[c] [/c]
[c]شبكة الزعيم - خاص
تغطية وحوار : محمد أبولما - منادي
تجهيز وتحميل ملفات الصوت : ياقاهرهم ياسامي
تجهيز وتحميل صور اللقاء : الوليد- الإعصار
تفريغ اللقاء : اللهلوب[/c]
[c]للإستماع للجزء الأول إضغط هنا [/c][c]للإستماع للجزء الثاني إضغط هنا [/c] [c]للإستماع للجزء الثالث إضغط هنا [/c]
[c]نرحب معنا في شبكة الزعيم بصاحب السمو الملكي الأمير عبد الله بن مساعد ، سمو رئيس الهلال في هذا اللقاء المختصر. [/c]
[c]هلا و الله بشبكة الزعيم. [/c]
[c] [/c]
[c]طال عمرك الجماهير بعد تصفيات العين، تريد أن تعرف ماذا حصل في العين، و ما هو الجديد بالنسبة لفريق الكرة ؟ [/c]
[c]
و الله طبعا كانت الفرصة ممتازة للمدرب إنه يتعرف على اللاعبين في مباريات مهمة و هو في بداية التمارين، و يقيم مستواهم، و إن شاء الله لاحظنا إنه فيه ارتفاع في المستوى في بطولة مجلس التعاون عن قبلها يعني باستثناء المباراة الأخيرة اللي كان اللاعبين فيها مرهقين و ما كان لهم أمل كبير، ما كانوا مقتنعين إنه العين حينهزم في المباراة الثانية. فإن شاء الله إنه فيه تحسن، بإذن الله يبدأ يظهر التحسّن في مباراة القادسية إن شاء الله. [/c]
[c] [/c]
[c]طال عمرك هل هناك أي احتجاج من نادي الهلال على اللاعب سيرجيو ؟ [/c]
[c]
حنا طبعا حسب نظام البطولة، كان قال لي فهد بعد المباراة إنه فيه عندنا ساعتين نحتج فيها، و انت عارف إنه أثناء الساعتين كانت المباراة اللي بعدنا ما انتهت، احنا احتجّينا على سيرجيو لأننا ما كنا ندري عن نتيجة المباراة الثانية، و لو قبل احتجاجنا نعتبر فايزين على السد، و بالتالي كان ممكن لو العين تعثّر، يعني يكون الهلال هو المتأهّل. اللي حصل طبعا إن العين ما تعثّر، فإذا قبل احتجاج الهلال، الحالة الوحيدة اللي ممكن يشارك فيها الهلال هو إن العين يعتذر، و هذه حالة مستبعدة للغاية لكن ما يدرى وش يحصل، ما أعتقد العين بيعتذر يعني. [/c]
[c] [/c]
[c]
لكن ربما العين يعتذر يعني يمكن، المفروض الهلال ما يضيّع أي ... [/c]
[c]
مادري و الله يعني يمكن تحصل، تعرف يعني هذا احتمال أقل من واحد في المليون، لكن احنا لما احتجّينا ما كنّا ندري عن نتيجة مباراة العين. و أنا قلت لفهد طيّب ليش ما نحاول حتى لو أخّرنا عن ساعتين، قال النظام أوّل شيء ساعتين—أنا ما قريت الفقرة حقت ساعتين، بس على حسب كلام فهد: قال إنه لا حتى افرض إنه حنّا دارين إن العين حيفوز اليوم، يمكن العين يعتذر لأي سبب من الأسباب، [/c]
[c] [/c]
[c]إذن الهلال لم يقدّم احتجاج ؟ [/c]
[c]
على سيرجيو ؟ إلا قدّمنا احتجاج. [/c]
[c] [/c]
[c]
سمو الأمير بعض الجماهير طالبت بإيقاع العقوبات على بعض اللاعبين المقصّرين، ما تعليقك على الكلام هذا ؟ [/c]
[c]
و الله أول شيء أبقول لك شيء، ودّي أقول نقطتين مهمة: أوّل شيء إن اللاعبين الموجودين عندنا الحين هم اللاعبين اللي حنكمّل فيهم الموسم، فيجب نعاملهم على هذا الأساس، يعني ما نقدر نستبدل اللاعبين الموجودين بأي لاعب آخر. الشيء الثاني أنا عندي ثقة إن اللاعبين الحاليين إن شاء الله ممكن يفوزون إن شاء الله في كأس ولي العهد و الدوري، إذا توفقنا. فإذا كان فيه عقوبات على أي لاعب، حتكون بيننا و بين اللاعب – يخصم من راتبه، و يحصل دائما خصومات بس ما نعلن عنها ما أشوف فيه مصلحة من إعلان العقوبات هذه. [/c]
