انا الحين قاهرني هذا الفيس بوك .. مدري كيف الله بلاني به وسجلت .. بس كذا حسيت ان كل مبتعث ولازم يصير عنده فيس بوك ويكشخ فيه .. والحق لله ماكنت اشارك ولا اكتب شيء ولا ادخله اساسا الى ان رحت ايرلندا وداومت اول ايامي بذاك المعهد وصراحه اول مره يصير عندي زميلات يعني بنات حقيقيين مو مزح مثل اللي بالفيسبوك والمنتديات .. المهم على بال مااتعود عالوضع يبيلي وقت ، تعرفون تغيير انظمه بكل شيء ويتكلمون انقليزي في كل مكان وحسيت مالي داعي لازم اشد حيلي بالانقليزي عشان اخذ واعطي .. ثاني اسبوع سألت لورا << مدرستي عمرها واحد وعشرين .. انا اكبر منها بسنتين ، وسالتها عشانها بجيلنا الجديد المتفتح مو مثل يوم أسأل عجوز ولا شايب .. الحاصل اني قلتلها بالله وش يخليني اتعلم انقليزي صح؟ << بالله من كيسي ... المهم انها قالت شف .. مافي مثل الاحتكاك ، بكل مكان تكلم حتى لو تخابط وتفحط محد بيضحك عليك .. شيء ثاني ، دايم نعطي الكمبيوتر النصيب الاكبر من اوقاتنا .. تعرّف على انقليزيين واحلى محادثات معهم فيس بوك مثلا سكايبي شف لك صرفه عاد ..



انا صرت ( شوي ) متعود على الاجواء الجديده بالمعهد الا سالفه البنات يعني مثلا اول اسبوع وثاني اسبوع اذا جات بنت جنبي بالفصل تجيني ام الركب بس على خفيف لاني جالس .. عاد سبحان الله البنات تسعين بالميه اوروبيات يعني فل كاااامل جمال وزييين يروع .. غالبا من اسبانيا وايطاليا .. وكانت تواجهني مشكله ..
اذا مثلا طلعت بالبريك ( خمسطعشر دقيقه ) للكوفي والشاهي والراحه بين الدروس كنت احصل شله اسبانيين يتكلمون مع بعض .. ايطاليين يتكلمون مع بعض .. برازيليين يتكـ ... حااااله قسم بالله لو فيه شله تتكلم انقليزي شيء حلووو يمديك تقط وجهك معهم لكن ذووول وش الحيله معهم .

المهم عشان ماتكثر بربرتي جا يوم .. وكان يوم بتودعنا فيه بنت اسبانيه خلصت كورسها وبتمشي لاهلها .. قبل لاينتهي الدرس قالت أحمد ... قلت هلااا .. قالت عندك فيس بوك نتواصل وكذااا ؟؟ قلت بقلبي .. (لو ماعندي يلللعن أبو اللي مايخترع لك فيس بوك ) .. يازييينها زيناااه تجيك الناس تزحف .. قلت اكيد ويشرفني .. هذا اسم حسابي وسوي لي اضافه .. اخذت الاسم وودعتنا ومشت .

طبعا كان باقي ساعتين بالنسبه لي وينتهي الدوام .. وانا من وقتها مااجمّع شيء ابي اروح البيت وبفتح الفيس بوك مدري ليييه حاس اني من زمان مافتحته يمكن أبو خالد ذاك اللي تعرفت عليه بالنت يسأل عني ولا ياورد ليه تجرح حاط خواطر جديده .. يااااربي مدري ليه فيني شوووق لهم ..



فتحت الفيسبوك ولقيت جايتني اضافه جديده <<< منها طبعا .. وحسيييت من يومها اني ماشي على نصيحه لورا صح ..

بديت اطور حسابي وسويت تنقيح للصور عندي ..صور ولد عمي كلللها شلتها وازاله .. هو صراحه مو مررره مرره جننننط .. لآآ .. يعني جنط بس ... وصوره بنت اختي يوم تتشقلب بمجلس الرجال حذفتها لانها كانت لابسه فستان ولابسه تحته سروال أبو خط ذااك .. صعبه شوي صراآحه . الحاصل اي شيء حسيته يفضح شلته .. والاصدقاء ( الأجانب ) مع مرور الايام صاروا يتكاثرون .. وصرت اهتم كثييير بالفيس بوك واتواصل معهم بالانقلش .. وحسابي وبشكل مستمر دايم اسوي له تلميييع ونظافه واحلى عنايه .. حتى صار الفيس بوك جزء لايتجزأ من أعمال اليوم ....

وهم اصلا .. طبيعه حياتهم <<< أي الاجانب ... حياتهم معتمده (أقدر اقول) بشكل شبه كلي على التواصل الالكتروني .. عشان كذا ضعف عندهم التواصل الحقيقي وجه لوجه .. يتطمن الواحد على أمه بالفيس بوك .. يسأل عن اخته .. عن خالته .. اخوانه .. على الفييس بوك دايم ..

