انتر ميلان - فالنسيا

- استياء جماهيري تام من مدرب الفريق كوبر على عدم إشراكه للاعب المبدع ريكوبا وإحلال اللاعب كريسبو الذي لم يكن جاهز على الإطلاق لهذه المباراة نظراً لانقطاعه عن اللعب لمايقارب المائة يوم لإصابته حيث تعالت صيحات الجماهير مع التغييرات اللي أجراها المدرب الفلتة (باستثناء التغيير الإجباري للاعب كوكو) وخصوصاً عند التغيير الأخير عندما أخرج كريسبو وتوقع الجميع بأن يكون البديل ريكوبا (اللي انحرق المسكين وهو يسخن طول الشوط الثاني) لزيادة الفاعلية الهجومية اللي تأثرت كثيراً بطرد مفتاح اللعب الهجومي اللاعب التركي ايمري في محاولة لتأمين النتيجة بهدف ثاني إلا أن الفلتة كوبر فاجأ الجميع (بما فيهم أنا مو تنسوني ) بإدخال كانافارو وقتل مكامن الخطورة في الإنتر وظلت الجماهير على أعصابها حيث امتلك فالنسيا زمام المباراة وكاد في أكثر من مرة من إحراز هدف التعادل.

- تعرض مهاجم فالنسيا كاريو إلى استهجان جماهيري كبير نظراً لخشونته الزائدة ضد لاعبي الإنتر معتمداً في ذلك على بنيته الخارقة (سلملي على أبو جمعان والله يروح شوربة عدس بجنبه) حيث كان يتعرض لهتافات مضادة مع كل كرة يلمسها أخرجته عن طوره وأفقدته أعصابه مما استدعى مدرب الفريق إلى استبداله.

- استياء جماهيري كبير من اللاعب دي بياجيو الذي تصفه بالبطء والغباء وتنتظر منه أصغر هفوة لتهتف ضده وعلى العكس تماماً مع اللاعب فييري الذي يرتكب جملة من الأخطاء الكبيرة والجمهور (لا يرى لا يسمع لا يتكلم).

- تعالت صيحات الجماهير فجأة وبدون أي مقدمات (عسى ما شر) اللعب عادي ولا في أي تغيير يبي يسير لكن شاشة الملعب تشير إلى إحراز برشلونة لهدف التعادل في ديللي ألبي (الحمد لله مهوب لحالنا إللي عندنا تعصب).

- والله يازين خويكم وهو رابط شعار الإنتر على راسه ومسوي زحمة مع الجماهير الإيطالية لا والا لو شفتوه وهو ينفعل مع الجماهير ويناقز معهم على طريقة من دون كلام كان فطستوا ضحك



- طبعاً أكيد كنت ناسي نفسي من الفرحة وأنا أناظر نجوم الإنتر وفالنسيا قدام عيني وفي دور الثمانية من التشامبيونزليج بعد لكن أكيد زعيمنا كان على البال وهو يلعب نهائي الكأس ويوم جت المسج بعد هدف الشلهوب مباشرة بغيت أصارخ بس أشوى اللي مسكت نفسي والا كان سيدا على مستشفى شهار بميلانو



تشاو

[c]
هلا والله وغلا أخوي عاشق السامبا ...

أخيراً كتبت اللي ما شفناه في مباراة فالنسيا والانتر !!!

لكن وين الانتر وروما !! اللي أراها أهم

____________[/c]

إقتباس استياء جماهيري تام من مدرب الفريق كوبر على عدم إشراكه للاعب المبدع ريكوبا وإحلال اللاعب كريسبو الذي لم يكن جاهز على الإطلاق لهذه المباراة نظراً لانقطاعه عن اللعب لمايقارب المائة يوم

[c]

والله أنا أرى مشاركة اللاعب كريسبو لابد منها .... وإبقاء ريكوبا كورقه رابحه خطه في مكانها

وبما أن الهدف أُحرز في بداية المباراة ... فمشاركة ريكوبا لا فائده منها - إلا إن أراد تعزيز الهدف بأخر[/c]

إقتباس تعرض مهاجم فالنسيا كاريو إلى استهجان جماهيري كبير نظراً لخشونته الزائدة

[c]

بالكلام فقط !!! و إلا حتى برمي العلب !!
[/c]

إقتباس الحمد لله مهوب لحالنا إللي عندنا تعصب

[c]
هههههه اليوفي بصراحه عقده للإنتر[/c]

إقتباس والله يازين خويكم وهو رابط شعار الإنتر على راسه ومسوي زحمة مع الجماهير الإيطالية لا والا لو شفتوه وهو ينفعل مع الجماهير ويناقز معهم على طريقة من دون كلام كان فطستوا ضحك

[c]
ما أقول إلا يا هنّيك والله حاضر مباراة للإنتر و في السان سيرو

------------- ما شاء الله -------------

تحياتي لك ..!
سديراوي
[/c]

مشكووووور حبيبي و يا حظك واللله <<<<<< >> لا ما عليك عيني باردة


وترى ننتظر منك يالغالي موضوع مباراة روما في شي ما شفتوه وتكفى ابغى تعليقات جماهير الانتر في السان سيرو عن المــــلــــك تـــــوتـــــي هل لديهم تعصب عدم احترام لنجومية الذئاب مثل مونتيلا بعد احرازه الهدف الرائع او كاسانو ...