[c] [/c]
[c] [/c]
[c]بالنسبة لتصرّف عبد الله الجمعان، الّذي حصل في المباراة الأخيرة، ما هو تعليقكم عليه؟ [/c]
[c]
و الله أنا أعتقد إنه عبد الله ضرب الكورة ما ضرب اللاعب، و اللاعب مثّل، لكن المفروض عبد الله إنه ما يعطي الفرصة للحكم، و يحرج الفريق بهذا التصرف، لو ضاعت عشرين ثانية زيادة و لا انطرد، تشوف الهلال كان ضاغط قبل ما ينطرد عبدالله الجمعان، فأتمنّى إن عبد الله يكون أعقل من كذا في المباريات الجايّة، عشان هو لاعب يعني يستفيد منّه الفريق. [/c]
[c] [/c]
[c]هل سيقام عليه أي عقوبة، ستكون معلنة أو ستكون مثل العقوبة الماضية؟ [/c]
[c]
إذا كان فيه أي عقوبة على عبد الله، فتكون بيننا و بينه. [/c]
[c] [/c]
[c]طيب طال عمرك بالنسبة للمباريات المقبلة، أتصور أنها كلها نهائيات، بالنسبة لتصورك لها و تصور اللاعبين. هل سيكون فيه تغيير في التشكيل، أو ستستمر تشكيلة العين ؟ [/c]
[c]
و الله ما أدري التشكيلة طبعا المدرّب هو اللي يقررها، أنا متفاءل إن شاء الله في مباراة القادسية، بإذن الله نفوز في أول مباراة، و بعدين عاد نمشي في كاس ولي العهد، أما بالنسبة للتشكيلة فزي ما قلت لك المدرب هو اللي يقرر. [/c]
[c] [/c]
[c]حتى ظهور بعض البطء الواضح في خط الدفاع و كذا، ما ستكون هناك مساءلة إداريّة للمدرّب ؟ [/c]
[c]
و الله لا بد أتناقش معاه، و النقاشات هذي يعني تكون بيننا و بين المدرّب، يعني مثلا المدرّب إذا انتقد لاعب و الا قال له شيء مو معقول بنعلن عن الأشياء هذي، لكن يعني لازم يكون عند الجمهور ثقة في المدرّب و في الإدارة، و لو إنه هذا قرار المدرّب إنه يلعب و إنه ما يلعب، و إن شاء الله بإذن الله إنه يتوفق في الفترة الجاية. [/c]
[c] [/c]
[c] [/c]
[c]إن شاء الله، بالنسبة للمدرّب عقده 3 شهور أو 15 شهر ؟ [/c]
[c]
15 شهر [/c]
[c] [/c]
[c]سمو الأمير، خلال تصفيات العين ما تقييمك لعمل المدرّب ؟ [/c]
[c]
و الله أحس إن المدرب مدرب كبير و ممتاز و متفهّم و ذكي، و انا كنت اليوم أقرأ بعض الانتقادات اللي على المدرب مثلا ناس انتقدوه في مباراة الاستقلال ليش غيّر نواف التمياط، طبعا نواف التمياط هو اللي طلب التغيير، و انتقدوه في المباراة الثانية ليش غيّر نواف التمياط برضه، نواف التمياط في المباراة الثانية أنا اللي مغيّره، أنا قلت للمدرّب بعد ما جاء الهدف الثاني في الهلال و ما بقى وقت كثير، قلت للمدرب خل نفكر في مباراة القادسية الحين، خلاص المباراة هذي يعني لو تعوّر لا قدر الله نواف خاصة نواف كان زي ما قلت لك المباراة اللي قبلها تعبان بالصدر، اقترحت على المدرب إننا نغير نواف في المباراة الثانية، قال لي أبفكّر و بعد شوي غيّر نواف. فيعني ما ودّي يقيمون المدرب على التغييرات، لأنه خاصة ما يعرفون خلفية التغييرات هذه. المدرب أنا أعتقد إنه إن شاء الله حيكون مدرب ممتاز بالمرة، مدرب منظم، و مدرب تفكيره منظم، و عمل تحضيراته، و يعني أنا أقارن مثلا بينه و بين بلاتشي، و بلاتشي برضه مدرب ممتاز، يعني مثلا لو تشوف كيف يحضر للمباراة، فيه أشياء كثيرة و تفاصيل تحس إن المدرب هذا مرة ممتاز. [/c]
