اعذروني ياجماعة الربع للتأخير .. توي مفرمت الجهاز

أمس هنق قبل لا ارسل اجابات سهل وهذي الاجابة الاحتياطية
والخير جاي بالطريق

وبعدين وش معجلكم ؟؟ تعطلت اعمالكم يعني وشركاتكم .. وماتوا عيالكم من الجوع
هذانا بضيافة الزعيم وبمطبخ ابوسليمان .. ناكل من هالسبانخ لين الله يفرجها

هلااااااااااااااا و الله بمشرفنا الغالي ... هلالي الجوف ... وعلى قولتهم اللقاء قونبلة الموووووووووسم ...;)

أجل مسوي فورمات للجهاز ... سبحان الله زيي ..اخاف جهازك هو نفسه جهازي ..؟؟ (هذا أول سؤال;) )

نجي للمهم ...

* بصراحه من ترتاح له أكثر شبكة الزعيم أو مدمي الشباك ؟؟

*هل تعتقد أن هناك أعضاء في الشبكه لم يضيفوا لها شيئاً أي ان تواجدهم أو غيابهم لا يؤثر على المنتدى ؟؟؟

* من هم الأعضاء الذين كسبت صداقتهم خلال تواجدك في الشبكه ( داريه انهم كثار ما شاء الله ) بس من ابرزهم ؟؟

*من ترى من الأعضاء أنه بالفعل :

- فاكهة المنتدى ...

- حجة الهلاليين ...

-أديبة الشبكه ...

*ماشعورك يوم مسابقة من سيربح المليون والسؤال الأخير وانت كنت متوقع الاجابه وطلعت صح ... والله اياااااااام عصيبه مرت علي ....

* من برأيك المدرب الأصلح للهلال ؟؟؟ ومن هم اللاعبين الاجانب الذين تعتقد انهم سيفيدوننا ؟؟؟

* في أي لحظه وأي مباراة احسست ان الزعيم منهار ؟؟؟ وفي اي مباراه احسسته زعيما شامخاً( وان شاء الله دائما هو كذلك )..؟؟؟

واتمنى اني ماطولت عليك ... ورح كمل السبانخ لكن بعد كا تجاوب على أسألتي ...

مع تحياتي ...
أسيرةالزعيم;)

عوووووووودنا مع مشاركة تحدوه البشر

هلا وغلا بابو عبدالرحمن
هلا والله فيك اخوي ابوصالح

س1/ لو كنت رئيس للهلال وعندك لاعب يتصرف مثل الغبي عبدالله الجمعان وش تسوي له؟
اسويله سحلب بالباشميل
بصراحه تعجبني مهارة وامكانيات الجمعان .. لكني غير معجب بطريقة تفكيره وتصرفاته .. لذلك مافي غير الخصم معه واشكاله من الاغبياء حتى ما أخسرهم وثمن يخسرهم الفريق .. بخصم من راتبه حتى يرجع له عقله ويصير أدمي وينضبط .. واذا استمر بعناده ودلعه واستهتاره بقوله اقضب الباب .. والباب يفوت جمل .. وعمر الهلال ماوقف على لاعب معين .
لاعبين هالوقت للأسف ولائهم للدراهم .. لذلك عاقبهم بالراتب ويقضبون الارض .

س2/ لما اطلقت على المجلس اللقب الرائع والمستحق منتدى المطبخ العام بماذا كُنت تشعر؟
كنت اشعر بالجوع

س3/ بعد زيارتك للشرقيه وش عجبك فيها<<<<<<< غير وجودي طبعاً ؟
كل شي بالشرقية زين ماعدى واحد نفر مزعج كتير اسمه القلب البردقاني
يعجبني البحر بقووووووووووة .. وتعجبني ملاهي الاطفال والالعاب والدبابات البحرية والطعسية والمنتزهات والاسواق والمطاعم والشوارع .. كل شي يعني
وزيارتي للشرقية سنوية .. ولا تنسى اني درست فيها وتعينت فيها اول ماتخرجت

س4/ الشاب ابو سليمان وش رايك فيه؟
ونعم الرجل زميل مهنه وزميل مشرف
اول مرة اقابله .. ورغم ضيق الوقت والاستعجال الا انها مقابلة حلوة وخفيفة على المعدة تشرفت فيها .. وتشرفت بمقابلتكم جميعاً

