بسم الله الرحمن الرحيم
السلام عليكم ورحمة الله
كيف حالكم ياشباب وشابات الشبكة
سبق ياحبايبي ان طرحت مثل هالموضوع يمكن قبل 8 اشهر ==> غبااااااااار
الموضوع بصفة عامة يعبّر عن اشياء تحدث حولنا فأنا - واعوذ بالله من كلمة انا -
اقوم باصطيادها او بمعنى اصح ملاحظتها ثم اقوم بطرحها في هالموضوع مع وجهة نظري الخاصة التي لاتعبر عن وجهة نظر اي واحد منكم ==> يعني انتم مالكم دخل ;) ;)
نبدأ الصيد :
--------------
# صيد عنكبوتي
( يعني من داخل النت وبالأخص من هنا من هذه الشبكة العملاقة وبالأخص جدا من هذا المنتدى )
- لاحظت ويمكن لاحظ اكثركم انه حدث محارش بين بعض الاعضاء من دون ذكر اسماء
وكان سبب الهوشة ان احد الاعضاء وساعده الايمن ينتقدون المنتدى العام ويتهمونه بسخافة المواضيع ثم قام ثلة من الاعضاء بالرد على هذين العضوين وماقصر هالعضوين بتقديم الاعتذار
مهوب عن وجهة نظرهم عن المنتدى ولكن على بعض الالفاظ اللي مالها داعي .
المهم ان هالعضوين بارك الله فيهم متحمسين ودرعموا على بعض الاعضاء بمحاولة اقناعهم
ان مواضيعهم مهيب زينه
فالله يهديهم كل واحد منا له رأي مختلف عن الآخر فصعبة انك تفرض وجهة نظرك على الاخرين
الا عاد امور الدين اللي فيها قال الله وقال رسوله .
يمكن مثل هالمواضيع اللي يقولون عنها سخيفة يرى 70% من الاعضاء انها فعلا سخيفة ولكن
ماكتبوا مواضيع عنها من باب احترام وجهات النظر والحرية فهذا منتدى عام .
واتوقع اللي خلى هالعضوين يقولون هالكلام انه فعلا فيه مواضيع مانقول عنها ولكنها مستهلكة
ومالها داعي ويمكن سبب كتابتها الفقر الفكري عند كاتب الموضوع فتلقاه يكتب اي شيء لانه مايرده الا الضغط على زر موضوع جديد ويقول اللي يبي وهذا خطأ كبيررررررررررررر .
على العموم كل واحد يصلح سيارته ومالها داعي المهاوش ولكن تظل المواضيع المفيدة الهادفة
عالقة بالذهن أكثر من غيرها .
والله يحفظكم ,,
الجنراله/ جمجومة خانو
قائدة الحرس الشخصي لجمجمة الهلال ===> وأنا اقل من ابو الخلاقين القذافي
______________________
# صيد بقالات
لحظة شوفو تحت :
الظاهر معروفات لديكم هالمشروبات واتحدى واحد منكم ماجرب واحد منهن وأولكم أنا ;) ;)
صراحة اذا دخلت اي بقالة او سوبر ماركت لازم ولابد وغصب تلقى على الاقل واحد من هالمشروبات .
طيب ليش ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ==> صرت المملكة على غفلة
انا اقولكم ليش طبعا من وجهة نظري الدايخة
الظاهر ان مروجي هالمشروبات يشوفون ان انسب بيئة لبيع هالمشروبات هي بيئة الرخويات ;) ;)
فهمتو شيء ؟؟
يعني افضل مكان يباع فيه هو مجتمعنا الخليجي الرخوي - الله يخلف علينا
لانهم - اللي هم منتجين هالمشروبات - يشوفون ان الانسان الخليجي او السعودي
اكثر شعوب العالم رفاهية وتبطح وبلع وتصنيع شحوم على اعلى مستوى لذلك مافيه امل الواحد يتحرك وتلقاه يحس دايم بالخمول من هالنعم يالله لك الحمد من مثلوثة لحنيذ لمندي لمظبي لبروستد
لهمبرجر لشاورما لكودو لبيتزا لمشاوي مشكله لحلويات اشكال والوان - يالله لك الحمد .
