السلام عليكم ورحمة الله وبركاته


بعد 30 يوم اكمل سنه بدون اي موضوع في المجلس!

رغم ان بيفرق علي التفاعل وعدد الردود لكن حبيت اترك حضور في هالمجلس الطيب

خــاطــره ..


افتقدت وجود انسانه تسوى غلاتها بقلبي كل ماتحمله الكره الارضيه من بشريه !..

انسانه الابتسامه ماتفارقها ولا لحظه .. دائما تتفقد الصغير قبل الكبير .. تسأل عن البعيد قبل القريب ..

قلبها رقيق وحنون.. لو سمعت قصة محزنه لشخص حتى بدون ذكر اسمه تشوف دموعها تسبقها على خدها الرقيق ..

انسانه توفت وكتب بشهادة الوفاة .. سبب الموت : ( 7 اسباب ) وهي اللي عمرها ماشكت من جرح يجرحها .!

هذه الانسانه قبل لا تطلع روحها بيد ملك الموت بلحظات ..
فتحت عينها ووصت ان كل الخدم بالبيت يعطونهم عيَادي لانهم اتعبوا معاها ..!


هذه الانسانه مــدرسـه بالأخلاق والحب والحنان والعـطـاء !
هذه الانسانه من كثر مابكيت على موتها .. تمنيت لو اذكر موقف ضايقني منها
علشان اقدر اهدا واوقف بكي .. لكني لقيت نفسي بكل حدث وكل موقف ازيد بالبكي


رحمك الله يا ام الحنان والعطاء ..



اسمحولي ولا تتضايقون لو بالغت بالمدح قليلا ..
ام عيـسـى تستحق سنين لذكر محاسنها


يدتي كانت انسانه اميَه لاتقرأ ولا تكتب ..!

ولا عمرها عرفت تقرا بالمصحف تكتفي فقط بالسماع ..!

ولا عمرها قدرت تقرا اذكار صباح ومساء .!

روحاتها لمكه المكرمه ماهي عدد مبالغ فيه..!

لها سنين حالتها الصحيه ماتسمح لها الا انها تصوم رمضان ..
ماقدرت تصوم اي نافله او تطوع زياده على صيامها ..!

رغم هذا .. توفت في صباح العيد وبعد الصلاة بعد ماانتهت من شهر
الطاعات وشهر الفوز العظيم

توفت وهي موصيه انها ماتروح المستشفى لانها تبي تتوفى بين
اهلها وعيالها وعلى فراشها ..!

وفي بداية غسلها لقوها متشهده ومبتسمه


اول ماانتهوا من الغسل وبدو يكفنونها لقوها مبتسمه وكأنها
شافت مكانها بالجنه .. ربي لك الحمد


دخل معاها ولد عمتي للقبر ويقول ماتتصورون شنو كانت ريحة القبر ! فجأه
صارت ريحته شي جمييل ريحة مسك ! ولكن اي مسك ..؟!



الناس الكبار دائما ولله الحمد نشوفهم بعد الوفاة مبتسمين ونحس انهم
مرتاحين .. ولو نحلم فيهم دايما يقولون انهم مرتاحين .. رغم قلة
عباداتهم وطاعاتهم ..

لكن لانهم جيل كان يعيش بأخلاق الدين الصحيحه ..


بعكس البعض الحين يسوي كل العبادات والطاعات الفروض والسنن ..
ولكنه عايش بلا اخلاق الدين ..!

اسأل الله ان يجعلنا ممن تخلق بأخلاق الدين الاسلامي ويجمعنا بكل موتانا
وموتى المسلمين


موت الناس الكبيره يعلمني دروس وعبَر!


اسأل الله لي الثبات


اعتذر لو كان موضوعي فيه شجن .. والمسكين اللي يحزن على وفاة شخص ..
ولكن لنعمل ونجتهد علشان نحصل على رضا ربنا ويجمعنا بكل احبابنا اللي افتقدناهم

اللهـ يرحمهـا و يغفر لـهـا ,,

((الناس الكبار دائما ولله الحمد نشوفهم بعد الوفاة مبتسمين ونحس انهم
مرتاحين .. ولو نحلم فيهم دايما يقولون انهم مرتاحين .. رغم قلة
عباداتهم وطاعاتهم ..))

اغلب الناس الكبار مايشيلون بقلوبهم على احد و دائما يذكرون اللهـ و يدعون مع اني اختلف في نقطة قلة عباداتهم او طاعتهم الا في حالة ان المرض منعهم من ذلك

شكرا لكـ يا شوق و رحم اللهـ موتى المسلمين

رحمها الله ، وأسكنها فسيح جناته ..
وغفر لها إن شاء الله ..


موضوع يثير الشجن ، ويحمل بطياته الكثير من المشاعر الصادقه ..
رحم الله من مات منهم ، وأطال الله في عمر الأحياء منهم على عمل صالح ..

على الشخص أن يستقطع يوميا وقت معين للجلوس فيه مع أمه وأبيه وجده وجدته ..
فوالله لو كان مُقصر سوف يندم على كل دقيقه كان بإمكانه أن يجلس معهم ،
لكن تركهم وذهب لينشغل في غرفته لأمر ما ..

يحتاجون لمجالستنا ، ونحتاج لمجالستهم ودعواتهم وعباراتهم البسيطه البعيده
عن التكلف ،والتي تُعبر عن قلب طيب جداً .. يُحبك جداً !




رحم الله فقيدتكم يا شوق ، وأسكنها فسيح جناته ..


وجزاك الله خير ، على القيمة الجميله في عبارات الموضوع .


فمان الله ..