س5/ الكل افتقد عاشق المان الاول جنتلمان بماذا تشعر عندما يبدا نقل اي مباراه للمان بالمنتدى ....... حقك وهو موجود وتتراددون مع بعض
ايوالله فقدناه والله يرده بالسلامه .
اما عن شعوري .. بصراحه اشعر بالسعاده لوجوده .. وتراددي معه من باب المزاح لا اكثر ..لأن متابعتي للأندية العالمية من باب حب كرة القدم .. يعني غير متعصب عالمياً زي تعصبي للهلال

ورساله توجهها له وش تقول فيها؟
ماقول الا ارجع يالشين .. ترانا اشتقنالك و لقرقعتك يافتى القرقعة .
واقوله بعد هاردلك الخسارة امس

عوووووووووودنا مع مشاركة ابوسليمان

هلا وغلا
ياهلا والله فيك زميلي

اولآ وللأمانه الأخ فيصل عمله نادره في هذا الوقت ,, فتشرفت بزيارته لي ايام العيد وبحضور تحدوه البشر والقلب الأزرق وعارف
احب الجميع,,, يحرق نفسه لأجل امر وكل عليه
بسيط , متواضع , هادي الطباع وخصوصى في المناقشة (( مثلي )) متواصل مع كل من يعرفه ومن لايعرفه ,,, اجتماعي الا ابعد الحدود
نعم نعم صحيح يحرق نفسه نعم متواصل مع من لايعرفه نعم وخصوصي ونقل واجرة بعد نعم
حاول ترضيني بهالكلمتين يالشين .. لكن هين دواك عندي
الا وش رايك تكتب قصة حياتي .. وركز على ضيعتنا برحيمه انا والدليلة اللي معي يومنه خلاني اروح يسار والبيت باليمين

الشرف لي يالغالي .. وصدقني انها زيارة لطيفة وممتعة ولولا غلاك مازرتك

1- برايك وش الطريقة التي يعود بها الهلال من العين بالمركز الأول ؟
مهنا الا طريقة وحدة ماغيرها ..
وهي الفوز بالثلاث مباريات <<== ماجبت جديد
ماراح يرجع الهلال بالمركز الاول الا اذا رجعت روح لاعبي الهلال اللي نعرفها منول وقتاليتهم واخلاصهم للشعار الازرق ونسيان المكافأت والرواتب .
كانت المشكلة بالرئيس وجا رئيس .. كانت المشكلة بالرواتب وانصرفت الرواتب .. كانت المشكلة بالمدرب .. وتغير المدرب .. وش بقى .. مابقى الا نسيان الدلع .

2- متى كانت بدياتك مع متابعة كرة القدم الأوربية ؟
بصراحة متابع قديم يمكن من عمري عشر سنين ايام ماكانت القناة الاولى تنقل النهائيات الاوروبية وكأس العالم بلاش .. لكن تغير الحال بفترة الشباب وصارت غصب واحد وغصب ثنين يجيبون المباراة لنا بطلعة الروح .. ولاتنسى فترة الطيش والكشتات والبران تأثر على المتابعة .. لكن رجعنا للكورة بعد الزواج والاستقرار وتوفر القنوات الفضائية .

حبيبي اعتذر اني انزلت الموضوع دون الرجوع لك بس بنتظارك
تمون يابعدهم على عبالرحمن وخيته وش عاد التواصل مع الغالين مثلك وشرواك .

عوووووووووودنا مع مشاركة عــــ الهلالي ــارف

اخلين وميه مليون مرخبا بابو عبدالرخمن بيك
اخلين فيك انت ياخواجه خارف

حبيبي ابو عبدالرحمن الغالي كيف الحال اول
الحال اول مايل .. بس الحال هالحين زين ;)

س1/ خلال الاجتماع السداسي اللي دار بينك وبين ابو سليمان و القلب الازرق وعارف وتحدوه البشر (( عن اثنين )) دارت مناقشات حول الزعيم واحواله ...
هل لك ان تذكر لنا الناتج من الاجتماع ...؟؟؟
خماسي وشلون .. انا اتذكر اننا ستة
نتيجة وحدة طلعت فيها .. وهي شوفة وجيهكم الطيبة المحبة للزعيم الشبكة والزعيم النادي .. وصدقوني اني تشرفت بشوفتكم والجلسة معكم .
واتمنى تكرارها

س2/ تعرضت شبكه الزعيم للتخريب الاسبوع الماضي ... وقد عرض اعضاء المجلس جائزه مقدارها مليون ريال للوصول للمخرب ... فمن تتهم (( غير سهل )) ...؟؟؟
ومن غيري خربها .. تراني اتهمني انا
انا من خربها ومستعد للاعتراف مدام السالفة فيها مليون .. اخاف اتهم واحد وينكر ويضيع المليون