[c] [/c]
[c]سمو الأمير، في الحديث عن لقاء القادسية سمعنا إنه الإدارة الهلالية طلبت نقل اللقاء إلى الرياض، هل هناك صحة في هذا الكلام؟ [/c]
[c]
القادسية بلّغونا إنهم عندهم استعداد لنقل المباراة للرياض إذا عرضنا عليهم عرض مناسب، و احنا عرضنا عليهم عرض نعتقد إنه مناسب و ما وافقوا عليه، طلبوا أكثر منّه، و حنا تمسكنا بموقفنا، إذا تمسّكوا بموقفهم و هذا هو الغالب، حتكون المباراة بالدمام، و حنا إن شاء الله عندنا ثقة بالفريق في الدمام و في الرياض. [/c]
[c] [/c]
[c]سمو الأمير إحدى الصحف ذكرت اليوم أن الإدارة الهلالية رفعت العرض إلى 180 ألف ، مقابل نقل المباراة للرياض، و الإدارة القدساوية في طريقها للرفض، ما صحة هذا الكلام ؟ [/c]
[c]
بس ما عرضنا 180 ألف، عرضنا مبلغ أقل من هذا بكثير. [/c]
[c] [/c]
[c] [/c]
[c]بالنسبة لبعض الأسماء، كانت أساسية لفترة بسيطة و الآن خارج التشكيلة، مع أن الضعف واضح و أنا أقصد بالذّات اللاعب أحمد الحربي، هناك بعض الهبوط في مستوى لاعبي الوسط، فلماذا لا يتم إشراكه حتى يشاهده المدرب ؟ [/c]
[c]
المدرب يبي يسوّي بكرة تقسيمة يشوف فيها كل اللاعبين. و أنا زي ما قلت لك أنا أحب أشرح للمدرّب، فأنا تكلّمت معاه عن الحربي و تكلّمت معاه عن أشياء كثيرة. و المدرّب آخر شيء القرار النهائي له، ما ودّنا حنا يعني نضع التشكيلة للمدرب أو نجبره يشرك أحد، ما يرضى هو بالشيء هذا، و لا حنا نرضى. [/c]
[c] [/c]
[c]سمو الأمير جماهير الهلال في المنطقة الشرقية تستعد لتكوين رابطة جماهيرية و ذلك خلال إعلان المجلس الجماهيري في المنطقة الشرقية في شبكة الزعيم. كلمتك للجمهور في الشرقية. [/c]
[c]
و الله جمهورنا في الشرقية جمهور مهم بالمرّة، و نتمنّى بالمناسبة إنهم يساعدونا كثير في مباراة القادسية أكثر مما ساعدونا في مباراة الاتفاق، على إنه جمهورنا اللي في الاتفاق، أكثر من جمهورنا اللي يحضر الحين في الرياض. بصراحة جمهور الرياض أنا زعلان منّه بالمرّة، ودّي جماهير الهلال برضه تشوف جماهير الإتحاد لمّا يلعب في جدّة، ووشلون الدعم اللي ياخذه من الجمهور، بل حتى يعني النصر مع الشباب كان حضر جمهور النصر. و جمهور الهلال جماهير كبيرة، و الهلال أنا أعتقد إنه أكثر نادي شعبية بالمملكة، لكن لازم الجمهور يورّينا كذا، يعني أذكر لك قصة: كنت أنا على الإنترنت وورّيت لكانشلسكس و سوفو صورة فيها جماهير الهلال حاضرة كثير، يعني ما صدّقوا إن الهلال يحضره جمهور زي كذا، فكّروا إم جمهور الأجانب من جمهورنا، احضروا المباريات الجاية. [/c]
[c] [/c]
[c]ماهي كلمتكم طال عمرك لجماهير الهلال عبر شبكة الزعيم ؟ [/c]
[c]
و الله ادعوا لنا إن شاء الله، و بإذن الله إن شاء الله يكون لنا نصيب في كأس ولي العهد و الدوري إن شاء الله. [/c]