كـــشـتــة شبــــاب في البــــــر ...
 

مساكم الله بالخيررررررر


في اجـــازة الربــــــيع ..


عزمــت انا وبعض الشـباب نطلع للـبر نخـيـم .. المهم اتفقـنا نطلع اربعه ايـام .. اليوم الاول من الصبح وانا مجهـزين كل شيء اللي جايب الخيام واللي جايب العده واللي جامع القطه ==> هذي اهم شيء :D .. الخ ..

المــهم طلـعنا ووصلنا المكان اللي نـبـغاه وكان يبعد عن الرياض حوالي 200 كلم.. وصلنا الصباح يعني على الساعه 12 ..


اول ماوصلنا طقـينا خيامنا .. ورتـبنا اوضاعنا .. وياله خلصنا على الساعه 3 .. بس كنا جوعانين وتعب وبرد ... ومخلين واحد من الشباب يطبخ .. وكل شوي نقوله جــهز الاكل وهو يقول عمى توني شاب على الرز اصبروا شوي جعل بطونكم تنفقع :upset: وحنا نقول الشكوى لله عنده اهم شيء ومانقدر نقوله شيء بس مغير نقول تكفى عجـل علينا ترانا جواعه .. وهو يقول .. ابشروا ازهلها بس اشتغلوا صح ولاتستهبلون وانتم تشتغلون :D وهو متربع على بلكه يناظر الغدا واخر روقان وحنا نكــرف ..

المــهم خلصنــا .. وطبعا مثلنا مثل اي ناس جـواعه على طول نصـينا اخونا اللي جالس يطبخ وقالنا لو انه حاشي كان قد استوا:D .. قال خلاص يله قربوا الباديه ...

والله ويجيك وينسب الغـدا الله واكبر يالغدا اللي يسمعه يقول ورق عنب وحمص وكباب خخخخ الحمد لله على النعمه بس كان رز وسفن اب ..:) ..

المـهم يوم نسب الرز الا والله مهوب رز ... نشوف انه رز محروق ... بس والله ان تكلمنا ولا شيء نخاف يقول دبروا عمـركم على العشاء وحنا اعجاز ناس:D بس بلعناها وقلنا الا والله الرز صح محروق بس انه زين بس حاول ماتسولف وانت تطبخ :D

طبـعا واحد من العيال جايب ساكـتون:D .. مدري وش جابه بس ياطلعنا مناب جمب الجاده:D

حـاطين سفن آب نتـويقع عليه يعني نصوب عليه .. طبعا وكنا على مسافة حوالي 15 متر عنه تقريبا .. بعد ساعه الا ربع .. ياله واحد من الشــباب قدر يطيح السفن آب :D

طبعا كـان نصيب وقتـنا الاكبر هو لعـب الورقه ..

المهم في آخر يـوم حصـل موقف صراحه قــوي :D لواحد من الشباب

الموقف كان وشو ...

كنا في اليوم الرابع في الصبـح و جانا اثـنين من الشـباب .. طبعا هم جايـن من الرياض ومايدرون وش السالفه ...

واحد كـان على نيـاته يعني قلبه ابيض ... وهو كــان فريــستــنا :D !!

طبــعا جاء الليل وحنــا كلنا متـفـقين على المقــلب ... طبعا من بكره بنمشي وبنرجع للرياض ..

طبعا كـنا شــابـيـن الحطب برى الخـيمه .. وجالسين حولها نسولف ونضحك واللي جوا الخـيمه يلعب ورقه ... المهم الضعيف اللي على نياته كان معنا على الجلسه ...

الشاهد وحنا جالسـين ... جاء اثــنين من اخويانا وقالوا لنا تــرا بنروح .. وكــان معهم قــوارير مــويه صحه ( اللي نشرب فيها ) بس كانت مليانه مــويه مع بــــيــبــســي .. وطالع شكل الـقاروره اسود كإنه ( خمر ) الله لا يبلانا فيه ... طبعا كلنا مـتفـقين على اساس انهم يرحون بعيد عنا يشربون ويرجعون لنا ... طبعا يوم شفناهم قــاموا ... قلنا لهم مالكم داعـي .. والله ماينراح معــكم للبر ... ترا بنــمشي ومن هالكــلام ..

