|
ماذا لاحظت على اداء الهلال بعد الثعلب زلاتكو ؟!! بسم الله الرحمن الرحيم بعد عدة مبارايات قادها ثعلب الكرة زلاتكو ومع توالي الظروف الحرجة له وللفريق لاحظت الآتي : - ثغرات الدفاع الهلالي تقلصت بشكل واضح والعرضيات ضعفت خطورتها واختراق الدفاع اصبح صعبا بنسبة كبيرة ... وزلاتكو تضايق بشكل كبير من طريقة هدف الريان وهذا امر جعلني اتفائل برؤية الدفاع الهلالي كساتر فولاذي الموسم القادم بحول الله ... - الهجمات الهلالية اصبحت متنوعة وخطيرة جدا جدا فمرة من العمق ومرة من الاطراف ومرة من الكور الطويلة المتقنة ... وقد رأيت عمق الريان يتلاعب به الهلال بشكل مجنون وارجعوا لهدف الشلهوب لتروا عينة من هذه الهجمات ... الكرات الثابتة وهي مهمة جدا ... اصبحت خطيرة واصبح الفريق يستفيد من الركنيات والضربات الحرة المباشرة وغير المباشرة ولكن لم تصل الخطورة الى شكل مرضي .... وهذه الميزة افتقدها الهلال فترة طويلة وها هي تعود بحول الله ... الهلال اصبح اكثر امتاعا ولله الحمد ... ولن اقول للجمهور احضروا المباريات ... لان متعة الهلال سوف تجبرهم على الحضور ... اخيرا ......... انتقدوا زلاتكو ... وحاربوا من يحاربه ... ننتظر ارائكم ... |
فعلا اخوي ماتقوله صحيح جدا وانا معك في رأيك |
أتمنى ألا نكون عاطفيين ،،، أتمنى أن ننتظر حتى نهاية الموسم لكي يتم الحكم عليه بشكل واضح ،،، بعد كأس الملك وكأس آسيا ،،، بالرغم من أن عناصر الفريق لاتساعد المدرب لكي يظهر مالديه بشكل كبير ،،، فبالنسبة للاعبين المحليين الهلال لايملك حاليا سوى نواف العابد وياسر الشهراني وياسر القحطاني والشلهوب مع إنه لايدعم دفاعيا ،،، غيرهم نفخ إعلامي أضر بالهلال |
والله نتمنى نشوف آلزعيم في آفضل حالاته وكما عودنا زلاتكو بدآ اشوي اشوي يطقطق على الفريق صح بس ينقصه كم محلي واجنبي اتوقع والعلم عند الله راح يطور الفريق وراح نشوف المستوى الممتآز من لاعبين بدآ يصحح الاخطآء إلي كآنت واضحه في الزعيم |
صراحة ووجهة نظري قد اكون مخطئ فيها ولكن هذا اللي اراه .. هلال زلاتكو فقط تغير نفسياً عن هلال كومبوارية واصبح اجتهاد لعيبه فقط يعني مافيه تكتيك واضح .. |
يعطيك العااافيه .. معاااك بكل كلمه قلتها صراااحه زلاتكو مدرب ناااجح قااادر على تغير فريق كااامل من بعد متاااهة كومبواريه ... ان شاااء الله يبدع وترجع هيبة الزززعيم ي رب ... |
تحسن اداء الفريق واضح وملحوظ ان شاء الله من افضل الى الافضل |
ما يعجبني في زلاتكو اكثر شيء انه يعرف الاخطاء والمشاكل يعني حتى وهو منتصر يغضب على الالعاب السيئه انا متفائل فيه بنسبه كبيره متى ما اخذ وقت اطول مع الهلال تقدر تقييم عمل زلاتكو ولا ننسا ان فيرجسون مدرب مانشستر يونايتد جلس مده طويله والفريق دائم في المقدمه رغم احيانا وجود مستويات متذبذبه برودوم حق الشباب ابدع العام وهذي السنه انخفض رتم الشباب قليلا جاروليم حق الاهلي نفس الوضع فعلى الجميع كما تقبلتوا ابداع اللاعبين مع زلاتكو تقبلوا هبوط مستوياتهم احيانا وليس دائما وان مو شرط يكون دائما خطا مدرب احيانا هبوط مستويات بعض اللاعبين تؤثر على الفريق بشكل عام وربعنا للاسف ما يحطون حرتهم الا بالمدرب ولكم في فريق الفتح خير مثال فريق مغمور ومدرب مغمور واصلوا ونجحوا انا ما اذكر ان الهلال خرج من بطوله اسيويه مرتين من مدرب واحد وراجعوا وشوفوا |