س3 / من الاعضاء الذين ترى ابتعادهم كان مؤثر على شبكه الزعيم ...؟؟؟** مع احترامي للجميع **
عمر الزعيم ماوقف على عضو والا على مشرف او حتى مدير
المبتعدين بصراحه كثير وش أعد وش اخلي منهم .. بصراحة بكل منتدى من منتديات الشبكة فيه مفقودين .. وابشرك السالفة طالت المشرفين واللجان الاخبارية والاستشارية للأسف .. وماقول غير الغايب عذره معه ولازم نقدر ظروفهم .. والله يجيبهم بالسلامه .

س4 / متى راح تكرر زيارتك للشرقيه المره القادمه ...؟؟؟ ** بس من دون الاهل **
العلم عند الله .. لكن لمعلوميتك انا من عشاق البحر والصيف والدبابات البحرية والتطعيس .
يعني كلها كم شهر وتلقاني مخيم بالهاف مون .
لكن ياويلك لو يدرون لك الأهل .. قصدي ياويلي انا

س5/ وش رايك بمنتدى المجلس العام ...؟؟؟
قصدك منتدى المطبخ ;)
رائع بصراحه .. واتمنى بس يسعفني الوقت علشان اتواصل معكم واشارككم بدجتكم وهبالكم ومواضيعكم الرائعة .. وانا من المتابعين لمنتدى المجلس العام من بعيد لبعيد .

ولك اجمل التحايا واعطرها اخوي ابو عبدالرحمن
مشكور ابومحمد ..
بس انتبه ترى السرعه شينة .. الا اذا انت مستاجر الكابرس ومأمن الرخصة ;)
تحياتي لك .

عوووووووودنا مع مشاركة كايدهم

والله الاسئله يـبـيـلها سنه عشان تجاوب
هذاني خليت اسئلتك للسنة الجديدة ;)
اصبر علي شوي .. بخلي بعض ناس يقعدون سنتين وهم يجاوبون

بس والله ضــــــيف كــــــبـــير .. ومقــابله بتكون رائــعه ان شاء الله
فعلن فعلن .. يامل الشووووووووووكرن والله كل ابوه .
ولا كبير ولا شي .. ماغيره كبير سبحانه .

@ سمعت ان احد اسباب دخولك لشبكة الزعيم .. هو الهجمه الكبـيره على فهد المصـبيح ؟ ممكن توضح لنا كيف ؟
والله لو اني ابوهيا
ابد يالغالي .. شفت واحد بالتلفزيون مسويلي نفسه فاهم ونافخن ريشه ويتكلم على المصيبيح وضغطني .. دقيت على البرنامج ابي اشارك وماردوا .. انتهى البرنامج و قلت مالي الا المنتديات بحشه واطلع .. وسجلت بالزعيم اثاري الكل منضغط منه مهو بس انا لحالي .. وخففت الرمي وصرت اتفرج .. واعجبني الوضع بالشبكة واستمريت

@ من بـين المـشرفين الحـالـين ... من هو المشرف الذي يراه المتألق حـاليا .. بصراحه تامه ؟
والله كلهم خير وبركه اذا كانوا متواجدين .
لكن بعضهم يمر بظروف تمنعه من فتح الجهاز والتواجد بالمنتدى وماقول الا الله يعينه ..
واذا انت مصمم تعرف منهو المتألق امسك قائمة المشرفين وسو بحث بمشاركاتهم وتعرف منهو المتألق بالراحه <<== اعرفك عجاااااااااز وماراح تسويها

@ شيء يضـايقك بشبكة الزعـيم .. من الاداره و من الاعضاء ؟
ياشينك انت وهالسؤال
من الادارة مافيه شي محدد .. والتواصل بيننا رائع .
لكن اتمنى تكثيف الاجتماعات بين اعضاء مجلس الادارة .. وتنفيذ القرارات والاقتراحات الجيده سواء من المشرفين او من الاعضاء وحل مشاكل الاعضاء بسرعة اكبر .
ويضايقني من الاعضاء .. التهجم الشخصي بالمنتديات بعد الاختلاف بالرأي .. والمواضيع المكررة والتسحيب بالعناوين .

