قصه بس قبل ماتقرؤنها .. اشربوا شاهي



قبل كم من شهــر ... زرت لي شايب (ابو محمد) ..فيه معرفه قديمه بيني وبينه . كنت ازوره كلما اتيحت لى فرصه زياره له.ومن حقه على ..زيارته .. انا اعتبر زيارته واجبه...

سلمت عليه وحبيت راسه ..
...واخذ يسئل عنى ويردد الله يجزاك بالخير ...ويسئل عن الربيع . وكيف ديار الشمال. وعن كل شيء ...... يطري على باله سواء عن عملي وصحتى وشيباني .. و و و و .....الخ

لحظات ..الا والسواق الهندي حقه .. احضر القهوه والشاهي ....والقدوع (تمر )

ابو محمد قال للسواق سلم على دمى_ازرق . سلمنا على بعض ..

انا ما اعجبتنى فكره ..هذا الهندي يقهوينا .قلت للهندي ..خل القهوه انا بقهوي عمى ...الله معاك ... فرح الهندي لانه هو مرتبط باعمال اخرى ..والله جاب له واحد يريحه من ان يقهوي (يصب القهوه ) للناس ...

الشايب ... اعجبه تصرفي .. لاننى اعتبرت البيت بيتي .... ففرح فرحا لامثيل له

طبعا انا كشاب احب ان اتكلم او يكون حديثي عن امور تعجب ابو محمد ...( قلت بيني وبين نفسي ياليت لو اعرف شيء عن ابو محمد يوم كان بشبابه ..كيف كان يتغزل . وكيف خطب ام محمد ...اين قضوا شهر العسل ..والا مثل الاولين يقضون شهر العسل في اقرب خيمه هههه..). ..وانا انظر له .. وهو فرحا ويبتسم .. ويكاد ان يطير من الفرح .....

دار حديثنا عن احداث 11 سبتمبر ..جمله حديثنا المختصر ...ان ندعو الله ان يوحد كلمه المسلمين وان يورينا عذابه على الكفره المجرمين ..

صبيت القهوه .. لي ابو محمد ...صبيت له فنجالين قال بس ... قمت وصبيت فنجال اخر .. ولزمت عليه ان يشربه ...( قال ابو محمد .. ياوليدي الهندي اذا صب لي فنجال وقلت بس ....ما يلزم على ان اشرب فنجال اخر) ... وانت تلزم على ..الله يستر عليك ..( كبار السن يستانسون لو اديت خدمه لهم لو انها بسيطه)

شرب ابو محمد الفنجال وقال ..الله لايهينك ياولدي
..صبيت له شاهي وتناوله. ابو محمد.قال اوه اوه اوه اوه اوه .. وهو ينظر لبياله الشاهى ويوجه بياله الشاهى للشمس وينظر لها ......ويردد اوه اوه اوه اوه اوه ............

انا استغربت !!!!... ماذا يقصد ابو محمد من تردد " اوه اوه اوه .."

سئلته ياعمى ... شكل بياله الشاهي .. ذكرتك بامر ما ...!!

قال نعم . ياوليدي .. ذكرتني بقصه .............قصه خوي لي ....الله يرحمه ..
اذا صب لي اي واحد شاهي اتذكر سالفته .......
سئلته ممكن تقول لي .............عن السالفه؟؟

سئلته .......
قال ياوليدي الشاهي يقعد الراس ....اول الشاهي .....ماينعرف ونادرا مايشربونه الناس من قله ...

خوي لى (ابو راشد) الله يرحمه ...راح حدره للعراق يوم الفقر ...لانه كان عندنا فقر بالسعوديه وكثير من الدول المجاوره ... الناس تروح للعراق للبحث عن الرزق او ان يشتغلون بالغوص ...او يتاجرون بالصقعى العراقي او التمن ......

المهم خوى (ابو راشد) .جهز اغريضاته واستائذن من ابوه وقال يا يبه .... بتغرب لكي ابحث عن لقمه ناكلها .رد ابوه عليه قال ..الله يوفقك ياوليدي

وتعرف ياوليدي ( دمى_ازرق) ...الاولين لازم ياخذون مشوره اللى اكبر منهم ..عكس هذه السنين او ها الوقت اللى حنا فيه الواحد راسه وراس عميه فقط .....

راح ابو راشد الله يرحمه وركب ذلوله .. وراح حدره للعراق ...عن طريق لينه ورفحا .......وعبر الدبدبه وسيده لسوق الشيوخ بسفوان وبعدين على البصره .....وكل مكان ينزل فيه مايتوفق بالاشغال .......

كل ماجمع له من قريشات راح لسوق سفوان واعطاهن اي واحد لكي يوصلهن لاهله بالسعوديه...عيشه شينه وفقر ...يالله لاتغير علينا .....

ابو راشد شريف ..ويحافظ على الصلاه ...عاد خبرك حريم البصره مزين .. اذا شربت الوحده ماء تشوف الماء من خلال حلقومها ...من ها البياض والبشره النظيفه . سبحان اللى هذه قدرته ..