ومشكــــــور مرة اخرى يالغالي ,, يعطيك الف عافية وتتهنى يالغالي في السانسير و ولا اوصيك تراك صرت قريب على روما رووح الاولمبكي لا تضيعها على نفسك

اشكرك عزيزي على هالموضوع الشيق ..
وياليت كل من سوى زيارة لملعب والا حضر مباراة عالمية يعطينا انطباعاته عن الملعب والجمهور زيك

إقتباس إقتباس من مشاركة عاشق السامبا - طبعاً أكيد كنت ناسي نفسي من الفرحة وأنا أناظر نجوم الإنتر وفالنسيا قدام عيني وفي دور الثمانية من التشامبيونزليج بعد لكن أكيد زعيمنا كان على البال وهو يلعب نهائي الكأس ويوم جت المسج بعد هدف الشلهوب مباشرة بغيت أصارخ بس أشوى اللي مسكت نفسي والا كان سيدا على مستشفى شهار بميلانو

والله لو يخيروني بين مباراة نهائي كأس العالم وتذكرة بالمنصة .. وبين مباراة للهلال عادية بالدوري بالتلفزيون كان أخترت الهلال وبدون تردد
فما بالك بمباراة للهلال على نهائي الكأس باستاد الملك فهد يجيب فيها الشلهوب هدف الفوز بالكأس برجله اليسار بالقول الايمن من تصويبة يسارية للمطيري بالدقيقة 35 من الشوط الثاني
خلهم يودوني لمستشفى شهار بميلانو والا مستشفى الامل بتورينو نوبربلم .. اهم شي اشوف الكاس بيد سامي ;)
<<== عنده حالة ادمان للهلال .. ويازينها من حالة



تقبل تحياتي ..
وبإنتظار مباراة الانتر وروما

حيالله سديراوي الإنتر والله

والله تمنيت إنك مخاويني كان شفت جنان رابطة جماهير الإنتر وهي صاجة الملعب طرب

أما بخصوص مباراة روما مدري والله إذا كان في شي يستاهل ينذكر والا إني وقتها ماني بصاحي أول مرة احضر لفرق عالمية لا وفي السان سيرو بعد, لكن الظاهر إني يوم مباراة فالنسيا كنت فايق وقتها ,,,

لكن أبرز مافي المباراة هو تذمر جماهيري شديد من ضياع الفوز بعد الحالة الهستيرية اللي اصابت المدرجات بعد تسجيل الثلاث الاهداف المتتالية,,

والله حقدت على نفسي إني ماني فاهم وش يقولون والا أنواع السب واللعن وكان لدي بياجيو وكوبر الغبي نصيب الأسد منها بعد التغيير الأحمق باخراج ايمري وادخال مورفيو وتسليم روما زمام المباراة

إقتباس والله أنا أرى مشاركة اللاعب كريسبو لابد منها .... وإبقاء ريكوبا كورقه رابحه خطه في مكانها

اوكي.. لكن ممكن تقول لي وش سوا كريسبو في المباراة ؟

وكم هي عدد الهجمات الخطرة اللي سنحت للانتر باستثناء هجمة كونسيساو
ماذا عمل الانتر بعد طرد ايمري ؟؟؟؟؟؟؟؟

كريسبو وفييري معزولين تماما في المقدمة ولسان حال زانيتي يقول ( يد وحده ماتصفق! ) في ظل تخبط خط الوسط دي بياجيو وكونسيساو(واوكان) وكريستيانو زانيتي

اوكي خله يبدأ بكريسبو, لكن منطقيا شوط واحد بس (يا ناس الرجال كان مصاب ومنقطع عن اللعب اكثر من ثلاث اشهر لا ويلعبه اساسي في مثل هالمباراة الهامة) وكان من المفترض انه يباغت فالنسيا في الشوط الثاني بريكوبا اللي ممكن يسوي اي شي بمجهود فردي

لكن ما علينا اشوى اللي انتهت على خير ولو اني اشوف ان فالنسيا قادر على التعويض في المباراة الجاية

ومشكور على الرد حبيب ألبي


عزيزي الغالي توتي10

إقتباس تكفى ابغى تعليقات جماهير الانتر في السان سيرو عن المــــلــــك تـــــوتـــــي

حبيبي تبي الصراحة عاد,, والله ماحد يقدر يتكلم في الملك لا في السان سيرو ولا في غيره وترى جمهور الانتر راقي والله ولاحظت انه ما يتعرض لأي لاعب إذا ما بدر منه أي تصرف غير لايق

إقتباس ولا اوصيك تراك صرت قريب على روما رووح الاولمبكي لا تضيعها على نفسك

أخوي والله ماتفوتني فرصة مثل هاذي
لا وأزيدك من الشعر بيت, صباح الخميس (اليوم اللي بعد مباراة فالنسيا) أنا في روما لأن عودتي للسعودية كانت من روما يوم الجمعة وكنت على أمل أني أحضر مباراة لاتسيو وبورتو اذا كانت هناك لكن للاسف انصدمت ان المباراة في البرتغال

وألف شكر على الرد ياغالي وبالتوفيق للذئاب


ياهلا باستاذي هلالي الجوف

إقتباس والله لو يخيروني بين مباراة نهائي كأس العالم وتذكرة بالمنصة .. وبين مباراة للهلال عادية بالدوري بالتلفزيون كان أخترت الهلال وبدون تردد

والله يا عيوني لو انك حاضر مثل هالمباريات ماكان قلت هذا الكلام,,

لكن مافي شك زعيمنا اهم من اي شي لكن وش تقول العين بصيرة واليد قصيرة, مغترب ولا ادري كيف ممكن اتابع الزعيم لكن لو جاتك الفرصة ابي ردك وقتها

وألف شكر على الرد


;) ;)

مشكوووووور يالغالي عاشق السامبا ,,,, على الرد السريع و المتابعة المستمرة ماشالله عليك


اما عن الملــــك تــــوتــــي >>>> طبعا هذا اللي المفروض يصير فهو نجم كبير و اهم عنصر في الازوري حاليا