@ لماذا تكره المان .. وكذلك بيكهام ؟ لا تقولي اشياء خارج الملعب انا اتكلم بداخل الملعب ..؟
وذا قلت اشياء خارج الملعب وش تبي تسوي ( واحد مطلع لسانه )
داخل الملعب اتفرج عليهم عادي زي ماتفرج على مباريات جار القمر ( النثر ) وبيكهام عندي زي الحقوي والجهوي والحلوي مابه زود عنهم الا اللون
بصراحه ماني مقتنع فيه وانا اخوك .. في كم لاعب اشوف انهم بشنق والكورة بشنق .. لكن الشهرة والاعلام وصلهم السما وخلاهم لاعبين .. وأولهم هذا هالمغرور

@ عبدالرحمن الله يخليه لك .. متى نشوفه بالشبكه بـيوزر ابوي هلالي الجوف ?
توه .. خله يما يدخل المدرسة اول .. ويما يحيلون ابوه للتقاعد .
لكن الولد ماشاءالله عليه طالع على ابوه ويحب الكورة حتى انه دايم يلعب قدامي وياكثر ماعلق الجهاز باسبابه هو وكورته .. ويعرف الاندية وشعاراتها ويعرف اللاعبين .. وحتى انا تأثرت فيه وصرت اعرف سابق ولاحق والمحقق كونان وبيدا بول وداي الشجاع وسلام دانك وكوكب زمردة ;) .. يعني تأثير متبادل

@ في فترة انقطاع شبكة الزعيم .... عطنا شعورك ؟
تبيه كاش والا تقسيط ؟ ترى شعوري غالي شوي
بالعربي ضعنا .. ومع احترامي لكل الشبكات والمنتديات الا انها ما قدرت تغطي النقص .. وصرت افتح النت واروح للشات اتهيبل وافضي خلقي على خلق الله .

@ مـاهو رأيك بكلا من :

1 - منتدى الجمهور ؟
حلقة الوصل بيننا يالبعيدين وبين نادي الهلال .

2 - نادي الهلال ؟
عشق قديم .. افرح لفوزه وازعل لخسارته او تعادله .

3 - عبدالله بن مساعد ؟
الله يستر عليه ويوفقه ..
تمنينا رئاسته للنادي والله جابه .. ولابد من دعمه معنوياً .

4- الشيروكي ?
ياحبيله

@ سمعنا ان المقابله كانت مجـهزه تماما بمعنى انه تم اتصال لأخذ الموافقه صح ولا فيه كلام ثاني..... ؟
فيه كلام ثاني .. حيث تم الاتصال ومارديت
يعني ياغافل لك الله

@ متى بدأت بتشجيع الزعـيم ؟
شجعت الزعيم الشبكة من عرفتها قبل سنة ونص تقريباً .
وشجعت الهلال من عام 1404 بعد فوزه على الاهلي 4/0

@ عضو .. بشبكة الزعيم يلفت نظرك .. وكذلك عضوه ؟؟
مايلفت نظري اكثر من العضو اللي يشارك بكل منتديات الشبكة دون استثناء بمواضيع هادفة ومتزنة وبافكار متجددة .. وردود واقعية تناقش باحترام وجهة نظر الكاتب .
واعذرني عن التسمية .. لأنهم واجد وواجدات والمجال مايتسع لذكرهم كل ابوهم .. وأخاف انسى منهم احد وياخذ بخاطره مني .

@ عطنا توقعاتك للهلال هذا الموسم .. كم سيحقق من بطوله ؟
ولا بطولة ..
لكن سأضل اشجع الهلال واؤيد بقاء الرئيس والمدرب واللاعبين المحليين والاجانب بكل قوة .. مع فتح المجال التدريجي للاعبين الشباب .
تشجيعي للهلال ماهو مرتبط بفوزه بالبطولات .. ان جت البطولة فالحمدلله وان ماجت فلاحول ولاقوة الا بالله .. صحيح اني ازعل شوي من الخسارة وضياع البطولة .. لكن الشكوى لله .
وذا ما أخذ بطولة الموسم هذا بياخذ الموسم القادم ان شاءالله .

@ ورأيك ببلاتشي ؟
بح .. بالاتشي بح .
كنت اتمنى استمراره على رأس الجهاز الفني بالهلال .. لأنه الأعرف بمستوى اللاعبين والفرق السعودية والفرق المشاركة بتصفيات العين .. لكن راح باستقالة غريبة وبوقت غريب

@ وش الاصعب .. انقاطع شبكة الزعيم .. ولا دوام الى 1.30 ؟
الأصعب منهم كلهم انقطاع البث عن مباراة للهلال
كلهن صعبات يالغالي .. لكن عطني جهاز القى فيه شبكة الزعيم وماعندي مانع لو اداوم حتى 1.30 بالليل .