ياعيني عليك قلت اللي ابيه كله هذا وهو استلم الفريق في وقت متأخر واضيف على اللي قلته حماسه على اثبات الوجود واعجبني بعد هدف الهلال في كأس ولي العهد انه طالب اللاعبين بتهدئة اللعب لكن اللاعبين تحمسوا بزيادة و جاء هدف النصر . عوافي اخوي ولك احلى لايك |
انا من وجه نظري : اتمنى التجديد معه لمدة موسمين مع اعطاءه الصلاحيات بجلب اللاعبين الاجانب والبحث عن لاعبين محلين ... اتوقع ينقل الهلال لاعلى المستويات وخاصة انه صغير في السن ومنسجم مع لاعبي الهلال نفسيا ويحب الصرامة والتطور في العمل وهو مهتم بلاعبي الصغار السن الذين كانو في الاولمبي ...... ان شاء الله يصنع لنا هلال لا يقهر ..... مع مرور الوقت ... وسلامتكم |
جمييل جداًً ولنرى زلآتكووآ في المباريات القويه القادمه مع الاتحاد والاهلي وفي الاسيويه ومن ثم نقيمه لانه لعبنا مع نادي الريان جيد وباذن الله ماينخفض اداء اللاعبين في المباريات القادمه |
بصراحة هلال زلاتكو غير عن هلال كومبواريه , واللي يقول غير كذا غلطان , لأن الهلال في مباراة الريان شفناه اكثر من لمسة يبدع والكرات تترواح بين اقدام اللاعبين من دون انقطاع عكس هلال كومبواريه .. واتمنى الصبر عليه لحد ما نرى عمله كاملاً لأن التقييم الآن لا يجدي نفع . |
اتفق معاك بكل كلمه قلتها لكن بعد يبي له وقت عشان نشوف هلالنا افضل من هلال قريتس دفاعيا وهجوميا وصناعه لعب الله يوفق الهلال وان شاء الله نشوف ثنائي رائع زلاتكو وسامي الله يعطيك العافيه |
هو فعلا ممتاز وثعلب الملاعب السعوديه حاليا ماينقصه الا وجود سامي الجابر مساعدا له |
احسنت فيما قلته وشكرا لهذا الموضوع المنصف للمدرب |
فعلاا زلاتكو غير طريقة اللعب 180 درجة بوقت قياسي جدا ويقول باقي ماشفتوا شيء ان شاء الله ابن مساعد مايغلط ويغيره الموسم القادم لكن طبعا هالفريق مستحيل يجيب اسيا بالنسبة للاعبين وليس المدرب الدفاع والمحور جدا ضعيف والظهير الايمن والله يستر لو راح الشهراني |
تحسن اداء الفريق واضح وملحوظ إن شاء الله من افضل الى الافضل |
فعلا اخوي ماتقوله صحيح جدا وانا معك في رأيك ابصراحه الهلال تغيرللافضل معه احس انه فيه لعب فيه تكتيك بدايه ممتازه منه يكفي انه عطوه فريق بدون مايختار الاعبين الأجانب الي يحتاجه الفريق |
