تشخيص متكامل عن لاعبي الهلال......وانت الحكم
الحراسه:
• الدعيع: من بعد 8 المانيا والراجل مو طبيعي, كانه لسه مو مصدق انه اكل 8 في مباراه ودرزن في تلاته مباريات, ما نقول انه سنه كبير بالعكس حارس المرمى كل ما كبر بالسن يكون احسن بشرط انه اللياقه تكون عاليه,والدليل انه سيمان حارس ارسنال و كان حارس بايرن ميونيخ وغيرهم كلهم كبار بالسن. بس المفروض انه ياخذ اجازه طويله عالاحتياط. ايوه ياخد اجازه ليش لا؟ حراس عالميين غيره لما مستواهم ينزل يجلسوا احتياط حتى لو كان الحارس الاحتياطي مفلت. مثلا كاسياس حارس ريال مدريد لما مستواه نزل قبل مده جلس احتياط ولعب بداله الاحتياطي سيزار. والاخير جاب العيد في اكتر من مباراه للريال وسوى افلام هنديه كتير وخسر ريال مدريد اكتر من مباراه. وبعدين رجع كاسياس اساسي وصار مستواه احسن من اول. وبرضه بارتيز حارس مانشستر يونايتد احيانا يتركن احتياط وبعدين يرجع احسن من اول. وبعدين لما الواحد يحس انه مافي منافس له في المركز حيلعب من غير حماس. ومن ايام البطوله الخليجيه الاخيره وكل مباراه هدف على الاقل في الدعيع .ايش معناها؟؟لازم اجازه للدعيع عشان نستفيد منه في المستقبل
• ضاري: ضحية الاحتياط. والله انه ما عنده حظ. يوم مباراة الاهلي الاخيره لما قالو حيلعب ضاري كلنا قلنا الله يستر منه.بس الراجل ابدع وصد كذا هدف. يعني يحتاج فرصه وشوية ثقه.
• العتيبي: هذا الموسم مصاب وانشاء الله نشوفه السنه الجايه. وصل للمنتخب وكان مبدع قبل ما يجي الدعيع. بس جاء الاخير والراجل زيه زي اي كرسي في الاحتياط. لو ماكان حارس ممتاز ما كان فكر النثر ياخده مننا قبل كم سنه. يبغاله فرصه زي ضاري
• الماس: حارس فله. في الجرايد قبل ما يلعب في كاس فيصل سمعت عنه ولما شفت لعبه قلت الراجل ده مو حارس مرمى...والاهداف السينيمائيه اللي جات فيه تشهد والمفروض انه يمشي
استنتاج:
المفروض كل الحراس ياخذوا فرصه ويكون في تصنيف للمباريات مثلا المباريات القويه يلعب فيها الحارس المتفوق في التمارين والمباريات العاديه اللي قدام الفرق الوسط وما تحته ياخد الاحتياطي فرصته بدل ما يجي يوم ما نلاقي ولا حارس عدل ونلعب المسعري حارس!
الدفاع:
• الدوخي: اخر مره رفع كوره وجات هدف يوم مباراة السعوديه وتايلاند في الرياض 4-1 والرفعه حطها الجمعان بالراس هدف. ومن بعدها الراجل بيصيد حمام في المدرجات. واللي انظلم في المنتخب محمد شليه لما صار شليه احتياط والدوخي اساسي بغض النظر عن مستواه والبركه في الجوهر!! يا ساده الدوخي بيلعب من غير مستوى ولازم يذوق الاحتياط ويا ريت يتعلم من كانشلسكس كيف الناس ترفع الكوره للمهاجم مو للأوت!!!
• الشريده: لاعب محترم بغض النظر انه خشن او لا.يلعب وقلبه على الفريق ولاحظوا اذا واحد غلط في الفريق وخصوصا في الدفاع الشريده يصرخ عليه. سنه كبير مو مشكله بس لازم يلعب جنبه قلب دفاع شاب. كل الانديه اللأ روبيه لما يكون قلب الدفاع كبير في السن يحطوا جنبه مدافع شاب منها عشان يكون ذو حركه سريعه ومنها انه يتعلم من خبرة المدافع الكبير
• سليمان:كان اسمه الراداربس شكله يبغاله صيانه دوريه. يمكن بيلعب تادية واجب او انه متاثر ب 8 المانيا او انه مهو منسجم في الرياض؟ في مشكله بسيطه لو تتحل حيرجع رادار صاحي وكلنا فاكرين انه كان يهجد اقوى المهاجمين واولهم الايراني دائي
• خليل:احيانا لما يسرح يجيب العيد. ممتاز وطويل ماشاء الله وينفع يكون مدافع مساك اذا مهاجم الخصم طويل وينفع يكون قشاش ويعرف يلعب كور اماميه للهجوم وكلنا فاكرين الكورتين اللي رفعها للمحمدي والمشعل في كاس الخليج الاخيره قدام قطر وجات اهداف. يبغاله شوية تركيز وجديه في اللعب
• المطيري:ايش اول خانه لعب فيها ؟؟؟قلب دفاع مع منتخب الناشئين واظن الشباب...بس ما ينفع قلب دفاع مع الكبار لانه قصير. راحو حولوه ظهير ايسر. مادري اي واحد في الهلال ماله خانه فاضيه يحطوه ظهير ايسر...كانه الخانه دي كمالة عدد؟؟؟؟ثبتوه قلب دفاع احتياط مو اساسي لانه هذا مركزه او بيعوه ينوبكم في جمهور الهلال ثواب!!!