ابو راشد خاف على نفسه .. وقال لازم اتزوج ...للعفه والعفاف ...وعاد خبرك ...ياوليدي ..النفس اماره بالسوء ..

مرت الايام ... وشكل ابو راشد عشق له وحده ... وحس انه عشقها ...راح لاهلها لكي يخطب ....!

زوجوه ام راشد .......واخذ حليلته معاه وركبها على ظهر ذلوله ورجع بها للسعوديه ....مضى اسبوع واحد على زواجه وفجآه.. وهي تصاب زوجه ابو راشد ..بمرض ..عجز الحكماء ان يعالجونها .....اخذ يتنقل ابو راشد من تختور (دكتور) لتختور ومن تختور شعبى لااخر .....ماترك مكان ذكر له ان يكون سببا بشفائها الا واخذ زوجته معاه ..لكي يعالجها ........

عجز ان يجد علاج لذلك ..وكل امره لله سبحانه وتعالى ......"واذا مرضت فهو يشفيني "

تعب ابو راشد .....وطاح حيله ....من كثر مايفكر بان يساعد زوجته .......ومن بحث عن علاج .. وغيره.

زوجته طريحه الفراش .24 ساعه
.. اخر الليل قام ابو راشد .. صكه راس .. قال بزين لي شاهي وهو ماتعود ان يفعل ذلك ....قام وشب النار في مجلس الرجال ..لانه الاولين يصلحون القهوه والشاهي في مجلس الرجال.....صخن الماء ابو راشد.. وتناول له ورق شاهي ووضعه في الابريق ...بانت ريحه الشاهي .... وفجآه الا وزوجته ...داخله عليه في مجلس الرجال وهي مفرعه وشعرها يتطايح على امتونها ( ماعليها غشوه) ولاتدري عن نفسها .....لانها دخلت عليه من دون اي شعور .............وطاحت بجنب الابريق ...
عرف ابو راشد ان ريحه ورق الشاهي ........فيها سر .. فام ورش مويه على وجه زوجته ... وصحت .. ناولها قلاس (كاسه) او بياله شاهي ... وشربتها ... وماهي لحظات الا وردت الروح لزوجته ... وانفك حجاجها ....وشربت .........
قالت كثر لي يازوجي من الشاهي .......

قالت من يوم تزوجتك ياطوايفي (طوايفي=كلمه دلع) ماطب اثمي (فمى) الشاهي .. وعاد خبرك حنا في العراق نشرب استكانات شاهي ....... وبكثره

قال ما اخبرتيني .....وانا من مكان لمكان ...ابحث عن عالج لك ........

فرح ابو راشد ..واستانس ...........

انا رديت عليه قلت ..اكيد اذا جاهم ولد بيسمونه شاهي هههههه

قال ابو محمد لالا ههههههه سموه راشد ...قريب من شاهي هههههه

القصة زينة ( ن ) بالحيل مثل راعيها لو انك الله يهديك كذبت فيها لأن الشايب مهب يقول دمي _ أزرق يقول .. . لا عاد تعودها عشان الكذاب يدخله ربي في النار .

تسلم على القصة و ذكرتني بقصة واحد كان بيته عند الصرف الصحي الله يكرمكم يوم شرى له بيت جديد بالشمال و نقل له زوجته صكها راسها و جاها صداع شديد ما بقى دكتور ما راحوا له و لا بقى مرض ما قالوا إنه فيها ؟!

مع الوقت حست الزوجة إنها ما ترتاح إلا إذا سيرت على جيرانها الأولين و عرفوا السبب !

لا تسألوني وش سوو يوم دروا لأني ما أدري وش سوو ..


شكراً دمي أزرق ..

ابو ريمان ههه الزين والله استحسانك للقصه ..

وش قصدك .. تبيني اقول اسمي الصدقى .. بس محاكيك ذكي ..مايقول اسمه .. خل ان شاء الله بيصير بولدك شامه ( هذه العباره " بيصير بولدك شامه " اذا اي شخص وده يعرف شيء بس ما حققت امنياته يقولون في الاخير بيصير بولده شامه" )

صحيح .. تقول ماترتاح الا اذا زارت جيرانهم الاولين ههه .. ياكثر اللى نسمع عن ها السوالف ..

اكيد اي شخص يتعود على شيء .. يكيف جسمه ورورحه معاها .. شف حنا ابسط مثال تكيفنا مع متابعتنا وتشجيعنا للهلال وبطولاته .. تجدنا تعودنا على البطولات ههه

اتذكر واحد كان يشتغل مع شركه ارامكو السعوديه وطبعا كما تعرف ارامكو يلبسون البنطلونات وقمصان العمل من سعوديين و اجانب .. المهم الرجال تقاعد .. تصدق يقولون اعياله يوميا ابوي اذا صلى الصبح بدل ملابسه ولبس بنطلون وقميص .. و وصلنا للمدرسه .. ويرجع لبيته ..تعود الرجال يوميا الصبح يتك نفسه بالبنطلون ههه

شكرا على مرورك ..

