السلام عليكم ...

اللي ماشاف الجزء الأول يرعص هنـــــــــــــا

وين وصلنا ...

اييييييه ...عند الناس المدرعمين ...

اقولكم يوم التفت وشفت شيء غريبن عجيب .

شفت فيلين معهم نقالة ولابسين ارواب بيض مكتوب عليهن
الصحة النفسية

ويركضون وكل واحد متلطم بخرطومة من الحماس .

مروا من عندي يمشون مليون قلت ياولد الحقهم ..

يوم لحقتهم اثرهم رايحين للعالم اللي متجمهرة .

مير اشوف الضباع والنمور والذيابه والثعالب والقرود والحيايا
والعقارب والتماسيح وكل الحيوانات متجمهرة على حوش كبييييييير .

جيت وقربت ابشوف وش فيه .!!!
قريت اللوحة اللي على الحوش لقيت مكتوب عليها
الاسد ملك الغابة ...

قلت : أفاااااا ...المسأله فيها أن .

السالفة فيها ملك الغابة ..مع ان مافيه غابة .

تلقفت وسألت اللي بجنبي
وقلت له : لو سمحت وش السالفة ؟؟

رد علي : أنا مافيه مألوم هزا يمكن واهد نفر أسد كبير ملك تأبان .

تدرون من طلع اللي أسأله ؟؟!!

طلع النمر البنغالي .. وفي رواية النمر البنجلاديشي .

ابعدت عن هالنمر البنغالي جاء ومسكن وقال لي :
هيه صديق انت يبغى غسيل سيارة .
قلت : وخر لا ابوك لا ابو من جابك .

سمعت صوت صراخ من داخل حوش الاسد !!!

يوم شفت لكم هالاسد يصرخ ويهوش ويزبد.. وماسك شيء بيده
الظاهر انه قرد .

بدا الاسد يصرخ ويقول : لا أحد يقرب مني ..أي واحد يقرب ابذبح القرد
همن اذبح نفسي
أنا خلاص تعبت زهقت مهيب عيشه ذي .


كانت الاسده قصدي اللبوه زوجةالاسد واقفتن ورا الاسد وماسكتن عيالها سعد وجهير
وتصيح وتقول :

تعوذ من ابليس يابو سعد واترك القرد مهوب علشاني
علشان سعد وجهير لاتذبح نفسك طلبتك .

رد عليها الاسد (ابو سعد) :
أقول اقطعي واخسي لاتدخلين انتي وجهتس ..جايز لتس
الوضع جوع وجو مغبر وامراض وكسافة .
وطول عمري مقابل وجهتس انتي وبزارينتس
ابغى اطلع ودي اشوف الغابة ودي اصيد غزال حي لو مرة .
مليت من الاكل الجاهز ..

ولا كل ماسألت الهندي اللي يجيب لنا الاكل ..عن الاكل هو طازج والا بايت من أمس
قال لي :
ما فيه قرقر كتير انت فيه اكل مافيه كلام .
بالله عليتس يام سعد مهوب شيء يقهر ..
انا لازم انتحر وارتاح .
ــــــــــــــــ
و في خارج الحوش:
دب الذعر بعد ماقرر الاسد انه ينتحر ..وخافت الحيوانات
من انفلات الامن .
وفعلا حدث ما لم يكن بالحسبان ..
انفلت الامن بين الحيوانات وبدت عمليات النهب والسلب
واستغل شرذمة من الحيوانات فراغ السلطة وعلى رأسهم القرود
والضباع والغربان .
من المشاهد اللي شفتها :
- زرافة لابسة عباية على الكتف وتكلم بالجوال انقض عليها
قردين ....ووقعت الفاجعة ...لاحول ولاقوة الا بالله .
- غراب ماسك بطه ويسلب منها مجوهراتها ..مسيكينه توها عروس .
- ذيب يستولي على سيارة حمار وحشي الكوبيه .
- تمساح عاض سنجاب ويقوله : افصخ نعالك .
- كنغر مستغل الوضع وناط بحوش النمر لانه كان مسطح كورته .
- غوريلا قاعد يحشش مايدري وش السالفة .
- دب طاير يلحق فقمة
- فيل واقف بنص الطريق ويزلق على أي واحد يمر ...والله من النجاسة .
- مراسل أجنبي بعير ابو سنامين ينقل الاحداث لحظة بلحظة .
ـــــــــــــــــ
..نر جع لابو سعد :
وفي تلك اللحظة كانت تتواجد قوات الدفاع المدني
والشرطة الحيوانيه ..حول حوش الاسد ونست الامن الداخلي .

وبدت الشرطة تتفاوض مع الاسد..

شفت حمار ملازم أول معه مكبر صوت يقول :
سلم نفسك أي حركة حنزرب في المليان ...حمار ماعليه شرهه .

فيه تمساح من المارينز يحاول التسلل للحوش ..

رفع رجل الخط ( التيس) الرايه بوجود التمساح بموقع تسلل .

كان فيه نمر بس مهوب بنغالي نمر أصلي .

قعد يفاوض الاسد قاله :

اسمع يابو سعد بحكم العشرة اللي بيننا والصداقة
اترك القرد وخلنا ندخل نتفاهم .ولاتنسى يابوسعد انك قدوتن لنا
وكلنا تحت مظلتك وانت قائدنا ..لاتلطخ تاريخك بهاالتصرف
وأنا اوعدك اني راح اطالب بعودتك للغابة .


الاسد تقل بدا يلين واقتنع بكلام النمر ..
جاء وترك القرد
وراح لعياله وحضن الاسده ام سعد وجهير وسعد .

وسمح للحيوانات انهم يدخلون لحوشه ..

قرب النمر للأسد وقال : امسكوه لايهج ..اقبضوا عليه
جت الفيله اللي من الصحة النفسية ومعهم الشرطة وكلبشوا الاسد واخذوه
للدورية ..

ضحك النمر ضحكة مغلفة بالخبث وقال للأسد وهو مكلبش :

معليش يابو سعد لابد من الخيانه هذا حكم وسلطة مهيب لعب .

كشر الاسد وقال للنمر : هين يابو حمد الايام بيننا لابد مايجي يوم وارجع لك ياكلب .

كان فيه كلب يهوجس يوم سمع أحد يقول ياكلب
قال : حاضر .

أخذوا ابوسعد للقسم وحققوا معه وسجنوه
بتهمة اهمال المال العام واستغلال السلطة .

وتم عمل انتخابات وفاز أكبر المرشحين اللي هو النمر
اصلا مافيه غير مرشح وبنسبة 99.99% .

أول قرار سواه النمر اعتقل ام سعد وعيالها .
وعين النمرالبنغالي نائبه => حظوظ .

سعد لازال يكبر في المعتقل ......هل ياترى يخرج ويعيد ملك ابيه
أم يخرج ابو سعد من السجن وينتقم من النمر ..

هذا ماستثبته الايام القادمة ..
والى لقاء آخر ..

والسلام عليكم ورحمة الله

أخوكم ابو خالد
مراسل حديقة الوساويس

أنتم وش رايكم ؟؟؟