وتحييييياتي لك وننتظر اجاباتك
تحياتي لك حتى انت

عووووووودنا مع مشاركة البارق 2000 ق م

هلا والله با ابو عبدالرحمن ومساك الله بالخير ..
ياهلا فيك يابوعبدالرحيم مساك الله بالنور والسرور .

من الناس القلائل الذين تمنيت حقا مقابلتهم هو ابو عبدالرحمن وحصل لي ذلك بل والله إنني تشرفت بها مع انها كانت لدقائق معدودة لكن والله أثرها كسنوات..
صحيح .. حتى انا تشرفت لدقائق مع دودة ;)
شوكرن شوووووكرن .. نفس الشعور مع دودة فوشية اللون

ما ودي والله اكتب اسئلة واكثر عليه الموضوع ..لكن بسأل كم سؤال ( تنسيمي ) ليس إلا
يلزم نغطسك بطشت علشان نشوف هالتنسيم من وين ونسده .. وتراك مسموح حتى لو ماكتبت شي .
مايقنت ان المقابلة تكون نهاية الاسبوع على باللي انك بالديرة .. ونفتك منك ومن تنسيمك بس ماش

## صحيت من النوم مبكرا ( ما لها دخل التبكير ) وعلى طول رحت للنت وكتبت موقع vb.alhilal.com <--- جديد .. وبعد ما سجلت دخولك قال لك مرحبا بدخولك يا (( هلالي سبت العلايا )) <--- تراني ما اعرفها الا من النشرة الجوية
وش يكون شعورك ذيك الحزة..
شعوري شعور أي مواطن هلالي يبغى يتمردغ ببطن كوكتيل .. على طول يروح بالي انها من حركاته هههههههههه
تصدق اول ماصار الاختراق المشئوم وحزة ما انا اسوي دخول ويقول معرف غير صحيح .. ماطرى ببالي الا كوكتيل خاصة واني كنت شاطفه ومارد على تلفوناته ذاك اليوم وقلت بيني وبين نفسي سواها ولد الفواكه
لكن وينها ذي سبت العلايا .. لاتكون بدعة من البدايع

## تصور إنك قفلت أو حذفت موضوع .. وتفاجئت إن الموضوع يخص ( دحموني ) بسم الله عليه .. ماشعورك في ذلك الوقت ..؟؟
- هل تطغى عليك العاطفة الأبوية وتفتح الموضوع ؟؟
- أم تضرب بيد من حديد والنظام نظام
وتبيني اقعد بالاشراف يما يكبر دحموني ويسجل عندنا ويقوم يكتب من هذولي الموضوعات الله يسلمك و يسلمهم .. فال الله ولا فالك
لو ماطردت نفسي يبي يطردني الاعصار .. ولوماطردني الاعصار طردوني الاعضاء
لكن وللأمانه .. النظام نظام .. وسأضربو بيدن من حديدي <<== تراه شديد خاصة اذا تكلم بالفصحى

## تصور في مرة من المراريت .. جيت للدوام في الشبكة يوم قربت لمكاتبكم انت ومالينكو لقيت مالينكو ينتظرك برا المكتب .. وقال لك الإعصار طردنا .. وقال مالكم إلا المطبخ ( طبعا مطبخ الشبكة ) ماهوب المطبخ اللي انت دايم تقوله وش بيكون شعورك في ذيك الحزة
بروح للمطبخ وامري لله .. لكن ذنبي برقبة الاعصار اذا لقيت المملكة والماسة ونجمة والفيروسة وباقي البنات قدامي بالمطبخ ومعهن السكاكين والسواطير وكاشخات بالمراييل <<== اكيد يبي ياكل علقة محترمة من اللي يحبها قلبك .. هذا اذا ما انفرم على الناعم حتى قبل لايحط رجله على عتبة المطبخ .. خاصة اذا شافوني وانا داخل بلباس الشغل

والله ما ودي أكثر عليك .. لكن إن شفت الموضوع اشتعل يمكن نرجع للعشرين سؤال اللي انت خابرها
لا بقولك من هالحين .. ترى الموضوع ماهو مشتعل .. ولا يبي يشتعل <<== سحبت بربيش الغاز .. وخلصت الكبريت على الطراطيع
وان اشتعل بكب عليه من موية طشتك اللي جايبينه لتنسيمك
ريح راسك بس وفكنا من شرك هههههههه وترى يمديك تحظر مباراة الهلال بالدمام ;)