والله ياجماعه الخير عجوز .. وربي عمرها ثمانين وحضرت عيد ميلادها الثمانين بما اني كنت ساكن معها .. بغيييت أنهبل يوم شفت عندها لاب توب .. لآآآآ ومن شركه ( Apple ) بعد .. تفتح اللاب توب وتعرف تفتح الفيس بوك .. وتتواصل مع اقاربها عن طرييقه ..


بنت أسبانيه .. عمرها ثلاثين .. حرام تحزن خابرها لها كم يوم تبي وظيفه عندنا بايرلندا لانها ميييييته عالحياه هنا وتبي ترجع .. قبل كم يوم تقولي تكفى دور لي وظيفه من هنا ولا من هنا .. هذي ( أطال الله بقاءكم على طاعته ) طووووووول يومها عالفيسبوك .. ادخل ظهر القاها مسنتره .. عصر ألقاها .. نص الليييل ألقاها .. متى تنام مدري ..
بس ياحليلها أكثر لايسلك لي بمشاركاتي هي ..


مره من المرات .. بلاني الله بذيك الماليزيه بالكلاااس .. وسبحان الله هالبنت من اول ماشفتها مررره مررره ماتدخل المزاج .. واكثر لايقهرني فيها اذا سوت نفسها تتدلع .. هي مدلعه أساسا .. بس أنا مرره ماني هاضمها .. اول لاتجي تحط الايفون على طاولتها ( لونه أبيض وكذااا عليه حركات تزينه ) ومقلميتها لون فووشي وانواع الانمي عليها .. ومرسامها ملووون بالوان طييف وبأعلاه فيه مسااحه على شكل دبدوب لون وردي من كثر ماتمسح بها سموووع الدبدوب صايره سوود من اطرافها وشكله مررره مؤسف ..
لقيتها مره مسويه لي اضافه بالفيسبوك ..
سلاماآآآت ؟ ماهضمتك بالكلاس بتنشبين لي هنا ؟؟؟ .. دخلت على ملفها .. ولقيتها كاتبه على حائطها بالانقلش ( لغتها بنت الذين حلوه ) ...
فكرت وقلت .. ياولد .. دام الشغله كلها تعليم بتعليم خلنا نضيفها نستفيد .. يضع الله سره بأضعف خلقه .. وأسوي اضافه .. وياليتني ماسويييت .. طلعت ذيك الرساله ( عارض ممطرنا ) لكن بقيه رسايلها وكتاباتها شيء يلوع الكبد .. عشان اوضح الفكره بس وادري كثير من اللي يستخدمون الفيسبوك متوهقين باصدقاء كذاا ..

ادخل ألقى كاتبه على حائطها :

جوعانه ...


ادخل بالليل ..

طفشانه ...


ادخل بعد يومين ..

هوووف .. ملل



مررره وصلت معي اتش بعد ماشفت كتابتها ذي :

لا أفعل شيئاً ...

رديت عليها .. قلت:

إقتباس طيب ماذا نفعل لك .. لسنا مهتمون أساسا بما تفعلين أو لاتفعلين .. يوما تخبرينا أنك جوعانه .. ومره أنك متململه .. ومره أنك متعبه .. والآن تقولين بأنك لاتفعلين شيئاً .. هل أنت رئيسه وزراء نراقب تحركاتك ؟ أو نجما يشار له بالبنان نقتدي به ؟

^
^
هذي ترجمه على فكره عشان كذا غصب تجي بالفصحى
بس صراحه على اني بعد ماكتبت الرد هذا وسويت لها ( ديلييت ) للأبد .. الا اني أحس اني ماشفيت غلّي منها هي ورسايلها .. تمنيت لو انها تفهم عربي أخليها تسف التراب ... لابوها آآبو من سربها .. عمآآآآ



كونت أصدقاء كثر بالفيسبوك .. الان وبعد تسع شهور تقريبا من اول اضافه اجنبيه لقائمه اصدقائي .. وكان خلال هذه المده تجيني اضاافات من ناس عرب وسعوديين يشاركوني نفس الاهتمامات فيسوون اضافه لي واضيفهم ..

أعود وأقول الآآآآن .. احس الفيسبوك بالعربي ممل .. زهق .. يعني مدري كيف كذااا احساس ... يعني ... امم .. اووف خلاص ان شاالله عرفتوا شعوري ...
يعني مثلا طريقته كأن كل واحد فاتح له منتدى يحط فيه افكاره وكتاباته ويبي خلق الله تزور وتقرا .. وتجي آخر كتابات اصدقائك على واجهه رئيسيه مجمعه عشان تقرا وش يقولون وش يفكرون .. ويجتمع فيها الغث والغث صراحه .. سمين على استحياء صراحه ..


افكر بالهجره من موقع التواصل الاجتماعي ( الفيسبوك ) الى عالم التواصل ( الحقيقي ) << والغير موجود للأسف.
أريد عالما حيث لا ينتصر فيه شخص لذاته ..
أريد عالما يظهر بين أركانه من يستحق أن يظهر ..
عالماً يجمع بين أحشائه من يتواضع لامن يتكبر مع من يهديك عيوبك لامن يجامل ويتستر .. مع أصدقاء ( حقيقيون ) يضحي بالنفيس لايتضجر .
من يكتب لتكن أحرفه بماء الذهب تسطر .

