نادي الهلال السعودي - شبكة الزعيم - الموقع الرسمي

١/ أحدن على موته تزف البشاير
من عقب عزه يذبح بذل ويهان

٢/ عقب القصور وعقب ذيك العماير
صادوك يامعمر وسط بيب جرذان

٣/ عيب وحرام تقول والشعب ثاير
في كل بيت ن سبتك هم وأحزان

٤/ عزك مضى دارت عليه الدواير
عمرك قضيته يااسود الوجه طغيان

٥/ مجرم وفاسد خبث الأطباع جاير
غدار أبو وجهين كذاب خوان

٦/ في كل بيت وكل زنقه وعاير
يدعي عليك أيتام رمل وشيبان

٧/ أمحق نهاية كلبوها خساير
ذل ومهانه وآخر الكفر نيران

٨/ واحدن على موته تهل العباير
يبكيه كل الناس شيبن وشبان

٩/ الخير من يمناه ينثر نثاير
شيخ ن رجح بالطيب في كل ميزان

١٠/ جزل العطية ما يحسب الخساير
من جاه ضايق يرجع بخير واحسان

١١/ من ذاق من وقته مرار وعزاير
إلياه نصاه يشل همه بليهان

١٢/ عنده ضمادن للكسور وجباير
يامسعف المضيوم ياطير حوران

١٣/ من هو بعدك يشب ضو المناير
من يمسح دموع ن على خدود يتمان

١٤/ من هو لمن ذاق النكد والحساير
امعوق ن واعلاجه بصعب الأثمان

١٥/ منهو لمن وقته عسيرن وباير
كون أنت يا سلطان يادمث الأركان

١٦/ حبك مكن بقلوبنا والضماير
يالله ترحم طيب الصيت سلطان

١٧/ أشعل خبر موته بقلبي سعاير
من يوم قالوا مات والدمع ودان

١٨/ بس القدر لابد للعبد صاير
يجريه ربي خالق الإنس والجان

١٩/ يالله جالك شيخنا اليوم زاير
يا موصي ن باكرام جارن وضيفان

٢٠/ طالبك يا علام خافي السراير
بعد المغفره ترزقه برد الأكفان

٢١/ يالله عساه لجنة الخلد ساير
في صحبة اللي جاب سنه وقرآن

٢٢/ مع الصحابه فوق حلو السراير
وانهار تجري في حدايق وريضان

٢٣/ واثيابه استبرق وسندس حراير
باقصور من لولو زبرجد ومرجان

٢٤/ واختامها واعداد ماطار طاير
يالله ترحم طيب الصيت سلطان

كلمات الشاعر :

فهد ابن حشان آل حمرا الهاجري