شكرا لك لقبول الدعوة والاستضافة..
كثر منها .. قال دعوة
تمنيت تجيني دعوة عرس فلبيني يبي يتزوج مكسيكية بجزر لانجر هانز اليسرى واقبلها ولا اقبل هالدعوة
اتحداك تدري وين جزر لانجر هانز

ولك وللجميع تحياتي ،،،
الله يحييك يابوعبدالرحيم

عووووووودنا مع مشاركة الماسه الزرقاء

هلا لي الجوف هنا
شفتي شلون .. ايوالله سحبوني على ملا وشي

هلا اخوي ونور المجلس العام بوجودك
شوووووووكرن شوكرن
ايه هذا نوري العالي مع الاسطب الامامي قولي ماشالله <<== اتحداك تعرفين وشو الاسطب

وكل عام وانت بخير بمناسبة حلول السنه الجديده قريبا
وانتي بخير وصحه وسلامه وحج وعريس

1- إذا قدر لك رحلة إلى القمر من ستأخذ معك ؟
باخذ معي سواق ليموزين علشان يرجعني لبيتي بساع <<== يقولون سواقين اللميوزين اسرع من البرق
امممممممم
ومن غير عيالي أخذهم معي الله يسلمتس .. لأني ماقدر استغني عنهم ولاعمري فكرت اني ابعد عنهم

2- ماذا تعني لك الإبتسامه؟
تعني فق الخشة
وبرواية أخرى هي شعور عن الرضا والفرح والسعادة تبان بوضوح تام على البراطم والشدوق وماحولهما .. واكثر ماتطلع عند الحريم بعد سماع نكتة جديدة او تقديم خدمة جليلة من الاخ او الزوج مثل التوصيل للأهل او للسوق او احضار العشى من المطعم ;)
وتظهر عند الرجال عند الوصول لواسطة قوية لا تعرف المحال .. أو الانتهاء من تسديد دين او اقساط ماتغيب عن البال .. او بعد فوز الهلال .

3- ما رأيك بالرأي ا لذي يقول ( الأب غالبا ما ينتحل صفة الدكتاتوريه مستغلا مركز القوامه بينما الأم غالبا ما تكون ديموقراطيه) ؟
وهوا انتي بتقيبي الحاقات دي من فين !!!
بس بجاوبتس بكلمة وحدة ..... خررررررررررررررررررطي

4- هلالي الجوف شخصيه تتميز بالمرح وخفة الدم وكما يتضح من الردود بأنه يتميز بحب الجميع ..... هل لك ان تخبرنا الخلطه السريه لهلالي الجوف
اذا علمتس ماصارت سرية
مهنا خلطة يالغالية .. والحمدلله اللي اعطاني هالمحبة

ولك وللجميع اخلص التحيات
تحياتي لك حتى انتي ..
وغريبة .. ماني شايف بنت عمتس والهلالية وللأبد عسى ماشر ;)

الاخ العزيز / هلالي الجوف

السلام عليكم

س 1 / من هو أفضل عضو و عضوه في النتدى ؟

س 2 / ما هو رائك بالعضو i.f.a ؟

عووووووودنا مع مشاركة yazeed_9

هلا وغلا ابوعبدالرحمن ,,
هلا فيك يالغالي

الله يعطيك العافية على جهودك الرائعــة في كل الاتجاهات ,,
بكل الاتجاهات <<== اشوفني صرت محوري
وحتى انت يالغالي مشكور لمشاركتك بكل المنتديات والمستقيمات والمتوازيات <<== على وزن الاتجاهات
<<== قلبها حصة رياضيات

والي خلتنا نواكب العالم من خلال منتدى الرياضة العالمية << أخلــــص >>
اما كلمة نواكب متعوب عليها من جدددددددد
العفو اخوي .. ماقمنا غير بالواجب

هذا الي عندي ,,, ولي رجعـــة للأسئلــــة
نحتريك يالغالي ..
بس انتبه وانت راجع من البعارين

تقبل تحيات أخوك
ياهلا فيك اخوي يزيد

عووووووودنا مع مشاركة ســـــ SMN2002 ـليمان

اول شيء السلام عليكم ورحمة الله وبركاته
وعليكم السلام ورحمة الله وبركاته
والف مبروك التخرج يالغالي .. وعقبال التعيين

