-




صبحهم بـ الخير نفر نفر

مبروكين يا زعماء الانتصار الثمين واللي جاء بوقته خصوصاً بعد خسارة نوريتش المُرّة
فوز رجع لنا المعنويات . واستعاد لنا بعض من ثقة اللاعبين
اللي نحتاجهم للفترة الجاية . واللي بدون اي شك اصعب من الفترة اللي راحت

مباراة اليوم اكتسبنا فيها عدة اشياء
منها عودة اندو لمستواه الرائع . وتحسن وضعنا الدفاعي ( نوعاً ما )
غير هذا عودة الداررررررين لمستواه المعهود
رغم انها اول مباراة له كأساسي في البريمر

في الشوط الاول عانينا كثير خصوصاً وان روني ما كان بفورمته بالشوط الاول
وعانينا من الاطراف اللي كانت نقطة قوتنا هالموسم
واتضح لنا انه مهما كان فالنسسيا سيء الا انه يبقى احد اسباب قوتنا
خصوصاً بعد ما شفنا اليوم الفريق وكأنه بلا اي حلول هجومية وتحديداً في الشوط الاول

ما علينا . شوط اول كان للنسيان . وكان الفريق في حالة ارتباك رهيبة
ومستعجلين على الهدف وكأن هالمباراة هي نهاية الدوري
ولا ادري وش سبب هالاستعجال اللي ماله داعي

كنا بنلقم اكثر من هدف لولا رحمة الله وكنا في حالة ضياع رهيبة

في الشوط الثاني لقمنا هدف من البداية ( ولله الحمد انه كان في البداية )
لانه لو كان هدفهم متأخر شوي ما كان تحرك السير
ولا كان شفنا تبديلاته اللي حركت الفريق للافضل

بعض اللاعبين بهالمباراة بشكل عام ما عجبوني . ثقة زايدة وعدم احترام للخصم
خصوصاً ( سكولز ) اللي استغربت برودته الزايدة اليوم وتحركاته البطئية اللي كانت عالة على الفريق

للامانة سكولز له مكانة بقلبي غير عن كل اللاعبين الموجودين
لكن ما يمنع هالشيء من قول الحقيقة

سكولز بالاسبوعين الاخيرة كان من اسوأ لاعبين الفريق
والاسباب مجهولة
مع العلم ان سكولز اكثر لاعب ريحه السير بأكثر من مباراة
يعني مستواه السيء ماله اي تبرير خصوصاً وانه لاعب خبره
والجمهور حاط الامل كله عليه بمعية روني وبيرسي وباقي اللاعبين المهمين

اتمنى من سكولز يراجع حساباته شوي
ويشوف وش اسباب ضعف مستواه هالفترة
خصوصاً وان الفريق يحتاجه وبدأت المباريات تضغط الفريق اسبوع ورى اسبوع

على كل حال مباراتنا الجاية صعبة
وضد فريق صعب وعنيد
الهامرز فريق ما يخاف ويحب يلعب قدام الاندية الكبيرة
وعنده ثقة رهيبة خصوصاً خارج ملعبه اذا لعب ضد اي نادي كبير
لذا كلي امل ان السير يدخل المباراة بافضل تشكيلة وبدون اراحة اي لاعب
عشان ينهيها من بدري ويقتل حماسهم المتوقع

تحياتي . ومبروكين مرة ثانية