* تم إعادة طرح الموضوع بناء على طلبات بعض الأخوه اللي اشكرهم بالمناسبه على كلامهم المشجع في الخاص
السلام عليكم ..
ومن باب مشاركة اخواني الزعماء افراحهم واتراحهم > أيوه؟
لا عاد الصج اليوم قلت ليش مواضيعي ماانزلها في منتدى الزعيم بدل ماتكون في القروبات؟
طبعا كنت متدردد لأن الاهتمامات هنا ممكن تكون رياضيه أو متعلقه بالرياضه أو أدبيه وغيرها، بس نجرب هالمره ونشوف
الموضوع متعلق بهوايه ماتطلع إلا وقت الحاجه
+ وقت المزاج الـ أوكي
قبل لا ابدأ ، الموضوع لي وموجود في قروب
(أبو نواف) مع مواضيعي السابقه ونازل بإسمي الصجي ، يعني بدون انبراشات تكريه
نقول بسم الله ونبدأ
؛
نخش في الموضوع وتراني موصيلكم على عصيرات وشاي وقهوه وسناكس ومشروبات روحيه ومشروبات ميته وحركات وكذا علشان محد يمل من الموضوع والصور
فـ حلفت محد يقوم
على طاري الحلفان ،، متى تختفي ظاهرة مضاربة السعوديين عند محاسبين المطاعم؟
والله ماتدفع ، حرام ماتدفع ، علي الطلاق ماتدفع وفي الأخير اللي يحلف كثير يطلع ناسي بطاقة الصراف والا يطلّع 50 من محفظته والحساب 60 وياخذ 10 من خويه اللي متناشب معه
..
بعد سنوات من معاناة البيوت والتنقلات قررت أخيرا آخذ بيت من الشركة وأستعوضت الله خير في بدل السكن ، ألزم ماعلى الواحد راحة باله
وبما ان تصميم البيت يحتوي على مجلس حريم وماعندي حريم ، فـ قررت احوله إلى ديوانية جلوسي ، تلفزيون وجلسه وكمبيوتر وشاي ومباريات ونقاشات حول مشاكل المجتمع << أمحق
واعذرونا على جودة بعض الصور ، شي بالجوال وشي بالكاميرا
..
أول شي ألقيت نظره على شكل الغرفة .. وماادري ليش تذكرت توقيف المرور كتبت عنه في موضوع سابق !
المهم بلاها الذكريات المريره ، نشوف الغرفه
وطبعا أول شي لازم يتغير لونها البائس ، فـ اخترت اللون وبدأت أم المعارك
’’ بقول شي قبل لاتصبغون أي شي في بيتكم ، لازم تعرفون اشياء مهمه ،،
* نوع الصبغ المناسب للجدار ، بلاستك أو زيتي
* اختاروا اصباغ نوعيات جيده.. جوتن ، سيغما ، الجزيرة هم الأفضل واتركوا الرخيص
* لاتشتري الصبغ و رولة الصبغ وتجي تراكض لبيتك فرحان
اشتري العلبة اللي بتصب فيها بوياتك وخلطاتك ، ولا تنسى الفرشاه الصغيره للأماكن الضيقه
* وأهم شي تشتري شي تحرك الصبغ بعد ماتخففه بـ"تنر" بالنسبه للزيتيه أو بالماء بالنسبه للبلاستك وإلا بيصير فيك مثل ماصار فيني ومالقيت شي احرك فيه فكان التالي:
وبطبيعة الحال ذابت أوراق الدليل لين اهتديت الى استخدام عصا رولة الصبغ
والحمدلله تمت عملية المزج والتخفيف بنجاح
وبدأت عملية الصبغ
أثناء العمل لاتحرمون أنفسكم متعة احتساء الشاي والقهوة
..
الآن إنتهيت من صبغ الجدران ، وصار وقت تغيير الأرضية ،،
ولازم ننظف كل شي قبل عملية التركيب
وهنا ودي اقول شغله : ان اي واحد فيكم اذا فكر ياخذ بيت وقالولك سيراميك لاتفرح لأن بعض الانواع لو يحطون مكانها تراب وتمشي عليه اصرف بسبب شكلها البايخ أولا ورداءة نوعها ثانيا
وكبديل ، مافي أحلى من الأراضي الخشبية "الباركيه"
وتم التركيب
الآن حان وقت شراء الاثاث والإكسسوارات والذي منه ، وكخيار أمثل (أو مافي غيره) توجهت إلى IKEA الظهران
- قبل تروحون ايكيا واذا في بالكم تشترون أغراض وايد لاتنسون تقدير حجم الأغراض مقارنة بالسيارة اللي رايحين فيها تحسبا لأي وهقه
الحمدلله تم (حشر) كل ماتم شراءه في السيارة
..
بعد مانزلت الأغراض
بدأت تركيب الستاره ولكن للأسف واجهتني مشكله (حمقاء) بعد ماسويت الفتحات في الجدار
والمشكلة هي ان القطع البلاستيك اللي المفروض تدخل فيها المسامير ماهي موجودة (ضيعتها)
اللي هي هذي
ولكن اهتديت الى حل جميل ومناسب .. تابعوا معي:
أول شي نجيب قطعة خشب صغيره من أي مكان
ونحشرها في الفتحات بهذا الشكل بحيث ان الخشب يكون مالي الفتحة
بعدين نكسر الأطراف الزايده
ونركب المسامير عادي
بعد ماسويت هالحركه اكتشفت ان الخشب اصرف من قطعة البلاستك لأن الخشب لا يتبربر بالحراره ولا ينكمش بالبروره
وتم تركيب الستارة
الآن وقت تركيب الإضاءات
وهنا لازم ناخذ بالنا من شغله مهمه بخصوص الاضاءات في "إيكيا" لما نشتري أي نوع من الاضاءات لازم نتأكد إننا شرينا اللمبات لأنها تجي بدون لمبات!
وبعد لازم نتأكد اننا اخذنا لمبات بنفس قوة الكهرباء في البيت 110v أو 220v وممكن بعد تختار قوة اللمبه 50w والا 60w أو 100w حسب الرغبة
انا اخترت هذا النوع
وركبنا إضاءة السقف
وبعدها ركبت إطارات الصور وفوقها ركبت إضاءة معارض .. بالنسبة للإضاءة وعلشان لايتشوه منظر الجدار بسلك الإضاءة صبغت السلك بنفس لون الجدار
الحين جا دور الخفايف ، تركيب الرف وتعليق الساعة وأي شي يحتاج سلم وتخريم جدران علشان نقفل على موضوع التركيب ونبدأ الترتيب
ركبت الساعة والرف على اليمين ودخلت أول كنبه
ونظفت الأرض من الفوضى
ودخلت الكنبة الثانية وركبت الطاولات وأضفنا شوية اكسوارات وحركات لين وصلنا للشكل النهائي
وانتهت المهمة بحمد الله
..
المضحك المبكي إني ماقعدت في هالبيت أكثر من 4 أشهر وبعدها تركت الشركة والبلد كلها 
أتمنى الموضوع عجبكم وحاضرين لأي استفسار
وأسعد بالتواصل معكم وأتشرف بزيارتكم على
Twitter
أو
Flickr
وكل عام وانتم بخير
أبو البشاعه 
الوضع العادي