من يحترم الرأي الآخر ويناقش بأسلوب ..
من يحمل قلبا صافيا لايكن حقدا ولا يضمر حسدا ..

ترى .. هل هذا العالم بين أيديكم ؟؟





------


قبل أسبوع رجعت السعوديه .. وبينما كنت اهيم بفضاءات الأنس آنسُ برؤية أهلي من فارقتهم قرابة السنة .. اذ بـ ( جود ) بنت الست سنوات تخترق تلك اللحظات المؤنسة ..........

" أحمد ... انت تدري حتى زميلتي بالروضه عندها فيسبوك "


" ......... "


قفز محمد أخوها الذي يكبرها ليرد :

" ياقدمكم .. غاده تو مافكت الرضاعه صار لها من زماااان فيسبوك "






أشــوفكم ..

تصدق أني قريت موضوعك كامل ، والله أني حسيت فيك ههههههه

ولد ابن عمي عنده فيسبوك وعمره أشهر معدودة ..

مواقع التواصل الاجتماعي زينة شينة ..
شي حلو أنك تبقى على تواصل مع أصدقاءك في جميع أنحاء العالم ^^..
يعني مثلاً أنت طالب مبتعث لكن مع الفيسبوك والتويتر والسكايب وغيره ما تفقد تواصلك مع أي أحد ..
يعرفون أخبارك يوم بيوم وتحركاتك مرصودة وفعالياتك وفعالياتهم معروفة وتحس نوعًا ما أنك بينهم ..
صحيح شعورك وأنت بينهم فعلاً يختلف، وأحيانًا تتحسف وودك فعلاً لو كنت بينهم .. لكن شيء أهون من لا شيء ..

المشكلة إذا أخذ التواصل الاجتماعي الالتكروني أكثر من حقه. هنا ممكن نكون في مشكلة حقيقية ..
والحل أننا نوازن بين هذا وذاك ونعطي كلاً حقه.

الله يوفقك (L)

هههههههههه والله حياه جميلة
الله يوفقك ان شالله

ههههههههههــ
معاك معاك و فاهم قصدك..
و صدقني الفيسبوك زين و على نياته.. مسكين..
بس بعض الناس حايرة ما تدري شنهو تسوي..
و تكره غيرها فيه..

و مثل ما قال "كان هنا".

إقتباس المشكلة إذا أخذ التواصل الاجتماعي الالتكروني أكثر من حقه.

الله يوفقك في الدراااااااااااااسه

وانا اقول حذفتني من قائمة الاصدقاء ليه !!
كله لعيون الاسبانية

هلا وغلا بك ابو حميد والحمد لله على سلامتك يالغالي ..
موضوع جميل عن الفيس بوك وما ادراك ما الفيس بوك
بالفعل اصبح الموقع ممل والمشكلة كل يوم له شكل
هذا غير القروبات اللي مدري كيف تضيفك وتدهر بالرسايل
طبعا توتير افضل واريح شوي وفيه اكشن
وتبقى جميعها مواقع في عالم افتراضي تجد فيه الغث والسمين

شكرا لك دائماً يا صديقي .

على كذا .. باقي خالد ولدي ما سويت له فيس بوك !
أعتذر لكم على إزعاجكم بهالبزر بكل رد وبكل سالفة ناط لكم به بس اعذروني
أب جديد وما عمري حبيت أحد بهالدنيا مثل ما حبيته هالزفت

بالنسبة لموضوعك يا أحمد .. والله أنا مثلك سويت لي صفحتين بالفيس بوك مش صفحة واحدة .. لكن ما أدخلها ولا أعمل فيها شيء أبد !
صفحة مسمي نفسي فيها : سلطان تكر < ذيك الأيام كنت في عز مراهقتي وخاق على رضا تكر
المهم آخر مرة دخلت الصفحة لقيت إضافات من أفراد قبيلة تكر
كلهم أجانب .. توماس تكر على أنجل تكر على مدري مين تكر
الشيء اللي خفف صدمتي إن ولا واحد منهم من افريقيا وكلهم أوروبيين أعتقد ..


أحمد ترى إنقليزيتي كويسة , إذا ودك نسوي محادثة جماعية أنا وياك مع هالإسبانية نتذاكر اللغة الإنقليزية تراي مستعد ومتحمس جداً

هلا أخوي سعودي أصيل.
مع احترامي لك هذا أغبى وأسخف موضوع أقراه خلال الأسبوع هذا.
وممكن يدخل النومونيز عشان يصير أغبى وأسخف موضوع خلال الشهر..

تبغى تتفاخر بالتعارف على البنات والبصبصة خلها بينك وبين نفسك ولا تجي تآذي خلق الله بها.. حتى فكرة الموضوع حطيتها في إطار سخيف وغير محترم مع احترامي لك <<<<<<< خليت فيها احترام..

مودتي لك يا الغالي..