صراحه بقول رآيي بدون عاطفه يعني مع اني احد اللي طالبوا بزلاتكو بعد سوء نتايج والمستويات مع كبواريه .. المدرب كان بالفيصلي مبدع ورائع جدا .. مستويات الاولمبي جيده جدا معاه مع إنه كنا نتمنى الافضل بس يكفي عثرات البدايه في المناطق الخلفيه وبعدها كيف صلح الامور وهالنقطه تعطي تفائل .. ولكن الفريق لسى ما اختبر إختبار قوي مع ان العناصر الحاليه من لاعبين اجانب مو من إختياره ولا على الطريقه اللي يبغاهم مع الفريق لخططه وفوق هذآ كله مستويات اغلب اللعيبه والحاله النفسيه اعتقد كانت سيئه مع كمبواريه وبدت تتحسن بعض الشي حاليا .. ننتظر للمباريات القويه حتى نحكم عليه وانا اشوف اقوى اختبار له خاضه مع العين ولكن وضع الريق وقتها وحالة الطرد تخليني ما احكم عليه ابد من هالمباراة .. ننتظر لمباريات القويه المتبقيه في الدوري وفي بطولة اسيا وكأس الملك إن شاء الله .. ومنها بناخذ فكره على الاقل باللي يقدر سويه بالفريق بهالموسم مع كل الاسباب اللي مرت على الفريق وكلنا نعرفها .. بالتوفيق للملكي ،، |
صحيح ما ذكرت في موضوعك واشكرك على هالموضوع ويعطيك الله العافية |
من خلال متابعتي الدقيقه ل زعيمنا الهلالي , زلاتكو يعمل بشكل جدي ل اعادة الهلال الى وضعه الطبيعي , شفنا توزيع في الهجمات مرة من الاطراف يمين و يسار و مرة من العمق و مرة من العرضيات و مرة من الون تو و مرة من التسديد من خارج المنطقة , كل هالامور افتقدناها مع كمبورايه اللي قتل خطورة الهلال و صار الهلال يلعب ع الاطراف فقط بدون اي خطورة , زلاتكو يحتاج الى عمل كثير و بالاخص في الخطوط الخلفية , لاحظنا كيف الفريق رجعت له اللياقه و رجعت لهم بعض الروح , بعض الاعبين كانوا فاقدين الثقه و يرتكبون الكثير من الاخطاء لكن زلاتكو اعاد لهم الثقه و اعاد لهم مستواهم , الفريق حالياّ في بداياته و يبشر بالخير , إن شاء الله في قادم الايام نشوف مستوى قوي لان لاعبيننا المحليين يملكون قدرات و مستويات قوية ,, بالتوفيق ل زلاتكو في اعادة هيبة الزعيم و مستوياته الخرآفيهه .. وجهة نظر و تحليل سريع لمستوى الهلال مقارنة بين كمبورآيهه و زلآتكوو .. |
والله لا دفاع والا كرات ثابته شفتها تحسنت اكلنا مع زلاتكو اهداف اكثر الشباب والعين اكبر نتيجه بالثلاثه بالنسبه للهجمات الكثيره واللعب الجماعي هذا واضح انها تحسنت اللي يقهرك ان ماعندنا الا لاعب وحيد يجيد الفاولات القريبه والا ينفذها وهو الشلهوب بالتوفيق للزعيم ويارب نتوفق بلاعب يركب الفاولات اهداف امنيه اتمنى من الرئيس يحققها يعطيك العافيه |
زلاتكو عارف الهلال من قبل وقدر يوظف اللاعبين صح ... واهم شي انه ثابت في التشكيلة الزوري ماشاءالله عاد لمستواه المتألق لانه رجع لمركزة الظهير والشهراني صار يلعب يمين وصار عندنا جهتين فعاله والشلهوب المايسترو عاد للتشكيلة الاساسية زلاتكو ممتاز جدا جدا في توظيف اللاعبين وكل لاعب مرتاح في خانته هذا اللي كان ينقص كومبواريه |
كلام جميل لاكن اعتقد اننا نستعجل في الحكم خل ينتهي الدوري ونشوف وش قدم زلاتكو للهلال انا لا انكر ان الاخطاء قلت في الفريق لاكن مابعد رجع الهلال الي نعرفه الله يوفقه يارب |
