر وش رايك أنت ليه منحوس والا أنا المنحوس

ههههههههههه
تصدق اليوم الصبح كل ماأحاول أدخل على سفر بالماسنجر
البرنامج يرفض يستقبل وألحين أكتشفت أن الحظ قايم
بعدين ياليت تدور لسفر واسطه تطلع له جواز بدل فاقد علشان تفتك من نحسه

وأنا ياغافل لك الله كل مالقيته على الماسينجر اقوله ,,,

صباح الورد والياسمين والفل والنرجس والكادي ,,,

وأثر التصبيح بوجهه مايجيب الا اللي قلته يامحمد
أسمع ياسفر عويذ الله من شرك ,لاعمرك تجيني على الماسينجر الا أذا انا جيتك وذيك الساعه تعرف أني صبحت بوجه واحد غيرك ,,,

لكن الحمدلله ماقد سويتها الى مره واحده ولا ودي اقولكم اللي جاني هذاك اليوم,,,

انا لله وأنا اليه راجعون

تبيني نصيحتي ياسفر ,,,

اعرض نفسك على أحد يقرا عليك لأن حالتك مره صعبه وتسبب مشاكل كثيره للي حولك, واذا ماتعرف ابشر انا أسال لك وأبلغك ,,,

لكن عاد ابي أبلغك على الأيميل ماسينجر مافي يفتح الله ,,,

يجماعة وش المسنجر (( لا يكون ممنوعات هروين والا شي ))
ترى ماعرفكم
ههههههههههههههههههه

لا تصدقون امزح عارفه