• النزهان: مفتقد ينه من زمان. اصلا هو ظهير ايمن و لعبوه ظهير ايسر!!!!الراجل ما قصر ومستواه اتحسن خصوصا بعد ماكان هوه سبب هدف الشيحان في الهلال في نهائي ولي العهد وخسرنا الكاس لانه ما قدر يلحق الشيحان. لعبوه وسط ايمن وشويه ايسر ياريت تختاروله مكان واحد يلعب ولا تحسبوه جوكر زي زيدان
• الجري والحوطي: ظهيرين ايسر وايمن اعطوهم الفرصه وحيكونو مكسب لنا في المستفبل
• لطف: كان يوم اغبر لما يوم ما لعب ظهير ايسر. وبالتالي خسرنا وسط ايسر فنان. فاكرين هدف الثنيان في الترجي التونسي في البطولة العربيه واهداف المنتخب في كاس اسيا للشباب كلها من تمريرات لطف وكان مدرب منتخب الشباب ايفو يعتمد عليه في منتخب الشباب في صناعة اللعب وكان يمرر للغشيان كور رهيبه!!!!!بس جلس ظهير ايسر وحاول يسوي شي لكن ما نفع وضاعت موهبته..لا ونسقناه ورجعناه؟؟؟؟ايس فيه؟؟؟
• المفرج:نفس الحكايه ظهر ايام منتخب الناشئين والشباب وكان الكابتن ولعب مع الشريده وكان ممتاز بس لما جا خليل وسليمان اتعقد...ومر على الظهير الايسر وما فلح.....اعطوه فرصه يكون قلب الدفاع وفاكرين يوم ما مسك ماجد لما لعبنا قدام النثر وقطع عنه المويه والكهرب والتلفون!!!
استنتاج:
صار دعاء كل هلالي: يارب نلاقي ظهير ايسر!!!!
الوسط:
• نواف: ليش ما خليتوه يحترف في اوروبا؟؟؟خلوه يروح يحتك بالناس الصح واذا ما نفع رجعوه. لو استثمرناه كان كسبنا شوية ملايين وكان رقعنا بعض الخانات اللي ما عندنا احد فيها(ما حقول الظهير الايسر لانها صارت ممله) كمان جاته اصابه ولسه بعيد عن مستواه..اتمنى انه يرجع بسرعه زي ما كان
• شلهوب: مارادونا الهلال والمنتخب. يلعب من قلبه بس الجوهر قتله وكان يلعب المحمدي في كاس اسيا 2000 ولما رجع الشلهوب وصلنا للنهائي.منسجم في المنتخب مع المشعل وفي الهلال مع سامي ونواف بس يبغاله ينسجم مع اي مهاجم معاه ويفهم اسلوب المهاجم في اللعب عشان يقدر يموله بالكور
• عزيز:الله يرحم ايام خميس العويران.مجتهد ما نقول لا بس بيلعب وشبح خميس وراه يبغاله تركيز ولعب سريع وتمرير صح وانشاء الله يفلح
• الغامدي: يوم ما يلعب يكون فنان ولما يتنح يتنح صح.قدام شيميزو الياباني كان عاله عالفريق. من لحظة ما خرج ودخل المطرف مررها للشلهوب واترفعت لسيرجيو وجا التعادل.هوه احسن واحد يلعب محور خلفي زي خميس بس لا يفكر يصنع لعب او يهاجم
• الحربي:خامه ممتازه وصغير في السن ويبغاله يتعلم من نواف وسامي والشلهوب ويحدد من الان ايش المركز اللي يبغاه بدل ما يلعب كل يوم في مكان زي الحجاج
• الخثران:وسط ايسر والله العظيم مهو ظهير ايسر . احيانا يتنح وينام كانه متفرج واحيانا زي النحله. حددوله مركز زي خلق الله خلو الرجال يلعب ويحلل الفلوس اللي اندفعت فيه
• الصالح:كان ممكن يكون نجم المستقبل بس اتعقد بعد ما رجعوا لعيبة المنتخب.صانع لعب ايمن هوه مركزه الاساسي وياريت يتعلم من نواف شويه
• البرقان: والله العظيم فنان. شفته ربع ساعه ايام كاس فيصل وحسبته محترف اجنبي. يلعب زي الواكد يرفع راسه ويكشف الملعب وواثق من نفسه وعنده مقدره انه يكون كابتن. يلعب في منتخب الشباب وتراه خامه ممتازه احسن من سامي شاص الل كنا حنشتريه بملايين.