زلاتكو مدرب طموح و جاد في عمله و الفريق تغير بشكل كبير بعد وجود زلاتكو لو كان مشرف على الفريق من بداية المعسكر و اختار الاعبين الاجانب و المحليين اكيد راح يكون وضع الفريق افضل بكثير من الان بوجود زلاتكو دفاع الهلال اصبح اكثر قوه و هجومه اخطر و اسرع اتمنى ان يأخذ فرصته كامله |
المدرب نجح مع في عمل تكتيك ممتاز لفريق متواضع مثل الفيصلي وهذا يدل على امكانيات المدرب حاليا أشوف تحسن نسبي بالفريق وبالتأكيد الوقت الي جاء فيه صعب جدا والأجانب الحاليين مايساعدون أي مدرب لكني اثق في زلاتكو وإن شاءالله ينجح في مهمته الحالية ويستمر معنا لسنوات قادمة |
لازم نفرق بين نوعين من المدربين : الاول مدرب تكتيكي يهتم بتكتيك كل مباراة على حدا... ويصنع تكتيكه على حسب الخصم الي يلعب ضده وهذا هو زلاتكو ..... الايجابي بهل مدرب : الخصم صعب يتوقع اسلوبك في بناء الهجمه وتحرك اللاعبين والسلبي ان اللاعب عندنا ماعنده فكر عالي يخدم المدرب ولا البنيه الجسمانيه الي تخليه متعدد المهام في المباراة الوحده .... بالتالي تلقا المدرب يغير لاعب مركز بنفس المركز مع تغير المهام .... الثاني مدرب تكتيكه ثابت بشكل كبير وتغيره بسيط عليه .... لكن يعتمد على توجيه اللاعبين بشكل كبير قبل المباراة وتحرك الاعبين بال (مليمتر) ... الايجابي بهل مدرب ان الاعبين حافظين تحركات بعضهم ويلعبون من لمسه والسلبي ان الخصم يتوقع اسلوب لعبك قبل المباراة ..... هذا النوع من المدربين هو الي غالبا ينجح مع الهلال مثل كوزمن وقيرتس مدربين تكتيكهم ثابت نسبيا بجميع المبارايات لكن يهتمون بتوجيه الاعبين (فرد فرد في التدريبات واثناء المباراة) لدرجت ان قيرتس اول ماجا كان يعامل اللاعبين كانهم ماعمرهم لعبوا كوره ويعلمهم كيف تمرر وتستلم بسرعه ومن لمسه... بالتالي تلقا اللاعب مركز .... وتلاحظ لاسجل يروح يحتفل مع المدرب لانه نفذ الي قاله حرفيا .... الدليل على التوجيهات الفرديه (مثال) اللاعب محمد القرني لاعب صغير بالسن ويحتاج للكثير من التوجيه ايام قيرتس كان يعتبر صخره للمسانده الدفاعيه والكل يتوقعله مستقبل خرافي .... الان مع زلاتكو اللاعب ضايع مركزه ويطلع من تركيزه اثناء المباراة كثيرا ....لانه مايوجه بشكل المطلوب... وجهت نظري .... |
زلاتكو واثقه في امكانيته لكن تلعناصر هلاليه هذي سنه لاتبشر باالخير ؟؟؟؟؟؟!!!! اتمنى التخلص من جميع الاجانب واثبقاء ع اوزيا وتعاقد مع الحافظ واعاره حارثي و الخيرات ومخالصه مع الغنام والنامي. .. والتعاقد مع محور اسيوي مع صانع اوربي ومهاجم اوروبي وشراء عقد الشهراني وعاره مسعد سنه اخرى والبقاء ع زلرتكو امر مطلوب. .. |
جزاك الله خيرا وكلامك صحيح 100٪ |
خط الوسط فقط هو اللي تغير وغير شكل الفريق .. الدفاع لازال شوارع والهجوم لازال فيه عقم .! |
| الوقت المعتمد في المنتدى بتوقيت جرينتش +3.
الوقت الان » 04:41 PM. |
Powered by: vBulletin Version 3.8.7
Copyright ©2000 - 2024, Jelsoft Enterprises Ltd