والله يعينك على هالاسئله واذا تبي المساعده ترا ماعندي مانع
الله يعين الجميع ..
وتسلم والله يالغالي ماتقصر

ادري كلكم تحسدوني لاني وبكل بساطه بيتنا ماهم بعيد عن بيت هلالي الجوف بحدود 10كم بس والله اني قااااااااطع ماعمري مريته وان شاء الله راح امره
قاطع والا طبلون
اتشرف بزيارتك يالسلمي .. وحياك الله بكل وقت يالغالي

والاخ ابو عبد الرحمن يجبر الواحد على احترامه وكل من تعامل معه يشهد بذلك
والله ابي اقول فيه الكثير بس شهادتي فيه مجروحه
تسلم انت وشهادتك هالمجروحه <<== كان وديتها لدكتور عيون
يابو السلم اخجلتم تواضعي

السؤال الاول
لوكان ناتج جمع 1+1 غير الثنين وش يكون
بيكون ثـنـيـنـتــيـن
والله يالغالي طول عمري وانا اسمع ان واحد وواحد يساوي ثنين .. لكن العلم بحر .
وانا اتوقع انه شي كثر الثنين .. لكن مدري وشو

السوال الثاني
موقف طريف مربك
من كثر المواقف مدري وش اذكرلك ;)
لكن وبما انك من الجوف خذ هالموقف بس تراه قديم شوي ..
طلعت مرة كشته وانا طالب مع الشلة نهاية الاسبوع كالعادة بكل اسبوع .. طلعنا ورى شعيب المرير بكم كيلو بمكان والله نسيت اسمه من البطى .. وصلنا الاربعاء بعد العصر وطقينا الخيام <<== هي خيمة وحدة نجلس فيها وناكل وينام فيها اكثر من عشرة .. بس بسوي فيها خطير
المهم نمنا ذيك الليلة ويوم صار ظهر الخميس وبعد ماتغدينا قلت للشباب بعد اذنكم برجع لسكاكا عندي شغل وبرجع بعد المغرب .. قالوا وشو هالشغل اللي هالحزة قلت شغل ضروري ولازم اكون هناك قبل العصر .. قالوا مسموح والله معك وانا احس انهم غير راضين .. ويقوم ثنين من الشباب وقالوا نبي نروح معك ونرجع معك .. فزعة يعني .. قلت قدام .. ركبنا هايلكس موديل 84 لهالحين اذكرها غمارة بدون خطوط يقال انها احسن سيارة معنا وانا السواق <<== اخس ياشوماخر .. بصراحة حسيت اني تأخرت .. ومير اطير بها من فوق الشجر والحجر ابي الحق شغلي .. شوي وحنا بحزم التكسير الا بنشر علينا الكفر .. لكن هين حنا ثلاث شباب غيرناه بخمس دقايق <<== ولا الفريق الفني حق شوماخر بعده بخمس دقايق وقبل لا نوصل لمركز المرير الا يضرب الثاني لوووووووووول ما معنا الا سبير واحد وركبناه وما معنا عدة الرقع وش العمل ؟؟ فكرنا وش نسوي واستقر الرأي على اننا نمشي ونخلي السيارة لين الله يفرجها .. دقيناها كعابي ( على رجولنا يعني ) حتى جاب الله لنا وايت حصنية صرنا نشوفه كأنه كدلك يتدلع وأشرنا له .. واشوى وقف لنا جزاه الله خير وركبنا معه ووصلنا للديرة وأذاننا متشققة من التهيجن وظهورنا متكسرة لأن ماكان فيه مرتبة غير مرتبة السواق .. ولا حنا واقفين ولا جالسين
ومن وصلنا للحزام على المغرب الا التفحيط والحركات والاعلام الزرقاء ومير اقوم اغني بالحصنية وارقص تقول مهبول
استغربوا الشباب اللي معي هالفرحة .. ومير يسألوني وش فيك فرحان .. قلت هذا شغلي اللي نزلت علشانه لحظتها .. حسيت انهم يبغون ياكلوني من القهر (( بيني وبينكم كان شغلي اني احظر مباراة الهلال والرائد المنقولة على نهائي الدوري 1410هـ واللي انتهت ثمانية للهلال .. ولو قلتلهم ابي ارجع للديرة علشان مباراة لاوالله يسمحون لي ))
عاد لا تسألوني وش صار بعد مارجعنا للمخيم قصدي للخيمة .. استحي اقول <<== كلى من المردغة لين قال بس
وحسبي ان الهلال فاز وخذا الدوري .. وسامي خذا الهداف
وهذا من اطرف المواقف اللي صارت علي