وانا كنت اشوف خوينا الضعيف اللي مايدري وش السالفه كنت اشوف وجهه هههههههههههه :D .. كان وجهه متغير ولا يدري وش السالفه ووده يسألنا ولا وده يعني بالعربي .. ملــخم يعني انصــدم فينا .. ولا توقع ان فيه احد من الشباب راعي شــرب ..

طبــعا يوم راحوا على رجولهم بعيد شوي عنا ...

كنا نسولف ونقول بيــننا .. ومعنا الضعيف اللي على نياته .... وكنا نقــول الله ياخذهم خــربوا الجلسه والتخــييم كل ليله لازم يخربون لـيلتنا .. يالله اذا رجعوا وش بـيسون ؟؟

وحنا كل هدفنا نبي نخوف خوينا الضعيف:D !!

طبعا كلها ربع ساعه ورجعوا الــثــنين اللي رايحين على اساس انهم شاربين المذكور ..!!

رجعوا وهم راجعين كانوا يضحكون بصوت عالي:D ... وهم طبعا بدون مايشربون شيء منــسمين خلقه:D ...

رجعوا ودخلوا الخــيمه !! وشوي وكل واحد منا يدخل الخيمه .. الين صرنا كلنا بالخيمه ...

الاثـنين اللي شاربوا المـذكور بداوا يسـتهبلون:D ..

اللي يقــول للمــبه وهو يأشر بـيده.. شف شف الشمس طالعه بالليل:D !!
ثم يقول خويه .. لالا هذا القمر شفه تراه جمبنا:D

ثم يرد الاول ويقول .. ياخي وراء مانطلع لباريس ونشاهد الانهار ونلعـب اتاري ‍!!
الثاني يقول ... ياخي وراء ماتقوم تلبس رياضه ونروح لماما نوره نتعشى:D

طبعا استمروا كـذا نص ساعه تقريبا وحنا جالسين وكانوا اربعه يلعبون ورقه ومسوين انفسنا ماندري عنهم ونتكلم بصوت واطي .. والله اللي تورطنا هذي اخر ليلة ... عسى مايسون اشياء اشين من الكلام ... طبعا حنا نبي نخوف الضعيف اللي على نياته:D ...

اللي على نياته ... شفناه طلع برى الخيمه !! لحاله ..

لحقه كذا واحد ... وقالــهم ..

انا بمـــشي !!:D برجع للرياض !!

وراك يافلان توك جاي ؟؟

قال ماتوقعت انكم كذا .. وهذي اخر مره اجي معكم .... وهو يتكلم ...

طلــعوا الــثـنين اللي مسوين فيها شاربـين ..

وقالوا يابن الحلال تعال العب معنا بلاي ستيشن:D ترا فيه مباريات بين بعارين حي العليا وبعارين جده !!... هو خاف زياده ولا يدري وش يرد !!

ثم قربوا من عــنده .. وصاروا يســتهبلون ويقولون تعال الحـين بنطلع نتمشى ونروح لليورمارشيه:D !!
وخــوينا الضعيف ... شوي ... الا وهو منحاش يركض بيروح لسيارته خخخخخخخخخخ

يبغى ينحــاش ويرجع للرياض خخخخ وتشوف جواله طاح .. ويجيك راجع وصوت النـفس حقه واضح ... وياخذ الجوال ويركض لسيارته خخخخخخ:D

حنا يوم شفــنا هالموقف ... ماقدرنا نمسك انفـسنا من الضحك !!:D

وياله لحقوا عليه اثـنين من الشباب ... ونادوه وعلموه السالفه ...

بس بالاخير اللي مسوين فيها شاربـين ... انفرشــوا من خوينا الضعيف :D !!!

فيه مـوقف ثاني حصل ..

كـان ثلاثه من الشباب طالـعين للمحطه طبعا هي كانت بعـيده شوي ... وحنا كنا بمنطقه مافيها مخيـمات كثيره .. فكان عدد السيارات اللي يمـرون أو اللي نشوفهم قـليل خصوصا في الليل .. وكان مـيزة مخيمنا تقـدر تشوف اللي جاي من بعـيد بكل وضوح ..

طبعـا هم راحوا يجـيـبـون بعض الاغـراض ..

وهم راجعــين كنـا شفناهم من بعــيد بواسطة دربـيل ليلي ... طبعا من يوم راحوا وحنـا متفقين على مقلب فيهم ...