واتوقع ان السبب الرئيس اللي خلى هالمنتجين من تصدير بضاعتهم عندنا بشكل يخوف
انهم يشوفون الانسان العربي المسلم يعيش في حالة من الذل والضعف فيلعبون علينا بمشروبات القوة .
لا واللي يزيد الطين بله ان اسمائها توحش مثل رد بول يعني الثور الاحمر
وباور هورس - قوة الحصان ===> ماتلاحظون انهم يسبوننا ؟؟؟
ولكن يظل الانسان قوي بإيمانه واداء فرائضه في اوقاتها فهذا افضل مشروب ومأكول للطاقة .
والله يقويكم بالايمان وطاعة الرحمن .
الاستاذ البروفسور / جمجوم البرادعي
رئيس الوكالة الدولية للطاقة الجماجمية
-----------------------------------------
# صيد تلفازي
(القناة الثانية حقتنا...........وضاع العمر ياولدي )
- قبل امس مادري امس كنت جالس اقرأ جريدة والتلفزيون مفتوح على القناة الثانية وكان الصوت مقصر عليه .
يوم رفعت راسي لقيت سيرك اسود ونمور واللي تروضهن حرمة .
المهم ان هالماخوذه بدت تلسبهم بسوطها وهالاسود والنمور الزلايب ما غير ينابطون .
جت وطلعت كل الحيوانات من الشبك الا اسد واحد جت المروضة وقربت للأسد وقالت له : ............
توقعوا وش قالت ؟؟؟
قالت : ورا ماتلبس طاقية
===> لالا أمزح
لا الصراحة قربت للأسد وقالت له عطني بوسة
يوم جاء الأسد يعطيها بوسه - قصدها انه يقرب لخدها بس -قامت القناة الرائعة السعودية الثانية
بقطع المشهد ووضع صورة اسد ثابتة لمدة 10 ثواني تقريبا - والله هذا اللي حاصل .
الحمدلله كلنا نفتخر بتلفزيوننا انه مايجيب لقطات وسخه بس لهالدرجة الظاهر ان الدعوى دباشة .
وعلى فكرة فيه مسلسلات بريطانية يجيبونها بالليل حريم لابسات قصير ويحصل تبويس على خفيف
فيه ناس شافوها .== والعهدة على الراوي
الله يستر علينا وعليكم ..
الاعلامي المعروف / جمجوم عطوان
المفكر والمهستر الأعلامي لدى جريدة الموت
________________________
# صيد القراطيس
( جريدة الجزيرة والمسطة الخامسة )
كلنا يدري ان جريدة الجزيرة بدت تنابط هالايام باصدار ملاحق مرفقة مع الجريدة بلون جذاب لون شوربة كويكر
فصراحة الجريدة تحاول مزاحمة جريدة الرياض المسيطرة بمبيعاتها الرهيبة وهي فعلا بدت من تالي
المزاحمة ولكن بوثبتها الخامسة مثل ماسمتها الجريدة جاء اسم الملحق بالثقافي .
فياجريدة الجزيرة ليتكم خليتوا هالوثبة بأسم يخدم الاسلام والمسلمين مثل ان يكون ملحق يختص
بأمور الدين وتكون ثقافة اسلامية لاننا بهالوقت خاصة بحاجة لتثقيفنا اسلاميا حتى نرجع الى الله
ونتوب من ذنوبنا فكل هالمصايب وهالفتن كلها من ذنوبنا .
ولا عزة لنا الا بالاسلام .
الله يتوب علينا وعليكم وينصر الاسلام والمسلمين .
فاعل خير
مقيم في الدولة الجمجومية المتحدة
_________________
واخيرا انا داري ان الموضوع طويل جدا ولكن تدرون ان مشاركاتي من تالي قليلة فاأحاول ان اعوض اللي فات .
وجزاكم الله خيرا ....
قال الرسول صلى الله عليه وسلم ( الارواح جنود مجندة ماتعارف منها ائتلف وماتناكر منها إختلف )
والسلام
أخوكم / ابو خالد