كثر الكلام .. والبربره الزايده ... وانت ماتحبني وانت ظالمني .. وانت تكذب علي ..ونت تبي تسرق الريال المشقوق اللي عندي وووو عوباء وفقرية وماتعرف غير التشكي والتبكبك والدعاوي ...

فكونا من طاريها ... تكفون لاعاد تسوون لها دعاية كل ما ناحت وصاحت ..


...........

هذي رياضة .. وكورة ... ومتعة ... واداء بشرف ... ماهم لها ولاهي لهم .. لاتنجرون ورائهم .. وتجرونا معكم

...........

كان ودي عنوان الحملة لو كان ?? yes we did بدلا من yes we can ??

نعم فنحن أهل اسيا .. لكن لم تكن من حظنا في السنين الاخيرة


.. بلى نحن أهلها لكن أبادنا .// صروف الليالي والحظوظ العواثر !



... عشرة سنين واسيا مابغتنا // وحنا نكافح ماثنتنا الرخامة !
... مير البلا محدن تعدا عددنا // ستة كؤوس تثبت لنا الزعامه !

-----------------


رجالنا نثق فيهم وحتى لو لا سمح الله خسرنا ... ولا انكتب لنا التوفيق ... لازم ندرك انها ماهي نهاية المطاف .. ونبني على هالاساس ردة فعلنا .... مانتصيد كل زله ونستقعد للاعب اللي يخطي او يتسبب في هدف ونسوي له موضوع في المنتدى.. ونحلله ... ونقعد نحط عليه لين ماعاد نثق فيه ولاهو يثق فينا ولا يثق في نفسه حتى ..

.....................

كلنا نعصب وقت المباراة وعلى ضياع الهجمات ... ونرفع اصواتنا ونلووم اللاعب ... لكن اتمنى مانكتب ردات فعلنا السريعه في المنتدى .. لان مايكتب يبقى مع الزمن ولا ينمحي .... والناس تقرا واللاعب نفسه يقرا وجمهور الفرق الثانية يقراا ... عشان كذا لازم نعرف وش نكتب و وتكون نظرتنا ابعد من لحظة ضياع هجمة او خطأ حارس !

...................

الاعلام وسرعته في الوقت الحالي ... لو الجيل السابق لحق عليه ... ترى بيكون مصيرهم زي مصير الجيل هذا ... تحت المجهر ... وكل غلطة ... محسوبة وجمهور الفريق اول من يكتبها وينشرها ...

--------------
اي لاعب تكتب عنه موضوع تلاقينا منقسمين حوله قسمين ... ليش ؟؟؟

لاننا نكتب كل زله عليهم ونسوي من الحبة قبة ... والجمهور وطبايعهم تختلف ..فيهم اللي ينسى الغلطة وفيهم اللي ماينسى ابد كل مايشوف اللاعب يتذكرهاا... //
..................

تذكرون هيبة القائد زمان ... لافي الهلال ولافي غيره ...
كان الجمهور يصنع لقائد فريقه هيبة ... ونذكر الثنيان ... كيف كان لما يدخل الفريق يهتز المدرج كله والفريق الثاني تجيه ام الركب ... وبربع ساعة تنقلب النتيجة ... ( هل الثنيان كان ملاك مايخطي ؟؟؟؟ )

... هنا اهمية الجمهور ... اللي يدافع عن لعيبته ... ويتحمل منهم ويسامحهم ... ويهز المدرج ... كله

هيبة الفريق .. وهيبة نجمومه ... بعد الله هي من صناعة الجمهور ... والعكس صحيح ..

امس اتكلم مع احد مشجعي نادي اخر ... وهو شخص كبير في السن لكن يتكلم عن كابتن فريقه ... بثقة .. ويقول لم يمر على السعوديه مثله ... وراح يعطيني قصص و مواقف ... لدرجة ان اللعبة العادية والتمريرة العادية ... يشوفها بعينه بطريقة أخرى كلها ذكاء ودهاء ومكر .. مع اني ارى انها اكثر من عاديه ...وارى مواقف ولعبات ونكبات سواها اللاعب...

ولكنه ذكرني بالثنيان وكيف كنت اشووفه ... الله يذكرك بالخير يابو يعقووب ...

هنا الجمهور يكون له تأثيره ... جمهور مايدقق على غلطات .. ويعاتب على طوول ...


الجمهور هو القائد .. الحقيقي ... اللي يقدر يطبع اللاعبين بالشي اللي هو يبغاه...
------------------

التحيه والتصفيق وقت الهزيمة .. وعند اضاعة الهجمه.... هي اساس كسب الثقة.. بين اللاعب والجمهور.. وهي البداية لعلاقة الود .. وبداية صناعة روح اللاعبين ... ومعها بيكونون اللاعبين يشعرون بالمسؤليه امام هذا الجمهور..


-----------------


نعود لاولسان الهوانداي الكوري ...

واثق بالله .. ثم بالرجال يبي يحققون نتيجة ايجابية بمشيئة الله


موفقين للخير دايما ...


ودمتم زعماء للمجد ...



2 - 0


--------------