مابي اكثر عليك الاسئله اقل شيء لانك ولد ديرتي
والله يوفقك لما يحبه ويرضاه
عادي اخوي سليمان .. خذ راحتك .. وأي سؤال انا حاظر
وفقك الله ووفق الجميع لما يحبه ويرضاه

والله هلا ومرحب وهلا مرة ثانية
وش اخبار الغالي ولد الغالي اخو الغالي
حيا الله فيصل ابو عبد الرحمن
بصراحة يمكن لاني احبك دخلت المجلس العام
انا مو من عادتي ادخل لكن يوم لقيت انك مسوي لقاء هنا قلت لازم اسلم عليك
اول شي رايك انت ... هل تتوقع ان يفوز الهلال ببطولة العين
انا اللي اتوقعه واللي متاكد منه ان لا زعيم الا الزعيم (مع تحيات شركة الصافي وهلالي الجوف المتحدة )
الشي الثاني هل تتوقع نشوب حرق بين موزمبيق والصومال الشرقية
لان اليوم فيه واحد صومالي راح يجيب خبز من عند موزمبيقي وتهاوشو
وكل واحد بيجيب ربعه
الشي الخامس وش رايك فيني انا الهلالي 11 مو اللي بجنبي
بس تكفى لا تطيح وجهي قدام الشباب بيني وبينك على الماسنجر
الشي الثامن : بصراحة شيء مؤسف اللي يصير بالجوف والله يعين الامن ويمسكون المجرم
بس ما ادري ليه احس ان لك علاقة بتنظيم القاعة <== بدينا
او انك انت اللي كنت تسوق الطيارة حقت 11 سبتمبر
حبينا نسلم عليك يا الغالي والله يعينك على الاسئلة

بس نسيت اقولك حكمة تاخذها عنوان لك في حياتك
يقول الشاعر : اكوس خمس اشياء بالدنيا ثلاث اشياء , الموية والهواء

يا هلا والله وغلا بهلالي الجوف ( أبو عبدالرحمن )

حبيت أسلم لا أقل ولا أكثر وأشكر القائمين على المنتدى العام على إستضافتهم لشخص ملكنا بأدبه وإحترامه وخفة ظله

تحياتي لك يا غالي والله يكثر من أمثالك

مرحبا أخوي هلالي الجوف ..

تحية طيبة .. وأهنئك على هذه الشعبية الجارفة والحب من الجميع ..

هو سؤال واحد جاء على بالي وحبيت أسأل..وأتمنى ما يكون محرج

هل من الممكن نشوف أم دحموني بيوزر هلالية الجوف في شبكة الزعيم ;) ؟

ولك تحياتي .. ولجهودك الرائعة والمميزة ..

عووووووووودنا مع مشاركة حبي تيماوي

ابا عبدالرحمن اهلاً بك ضيفاً كريما في منتداك .
ياهلا والله فيك اخوي ابواسامه ضيفاً كريما كرميل وسنبوسة

@ الغالي ابو عبدالرحمن روح وقلب شبكة الزعيم النابض ..... بصراحة ماذا اظن ان عندي اسئلة ودي اعرفها منك لأن بصراحة اتصالك وتواصلك الدائم ما بقى شئ .... فيه سؤال واحد فقط !!!
حيالله من زار وخفف

>> في فاتورة جوالي مكالمة حدثت بينى وبينك ولمدة ساعه وثلاثة عشر دقيقة !!!!! هل تذكر متى وفيما كنا نتحدث ؟؟؟؟؟ ( استبعد طبعاً إنا كنا نحش في البارق )
وحتى انا استبعد ذلك قطعن قطعياً
تتوقع ان البارق يستاهل مكالمة ساعة وربع !!! قيمتها حوالي الستين ريال
البارق يستاهل مكالمة ثلاث ساعتين قيمتها ميتين ريال <<== يبي يرقعها
اما عن المكالمة .. أكيد يالغالي كنا نتكلم عن الشبكة واحوالها

@ ابو عبدالرحمن وقت سعيد وممتع نتمنى ان تقضيه مع محبيك وأسئلتهم اعانك الله .
اشكرك اخوي حاتم على اتاحة هالفرصة لي مع محبيني واسئلتهم واشكر التلفزيون السعودي ممثلا بقناة المطبخ <<== يؤيؤ .. شكلي صدقت وخشيت جو
والله يعين الجميع