يوم شفـناهم من بعيد جاين للمخيم .. جاء خمسه من الشباب ركبوا سيـاره ... وراحوا لاول خط التراب اللي بيــجون من عنده وكان يبعد عن مخيمنا تقريبا كيلو وكان طريق كله شجر يعني ماتقدر تمشي فيه بسهوله فاجباريا راح تمشي بشـويش .. وقبلها كان خط يعني جيد بس ماتسرع فيه ..

طبعا الخمسه اللي راحوا .. نزلوا اربعه .. و واحد رجع للمخيم بالسياره ..

صاروا الاربعــه لحالهم بعــيدين عنا يعني ياله يشــوفون لمبات المخـيم وش مسوين بانـفسهم ؟!!

طبعا .. ما لابســوا لا ثــوب .. ..و لا فانيله !!

كل اللي لابــسينه صراويل سنه مع شمـاغ مــتلــطمين فيهــا :D .. كل الاربعه اللي لحالهم ينتظرون اللي جاين من المحطه:D

طبعــا يوم جوا من المحطه وهم توهم بيدخلون الطريق اللي صعب تمشي فيه ... وهم مشغلين محمد عبده وفاتـحين الدرايش يعني رواقان ..‍‍‍!!

كانوا الاربعه مــتوزين تحت الشجر .. يوم شافهم دخلوا الطريق .. وهم كانوا قريبن من عندهم !!

فماكان منهم الا طلعوا في وجه السياره ... وصاروا يطامرون بصراويل السنه وهم متلطمين !! ويأشــرون بيــدينهم وقفـــوا !!:D و الوقت كان متأخر يعني على الساعه 2 في الليل !!

اللي يسوق حاول يبعد عنهم ويروح في اتجاه ثاني بس صعب تسرع !!

فماكان من الاربعه اللي كانوا يحلقونهم وهم يطامرون بصراويل السنه ومسوين فيها جن بسم الله الرحمن الرحيم !!:D .. طبعا الاربعه ماتكلموا عشان ماينفضحون !!

واســتمر ملاحقهم لهم نص ساعه تقريبا ... الين وصلوا المخــيم !! واخـوينا الاربعه يقولون نشوفهم بالسياره كانوا كلهم بالمرتبه الاولى خايفن خخخخخخخ:D ومطفين المسجل ومقفلين الدرايش خخ:D

يوم وصلوا للمخيم وحنا اللي نــشوف وجــيه اخوينا وجيــه ناس مانعرفهم من الروعه اللي مرتاعين منها !! .. يوم شافوا صراويل السنه من بعيد وهم يجون .. صاروا يقولون بسم الله الرحمن الرحيم جوا جوا :D ..

وحنا اللي نقول يامهــاف .. يامهــاف .. ذولي اخويانا ....خخخخخخ:D

طبعا بعد اي مقـلب لازم يكون فيه فــرش وتكفيخ على اصوله:D




وداري اني طولت عليكم .. بس عسى الموضوع نال على اعجابكم :) ...



تحياتي للجمــــيع :)

والله سواليفك رايقه ياكايدهم..احس كني كاشت بالمخيم الي بجنبكم..

بس شكل ماعلمتنا سواليف المطاعس ومن الي فاز بام التسع ؟!!!!

لـووووووووووووووول

مــواقــف كــل واحــد أحلــى مـن الـثـانـي :D

والله طـقــت بـراســي أجــربهــا يـاولــد :D

يالله كـايـدنــا ,,, مــوضـوع رايــق

ننــتــظر مـنــك الــمـزيــد ;)

ليتني معكم في طلعات البر لظبط لكم كبسة ضبان على كيف كيفكم ..

بس الطلعه الجايه خذونا معكم حتى تحلو الجلسه ..

وخاصة انه مقبل موسم الضبان ..

هين هين يالضبان ..

الوعد في الصمان ..

كايدهم


الله يرجك ياشيخ



ههههههههههههه:D

خخخخخخخخخخخخ:D


الكشته فلة وروعه الصراحه:D


احلى ما في كشتات البر المقالب اللي زي كذا:smilewink


يعطيك العافية


هيك كشتات ولا بلا


تحياتي لك

اهلا والله فتى القصيم :) ..