• فاضل العلي: ليش سجلتوه لما ما تبغو تلعبوه؟؟؟كاننا بنجمع طوابع!!!
• المسعري: بلاتشي رجع وسجله...ياريت يمسك الباب زي بلاتشي
• المطرف: انظلم لان الشلهوب غطا عليه واخد فرصه والمطرف لا...خلوه يمكن نستفيد منه بعدين
استنتاج:
وسطنا لياقته مش ولا بد ولازم المدرب يركز على رفع مهارات البعض وزيادة جرعات التكتيك والتفاهم مع خط الهجوم اللي يجيب اهداف بالقطاره
الهجوم::
سامي: من مباراة المانيا والراجل مو طبيعي زيه زي الدعيع. مره مصاب ومره اعتزل اللعب الدولي ومره........المهم انه يتعالج ويتعلم انه اللي يخدم الكوره تخدمه واللي يلعب على سمعته زمان ما حيستفيد ولا حيفيد.ياريت يرجع زي زمان المهاجم اللي يخوف المدافعين
الجمعان:مادري مين قاله ان الهلال ما يقدر يستغنى عنه؟هوه يانه اهبل يا بيستهبل!!!!!المفروض الاداره تحجزله عند دكتور العيون؟؟؟والله العظيم فاضحنا بالتصويبات الحوله حقته..رجله قويه ماشي بس ايش فايدتها؟؟وكل مباراه مهمه كرت احمر وضرب للمدافعين ويضيعلنا الوقت واحنا مهزومين؟؟؟يعني هوه قد كده ضامن الخانه عشان الامير اللي داعمه هوه والدوخي؟؟؟شوفوله حل الاحول ده ولا بيعوه وجيبو واحد يعرف اتجاه الباب من فين
• العلي: مشروع مهاجم زي سولشيار مهاجم مانشستر يونايتد بس فشل لانه مو عارف في كل مباراه حيلعب ولا لا. الجوهر ما اخده في المنتخب مع انه كان جايب 15 هدف السنه الماضيه زيه زي سيرجيو وادميلسون يعني هداف الدوري. يوم في السما ويوم في الارض وحبه فوق وحبه تحت!!
• الخراشي: 2 رباط صليبي؟؟؟ايش هذا النحس؟؟؟الله يفك عنه النحاسه وما يجيله رباط صليبي ثالث!!
استنتاج:
الهجوم ككل ضعيف والهدف يجي بطلوع الروح...ليش؟؟؟؟؟؟؟؟؟؟
الاجانب:
بدرا: صديق الكروت ويفكرنا بالطيب مصطفى ادريس....والله توليو كان افضل منه عالاقل ما يعرف الكروت الملونه...رتمه بطيء ويموت اللعب بحركته...ياريت نمشيه
كانشلسكس: فنان فنان فنان بس نظرية كل شويه ارفع ما تنفع وياريت عندك راس حربه صح.ياريت يتعلمو منه اللعيبه كيف الواحد يرفع الكوره للمهاجم مش للمدافع. ممكن يكون هوه ونواف ثنائي زي لما كان نواف وسوزا ثنائي حلو
سوفو: مهاجم عادي وادميلسون كان احسن منه مع انه اكبر من سوفو في السن.....لما يخلص الموسم يا ريت يمسك الباب!!!!!
متفرقات:
• تعرفو ليش ساب ريفالدو برشلونه؟؟؟لانه المدرب يلعبه في خانه غير خانته. ايش نستنتج؟؟ انه اللاعب لازم يكون عنده شخصيه ويعرف فين ممكن يلعب ويقدم شي. مش لما المدرب يقوله يمين يمشي يمين. يسار يمشي يسار. المفروض اللاعب ما يكون طرطور للمدرب لانه المدرب ما حيخسر شي واللاعب لما يلعب في خانه غير خانته ويفشل ما حيقولوا المدرب فشل لا حيقولو اللاعب فشل!!!!!!!صح ولا لأ؟؟؟؟؟
• ايش اخبار مواهب مدرسة الهلال؟؟؟؟؟لم ينجح احد
•
وسامحونا على التقصير.......ومرحبا باي رد
يزيد جده الهلالي
الوضع العادي