الا باقول لك وش جاب سالفه البنطلون؟؟ ايه .. سالفه ابو محمد الله يلبسه لباس الصحه واالعافيه ..

اذا اعجبتكم القصه ..

اخبروني حتى اقول لكم قصه " ابو محمد وفنجال القهوه "

قصه حلوه والله هات لنا الثانيه

الحاتمي ..


مــر من هـــنــا ......

غروده حياك ربي و اوامرك منفذه ..

الحاتمي ..حياك ربي ( ذكرتني بتعليق سلطان العبدالله مره يعلق على مباراه بين الرياض والشباب من زمان .. المباره بارده جدا ولا فيها اثاره وفوق هذا سلطان العبدالله يعلق على المباراه .. من ضمن اللعبات لاعب من الشباب اعتقد انه سعيد زاهر شات الكوره ومرت بجنب العارضه و الكمره التلفزيونيه تصور الكوره وتتابعها ويقول سلطان العبدالله مرت ولا حتى تلتفت "

عاد انت هنا مريت ولا التفت لنا ولو بكلمه حلوه ....
----------------

نتواصل عن لقائنا مع ابو محمد ..
عاد خبركم حنا ماعندنا سوالف ذربه ..
ابو محمد قال لي يادمى_ازرق هاه ماعندكم سوالف
على طول قلت لالالالا ماعندي ..
قال لالا قل اللى بخاطرك ..
قالت حاضر عاد يا عمى والله سوالفكم حلوه بس حنا سوالفنا يا روحات للاسواق والا سفرات او ....يعني من ها الطرق .. قال انت قل وش عندك..انا رديت قلت حاضر ... قلت بقول لك سالفه حصلت لي يوم انا ضغير ...ان شاء الله بتعجبك ياعمى .. قال قل الله يستر عليك.

قلت والله ياعمى انا ما احب او كم اكره ..... حتى هذه الحظه .. التطعيمه ... التلقيحه ........... التوتينه (
Immization
المهم .. على وقتنا كما هو معرف لايوجد ملف صحي ... اما الان كل واحد حتى لو انه في بطن امه يكون له ملف صحي وموثق ... وغيره

اتذكر يوم كان عمري خمس سنوات او اقل اخذني الوالد للمستوصف لاجل التطعيمه عن السل او الشلل لاادري ....والوالد ... من صبح الله وهو يحاول ان يسهل الامر ... و شري لي بسكوت مينو (بالبريقال ) و كم قطعه حلوي "ابو بقره " ماهو مثل اعيال هالوقت بونتي وجلاكسي و بعد يتمنن عليك

الوالد قال لي الدكتور سوف يكشف عليك و بس ... وبس ... وبس ..... كلمه "وبس" رسخت في ذهنى .. يعني الامر كشف و بس!

دخلنا على الدكتور .... و سلم الدكتور على الوالد وقال كيفك يا ابو دمى_ازرق ...؟ كيف دمى_ازرق صحته تمام ..... و فتح طاولته واعطاني بسكويت ابوميزان (الاخضر .. اللى 36 حبه بخمسه ريال )

وعلى طول الدكتور مسك يدي ... ورفع (ازال) الثوب عن ذراعي .. لكي يتحسس اي عرق مناسب للابره .... وانا خبرك على طول . وااااااااااااااااااا واااااااااااااااااااا ازعجت كل الى بالمستوصف ... كانني واحد مقروص .... وهذا بس الدكتور فقط لكي يتحسس العرق والمكان لكي يخزنى بالابره

وااااا واااااا وعلى نغمه وحده ........ والممرضات الى يهديني .. والى يحبني (يشخفني على وجنتي___ دمى_ازرق انشخف من ناس غرباء ... ومن مين من ممرضات ) والوالد كذلك شخفنى... كله لكي لااكرر وااااااااااوااااااوااااااا
المهم بديت اشاهق من كثر البكاء والصراخ والدموع وغيره ......

وكلماتي كلها يابابا " الله الله الله ياباباااااااااااا ....... لاتخليهم يبطوني اهيييييييييييه اهييييه وااااا واااااا
المهم بقدره قادر .. تحكموا فيني ...... وقام الوالد و صار المسئول عن ازاله ثوبي عن ذراعي ..... وقام الوالد قبل ما الدكتور يوخزني بالابره . الوالد حب المكان المخصص لمبط الابره ( الله يعطيك الصحه يابي .. ويقدرني ان اخدمك ..امين )

وانا المح الابره ........ ياشينها شيناه تقل ثعبان .... واعيد الكره وااااااااااوااااااااواااااا
ولامجيب . شفت الامر مابليد حيله .قلت خلاص .. بطوني الابره بس بشرط اريد ابوي يبطني ..... بدل الدكتور ....... والكل يضحك من دكتور و ممرضات حتى الوالد وانا على وتيره واحده وااااااااوااااااااواااااا

اهو شي تذكرته ...ياعمى لكن وعد المره الثانيه بقول لك قصه من القصص اللى تفتح النفسه .ز بس ياعمى كل قصصكم حلوه ورائعه جدا ......... والسلام