يابن الحـلال تخييمنا عساك سالم كله لعب ورقه واستهبال وماحول ذلك :D

تحياتي

========

اهلا والله يزيدوه :) ..

جربهـا بس أن انــفرشت ما اتحمل اي شي يجيك :D

وابشر :) ..

========

هلا والله هلالي صميم/ابوزياد ..

ابــشر بس جهز نفسك الحين :) ...

تحياتي ..

==========

هلا والله عزوز10 ..

اقول خلــنا ساكتـيـن احسن :D ..

وانا الحمد لله ماصار لي شيء يمكن لاني ذيب :39:

بس التعلم فينا على كيفك .. و آخرتها صرنا نتعشى نواشف :D

تحياتي :46:

=========

هلا والله طوربيد10 :44:

ايه اكـيد ولا ماتـتسمى طلعه بس بحدود معينه :) ..

وياهلا والله :68:

======

هلا والله بكايدهم:D :D من زمان وحنا ندور مثل هالسواليف:D بس مالكم حق في اللي سويتوه في الضعيف!!! وزين انكم ماسويتوا انفسكم كلكم شاربين من اللي في القوارير ولا كان انهبل الرجال وهج للرياض مشي على رجليه:D :D :D
وربعك اللي لابسين صراويل السنه يحمدون ربهم ان اللي في السيارة ماوطوهم ولصقوهم بالأرض:D :D :D

هلا قرقاص :) ..

خخخخخخخخخخ صراحه صعبه نسوي فيها كلنا شاربـين .. لاني عاقل انا ومستحيل احد يصدق اني اسوي هالحركات :D ...

وش يوطاهم .. من الخوف يمكن .. لكن اشكــالهم تــحف ناقصنا كاميرا نصـورهم :bluesky:


وحياك :) ..

========

هلا والله بالقاضي :) ..

تفاح مع رز الحمد لله على النعمه بــس ...

على جـــــــوووع !! وخــويكم مخربهــــا !! عز الله اللي بـيــنفرش :D

وحياااك :) ..

[ALIGN=CENTER]للرفع للاهمية:D

سنعود بعد قليل للرد:D:D[/ALIGN]

ههههههههههههههههههههههههههههه

كل المواقف في جهه وموقف الشراب في جهه :D:D:

الله يرجكم .. لعبتو في حسبه هالضعيف :(


اقول كايدهم ... متأكد كل هذا الي صار .. عطنا الي عندك كله اقووول s96s

الحاتمي ...

مـــر مـــن هــــنـــا .......

[ALIGN=CENTER]هذي البدايه ياكايدهم ، الوصول الساعه 12 ، لا وتقول صباح :D:D.


:D:D:D


الله يلوم اللي يلومهم ، زين اللي ما اغمي عليهم :D:D

تحياتي ، ناصر [/ALIGN]

[ALIGN=CENTER]واللي جامع القطه
افااا يا ذا العلم...وانا ويني؟؟!!! افا يا كايدهم ما تخليني اجمعها؟؟!!! هين سنعك عندي:mad:

المـهم يوم نسب الرز الا والله مهوب رز ... نشوف انه رز محروق ... بس والله ان تكلمنا ولا شيء نخاف يقول دبروا عمـركم على العشاء وحنا اعجاز ناس بس بلعناها وقلنا الا والله الرز صح محروق بس انه زين بس حاول ماتسولف وانت تطبخ
كان اتصلتوا على المطعم:D
على طاري البر والمطعم اذكر واحد اتصل على بيز هت يقول توصل للثمامة:D

حـاطين سفن آب نتـويقع عليه يعني نصوب عليه .. طبعا وكنا على مسافة حوالي 15 متر عنه تقريبا .. بعد ساعه الا ربع .. ياله واحد من الشــباب قدر يطيح السفن آب
الله يخلف عليك وهذا وانا باقول بتكون خليفة فؤاد بن بطاح:D
انا قد مره طيحت القمر بصتمه خلال خمسة اجزاء من الثانية:D<<<مشها الله يرحم والديك:dead:

اما حقة خويكم اللي شاربين لو منكم مسكتوا هالضعيف وركبتوه السياره وامسكوووه مطاعس الين يزرها:D






ويسلم على هيك طلعات يالداج:D[/ALIGN]